Heroshima ꓔꓲꓺ ꓒ: ꓓ: ꓐꓰ ꓡꓳꓺ ꓒꓱꓺ ꓙꓵ: ꓢꓴ ꓐꓴ ꓗꓪ ꓐꓰ ꓐꓳꓹ(ꓠuclear Bombs ) ꓠ: ꓗꓷ ꓓꓴ ꓐꓰ ꓗꓴꓷꓼ ꓢꓲꓺ ꓡꓲꓺ ꓓꓴ ꓐꓱ ꓶꓼ ꓕꓵꓼ ꓪ: ꓖꓶ:ˍ ꓟ=

Heroshima ꓐꓰ Nagasaki ꓡꓳꓺ ꓒꓱꓺ ꓕꓯ: ꓢꓲꓺ ꓗꓪ ꓐꓳꓹ(Nuclear Bombs) ꓡꓳꓺ ꓩꓴꓺ ꓗꓷ ꓟꓶˍ ꓟ 74 ꓘꓳꓼ ꓐꓲˍ ꓟ ꓑꓮꓲ=

Heroshima ꓔꓲꓺ ꓒ: ꓓ: ꓐꓰ ꓡꓳ ꓒꓱ ꓙꓵ: ꓢꓴ ꓐꓴ ꓗꓪ ꓐꓰ ꓐꓳꓹ(nuclear bombs) ꓠ: ꓗꓷ ꓓU ꓐꓰ ꓗꓴꓷꓼ ꓢꓲꓺ ꓡꓲꓺ ꓓꓴ ꓐꓱ ꓶ ꓕꓵꓼ ꓪ: ꓖꓶ:ˍ ꓟ=

8 ꓦꓻ ꓟ 7 ꓠꓬꓲ꓾ 2019

ꓙꓮꓑꓮꓠ ꓗꓴꓷꓼ ꓗ-ꓔꓳ-ꓡꓲ ꓘꓴ-ꓜꓲ-ꓞꓳ ꓗꓪ ꓐꓰ Heroshima ꓐꓰ Nagasaki ꓡꓳ ꓒꓱ ꓕꓯ: ꓢꓲ ꓗꓪ ꓐꓳꓹ (Nuclear bombs) ꓡꓳ ꓗꓷ ꓟꓶˍ ꓟ 74ꓘꓳꓼ ꓐꓲˍ ꓟ ꓘꓳꓼ ꓚꓳꓻ ꓑꓮꓲ ꓔꓯ ꓬꓰ ꓗꓷꓳ=ꓘꓳꓼ ꓚꓳꓻ ꓑꓮꓲ ꓗꓪ Heroshima ꓔꓲꓺ ꓒ: ꓓ: ꓐꓰ ꓡꓳ ꓒꓱ ꓔꓯ ꓙꓵ: ꓢꓴ ꓐꓴ ꓗꓪ ꓐꓰ ꓐꓳꓹ(Nuclear Bombs) ꓔꓯ ꓠ: ꓗꓷ ꓓꓴ ꓐꓰ ꓗꓴꓷꓼ ꓢꓲꓺ ꓡꓲꓺ ꓓꓴ ꓐꓱ ꓶꓼ ꓪ ꓙꓲꓺ ꓣꓱ: ꓬꓰ ꓠꓹ ꓟ ꓕꓵꓼ ꓪ: ꓖꓶ: ꓗꓷꓳ=

Heroshima ꓐꓰ Nagasaki ꓡꓳ ꓒꓱ ꓕꓯ: ꓢꓲꓺ ꓗꓪ ꓐꓳꓹ(Nuclear Bombs) ꓡꓳꓺ ꓩꓴꓺ ꓗꓷ ꓟꓶˍ ꓟ 74 ꓘꓳꓼ ꓐꓲˍ ꓟ ꓘꓳꓼ ꓚꓳꓻ ꓑꓮꓲ ꓗꓪ ꓟꓲ ꓠꓯ ꓢꓲꓺ ꓡꓲꓺ ꓟ ꓐꓱ ꓶ ꓕꓲ: ꓠꓲꓹ ꓕꓲ: ꓪ: ꓪ: ꓘꓴ ꓙ ꓖꓶ: ꓗꓷ ꓟ ꓮ: ꓙꓵ: ꓔꓯ ꓮ ꓘꓶ. ꓫ. ꓟꓳ= ꓡꓳꓹ ꓬꓰ ꓟ ꓦꓬꓼ ꓠꓬꓲ ꓗꓪ ꓔꓳꓹ ꓜꓳ: ꓗꓷ ꓟꓶˍ ꓟ ꓫ. ꓙꓵꓺ ꓓꓴ ꓔꓯ ꓚꓲ. ꓔ ꓢꓲ꓾ ꓐꓳꓹ(Nuclear Bombs) ꓠ: ꓗꓷ ꓠꓹ ꓟ ꓐꓰ ꓢꓲꓺ ꓡꓲꓺ ꓟ ꓟꓶ ꓠꓹ ꓟ ꓐꓱ ꓶꓼ ꓪ: ꓘꓴ ꓠꓹ ꓟ꓾ ꓣꓱ: ꓬꓰ ꓠꓹ ꓟ ꓣꓳ. ꓚꓵˍ ꓟ ꓬꓲ. ꓙꓵꓹ ꓥꓳ ꓐꓰ ꓥꓪ ꓓꓵ: ꓙ ꓟꓶˍ ꓡꓳ=ꓡꓯꓼ ꓫꓵꓺ Japan ꓗꓴꓷꓼ ꓗꓪ ꓟ ꓗ-ꓔꓳ-ꓡꓲ ꓘꓴ-ꓜꓲ-ꓞꓳ ꓗꓪ ꓐꓰ ꓢꓲꓺ ꓡꓲꓺ ꓟ ꓦꓬꓼ ꓠꓬꓲ ꓐꓯ ꓢꓲ 8 ꓦꓻ ꓟ 6 ꓠꓬꓲ ꓗꓪ ꓐꓰ 15 ꓠꓬꓲ ꓗꓪ ꓛꓲ 10 ꓠꓬꓲ ꓚꓲ. ꓢꓲ ꓪ: ꓘꓴ ꓓꓴ ꓬꓰ ꓠꓹ ꓟ ꓔꓯ ꓟꓲ ꓚꓲ. ꓔ ꓟ ꓔꓯ Heroshima ꓔꓲꓺ ꓒ: ꓓ: Alexis Mitsui Shirahama ꓗꓪ ꓐꓰ Asia ꓓꓳ: ꓗꓪ ꓐꓯ ꓗꓷ ꓟ ꓥꓳ=

ꓚꓲ ꓛꓬꓼ ꓗꓴꓷꓼ ꓕꓲ: ꓟ ꓔꓯ ꓡꓰ: ꓡꓳ. ꓔꓬꓹ ꓟ ꓪꓴ. ꓠꓬꓲ꓾ ꓢꓰꓼ ꓡꓯ: ꓘꓳ ꓓꓴ ꓡ-ꓛꓬꓴ. ꓔꓯꓺ ꓡꓯ: ꓘꓳ ꓔꓬ. ꓟ ꓪꓴ. ꓠꓬꓲ ꓕꓲ: ꓟꓲ ꓠꓯ ꓡꓱꓸꓼ ꓗꓪ ꓟ ꓗꓴꓷꓼ ꓙꓵ: ꓢꓴ ꓐꓴ ꓐꓳꓹ (Nuclear Bombs) ꓟ: ꓙꓳ ꓟ ꓟꓲꓺ ꓠꓯꓺ ꓕꓲ: ꓟ ꓒꓬꓱꓼ ꓡ ꓠ ꓢꓯꓼ ꓕꓵꓼ ꓙꓰ ꓠꓹ ꓟ ꓐꓱ ꓶꓼ Japan ꓗꓴꓷꓼ Heroshima ꓡꓳ ꓒꓱ ꓔꓯ ꓙꓵ: ꓢꓴ Kazumi Matsui ꓗꓪ ꓐꓰ ꓘꓳꓼ ꓚꓳꓻ ꓑꓮꓲ ꓗꓪ ꓐꓯ ꓗꓷ ꓟ ꓥꓳ=ꓝ ꓢꓲ Heroshima ꓡꓳ ꓒꓱ ꓔꓯ ꓙꓵ: ꓢꓴ ꓗꓪ ꓐꓰ ꓡ ꓠꓹ ꓟ ꓞꓳ ꓡꓱ ꓤ ꓐꓴꓳ꓾ ꓠꓴꓻ ꓪ: ꓤꓶꓻ ꓗꓪ ꓕꓱ ꓟ ꓡꓰ ꓐꓰ ꓞꓳ ꓙꓳ ꓫ. ꓟ ꓡ-ꓛꓬꓴ. ꓣꓱ:ˍ ꓟ ꓔꓯ ꓠ: ꓦ: ꓗꓷ ꓠꓹ ꓟ ꓕꓵꓼ ꓪ: ꓖꓶ: ꓠꓲꓹ ꓫꓵꓹ ꓡꓳ=ꓝ ꓢꓲ ꓟꓲꓺ ꓠꓯꓺ ꓙꓵ: ꓢꓴ ꓐꓴ ꓔꓯ꓾ Heroshima ꓐꓰ Nagasaki ꓡꓳ ꓒꓱ ꓗꓪ ꓡ ꓢꓲ꓾ ꓐꓳꓹ(Nuclear Bombs) ꓐꓶꓻˍ ꓟ ꓪꓴ. ꓠꓬꓲ꓾ ꓮ ꓡꓰ ꓘꓶ ꓛꓲ ꓫ. ꓙꓵꓻ ꓔꓬꓹ ꓟ ꓔꓯ ꓡꓳ. ꓠꓬꓲ ꓠꓹ ꓟ ꓕꓵꓼ ꓪ: ꓖꓶ: ꓗꓷꓳ=

1945 ꓘꓳꓼ 8 ꓦꓻ ꓟ 6 ꓠꓬꓲ ꓕꓯ꓾ American ꓐꓴ ꓡꓰ Heroshima ꓡꓳ ꓒꓱ ꓕꓯ: ꓢꓲꓺ ꓗꓪ ꓐꓳꓹ(Nuclear Bombs) ꓡꓳꓺ ꓩꓴꓺ ꓗꓷ ꓟ ꓪꓴ. ꓠꓬꓲ꓾ ꓞꓳ ꓤ 140ꓹ000 ꓣꓳ ꓫꓵꓺ ꓢꓲ꓾ 3 ꓠꓬꓲ ꓗꓳ. ꓙꓰˍ ꓕꓯ 8 ꓦꓻ ꓟ 9 ꓠꓬꓲ ꓕꓯ Nagasaki ꓡꓳꓺ ꓒꓱꓺ ꓗꓪ ꓝꓮꓲ. ꓕꓲ: ꓧꓪꓹ ꓐꓳꓹ ꓡꓳꓺ ꓦ ꓗꓷˍ ꓟ ꓗꓪ ꓞꓳ ꓤ 70ꓹ000 ꓣꓳ ꓟ ꓛꓲꓺ ꓫꓵꓺ ꓗꓷ ꓟ ꓔꓯ ꓕꓳ: ꓶ: ꓐꓳꓻ ꓝꓲ. ꓔ ꓟ ꓗꓪ ꓟꓳꓻ ꓪ ꓓˍ ꓡꓳ=

Heroshima ꓐꓰ Nagasaki ꓗꓪ ꓐꓳꓹ(Nuclear Bombs) ꓡꓳꓺ ꓩꓴꓺ ꓗꓷ ꓟ 74 ꓘꓳꓼ ꓐꓲˍ ꓟ ꓘꓳꓼ ꓚꓳꓻ ꓑꓮꓲ ꓔꓯ ꓬꓰˍ ꓟ ꓗꓪ꓾ ꓗꓴꓷꓼ 90 ꓗꓴꓷꓼ ꓟ: ꓛꓲ ꓗꓪ ꓟ ꓗꓴꓷꓼ ꓞꓲꓺ ꓐꓴ ꓡ ꓢꓲ꓾ ꓞꓳ ꓤ 50ꓹ000 ꓛꓲꓺ ꓐꓹ ꓡꓳ=

Photo credit to Vatican News

https://bil.ly/33kcCbi

Add new comment

17 + 0 =