ꓲ-ꓓꓳ-ꓠꓲꓹ-ꓫ ꓬꓲ ꓪꓴꓸ ꓟ ꓪꓴ-ꓢ ꓟꓸ ꓟꓲꓽ ꓚꓺ ꓒꓬꓱ ꓢꓴ ꓔꓲꓺ ꓒ ꓫꓵꓻ ꓟ

ꓲ-ꓓꓳ-ꓠꓲꓹ-ꓫ ꓬꓲ ꓪꓴꓸ ꓟ ꓪꓴ-ꓢ ꓟꓸ ꓟꓲꓽ ꓚꓺ ꓒꓬꓱ ꓢꓴ ꓔꓲꓺ ꓒ ꓫꓵꓻ ꓟ

ꓲ-ꓓꓳ-ꓠꓲꓹ-ꓫ ꓗꓴꓷꓼ ꓗꓪ ꓬꓲ ꓪꓴꓸ ꓟ ꓪꓴ-ꓢ ꓟꓸ ꓟꓲꓽ ꓚꓺ ꓒꓬꓱ ꓙꓰ ꓢꓴ “ꓪꓴ-ꓢ ꓐꓯ ꓘꓶꓽ” ꓐꓰ ꓟꓬꓱꓺ ꓔ ꓟ ꓔꓲꓺ ꓒ ꓜꓴꓻ ꓗꓪ ꓕꓲ ꓣꓳ ꓥ ꓟꓲ ꓔꓲꓺ ꓒ ꓙꓮꓠ ꓳꓡꓰꓚꓗꓲ ꓠꓬ 2022 ꓘꓳꓼ 11 ꓦ 4 ꓠꓬꓲ꓾ ꓬꓲ ꓞꓲꓼ 88 ꓘꓳꓼ ꓕꓯ ꓑꓳꓡꓮꓠꓓ ꓗꓴꓷꓼ ꓗꓪ ꓢꓲ ꓒ ꓠꓯꓸꓼ ꓗꓪ ꓬꓲꓼ ꓟꓶ ꓡꓰꓳ ꓐꓰ ꓢꓷꓸ ꓪ ꓡꓳ= ꓬꓲ ꓠꓬ ꓑꓳꓡꓮꓠꓓ ꓪꓴ-ꓢ ꓟꓸ ꓟꓲꓽ ꓚꓺ ꓒꓬꓱ ꓙꓰˍ ꓟ ꓔꓲꓺ ꓒ ꓐꓴ ꓘꓴꓽ ꓗꓪ ꓬꓲ ꓪꓴꓸ ꓕꓲ ꓜꓴꓻ ꓟ ꓥ ꓡꓳ=

ꓬꓲ ꓔꓯ 1965 ꓘꓳꓼ 7 ꓦ 29 ꓠꓬꓲ ꓕꓯ ꓲ-ꓓꓳ-ꓠꓲꓹ-ꓫꓸ ꓗꓴꓷꓼ ꓗꓪ ꓪꓴ-ꓢ ꓟꓸ ꓟꓲꓽ ꓚꓺ ꓒꓬꓱꓻ ꓙꓰ ꓠꓹ ꓟ ꓝꓲ ꓩꓴˍ ꓟ ꓟꓶ ꓗꓷꓳ= ꓬꓲ ꓪ ꓐꓴ ꓔꓯ ꓗꓴꓷꓼ ꓗꓪ ꓟꓯꓼ ꓓꓶꓽ ꓡꓯ ꓘꓳˍ ꓟ ꓦꓬꓼ ꓠꓬꓲ ꓡꓳꓹ ꓬꓰ ꓗꓸ ꓠꓯꓸ ꓪꓴ-ꓢ ꓟꓸ ꓟꓲꓽ ꓚꓺ ꓒꓬꓱ ꓙꓰ ꓠꓹ ꓟ ꓐꓱ ꓶ ꓑꓳꓡꓮꓠꓓ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓠꓱꓸ ꓐꓯ ꓗꓴꓷꓼ ꓗꓪ ꓙꓰ ꓢꓲ ꓪꓴ-ꓢ ꓟꓸ ꓟꓲꓽ ꓚꓺ ꓒꓬꓱ ꓙꓰˍ ꓟ ꓙꓵꓽ ꓪ ꓟꓶ ꓡꓰ ꓢꓴ ꓐꓴ ꓘꓴꓽ ꓗꓪ ꓬꓲ ꓪ ꓐꓴ ꓠꓬ ꓬꓲ ꓪꓴꓸ ꓕꓲ ꓜꓴꓻ ꓟ ꓥ ꓡꓳ=

ꓔꓲꓺ ꓒ ꓔꓯ 1934 ꓘꓳꓼ 12 ꓦ 3 ꓠꓬꓲ ꓕꓯ ꓑꓳꓡꓮꓠꓓ ꓗꓴꓷꓼ꓾ ꓟꓣꓳꓚꓜꓠꓳ ꓗꓪ ꓟ ꓦ ꓟꓲꓽ ꓬꓰ ꓜ ꓢꓴ ꓐꓴ ꓥ ꓟ ꓙꓳꓜꓰꓝ ꓐꓰ ꓟꓮꓣꓲꓮꓠꓮ ꓐꓴ ꓗꓪ ꓐꓰ ꓦꓵꓻ ꓗꓷ ꓟ ꓥ ꓡꓳ= 1949 ꓘꓳꓼ ꓕꓯ ꓠꓬ ꓔꓲꓺ ꓒ ꓒꓬꓱꓼ ꓢꓳ ꓦꓲꓻ ꓗꓪ ꓙꓰ ꓢꓲ ꓢꓷꓸ ꓠꓲꓹ ꓢꓳ ꓣꓴ ꓗꓷ ꓢꓲ ꓠꓬꓲ 1961 ꓘꓳꓼ 1 ꓦ 29 ꓠꓬꓲ ꓕꓯ ꓠꓬ ꓔꓲꓺ ꓒ ꓕꓲ ꓣꓳ ꓒꓬꓱꓼ ꓡ ꓗꓷ ꓟ ꓥ ꓡꓳ=

ꓬꓲ ꓫꓵꓻ ꓟꓳ ꓔꓯ ꓠꓬ ꓪꓴ-ꓢ ꓟꓸ ꓟꓲꓽ ꓚꓺ ꓒꓬꓱ ꓙꓰ ꓢꓴ ꓐꓴ ꓠꓽ ꓖꓴ ꓥ ꓟ ꓙꓲꓻ ꓫꓬ ꓢꓴ ꓬꓳ-ꓢꓷ ꓦꓲꓻ ꓗꓪ ꓙꓳˍ ꓟ ꓡꓱꓼ ꓜꓴ ꓗꓪ ꓔꓵꓸ ꓓꓴ ꓥꓳ꓾ ꓐꓰ ꓢꓷꓸ ꓪ ꓡꓳ=