ꓙꓲ_ ꓟ ꓮ ꓣꓳ ꓡꓳꓸ ꓒꓽ ꓬꓰ-ꓢꓴ ꓠꓬ ꓬꓲꓸ ꓡꓯꓽ ꓒꓯꓹ ꓠꓬꓲꓽ ꓐꓽ ꓐꓰ ꓣꓳ ꓔꓯ ꓘꓳꓹ ꓣꓴ ꓔꓬ ꓡꓳ꓾

ꓙꓲ_ ꓟ ꓮ ꓣꓳ ꓡꓳꓸ ꓒꓽ ꓬꓰ-ꓢꓴ ꓠꓬ ꓬꓲꓸ ꓡꓯꓽ ꓒꓯꓹ ꓠꓬꓲꓽ ꓐꓽ ꓐꓰ ꓣꓳ ꓔꓯ ꓘꓳꓹ ꓣꓴ ꓔꓬ ꓡꓳ꓾

ꓔꓲꓺ  ꓪ ꓔꓲ ꓡꓰ “ꓖꓳꓳꓓ ꓢꓧꓰꓑꓧꓰꓣꓓ” ꓙꓲ_ ꓟ ꓮ ꓣꓳ ꓡꓳꓸ ꓒꓽ ꓠꓽ ꓦꓬꓼ ꓠꓬꓲ ꓟꓲ-ꓢ ꓪꓽ ꓘꓴ ꓙꓵꓹ ꓕꓯ “ꓢꓲ ꓒ ꓬꓰ-ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓟ ꓠꓵꓻ ꓠꓲꓹ ꓐꓰ ꓣꓳ ꓔꓯ ꓠꓲꓹ ꓠꓵꓻ ꓔꓬ ꓥꓳ꓾ ꓣꓳ ꓐꓱ ꓶ ꓬꓲ ꓢꓯꓼ ꓟꓬ ꓔꓯ ꓖꓶ ꓗꓷ ꓗꓪ ꓛꓲ ꓠꓲꓹ ꓠꓵꓻ ꓟ ꓔꓯ ꓐꓯ ꓔ ꓡꓳ=

ꓡꓳꓹ ꓬꓰ ꓟ ꓠꓽ ꓦꓬꓼ ꓠꓬꓲ ꓕꓯ ꓪꓽꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓖꓳ ꓕꓲ ꓫꓵ ꓠꓽ ꓠꓽ ꓦꓬꓼ ꓠꓬꓲ ꓶꓼ ꓓꓳ ꓫꓱꓸ ꓓꓳ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓠꓬ ꓙꓲ_ ꓟ ꓮ ꓣꓳ ꓡꓳꓸ ꓒꓽ ꓥ ꓟ ꓔꓯ ꓐꓯ ꓔ ꓡꓳ= ꓙꓲ_ ꓟ ꓮ ꓣꓳ ꓡꓳꓸ ꓒ ꓠꓬ ꓮ ꓣꓳ ꓤ ꓐꓱ ꓶ ꓬꓲ ꓢꓯꓼ ꓟꓬ ꓔꓯ ꓖꓶ_ ꓟ ꓚꓱꓹ ꓔꓯ ꓐꓯ ꓡꓳꓹ ꓬꓰ ꓟ ꓡꓰ ꓐꓰ ꓟꓽ ꓡꓳꓹ ꓬꓰ ꓟ ꓠꓵꓻ ꓠꓲꓹ ꓐꓰ ꓠꓲꓹ ꓠꓵꓻ ꓟ ꓔꓯ ꓢꓯꓼ ꓖꓶ ꓔ ꓡꓳ=

ꓬꓰ-ꓢꓴ ꓠꓬ ꓮ ꓣꓳ ꓤ ꓐꓴ ꓔꓯ ꓕꓲ ꓑꓹ ꓞ ꓡꓰ ꓟꓽ ꓥ ꓥ꓾ ꓟꓳꓼ ꓡꓳ ꓥ ꓟꓲ ꓟꓶꓽ ꓘꓶꓼ ꓥ ꓟꓲ ꓡꓳꓸ ꓔꓬ ꓟ ꓥꓳ ꓐꓰ ꓐꓯ ꓔ ꓡꓳ꓾ ꓙꓲ_ ꓟ ꓮ ꓣꓳ ꓡꓳꓸ ꓒꓽ ꓠꓬ ꓬꓲ ꓮ ꓣꓳ ꓤ ꓐꓴ ꓔꓯ ꓢꓷꓸ ꓢꓲ꓾ ꓕꓲ ꓟ ꓤ ꓡꓰ ꓒꓰꓼ ꓬꓰ ꓥ ꓟꓲ ꓟꓳ ꓡꓰ ꓠ ꓗꓪ ꓛꓲ ꓧꓪ_ ꓟ ꓥꓳ꓾ ꓮ ꓣꓳ ꓤ ꓐꓰ ꓕꓲ ꓪ ꓔꓬ ꓢꓲ꓾ ꓬꓲ ꓪ ꓣꓱ ꓬꓯꓼ ꓟ ꓔꓯ ꓬꓰ ꓙ ꓔꓳꓹ ꓙ ꓟ ꓥꓳ꓾ꓢꓲ ꓒ ꓬꓰ-ꓢꓴ ꓠꓬ ꓮ ꓣꓳ ꓜꓴ ꓐꓱ ꓶ ꓬꓲ ꓤꓶꓻ ꓕꓯ ꓡꓯꓼ ꓙꓱ_ ꓟ ꓡꓰ ꓟꓽ ꓞꓲ ꓬꓲ ꓠꓬ ꓕꓲ ꓣꓳ ꓡꓲ ꓕꓲ ꓣꓳ ꓟꓬꓱꓺ ꓔꓯ ꓢꓷꓸ ꓔ ꓟ ꓐꓰ ꓣꓳ ꓙ ꓖꓴ ꓥꓳꓽ ꓡꓰ ꓟꓶꓽ ꓡꓰ ꓥ ꓟꓲ ꓧꓪ ꓟꓳ ꓗꓪ ꓛꓲ ꓧꓪ_ ꓟ ꓥꓳ꓾ ꓣꓳ ꓐꓱ ꓶ ꓬꓲ ꓤꓶꓻ ꓔꓯ ꓡꓯꓽ ꓙꓱꓻ ꓢꓲ꓾ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓖꓶ_ ꓟ ꓙꓲ_ ꓟ ꓮ ꓣꓳ ꓡꓳꓸ ꓒꓽ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ=

ꓔꓲꓺ ꓒ ꓪ ꓔꓲ ꓡꓰ ꓣꓳ ꓐꓱ ꓶ ꓠꓬ ꓚꓵ ꓚꓵ ꓬꓲ ꓢꓯꓼ ꓟꓬ ꓔꓯ ꓡꓯꓼ ꓙꓱ ꓗꓷ ꓟ ꓥꓳ꓾ ꓣꓳ ꓐꓱ ꓶ ꓢꓯꓼ ꓟꓬ ꓖꓶ ꓗꓷ ꓢꓲ꓾ ꓝꓮꓲ ꓢꓯ. ꓬꓲꓼ ꓡ ꓡꓳ꓾ ꓮ ꓫꓵ ꓑꓶ ꓓꓴ ꓐꓯ ꓠꓬ ꓬꓲ ꓣꓳ ꓔꓯ ꓠꓲꓹ ꓠꓵꓻ ꓟ ꓦꓰ ꓣꓳ ꓚꓲ ꓛꓬ ꓟ: ꓟꓳ ꓓ- ꓟ ꓡꓳ. ꓐꓲˍ ꓟ ꓔꓯ ꓬꓲ ꓡꓰ ꓟꓳ ꓖꓶˍ ꓡꓳ=

ꓣꓳ ꓚꓲ ꓛꓬ ꓔꓯ ꓠꓱ. ꓐꓯꓼ ꓢꓴ ꓡꓰ ꓮ ꓡꓰ ꓓꓵ: ꓙˍ ꓟ꓾ ꓟꓲ ꓠꓯ ꓡ ꓞꓳ ꓡꓰ ꓮ ꓡꓰ ꓐꓰ ꓡꓳ. ꓟꓳˍ ꓟ꓾ ꓚꓲ ꓛꓬ ꓧꓪ. ꓡꓰ ꓟ ꓔꓯ ꓡꓳ  ꓠꓬꓲ ꓢꓲ ꓐꓯ ꓔꓳꓹ ꓟ ꓕꓱ ꓟ ꓗꓪ ꓐꓰ ꓣꓳ ꓚꓲ ꓛꓬ ꓠꓬ ꓟ: ꓐꓲ ꓜꓲꓼ ꓢꓰ꓾ ꓚꓲ ꓛꓬ ꓠꓬ ꓥꓳ: ꓡꓰ ꓔꓬ ꓢꓰ ꓡꓳ ꓐꓰ ꓢꓷ. ꓡꓰ ꓝꓲˍ ꓡꓳ=

ꓖꓳ ꓡꓱ ꓥ ꓟꓲ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓐꓱ ꓶ ꓣꓳ ꓠꓬ ꓮ ꓕꓯ ꓥ ꓟꓲ ꓐꓲ ꓜꓲꓼ ꓔꓬ ꓟ ꓔꓯ ꓐꓯ ꓔ ꓡꓳ=ꓖꓳ ꓟ ꓑꓶ ꓓꓴ ꓣꓳ ꓠꓲꓹ ꓟ ꓘꓴ: ꓗꓪ ꓚꓵ ꓚꓵ ꓗꓹ ꓛꓲ ꓟ ꓔꓯ ꓟꓳ ꓠꓹ ꓟ꓾ ꓝꓮꓲ ꓚꓲ ꓛꓬ ꓠꓲꓹ ꓟ ꓘꓴ: ꓙꓪ ꓐꓰ ꓪꓴ-ꓢ ꓔꓯ ꓠꓲꓹ ꓡꓱ ꓡꓱ ꓐꓰ ꓘꓳꓹ ꓣꓴ ꓠꓹ ꓟ ꓐꓰ ꓙꓲˍ ꓟ ꓮ ꓣꓳ ꓡꓳ. ꓒ: ꓬꓲ ꓠꓵꓻ ꓠꓲꓹ ꓡꓯ: ꓒꓯꓹ ꓔꓯ ꓣꓳ ꓘꓳꓹ ꓣꓴ ꓐ ꓡ ꓠꓹ ꓟ ꓪꓴ-ꓢ ꓠꓯꓼ ꓗꓪ ꓪ: ꓘꓴ ꓢꓲ ꓧꓪ ꓠꓹ ꓟ ꓐꓯ ꓔ ꓡꓳ=

ꓚꓵ ꓚꓵ ꓣꓳ ꓤꓶꓻ ꓠꓯꓼ ꓗꓪ ꓟ: ꓡꓳꓹ ꓬꓰ ꓟ ꓪꓴ-ꓢ ꓬꓲ ꓠꓵꓻ ꓠꓲꓹ ꓠꓬ ꓣꓳ ꓔꓯ ꓬꓲ ꓚꓱꓹ ꓙꓳ ꓟ ꓤꓶꓻ ꓔꓯ ꓖꓶˍ ꓟ ꓔꓯ ꓚꓵ ꓚꓵ ꓙꓵꓻ ꓡ ꓘꓳꓹ ꓣꓴ ꓡ꓾ ꓐꓰ ꓓꓵ ꓙ ꓠꓹ ꓟ ꓠ ꓠꓬꓲ ꓔ ꓡꓳ= ꓕꓱ ꓟ ꓔꓯ ꓣꓳ ꓪ: ꓘꓴ ꓔꓬ ꓡꓳ꓾ ꓬꓲ ꓔꓯ ꓪ: ꓘꓴ ꓫꓱ. ꓖꓶ ꓢꓲ꓾ ꓪꓴ-ꓢ ꓠꓯꓼ ꓗꓪ ꓛꓳ ꓫꓱ: ꓪ: ꓘꓴ ꓐ ꓡ ꓡꓳ꓾ ꓣꓳ ꓮ ꓙꓵ ꓐꓱ ꓶ ꓬꓲ ꓤꓶꓻ ꓔꓯ ꓡꓯꓼ ꓙꓱ ꓗꓷ ꓟ ꓐꓰ ꓣꓳ ꓮ ꓙꓵ ꓠꓬ ꓬꓲ ꓐꓱ ꓶ ꓮ ꓘꓶ. ꓒꓵ:ˍ ꓟ ꓔꓯ ꓓꓵ: ꓙ ꓢꓲ꓾ ꓣꓳ ꓥ ꓟꓲ ꓣꓳ ꓤꓶꓻ ꓗꓪ ꓕꓱ ꓟ ꓔꓯ ꓚꓵ ꓚꓵ ꓙꓵꓻ ꓢꓲ꓾ ꓛꓳ ꓫꓱ: ꓠꓬ ꓣꓳ ꓤꓶꓻ ꓗꓪ ꓣꓳ ꓟꓳ ꓡꓰ ꓟ: ꓓ ꓟ ꓔꓯ ꓝꓮꓲ ꓧꓪ ꓟꓳ ꓡ ꓥꓳ꓾ ꓐꓰ ꓢꓯꓼ ꓖꓶ ꓔ ꓡꓳ=