Japan ꓤ ꓠꓱ ꓤ 10% ꓟꓽ ꓞꓲꓺ ꓠꓬ ꓚꓳꓦꓲꓓ ꓐꓰ ꓗꓴꓸ ꓙꓲꓽ ꓙꓳˍ ꓟ ꓪꓴꓸ ꓠꓶꓸ ꓠꓻ ꓗꓪ ꓐꓰ ꓫꓵꓻ ꓔꓬ ꓟ ꓓꓳꓽ

Japan ꓗꓴꓷꓼ ꓗꓪ ꓚꓳꓦꓲꓓ ꓠꓻ ꓙꓳ ꓡꓰ ꓗ ꓠꓯꓸ ꓮ ꓘꓶꓸ ꓪꓽ ꓠꓬꓲˍ ꓟ ꓪꓴꓸ ꓠꓶꓸ ꓠꓻ ꓒꓬꓱꓼ ꓔꓬ ꓟ ꓤ ꓠꓱ ꓤ 10% ꓟꓽ ꓞꓲꓺ ꓫꓵꓻ ꓗꓷ ꓟ ꓔꓯ ꓠꓯꓻ ꓞꓲꓼ ꓢꓲꓽ ꓒ ꓟꓬꓱꓽ ꓬꓰ ꓜꓴꓻ ꓗꓪ ꓟ ꓠꓻ ꓫꓵꓽ ꓔꓯ ꓟꓳꓸ ꓧꓪ ꓟꓰꓹ ꓠꓬꓲ ꓜꓴꓻ ꓗꓪ ꓐꓰ ꓟꓽ ꓟꓶ ꓫꓵ ꓟ ꓦꓬꓼ ꓠꓬꓲ ꓕꓯ ꓐꓯ ꓑꓶ ꓔ ꓟ ꓗꓪ ꓐꓰ ꓢꓷꓸ ꓪˍ ꓡꓳ=

ꓧꓪ ꓟꓰꓹ ꓠꓬꓲ ꓔ ꓟ ꓗꓪ 2020 ꓘꓳꓼ 1 ꓦ 20 ꓠꓬꓲ ꓗꓪ ꓐꓰ 2022 ꓘꓳꓼ 5 ꓦ ꓗꓪ ꓛꓲꓺ꓾ ꓬꓲ ꓞꓲꓼ 18 ꓘꓳꓼ ꓠꓯꓸ ꓘꓪ ꓗꓪ ꓟ ꓤ ꓠꓱ ꓤ ꓐꓴ ꓗꓪ ꓚꓳꓦꓲꓓ ꓐꓰ ꓗꓴꓸ ꓙꓲꓽ ꓙꓳˍ ꓟ ꓮ ꓘꓶꓸ ꓪꓽ ꓠꓬꓲˍ ꓟ ꓪꓴꓸ ꓠꓶꓸ ꓳˍ ꓟ ꓠꓻ ꓒꓬꓱꓼˍ ꓟ 34 ꓟ ꓔꓯ ꓟꓳꓻ ꓗꓷꓳ꓾ ꓐꓰ ꓢꓷꓸ ꓪ ꓡꓳ= ꓠꓻ ꓔꓯ ꓟꓳꓸ ꓚꓬꓹ ꓠꓬꓲ ꓢꓴ ꓜꓴꓻ ꓐꓴ ꓡꓰ ꓪꓴꓸ ꓠꓶꓸ ꓠꓻ ꓒꓬꓱꓼ ꓝꓲˍ ꓟ ꓚꓱꓹ ꓟꓽ ꓙꓳ ꓟ ꓞꓳ ꓠꓻ ꓤ ꓠꓱ ꓤ 31 ꓣꓳ ꓔꓯ ꓠꓻ ꓚꓬꓹ ꓠꓬꓲˍ ꓟ ꓔꓯ ꓬꓰ ꓗꓷ ꓟ ꓥ ꓡꓳ=

ꓤ ꓠꓱ ꓤ 31 ꓣꓳ ꓘꓴꓽ ꓗꓪ 19 ꓣꓳ ꓠꓬ ꓠꓻ ꓓꓻ ꓡꓰ ꓔꓬ ꓕꓯ 4 ꓣꓳ ꓠꓬ ꓫꓵꓻ ꓢꓲ꓾ ꓝꓮꓲ 8 ꓣꓳ ꓠꓬ ꓠꓻ ꓒꓬꓱꓼ ꓔꓬ ꓟ ꓔꓯ ꓢꓷꓸ ꓙ ꓟꓳ ꓙ ꓗꓷꓳ=

ꓚꓳꓦꓲꓓ ꓠꓻ ꓐꓰ ꓗꓴꓸ ꓙꓲꓽ ꓙꓳˍ ꓟ ꓠꓻ ꓒꓬꓱꓼ ꓔꓬ ꓟ ꓖꓳ ꓤ ꓠꓱ ꓤ 8 ꓣꓳ ꓘꓴꓽ ꓗꓪ 5 ꓣꓳ ꓠꓬ ꓧꓪꓸ ꓟꓽ ꓛꓲꓽ ꓛꓲꓽ ꓗꓷ ꓡꓰˍ ꓟ(ꓬꓲꓸ ꓡꓰ ꓟ) ꓐꓰ ꓬꓲꓼ ꓖꓴ ꓗꓪ ꓓꓳꓽˍ ꓟ ꓠꓻ ꓔꓯ ꓔꓳꓹ ꓜꓳꓽ ꓔꓬ ꓪˍ ꓡꓳ꓾ ꓐꓰˍ ꓟꓲ ꓢꓷꓸ ꓪ ꓡꓳ=

ꓠꓻ ꓖꓳ ꓟ ꓙꓳ ꓔꓬ ꓟ ꓤ ꓠꓱ ꓤ ꓐꓴ ꓗꓪ ꓠꓻ ꓒꓬꓱꓼ ꓡˍ ꓪꓴꓸ ꓔꓴˍ ꓟ ꓬꓲ ꓢꓷꓸ ꓡꓰ ꓓꓴ ꓠꓬ ꓬꓲ ꓙꓴꓽ ꓚꓵꓹ ꓟ꓾ ꓬꓲꓸ ꓡꓰˍ ꓟ(ꓧꓪꓸ ꓟꓽ ꓛꓲꓽ ꓛꓲꓽ ꓗꓷ ꓡꓰˍ ꓟ) ꓐꓰ ꓧꓶꓸ ꓕꓯ ꓟ ꓡꓰ ꓟꓽ ꓥ ꓟ ꓫꓸ ꓕꓱ ꓘꓶꓽ꓾ ꓧꓶꓸ ꓕꓯ ꓟ ꓡꓰ ꓟꓽ ꓥ ꓟ ꓣꓱꓽ ꓬꓰ ꓚꓱꓹ ꓐꓴ ꓔꓯ ꓬꓰ ꓡˍ ꓟ ꓥ ꓡꓳ꓾ ꓐꓰˍ ꓟꓲ ꓢꓷꓸ ꓪ ꓡꓳ=

ꓓꓳꓽ ꓚꓰꓺ  :ANI