(11)ꓧꓪꓹ ꓟ ꓡꓲ-ꓢꓴ ꓕꓳ: ꓶ ꓐꓰ ꓪꓴ-ꓢ ꓐꓯ ꓘꓶ: ꓢꓳ ꓜꓲꓼ ꓓꓴ ꓡꓳꓹ ꓬꓰˍꓟ ꓪꓴ-ꓢ ꓔꓯ ꓫ. ꓟꓳ ꓑꓮꓲ ꓐꓰ ꓢꓲ: ꓫꓬ ꓟ-ꓡꓲ-ꓬ ꓭ. ꓘꓴ ꓬꓲ ꓫꓵꓼ ꓒꓴꓻ ꓑꓮꓲ: ꓬꓰˍ ꓟ

2024 ꓘꓳꓼ꓾ 4 ꓦ 23 ꓠꓬꓲ꓾ ꓮ ꓟꓰ ꓕꓯ ꓡ-ꓫꓬꓳ ꓡꓳ ꓒꓱ ꓙ-ꓟꓮꓲ ꓘꓹ ꓦ-ꓐ-ꓡꓴ.-ꓡꓴ. ꓢꓳ ꓤ ꓜꓲꓼ ꓦꓲ ꓗꓪ꓾ (11) ꓧꓪꓹ ꓟ ꓡꓲ-ꓢꓴ ꓕꓳ: ꓶ ꓐꓰ ꓪꓴ-ꓢ ꓐꓯ ꓘꓶ: ꓢꓳ ꓜꓲꓼ ꓓꓴ ꓡꓳꓹ ꓬꓰˍ ꓟ ꓪꓴ-ꓢ ꓔꓯ ꓫ. ꓟꓳ ꓑꓮꓲ ꓐꓰ ꓢꓲ: ꓫꓬ ꓟ-ꓡꓲ-ꓬ ꓭ. ꓘꓴ ꓬꓲ ꓫꓵꓼ ꓒꓴꓻ ꓑꓮꓲ: ꓬꓰ ꓗꓷꓳ꓾ ꓐꓰ ꓢꓷ. ꓪ ꓡꓳ=

ꓢꓲ: ꓫꓬ ꓟ-ꓡꓲ-ꓬ ꓭ. ꓘꓴ ꓬꓲ ꓫꓵꓼ ꓒꓴꓻ ꓑꓮꓲ ꓐꓰ ꓢꓳ ꓜꓲꓼ ꓓꓴ ꓡꓳꓹ ꓬꓰ ꓟ ꓪꓴ-ꓢ ꓔꓯ ꓫ. ꓟꓳ ꓑꓮꓲ: ꓟꓲ-ꓢ ꓔꓯ ꓠꓯꓼ ꓠꓯꓼ (6:30) ꓙꓵꓹ ꓕꓯ ꓔꓲꓺ ꓒ George La Ring ꓡꓰ ꓧꓳ: ꓪꓴ. ꓟꓴ ꓢꓲ ꓑꓮꓲ: ꓔꓯ ꓬꓰ ꓗꓷꓳ=

ꓟꓲ-ꓢ ꓔꓲꓺ ꓖꓶˍ ꓟ ꓙꓵꓹ ꓶꓼ ꓓꓳ ꓫꓱꓹ ꓓꓳ ꓚꓺˍ ꓟ ꓗꓪ ꓔꓲꓺ ꓒ George La Ring ꓡꓰ꓾ ''ꓢꓳ ꓜꓲꓼ ꓓꓴ ꓒꓴ ꓔ ꓟ ꓟ. ꓒ ꓠꓬ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓡꓲ-ꓢꓴ ꓕꓳ: ꓶ ꓐꓰ ꓪꓴ-ꓢ ꓐꓯ ꓘꓶ: ꓟ. ꓖꓶ ꓔꓬ ꓡꓳ= ꓔꓲꓺ ꓒ ꓙꓵ: ꓔꓶ. ꓮ ꓙꓵ: ꓗꓪ ꓐꓰ ꓡ ꓢꓴ ꓤ ꓠꓱ ꓤ ꓐꓴ ꓔꓯ ꓟ. ꓖꓶ ꓔꓬ ꓡꓳ= ꓕꓱ ꓡꓱ ꓙꓲꓻˍ ꓟ ꓟꓬꓱ: ꓔꓯ ꓬꓰ ꓢꓯꓼ ꓕꓵꓼ ꓔꓬ ꓟ ꓪꓴ. ꓠꓬꓲ ꓪꓴ-ꓢ ꓣꓱ: ꓛꓰ: ꓔꓯ ꓬꓲ ꓐꓷꓹ ꓘꓳ ꓣꓴ ꓪˍ ꓥꓳ꓾ ꓐꓰ ꓙꓵꓻˍ ꓡꓳ꓾'' ꓐꓰ ꓐꓯ ꓡꓳ=

ꓬꓲ ꓡꓰ ꓝ ꓢꓲ꓾ ꓢꓳ ꓤ ꓐꓴ ꓥ ꓟꓲ ꓚꓲ. ꓛꓬ ꓦꓲꓻ ꓗꓪ ꓬꓲꓼ ꓛꓲ ꓬꓰ ꓕꓯ ꓙꓵꓻ ꓠꓲꓹ ꓔꓯ ꓡꓯꓼ ꓫꓵ ꓕꓶ ꓞꓹ ꓝꓲ ꓠꓹ ꓟ꓾ ꓚꓲ. ꓛꓬ ꓢꓳ ꓣꓴ ꓟꓶ ꓔ ꓟ ꓔꓯ ꓦꓲꓻ ꓗꓪ ꓛꓲ ꓬꓰ ꓕꓯ ꓡꓯꓼ ꓕꓲ ꓣꓱ: ꓬꓰ ꓠꓹ ꓟ ꓬꓳ. ꓚꓵˍ ꓡꓳ= ꓮ: ꓐ ꓮ ꓟ ꓣꓱ: ꓢꓴ ꓐꓴ ꓥˍ ꓟꓲ ꓚꓲ. ꓛꓬ ꓤ ꓠꓱ ꓔꓯ ꓪ: ꓘꓴˍ ꓟ ꓗꓪ ꓧꓳ: ꓣꓱ: ꓝꓲ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ꓾ ꓐꓰ ꓐꓯ ꓢꓲ ꓢꓯꓼ ꓖꓶ ꓗꓷꓳ=

ꓢꓳ ꓜꓲꓼ ꓓꓴ ꓔꓯ ꓙꓵ: ꓢꓴ꓾ ꓧꓳ: ꓪꓴ. ꓟꓴ ꓢꓴ ꓟ. ꓒ ꓐꓬ-ꓔ ꓡꓰ ꓑꓮꓲ: ꓗꓪ ꓡ ꓢꓴ ꓮ ꓐ ꓮ ꓟ ꓐꓴ ꓔꓯ꓾ ꓚꓲ. ꓛꓬ ꓤ ꓠꓱ ꓤ ꓔꓯ ꓟ: ꓣꓱ: ꓣꓱ: ꓡꓳ ꓔ ꓕꓯ ꓟ: ꓢꓲ. ꓮ. ꓕ: ꓙꓲ: ꓜ:ˍ ꓟ ꓡꓰ ꓗꓷ ꓡꓰˍ ꓥꓳ= ꓖꓳ ꓡꓱ ꓠꓬꓲ ꓚꓲ. ꓛꓬ ꓔꓬ ꓖꓴ ꓗꓪ ꓬꓲꓼ ꓛꓲ ꓬꓰ ꓕꓯ ꓤ ꓠꓱ ꓤ ꓐꓴ ꓔꓯ ꓪ: ꓧꓳ: ꓘꓴ ꓝꓲ ꓠꓹ ꓟ꓾ ꓠꓱ. ꓐꓯ ꓢꓴ ꓔꓯ ꓡꓲ-ꓢꓴ ꓕꓳ: ꓶ ꓟ. ꓝꓲ ꓠꓹ ꓟ꓾ ꓕꓵꓼ ꓪ ꓖꓶ ꓗꓷꓳ=

ꓡ-ꓫꓬꓳ ꓡꓳ ꓒꓱ ꓙ-ꓟꓮꓲ ꓘꓹ ꓗꓪ ꓙꓳˍ ꓟ ꓦ-ꓐ-ꓡꓴ.-ꓡꓴ. ꓢꓳ ꓜꓲꓼ ꓓꓴ ꓠꓬ ꓟ. ꓒ ꓐꓬ-ꓔ ꓝꓣꓮꓠꓚꓲꓢ ꓡꓰ ꓧꓳ: ꓪꓴ. ꓟꓴ ꓢꓲ ꓒꓴ ꓔ ꓟ ꓥ ꓢꓲ ꓠꓬꓲ꓾ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓡꓲ-ꓢꓴ ꓕꓳ: ꓶ ꓟ. ꓩꓴ ꓡ ꓔꓬ ꓟ ꓠꓬ 2018 ꓘꓳꓼ ꓕꓯ ꓡꓰ ꓥ ꓡꓳ꓾ ꓐꓰ ꓢꓷ. ꓪ ꓡꓳ= ꓮ ꓟꓶ ꓕꓲ ꓧꓪꓹ ꓟ ꓢꓳ ꓜꓲꓼ ꓓꓴ ꓠꓬ (50) ꓠꓬꓲ ꓥ ꓡꓳ=

ꓢꓳ ꓜꓲꓼ ꓓꓴ ꓖꓳ ꓟ ꓗꓪ ꓘꓴ ꓜꓲꓼ ꓞꓳ ꓟ: ꓘꓶ:꓾ ꓞꓳ ꓫꓵ: ꓟ: ꓘꓶ: ꓟ. ꓖꓶ ꓔꓬ ꓟ ꓥ ꓡꓳ꓾ ꓡꓲ-ꓢꓴ ꓕꓳ: ꓶ ꓢꓷ. ꓠꓲꓹ ꓫꓵ ꓢꓴ ꓮ ꓙꓵ: ꓔꓯ ꓘꓳ ꓣꓴ ꓔꓬ ꓡꓳ꓾ ꓐꓰ ꓢꓷ. ꓪ ꓡꓳ=