ꓲ-ꓓꓳ-ꓠꓲꓹ-ꓫ ꓗꓪ ꓮꓸ ꓔꓳꓸ ꓪꓽ ꓙꓵꓽ(ꓪꓽ ꓚꓲ) ꓐꓶꓽ ꓗꓷꓳ

ꓲ-ꓓꓳ-ꓠꓲꓹ-ꓫ ꓗꓪ ꓮꓸ ꓔꓳꓸ ꓪꓽ ꓙꓵꓽ(ꓪꓽ ꓚꓲ) ꓐꓶꓽ ꓗꓷ ꓟ

ꓮ-ꓢꓲ-ꓬꓯ ꓜꓴꓻ ꓗꓪ ꓟ ꓗꓴꓷꓼ ꓕꓲ ꓗꓴꓷꓼ ꓥ ꓟ ꓲ-ꓓꓳ-ꓠꓲꓹ-ꓫ ꓗꓪ 2022 ꓘꓳꓼ 12 ꓦ 4 ꓠꓬꓲ꓾ ꓠꓽ ꓦꓬꓼ ꓠꓬꓲ ꓕꓯ ꓮꓸ ꓔꓳꓸ ꓪꓽ ꓙꓵꓽ ꓐꓶꓽ ꓗꓷꓳ=

ꓲ-ꓓꓳ-ꓠꓲꓹ-ꓫ ꓗꓴꓷꓼ ꓐꓶ ꓓꓳ ꓙꓮꓦꓮ ꓬꓲꓻ ꓗꓳ ꓡꓳ ꓟꓵꓽ ꓗꓪ ꓙꓳˍ ꓟ ꓢ-ꓟꓯꓹ-ꓣꓴ ꓮꓸ ꓔꓳꓸ ꓪꓽ ꓙꓵꓽ ꓐꓶꓽ ꓔꓴ ꓡ ꓟ ꓑꓶꓸ ꓓꓴ ꓙꓵꓽ ꓪ ꓙꓳ ꓢꓴ ꓐꓴ ꓠꓬ ꓑ ꓫꓬ 2000 ꓣꓳ ꓛꓲꓺ ꓔꓯ ꓪꓽ ꓙꓵꓽ ꓖꓳ ꓟ ꓐꓰ ꓶꓽ ꓞꓹ ꓟ ꓗꓪ ꓚꓵꓸ ꓖꓶ ꓗꓷꓳ꓾ ꓐꓰ ꓢꓷꓸ ꓪ ꓡꓳ=

ꓖꓳ ꓡꓱ ꓐꓶꓽ ꓗꓷ ꓟ ꓪꓴꓸ ꓠꓬꓲ ꓮꓸ ꓔꓳꓸ ꓟꓴꓽ ꓘꓴꓽ ꓐꓴ ꓠꓬ ꓟꓵꓽ ꓪꓴꓽ ꓗꓪ ꓓꓯ ꓙꓰ ꓔꓬ ꓟ ꓔꓯ ꓟꓳꓻ ꓪˍ ꓟ ꓥ ꓢꓲ ꓠꓬꓲ ꓙꓵꓽ ꓪ ꓙꓳ ꓢꓴ ꓐꓴ ꓠꓬ ꓶꓽ ꓤ ꓗꓪ ꓙꓰ ꓠꓹ ꓟ ꓑ ꓫꓬ ꓐꓴ ꓔꓯ ꓙꓳꓺ ꓗꓽ ꓖꓶ ꓔꓬ ꓡꓳ=

ꓑ ꓫꓬ ꓐꓴ ꓠꓬ ꓮꓸ ꓔꓳꓸ ꓪꓽ ꓙꓵꓽ ꓗꓪ ꓐꓰ ꓡꓳ ꓔ ꓕꓷꓹ ꓶꓽ ꓞꓹ ꓟ ꓗꓪ ꓔꓬꓹ ꓠꓹ ꓟ ꓔꓯˍ ꓟꓲ ꓕꓵꓼ ꓪ ꓖꓶꓽ ꓔ ꓡꓳ꓾ ꓐꓰ ꓢꓷꓸ ꓪ ꓡꓳ= ꓮ ꓟꓶ ꓗꓪ ꓛꓲꓺ ꓗꓪ ꓠꓻ ꓓꓴ ꓓꓴ ꓡꓰ ꓟ ꓓꓳꓽ ꓠꓬ ꓟꓽ ꓓꓳꓻ ꓡ ꓢꓰꓽ ꓐꓰ ꓐꓯ ꓔ ꓡꓳ=

ꓮꓸ ꓔꓳꓸ ꓪꓽ ꓙꓵꓽ ꓕꓱ ꓟ ꓠꓬ ꓗꓳꓸ ꓗꓷ ꓟ ꓕꓲ ꓘꓳꓼ ꓕꓯ ꓐꓶꓽ ꓗꓷ ꓟ ꓥ ꓢꓲ ꓖꓳ ꓕꓯ ꓠꓬ ꓞꓳ ꓤ 50 ꓣꓳ ꓛꓲꓺ ꓫꓵꓻ ꓗꓷ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓟꓲ ꓠꓯ ꓗꓪ ꓡ ꓞꓳ ꓟꓽ ꓓ ꓟꓬꓽˍ ꓟ ꓲ-ꓓꓳ-ꓠꓲꓹ-ꓫ ꓗꓴꓷꓼ ꓗꓪ ꓮꓸ ꓔꓳꓸ ꓪꓽ ꓙꓵꓽ (ꓪꓽ ꓚꓲ) ꓠꓬ 142 ꓟ ꓙꓳˍ ꓟ ꓥ ꓢꓲ꓾ ꓑ ꓫꓬ ꓐꓴ ꓠꓬ ꓮꓸ ꓔꓳꓸ ꓪꓽ ꓙꓵꓽ ꓒ ꓕꓲꓺ ꓗꓪ ꓔꓬ ꓖꓴˍ ꓡꓳ=

ꓮꓸ ꓔꓳꓸ ꓪꓽ ꓙꓵꓽ ꓐꓴ ꓘꓴꓽ ꓗꓪ ꓟ ꓕꓲ ꓟ ꓒ ꓕꓲꓺ ꓡꓳ ꓔ 6 ꓕꓷꓹ ꓛꓲꓺ ꓶꓽ ꓞꓹ ꓟ ꓗꓪ ꓞꓳ ꓤ 80 ꓫꓬꓹ ꓟꓽ ꓛꓲꓺ ꓔꓬ ꓟ ꓥ ꓢꓲ꓾ ꓗꓳꓸ ꓗꓷ ꓟ ꓕꓲ ꓠꓽ ꓘꓴꓽ ꓗꓪˍ ꓟꓲ Pacific ꓠꓯ ꓬꓲꓻ ꓓꓽ ꓟ Hawaii ꓬꓲꓻ ꓗꓳ ꓡꓳ ꓟꓵꓽ ꓗꓪˍ ꓟꓲ ꓟꓲ ꓠꓯ ꓗꓪ ꓟꓽ ꓓ ꓪꓴꓽˍ ꓟ ꓮꓸ ꓔꓳꓸ ꓪꓽ ꓙꓵꓽ ꓐꓶꓽ ꓗꓷ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

Photo : AP-Reuters