ꓴꓖꓮꓠꓓꓮ ꓗꓴꓷꓼ ꓢꓷꓸ ꓠꓲꓹ ꓢꓳ ꓦꓲ ꓗꓪ ꓟꓽ ꓙꓲꓻ ꓢꓴ ꓐꓴ ꓡꓰ ꓑꓳ ꓡˍ ꓟ ꓑꓶꓸ ꓓꓴ ꓫꓵꓻ ꓢꓴ 40 ꓣꓳ ꓟꓽ ꓞꓲꓺ ꓙꓳ ꓡ ꓗꓷꓳ

ꓴꓖꓮꓠꓓꓮ ꓗꓴꓷꓼ ꓐꓶꓻ ꓓꓵꓽ ꓕꓲ ꓛꓱꓽ ꓟꓵꓽ ꓫꓸ ꓗ ꓗꓪ ꓙꓳˍ ꓟ ꓢꓷꓸ ꓠꓲꓹ ꓕꓳ ꓶ ꓢꓳ ꓦꓲ ꓕꓲ ꓟ ꓗꓪ 6 ꓦ 16 ꓠꓬꓲ ꓕꓯ ꓟꓽ ꓙꓲꓻ ꓢꓴ ꓐꓴ ꓡꓰ ꓑꓳ ꓡ ꓟ ꓑꓶꓸ ꓓꓴ ꓞꓳ ꓤ 40 ꓣꓳ ꓟꓽ ꓞꓲꓺ ꓫꓵꓻ ꓟ ꓔꓯ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓐꓯ ꓑꓶ ꓗꓷ ꓗ ꓠꓯꓸ꓾ ꓖꓳ ꓡꓱ ꓑꓳ ꓡ ꓢꓴ ꓐꓰ ꓚꓬꓹ ꓪ ꓢꓴ 20 ꓣꓳ ꓔꓯ ꓣꓴ ꓐꓱ ꓗꓷꓳ꓾ ꓐꓰ 6 ꓦ 19 ꓠꓬꓲ ꓕꓯ ꓓꓳꓽ ꓐꓯ ꓑꓶ ꓗꓷꓳ=

ꓚꓳꓠꓖꓳ ꓓꓲ-ꓟꓳ-ꓗ-ꓣꓯꓸꓼ-ꓔꓲꓸ ꓢꓲꓽ ꓒ ꓙꓵꓽ ꓗꓴꓷꓼ ꓐꓰ ꓒ ꓕꓲꓺ ꓗꓪ ꓙꓳˍ ꓟ ꓴꓖꓮꓠꓓꓮ ꓟꓵꓽ ꓫꓸ ꓗ ꓗꓪ ꓝꓴꓲꓸ ꓟꓽ ꓙꓳ ꓟ ꓑ ꓫꓬ ꓐꓴ ꓔꓯ ꓟꓽ ꓙꓲꓻ ꓟꓽ ꓜꓳꓽ ꓬꓰˍ ꓟ ꓗꓪ ꓟꓬꓱꓻ ꓓꓳꓽ ꓪꓴꓽˍ ꓟ ꓑ ꓫꓬ ꓙꓵꓽ ꓟꓯꓼ ꓜꓴ ꓐꓴˍ ꓟꓲ ꓐꓹ ꓟ ꓥ ꓡꓳ꓾ ꓐꓰ ꓴꓖꓮꓠꓓꓮ ꓑ ꓫꓬ ꓟꓯꓼ ꓜꓴꓻ ꓡꓰ ꓙꓵꓻ ꓔ ꓡꓳ=

ꓫꓵꓽ ꓪꓴ ꓕꓱ ꓟ ꓗꓪ ꓢꓷꓸ ꓠꓲꓹ ꓢꓳ ꓤ 37 ꓣꓳ ꓐꓰ ꓕꓲ ꓪ ꓫꓵꓻ ꓢꓴ 42 ꓣꓳ ꓛꓲꓺ ꓙꓳ ꓡꓰꓳ꓾ ꓐꓰ ꓢꓷꓸ ꓪ ꓡꓳ= ꓫꓵꓻ ꓢꓴ ꓐꓴ ꓗꓪ ꓞꓲꓼ ꓪꓴꓽ ꓓꓰ ꓡꓰ ꓢꓴ ꓠꓬ 95 ꓘꓳꓼ ꓙꓳˍ ꓟ ꓤ ꓟꓶ ꓤ ꓕꓲ ꓣꓳ ꓥ ꓢꓲ꓾ ꓣꓳ ꓓꓰ ꓡꓰ ꓢꓴ ꓠꓬ 12 ꓘꓳꓼ ꓙꓳˍ ꓟ ꓮ ꓟꓲꓽ ꓤ ꓕꓲ ꓣꓳ ꓥ ꓡꓳ=

ꓠꓻ ꓓꓴ ꓓꓴ ꓡꓰ ꓢꓴ 6 ꓣꓳ ꓔꓯ ꓠꓯꓻ ꓞꓲꓼ ꓦꓲ ꓗꓪ ꓧꓳꓽ ꓔ ꓢꓲ꓾ ꓟꓽ ꓙꓲꓻ ꓢꓴ ꓐꓴ ꓡꓰ ꓧꓳꓽ ꓔꓯꓹ ꓬꓰ ꓢꓴ ꓠꓬ 5 ꓣꓳ꓾ ꓟꓽ ꓥ ꓠꓬ꓾ 7 ꓣꓳ ꓙꓳˍ ꓡꓳ꓾ ꓐꓰ ꓐꓯ ꓔꓬ ꓡꓳ=

ꓕꓲ ꓟꓲ ꓠꓯ ꓡꓱꓸꓼ ꓟꓽ ꓠꓲꓹ ꓫꓵˍ ꓟ ꓕꓱ ꓡꓱ ꓡ ꓞꓳ ꓫꓵꓻ ꓝꓲˍ ꓟ ꓗꓪ ꓫꓵꓻ ꓢꓴ ꓐꓴ ꓔꓯ ꓬꓲ ꓪ ꓕꓲ ꓦꓲ ꓢꓴ ꓐꓴ ꓡꓰ ꓠꓲꓹ ꓟ ꓫꓸ ꓫꓸ ꓡꓰꓽ ꓔꓵꓸ ꓗꓷꓳ= ꓢꓳ ꓤ ꓕꓲ ꓐꓱ ꓠꓬ ꓕꓲ ꓖꓳ ꓓꓱꓽ ꓡꓱꓸꓼ ꓮ ꓔꓳꓸ ꓐꓬ ꓗꓷ ꓢꓲ ꓫꓵꓻ ꓟ ꓑꓶꓸ ꓓꓴ ꓬꓲ ꓪ ꓓꓠꓮ ꓔꓯ ꓚꓬꓹ ꓠꓬꓲ ꓠꓹ ꓟ ꓦꓲ ꓢꓴ ꓕꓲ ꓐꓱ ꓠꓬ ꓠꓲꓹ ꓟ ꓔꓷꓹ ꓠꓬꓲ ꓐꓰ ꓡꓳꓸ ꓠꓬ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=

Source #MyanmaPlatform