Bangladesh ꓗꓴꓷꓼ꓾ Rajshahi ꓢ-ꓢꓶ-ꓠ ꓗꓪ “ꓢꓲꓽ ꓫꓬꓹ ꓟ ꓤꓶꓻ ꓠꓬꓲ” ꓬꓰ ꓗꓷ ꓟ

Bangladesh ꓗꓴꓷꓼ꓾ Rajshahi ꓢ-ꓢꓶ-ꓠ ꓗꓪ “ꓢꓲꓽ ꓫꓬꓹ ꓟ ꓤꓶꓻ ꓠꓬꓲ” ꓬꓰ ꓗꓷ ꓟ

Bangladesh ꓗꓴꓷꓼ Rajshahi ꓢ-ꓢꓶ-ꓠ ꓡꓰ 2 ꓦ 15 ꓠꓬꓲ ꓕꓯ Omorpur ꓗꓪ ꓙꓳˍ ꓟ ꓔꓲꓺ ꓒ ꓦꓲꓻ ꓗꓪ “ꓢꓲꓽ ꓫꓬꓹ ꓟ ꓤꓶꓻ ꓠꓬꓲ” ꓐꓯ ꓢꓲ ꓢꓷꓸ ꓙ ꓟꓳ ꓙ ꓗꓷꓳ=

ꓘꓴ ꓜꓲꓼ ꓞꓳ ꓔꓲꓺ ꓒ ꓐꓴ꓾ ꓐ-ꓣ-ꓓ ꓐꓴ ꓐꓰ ꓔꓲꓺ ꓟ ꓐꓴ ꓡꓳꓽ ꓢꓲ ꓬꓰ ꓗꓷ ꓟ “ꓢꓲꓽ ꓫꓬꓹ ꓟ ꓤꓶꓻ ꓠꓬꓲ” ꓘꓴꓽ ꓗꓪ “ꓙꓲꓻ ꓫꓬꓹ ꓟ ꓤꓶꓻ ꓗꓪ ꓗꓹ ꓛꓲꓽˍ ꓟ ꓐꓰ ꓕꓲ ꓠꓲꓹ ꓕꓲ ꓪ ꓟ ꓥ ꓟ” ꓐꓯ ꓔ ꓟ ꓬꓲ ꓕꓲꓽ ꓟꓴꓽ ꓔꓯ ꓣꓴ ꓔ ꓡꓳ=

“ꓠꓬꓲꓸ ꓠꓬꓲ ꓗꓪ ꓣꓳꓽ ꓔꓯ ꓘꓴ ꓜꓲꓼ ꓞꓳ ꓗꓪ ꓣꓱꓽ ꓙ ꓠꓹ ꓟ ꓐꓱ ꓶ ꓣꓳꓽ ꓔꓯ ꓘꓴ ꓔ ꓖꓶˍ ꓟ ꓑꓶꓸ ꓓꓴ ꓪꓴ-ꓢ ꓔꓯ ꓮ ꓘꓶꓸ ꓫꓸ ꓟꓳˍ ꓡꓳ” ꓐꓰ Rajshahi ꓢ-ꓢꓶ-ꓠ ꓗꓪ ꓟ ꓔꓲꓺ ꓒ ꓓꓽ Gervas Rozario ꓡꓰ ꓐꓯ ꓗꓷꓳ=

ꓕꓱ ꓟ ꓠꓬ ꓥꓪ ꓠꓴꓽ ꓤꓶꓻ ꓐꓱ ꓶ ꓪꓴ-ꓢ ꓬꓲ ꓣꓱꓽ ꓛꓰꓽ ꓓꓽ ꓟ ꓥ ꓡꓳ꓾ ꓐꓰ ꓔꓲ ꓒ ꓓꓽ ꓡꓰ ꓝꓸ ꓢꓲ ꓐꓯ ꓡꓳ=

ꓘꓴ ꓜꓲꓼ ꓞꓳ ꓟꓸ ꓒ ꓟꓸ ꓟ ꓐꓴ ꓐꓰ ꓙꓵꓻ ꓠꓲꓹ ꓚꓱꓹ ꓔꓯ ꓟꓳꓸ ꓗꓳ-ꓟꓲ-ꓫꓬꓲ ꓜꓴꓻ ꓗꓪ ꓟ ꓙꓽ ꓖꓶꓽ ꓢꓴ ꓥ ꓟ ꓔꓲꓺ ꓒ Michael Corraya ꓡꓰ “ꓢꓲꓽ ꓫꓬꓹ ꓟ ꓤꓶꓻ ꓠꓯꓸꓼ ꓗꓪ ꓕꓲ ꓠꓲꓹ ꓕꓲ ꓪ ꓟ ꓐꓰ ꓙꓻ ꓡꓯꓽ ꓘꓳˍ ꓟ ꓟꓽ ꓙꓳ ꓕꓯ ꓠꓽ ꓣꓳꓽ ꓤꓶꓻ ꓠꓬ ꓬꓲꓸ ꓒꓵꓽ ꓟꓽ ꓒꓵꓽ ꓗꓷ ꓡꓰˍ ꓥꓳ” ꓐꓰ ꓐꓯ ꓡꓳ=

ꓖꓳ ꓟ ꓑꓶꓸ ꓓꓴ ꓕꓲ ꓠꓲꓹ ꓕꓲ ꓪ ꓬꓰˍ ꓟ ꓗꓪ ꓐꓰ꓾ ꓗꓹ ꓛꓲꓽˍ ꓟ ꓗꓪ ꓐꓰ꓾ ꓬꓲꓸ ꓒꓵꓽ ꓒꓵꓽˍ ꓟ ꓗꓪ ꓐꓰ ꓣꓳ ꓢꓲꓽ ꓫꓬꓹ ꓟ ꓤꓶꓻ ꓔꓯ ꓫꓬꓹ ꓔꓱꓹ ꓡꓯ꓾ ꓐꓰ ꓔꓲꓺ ꓒ ꓡꓰ ꓝꓸ ꓢꓲ ꓐꓯ ꓗꓷꓳ=

ꓗꓹ ꓛꓲꓽ ꓠꓲꓹ ꓠꓬ ꓕꓲ ꓠꓲꓹ ꓕꓲ ꓪ꓾ ꓪꓽ ꓡꓯ ꓘꓳꓹ ꓟ ꓠꓯꓸꓼ ꓗꓪ ꓙꓳˍ ꓡꓳ= ꓕꓲ ꓠꓲꓹ ꓕꓲ ꓪˍ ꓟ ꓐꓰ ꓧꓳꓹ ꓡꓰ ꓝꓲˍ ꓟ ꓘꓴ ꓓꓰꓽˍ ꓟ ꓔꓯ ꓢ-ꓣꓳ-ꓕꓲ-ꓖꓳ-ꓓꓱꓽ-ꓪꓴ-ꓢ ꓠꓯꓸꓼ ꓗꓪ ꓡꓳꓸ ꓟꓳꓻ ꓐ ꓡˍ ꓡꓳ꓾ ꓐꓰ Jesuit ꓔꓲꓺ ꓒ Srejon ꓡꓰ ꓐꓯ ꓡꓳ=

ꓘꓴ ꓜꓲꓼ ꓞꓳ ꓐꓰ ꓢ-ꓢꓶ-ꓠ ꓜꓴꓻ ꓗꓳ-ꓟꓲ-ꓫꓬꓲ ꓗꓪ ꓐꓰ ꓬꓲꓸ ꓪꓴꓸ ꓔꓴ ꓢꓲ ꓬꓰ ꓗꓷ ꓟ ꓠꓬ ꓔꓲꓺ ꓒ ꓐꓴ ꓐꓰ ꓐ-ꓣ-ꓓ ꓐꓴ꓾ ꓔꓲꓺ ꓟ ꓐꓴ ꓐꓱ ꓶ ꓝꓸ ꓢꓲ ꓟꓬꓱꓽ ꓕꓱ ꓟ ꓔꓯ ꓬꓰ ꓠꓹ ꓟ ꓐꓱ ꓶ ꓬꓲ ꓔꓶꓺ ꓙꓱꓼ ꓬꓰ ꓔ ꓟ ꓥ ꓡꓳ꓾ ꓐꓰ ꓣꓦꓮ ꓓꓳꓽ ꓗꓪ ꓐꓰ ꓢꓷꓸ ꓪ ꓡꓳ=