ꓘꓴ-ꓜꓲ-ꓞꓳ ꓠꓬ ꓪꓴ-ꓢ ꓐꓯ ꓘꓶ ꓑꓮꓲꓽ ꓠꓬꓲꓽ ꓧꓪꓹ ꓕꓲ ꓧꓪꓹ ꓟ ꓠꓽ ꓦꓬꓼ ꓠꓬꓲ ꓗꓪ꓾ ꓔꓲ ꓒ ꓪ ꓔꓲ Francis ꓡꓰ꓾ ꓮ ꓕꓯ ꓟꓲ ꓢꓲꓽ ꓫꓬ ꓕꓳ ꓶ ꓑꓷꓠꓽ ꓔꓯ ꓒ ꓕꓲꓸꓼ ꓗꓪ ꓗꓶ ꓔ ꓢꓲ ꓾ ꓟꓽ ꓠꓽ ꓠꓽ ꓵ ꓠꓹ ꓟ ꓐꓯ ꓖꓶ ꓗꓷꓳ=
“ꓠꓬꓲꓸ ꓠꓬꓲ ꓣꓳ ꓦꓬꓼ ꓠꓬꓲ ꓗꓪ ꓪꓴꓽ ꓓꓰ ꓡꓰˍ ꓟ ꓡꓯꓼ ꓫꓴ ꓠꓬ ꓙꓵꓻ ꓢꓴ ꓐꓴ ꓐꓰ ꓘꓴ-ꓜꓲ-ꓞꓳ ꓤꓶꓻ ꓗꓪ ꓢꓲꓽ ꓫꓬ ꓟ ꓪꓴ-ꓢ ꓐꓯ ꓘꓶꓽ ꓔꓯ ꓝꓮꓲ ꓕꓲ ꓧꓪꓹ ꓟꓳˍ ꓟ ꓥ ꓡꓳ꓾” ꓐꓰ ꓠꓽ ꓦꓬꓼ ꓠꓬꓲ Angelus ꓪꓽ ꓘꓴˍ ꓟ ꓙꓵꓹ ꓗꓪ ꓐꓯ ꓗꓷ ꓟ ꓥꓳ=
“ꓮ ꓠꓱ ꓟ ꓦꓬꓼ ꓠꓬꓲ ꓕꓯ ꓠꓬ ꓠꓬꓲꓸ ꓠꓬꓲ ꓟ ꓡꓰ ꓐꓰ ꓢꓲꓽ ꓫꓬ ꓕꓳꓽ ꓶ ꓠꓬ ꓥꓳꓽ ꓫꓵꓽ ꓥꓳꓽ ꓙꓰꓽ ꓮ ꓟꓬꓹ ꓐꓰ ꓾ ꓞꓳ ꓤ ꓮ ꓙꓵꓽ ꓐꓱ ꓶ ꓟꓽ ꓙꓳ ꓢꓰꓽ= ꓠꓬꓲꓸ ꓠꓬꓲ ꓗꓪ ꓠꓬ TV꓾ Phone ꓐꓰ ꓠꓱꓸ ꓐꓯꓼ ꓗꓪˍ ꓟ ꓢꓲꓽ ꓫꓬ ꓕꓳꓽ ꓶ ꓔꓯ ꓚꓲꓸ ꓛꓬ ꓥꓳꓽ ꓗꓪ ꓐꓰ ꓵ ꓪ ꓓˍ ꓟ ꓥꓳ=”
ꓔꓲ ꓒ ꓪ ꓔꓲ Francis ꓡꓰ꓾ ꓗꓳꓸ ꓗꓷ ꓟ 500 ꓘꓳꓼ ꓕꓯ ꓢꓲꓽ ꓫꓬ ꓕꓳ ꓶ ꓚꓱꓹ ꓔꓯ ꓟꓳꓸ ꓢꓷꓸ ꓠꓲꓹ ꓙꓳ ꓢꓴ ꓐꓰ ꓘꓴ-ꓜꓲ-ꓞꓳ ꓗꓪ ꓢꓷꓸ ꓠꓲꓹ ꓙꓳ ꓢꓴ ꓥ ꓟ ꓙꓲꓻ ꓫꓬ ꓢꓴ Jerome ꓐꓯ ꓗꓷ ꓟ “ꓢꓲꓽ ꓫꓬ ꓕꓳꓽ ꓶ ꓔꓯ ꓡꓳꓺ ꓔ ꓢꓴ ꓮ ꓙꓵꓽ ꓠꓬ ꓪꓴ-ꓢ ꓔꓯ ꓡꓳꓺ ꓗꓷ ꓟ ꓥ ꓡꓳ”꓾ ꓐꓯ ꓟ ꓔꓯ ꓐꓯ ꓖꓶ ꓗꓷꓳ=
ꓝ ꓢꓲ ꓬꓲ ꓡꓰ ꓐꓯ ꓟ ꓠꓬ꓾ “ꓕꓱ ꓟ ꓠꓬ ꓮ ꓘꓶꓸ ꓜꓳꓽˍ ꓟ ꓫꓸ ꓕꓱ ꓘꓶꓽ ꓥꓳ= ꓮ ꓡꓲꓳ ꓐꓯ ꓠꓬ ꓬꓰ-ꓢꓴ ꓙꓲ-ꓢꓴ ꓟꓲ ꓠꓯ ꓧꓪꓽ ꓖꓳ ꓓꓱ ꓣꓴ ꓢꓲ ꓢꓯꓸ ꓬꓲꓼ ꓡ ꓗꓷ ꓢꓲ ꓠꓬꓲ꓾ ꓢꓲꓽ ꓫꓬ ꓕꓳꓽ ꓶ ꓔꓯ ꓙꓽ ꓙꓲꓼ ꓐ ꓡ ꓠ ꓛꓲꓺ ꓒꓴ ꓖꓶ ꓗꓷ ꓢꓴ ꓥ ꓡꓳ=
ꓟꓬꓽ ꓠꓬꓲ ꓪꓽ ꓘꓴ ꓔꓬ ꓕꓯ ꓡꓰ ꓟꓽ ꓞꓲꓺ ꓕꓲ ꓣꓳ ꓔꓵꓸꓼ ꓪꓽ ꓘꓴ ꓙꓵꓹ꓾ ꓥ ꓠꓬ꓾ ꓮ ꓟꓬꓹ ꓐꓰ ꓪꓽ ꓘꓴ ꓙꓵꓹ ꓕꓯ ꓣꓳ ꓐꓴ ꓠꓬ ꓪꓴ-ꓢ ꓬꓲ ꓐꓯ ꓘꓶꓽ ꓔꓯ ꓙ ꓙꓲꓼ ꓡ ꓗꓷꓳ=”
ꓔꓲꓺ ꓒ ꓪ ꓔꓲ Francis ꓠꓬ ꓙꓵꓻ ꓢꓴ ꓐꓴ ꓔꓯ ꓢꓲꓽ ꓫꓬ ꓕꓳ ꓶ ꓔꓯ ꓙꓽ ꓙꓲꓼ ꓠ ꓟꓸ ꓖꓶ ꓗꓷ ꓟ ꓟꓸ ꓒ ꓟꓹ ꓟ ꓐꓴ꓾ ꓞꓳ ꓪꓴꓽ ꓐꓴ ꓔꓯ ꓫꓸ ꓟꓳ ꓗꓷꓳ=
“ꓣꓳ ꓐꓴ ꓠꓬ ꓶꓼ ꓓꓳꓽ ꓫꓱꓹ ꓓꓳꓽ ꓚ ꓒꓬꓱˍ ꓟ ꓗꓪ ꓐꓰ ꓟꓶˍ ꓟ ꓗꓹ ꓛꓲꓽ ꓠꓲꓹ ꓔꓯ ꓮ ꓕꓯˍ ꓟꓲ ꓡꓳꓺ ꓗꓷ ꓟꓽ ꓓ”꓾ ꓐꓰ ꓐꓯ ꓗꓷ ꓢꓲ꓾ ꓢꓲꓽ ꓫꓬ ꓕꓳ ꓶ ꓑꓷꓠꓽ ꓔꓯ ꓔꓯꓺ ꓔ ꓠꓹ ꓟ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓐꓯ ꓖꓶ ꓗꓷꓳ=
ꓝꓮꓲ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓗꓪ ꓬꓲꓸ ꓝꓲꓸ ꓢ ꓝꓲꓸ ꓛꓲꓺ ꓵ ꓠꓹ ꓟˍ ꓟꓲ ꓕꓵꓼ ꓪ ꓖꓶꓽ ꓗꓷꓳ=