Sumprabum ꓗꓪ ꓐꓶꓽ ꓓꓲ ꓡꓳ ꓓꓲ ꓑꓶ ꓓꓴ ꓜ ꓟꓲ ꓮ ꓟꓬꓹ ꓐꓬ ꓡꓰ ꓟ꓾

Thursday, August 31, 2023

Sumprabum ꓗꓪ ꓐꓶꓽ ꓓꓲ ꓡꓳ ꓓꓲ ꓑꓶ ꓓꓴ ꓜ ꓟꓲ ꓮ ꓟꓬꓹ ꓐꓬ ꓡꓰ ꓟ꓾

ꓡꓳꓹ ꓬꓰ ꓟ ꓙꓵꓹ ꓗꓪ ꓦꓯꓹ ꓑꓶꓼ ꓑꓶ ꓓꓴ ꓫꓸ ꓓꓴ ꓔꓳꓹ ꓜꓳ ꓡꓰ ꓟ ꓢꓴꓟꓑꓣꓮꓐꓴꓟ ꓗꓪ ꓕꓱ ꓕꓲ ꓘꓳꓼ ꓥ ꓟꓲ ꓐꓶꓽ ꓓꓲ ꓡꓳ ꓓꓲ ꓑꓶ ꓓꓴ ꓜ ꓟꓲ ꓮ ꓟꓬꓹ ꓐꓬ ꓡꓰ ꓓꓴ ꓗꓷ ꓡꓰ ꓡꓳ ꓐꓰ ꓢꓷꓸ ꓪ ꓡꓳ= ꓢꓽ ꓦ ꓛꓲ ꓡꓰ ꓡꓳꓼ ꓡꓰ ꓢꓲ ꓟ ꓜ ꓟꓲ ꓠꓬ ꓐꓶꓽ ꓓꓲ ꓡꓳ ꓓꓲ ꓑꓶ ꓓꓴ ꓐꓬ ꓡꓰ ꓢꓲ꓾ ꓕꓱ ꓕꓲ ꓘꓳꓼ ꓟ ꓠꓬ ꓢꓴꓟꓑꓣꓮꓐꓴꓟ ꓡꓳ ꓒꓱ ꓘꓴꓽ ꓗꓪ ꓠꓬ ꓜ ꓟꓲ 70% ꓛꓲ ꓐꓬ ꓡꓰ ꓓꓴ ꓗꓷ ꓡꓰꓳ ꓐꓰ ꓘ-ꓖ-ꓬ-ꓬꓮꓠ ꓘꓹ ꓢꓴ ꓕꓲ ꓣꓳ ꓡꓰ 74 ꓟꓰꓓꓲꓮ ꓔꓯ ꓐꓯ ꓔ ꓡꓳ=

ꓕꓱ ꓐꓶꓽ ꓓꓲ ꓡꓳ ꓓꓲ ꓠꓬ ꓜ ꓜꓲ ꓔꓯ ꓡꓰ ꓟꓽ ꓞꓲ ꓦꓻ ꓟꓲ ꓗꓪ ꓔꓶꓻ ꓔ ꓟ ꓜ ꓫꓵ ꓜ ꓙꓰ ꓔꓯ ꓥ ꓟꓲ ꓐꓬ ꓡꓰ ꓝꓲ_ ꓟ ꓥꓳ= ꓞꓳ ꓘꓹ ꓢꓴ ꓬꓰ ꓜ ꓔꓶꓻ ꓜ ꓟ ꓔꓯ ꓕꓲ ꓘꓳꓼ ꓡꓲ ꓕꓲ ꓘꓳꓼ ꓐꓶꓽ ꓓꓲ ꓡꓳ ꓓꓲ ꓑꓶ ꓓꓴ ꓐꓬ ꓡꓰ ꓓꓴ ꓗꓷ ꓡꓰ ꓢꓲ꓾ ꓫꓸ ꓔꓬ ꓟ ꓔꓳꓹ ꓜꓳ ꓔꓬ ꓟ ꓥꓳ=

ꓮ ꓟꓶ ꓠꓬ ꓮ ꓫꓵ ꓒꓵꓽ ꓥ ꓟꓲ ꓓꓯ ꓔꓬ ꓟ ꓪꓴꓸ ꓠꓬꓲ ꓮ ꓘꓶꓸ ꓫꓸ ꓓꓴ ꓔꓳꓹ ꓜꓳ ꓔꓬ ꓟ ꓑꓶ ꓓꓴ ꓮ ꓫꓵ ꓟꓬꓱꓽ ꓥ ꓟꓲ ꓬꓰ ꓢꓲ꓾ ꓬꓲꓻ ꓙꓬ ꓡꓳ ꓗꓪ ꓫꓵꓺ ꓙꓴꓸ ꓢꓲ꓾ ꓜ ꓓꓴ ꓓꓳꓺ ꓓꓴ ꓐꓱ ꓶ ꓬꓰ ꓜ ꓧꓪ ꓜ ꓔꓬ ꓟ ꓥꓳ=

ꓬꓲ ꓪ ꓠꓬ ꓦ ꓟꓲ ꓔꓯ ꓡꓰ ꓟꓬ ꓠꓬꓲ ꓬꓰ ꓜ ꓔꓬ ꓟ ꓑꓶ ꓓꓴ ꓮ ꓟꓶ ꓡꓰ ꓐꓰ ꓔꓶꓻ ꓔ ꓟ ꓜ ꓫꓵ ꓜ ꓙꓰ ꓔꓯ ꓐꓶꓽ ꓓꓲ ꓡꓳ ꓓꓲ ꓡꓰ ꓐꓬ ꓡꓰ ꓓꓴ ꓗꓷ ꓡꓰ ꓠꓬ ꓫꓸ ꓓꓴ ꓗꓷ ꓡꓰ_ ꓡꓳ ꓐꓰ ꓢꓷꓸ ꓪ ꓡꓳ=