Synod ꓖꓪ ꓙꓱ ꓜꓲꓼ ꓓꓴ ꓗꓪ ꓮ ꓡꓰ ꓫꓵˍ ꓔꓯ ꓖꓪ ꓙꓱ ꓡꓯ ꓘꓳ, ꓟ ꓔꓯ ꓡꓳ. ꓠꓬꓲˍ ꓟ

Synod ꓖꓪ ꓙꓱ ꓜꓲꓼ ꓓꓴ ꓗꓪ ꓮ ꓡꓰ ꓫꓵˍ ꓔꓯ ꓖꓪ ꓙꓱ ꓡꓯ ꓘꓳ, ꓟ ꓔꓯ ꓡꓳ. ꓠꓬꓲˍ ꓟ

10 ꓦ ꓟ 6 ꓠꓬꓲ 2023 ꓘꓳꓼ ꓕꓯ ꓣꓳ˗ꓟ ꓗꓴꓷꓼ Vatican ꓡꓳ ꓒꓱ ꓗꓪ ꓟꓵ ꓗꓳ ꓓꓵ ꓓꓵ ꓗ‐ꓔꓳ‐ꓡꓲ ꓘꓴ ꓜꓲꓼ ꓞꓳ ꓠꓯ ꓗꓪ ꓮ ꓘꓶ. ꓪꓴꓽ ꓟ ꓖꓪ ꓙꓱꓼ ꓓꓴ Synod ꓖꓪ ꓙꓱ ꓜꓲꓼ ꓓꓴ ꓔꓯ ꓬꓰ ꓔꓬ ꓟ ꓥ ꓡꓳ꓿ ꓕꓱ ꓖꓪ ꓙꓱ ꓜꓲꓼ ꓓꓴ ꓬꓲ. ꓓꓴ ꓓꓵ ꓟ ꓕꓲ ꓠꓬꓲ ꓗꓪ ꓐꓰ ꓖꓪ ꓙꓱ ꓜꓲꓼ ꓓꓴ ꓗꓪ ꓜꓲꓼ ꓡ ꓢꓴ (450) ꓣꓳ ꓐꓴ ꓕꓲ ꓫꓵꓽ ꓠꓽ ꓖꓪ ꓙꓱ ꓗꓷ ꓟ ꓚꓱ, ꓔꓯ ꓐꓯ ꓑꓶ ꓗꓷ ꓟ ꓥ ꓡꓳ꓿

Cardinal Mario Grech ꓗꓪ ꓓꓽ ꓪꓴ. ꓖꓪ ꓙꓱ ꓜꓲꓼ ꓓꓴ ꓔꓯ ꓮ ꓡꓰ ꓐꓰ ꓬꓰ ꓠꓯ, ꓟ ꓚꓱ, ꓔꓯ ꓫ. ꓕꓱ ꓗꓷ ꓟ ꓥ ꓡꓳ꓿ ꓝꓮꓲ ꓖꓪ ꓙꓱ ꓜꓲꓼ ꓓꓴ ꓗꓪ ꓡ ꓢꓴ ꓐꓴ ꓮ ꓡꓰ ꓫꓵꓽ ꓙꓵꓽ ꓗ ꓔꓯ ꓛꓳꓽ ꓠꓯ, ꓟ ꓐꓰ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓙꓵꓽ ꓐꓱ ꓶ ꓙꓵꓽ ꓟ ꓟꓬꓱꓽ ꓔꓯ ꓬꓰ ꓐ ꓡ ꓠ, ꓟ ꓖꓪ ꓙꓱ ꓠ, ꓟ ꓐꓯ ꓔ ꓟ ꓥ ꓡꓳ꓿

ꓝꓮꓲ10 ꓦ 4 ꓠꓬꓲ ꓕꓯ ꓔꓲꓺ ꓒ ꓪ ꓔꓲ ꓡꓰ ꓖꓪ ꓙꓱ ꓜꓲꓼ ꓓꓴ ꓗꓪ ꓟ. ꓟꓲ ꓚꓺ ꓗꓷ ꓟ ꓥ ꓡꓳ꓿ ꓔꓲꓺ ꓒ ꓪ ꓔꓲ ꓡꓰ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓐꓯ ꓘꓶꓽ ꓔꓯ ꓠ, ꓡꓳ ꓢꓲ ꓠꓬꓲ ꓖꓪ ꓙꓱ ꓜꓲꓼ ꓓꓴ ꓗꓪ ꓖꓪ ꓙꓱ ꓠ, ꓟ ꓐꓰ ꓪꓴ‐ꓢ ꓐꓰ ꓮ ꓕꓯ ꓥ ꓟꓲ ꓙꓻ ꓡꓯꓽ ꓘꓳ, ꓠ, ꓟ ꓣꓳꓺ ꓚꓵ. ꓟ ꓔꓯ ꓐꓯ ꓗꓷ ꓟ ꓥ ꓡꓳ꓿ ꓖꓪ ꓙꓱ ꓜꓲꓼ ꓓꓴ ꓗꓪ ꓖꓪ ꓙꓱ ꓡ ꓢꓴ ꓮ ꓙꓵꓽ ꓠꓬ ꓙꓲ ꓕꓲ ꓒꓳ, ꓗꓪ ꓬꓰ ꓐ ꓡ ꓠ, ꓟ ꓚꓲ. ꓛꓬ ꓠꓲ, ꓫꓵˍ ꓟ ꓔꓯ ꓐꓯ ꓟ. ꓔ ꓟ ꓐꓰ ꓟꓯꓻ ꓖꓶ ꓢꓲ ꓠꓬꓲ ꓟꓬꓱꓽ ꓔꓯ ꓬꓰ ꓠ, ꓟ ꓐꓯ ꓔ ꓟ ꓥ ꓡꓳ꓿

ꓝꓮꓲ ꓔꓲꓺ ꓒ ꓪ ꓔꓲ ꓡꓰ Synod ꓖꓪ ꓙꓱ ꓜꓲꓼ ꓓꓴ ꓠꓬ ꓗꓴꓷꓼ ꓔꓯ ꓙꓵꓽ ꓟ ꓢꓲꓺ ꓒ ꓐꓴ ꓖꓪ ꓙꓱ ꓡꓯꓽ ꓘꓳ, ꓟ ꓐꓰ ꓟꓽ ꓫꓱ, ꓡꓯꓽ ꓘꓳ ꓟ ꓚꓱ, ꓔꓯ ꓬꓲ. ꓡꓰ ꓟ. ꓟꓲ ꓚꓺ ꓟ ꓙꓵ, ꓔꓯ ꓫ. ꓕꓱ ꓗꓷꓳ꓿ ꓝꓮꓲ ꓮꓝꓣꓲꓚꓮ ꓗꓴꓷꓼ ꓐꓰ ꓔꓲꓺ ꓒ ꓓꓽ ꓕꓲ ꓣꓳ ꓡꓰ ꓫ. ꓕꓱ ꓔ ꓟ ꓠꓬ ꓖꓪ ꓙꓱ ꓜꓲꓼ ꓓꓴ ꓐꓰ ꓖꓪ ꓙꓱ ꓗꓷ ꓟ ꓚꓱ, ꓮ ꓙꓵꓽ ꓔꓯ ꓪꓴ‐ꓢ ꓡꓰ ꓣꓳ ꓔꓯ ꓟ. ꓖꓶ ꓡ ꓟ ꓚꓱ, ꓥ ꓡꓳ ꓐꓰ ꓘꓳ, ꓣꓴ ꓠ, ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿

ꓕꓱ ꓖꓪ ꓙꓱ ꓜꓲꓼ ꓓꓴ ꓠꓬ ꓘꓴ ꓜꓲꓼ ꓞꓳ ꓠꓯ, ꓗꓪ ꓪꓴ‐ꓢ ꓟꓬꓱꓽ ꓔꓯ ꓪꓽ ꓜꓲ ꓬꓰ ꓐ ꓡ ꓠ, ꓟ ꓐꓰ ꓕꓲ ꓟꓲ ꓠꓯ ꓡꓱ ꓗꓪ ꓔꓬ ꓟ ꓪꓴ‐ꓢ ꓔꓯ ꓦꓻ ꓡꓱ ꓢꓴ ꓐꓰ ꓟꓽ ꓦꓻ ꓡꓱ ꓢꓴ ꓐꓴ ꓔꓯ ꓘꓴ ꓜꓲꓼ ꓞꓳ ꓗꓪ ꓐꓰ ꓮ ꓡꓰ ꓬꓰ ꓙ ꓔꓳ ꓙ ꓠ, ꓟ ꓚꓱ, ꓮ ꓟꓬ, ꓫꓵꓽ ꓔꓯ ꓖꓪ ꓙꓱ ꓠ, ꓟ ꓥ ꓡꓳ꓿ Synod ꓖꓪ ꓙꓱ ꓜꓲꓼ ꓓꓴ ꓠꓬ 10 ꓟ 4 ꓠꓬꓲ ꓗꓪ ꓐꓰ 29 ꓗꓪ ꓛꓲ ꓖꓪ ꓙꓱ ꓓꓴ ꓥꓡ ꓳ ꓐꓰ (Vatican news agency ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿