2020 ꓘꓳꓼ ꓗ ꓠꓯꓸ ꓬꓲ ꓪꓴꓸ ꓕꓲ ꓧꓪꓹ ꓠꓱꓸ ꓐꓯ ꓗꓴꓷꓼ ꓗꓪ ꓟ ꓪꓰ ꓤ ꓐꓴ ꓐꓱ ꓶ ꓧꓶꓽ ꓗꓴꓷꓼ ꓡꓰ ꓟꓵꓽ ꓫꓸ ꓗ ꓗꓹ ꓘꓶꓽ ꓒꓴ ꓖꓶ ꓓꓴ ꓥꓳ

Wednesday, March 15, 2023

ꓧꓶꓽ ꓗꓴꓷꓼ ꓠꓬ ꓚꓳꓦꓲꓓ ꓠꓻ ꓫꓵꓽ ꓒꓬꓱꓼ ꓡ ꓗ ꓠꓯꓸ 3 ꓘꓳꓼ ꓘꓴꓽ ꓗꓪ ꓬꓲ ꓪꓴꓸ ꓕꓲ ꓧꓪꓹ ꓟ ꓟꓵꓽ ꓫꓸ ꓗ ꓗꓹ ꓘꓶꓽ ꓒꓴ ꓖꓶ ꓗꓷ ꓢꓲ꓾ 3 ꓦ 15 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲ ꓠꓬꓲ ꓦꓲꓢꓮ ꓮ ꓙꓵꓽ ꓖꓶ ꓓꓴ ꓥꓳ꓾ ꓐꓰ ꓐꓯ ꓑꓶ ꓗꓷꓳ=

ꓚꓳꓦꓲꓓ ꓠꓻ ꓫꓵꓽ ꓟꓽ ꓓꓳꓻ ꓡ ꓢꓰꓽ ꓕꓯ ꓦꓲꓢꓮ ꓣꓱꓽ ꓟꓽ ꓞꓹ ꓟ ꓧꓶꓽ ꓗꓴꓷꓼ ꓗꓪ ꓟ ꓡꓳ ꓒꓱ ꓐꓴ ꓥˍ ꓟꓲ꓾ ꓦꓲꓢꓮ ꓣꓱꓽ ꓟꓽ ꓞꓹ ꓟ ꓪ ꓙꓵꓽ ꓪ ꓝꓮꓲ ꓕꓲ ꓧꓪꓹ ꓟꓶ ꓪˍ ꓟ ꓔꓯ꓾ ꓠꓱ ꓐꓯ ꓗꓴꓷꓼ ꓚꓱꓹ ꓔꓯ ꓟꓳꓸ ꓢꓲꓽ ꓒ ꓟꓬꓱꓽ ꓣꓱꓽ ꓜꓴ ꓗꓪ ꓐꓰ ꓠꓽ ꓠꓬꓲꓽ ꓠꓬꓲ ꓕꓯ ꓐꓯ ꓑꓶ ꓔ ꓡꓳ=

ꓕꓱ ꓟ ꓦꓲꓢꓮ ꓣꓱꓽ ꓟꓽ ꓛꓵ ꓟ ꓘꓴꓽ ꓗꓪ ꓠꓬ Hainan ꓖꓴ ꓟꓶꓸ ꓗꓪ ꓙꓳˍ ꓟ ꓬꓲ ꓗꓳ ꓡꓳ ꓟꓵꓽ ꓐꓰ Shanghai ꓬꓲꓻ ꓙꓬ ꓘꓶꓽ ꓔꓯ ꓗꓳꓸ ꓙ ꓙꓰˍ ꓟ ꓞꓳ ꓤ ꓜꓶꓽ ꓡꓲꓺ ꓓ ꓟ ꓐꓴ ꓥˍ ꓟꓲ ꓐꓹ ꓟ ꓥ ꓡꓳ꓾ ꓐꓰ ꓐꓯ ꓔ ꓡꓳ=

2020 ꓘꓳꓼ 3 ꓦ 28 ꓠꓬꓲ ꓟꓽ ꓛꓲꓺ ꓡ ꓢꓰꓽ ꓕꓯ ꓖꓶ ꓔ ꓟ ꓦꓲꓢꓮ ꓐꓴ ꓔꓯ ꓔꓯꓹ ꓔ ꓟ ꓠꓱꓸ ꓐꓯ ꓗꓴꓷꓼ ꓢꓴ ꓐꓴ ꓥˍ ꓟꓲ ꓬꓲ ꓪ ꓔꓯ ꓤꓰꓻ ꓞꓹ ꓟ ꓦꓲꓢꓮ ꓦꓬꓼ ꓠꓬꓲ ꓘꓴꓽ ꓗꓪ ꓧꓶꓽ ꓗꓴꓷꓼ ꓗꓪ ꓓꓵꓽ ꓙꓰ ꓐ ꓡˍ ꓟ ꓥ ꓡꓳ꓾ ꓐꓰ ꓢꓲꓽ ꓒ ꓟꓬꓱꓽ ꓣꓱꓽ ꓜꓴ ꓗꓪ ꓐꓰ ꓐꓯ ꓑꓶ ꓗꓷꓳ=

Beijing ꓠꓬ ꓠꓻ ꓫꓵꓽ ꓬꓲꓸ ꓪꓴꓸ ꓒꓬꓱꓼ ꓡˍ ꓟ ꓗꓪ ꓐꓰ ꓪꓴꓸ ꓔꓴ ꓢꓲ ꓚꓳꓦꓲꓓ ꓠꓻ ꓟꓶꓽ ꓬꓰ ꓚꓱꓹ ꓔꓯ ꓣꓱꓽ ꓬꓰ ꓔꓬ ꓟ ꓗꓪ ꓐꓰ 12 ꓦ ꓕꓯ ꓠꓬ ꓖꓳ ꓟ ꓔꓯ ꓠꓽ ꓗꓷ ꓢꓲ꓾ 1 ꓦ ꓗꓪ ꓐꓰ ꓪꓴꓸ ꓔꓴ ꓢꓲ ꓠꓬꓲ ꓗꓴꓷꓼ ꓘꓴꓽ ꓗꓪ ꓓꓵꓽ ꓛꓲ ꓡ ꓟ ꓪꓰ ꓤ ꓐꓴ ꓐꓱ ꓶ Qꓴꓮꓣꓮꓠꓔꓲꓠꓰ ꓓꓵꓽ ꓝꓲˍ ꓟ ꓔꓯ ꓥˍ ꓟꓲ ꓠꓽ ꓗꓷ ꓟ ꓥ ꓡꓳ=