ꓓꓰ ꓟꓲ ꓗꓪ ꓜ ꓜꓲ ꓜꓰꓼˍ ꓟ ꓚ ꓑꓴ ꓐꓰ ꓦꓯꓹ ꓒꓶꓼ ꓟꓬꓽ ꓡ ꓖꓪꓺ ꓡˍ ꓟ ꓔꓯ ꓗꓽ ꓕꓸ ꓐ ꓡ ꓠꓹ ꓟ ꓬꓰ ꓙ ꓢꓴ ꓣꓱꓽ ꓞꓹ ꓔꓬ ꓟ

ꓓꓰ ꓟꓲ ꓗꓪ ꓜ ꓜꓲ ꓜꓰꓼˍ ꓟ ꓚ ꓑꓴ ꓐꓰ ꓦꓯꓹ ꓒꓶꓼ ꓟꓬꓽ ꓡ ꓖꓪꓺ ꓡˍ ꓟ ꓔꓯ ꓗꓽ ꓕꓸ ꓐ ꓡ ꓠꓹ ꓟ ꓬꓰ ꓙ ꓢꓴ ꓣꓱꓽ ꓞꓹ ꓔꓬ ꓟ

ꓲ-ꓬ-ꓪ-ꓔꓲ ꓬꓲꓻ ꓙꓬ ꓟꓬꓲꓔ-ꓢꓳꓠꓰ ꓕꓯꓽ ꓢꓲ ꓢꓴ-ꓑ-ꓣ-ꓐꓴꓟ ꓐꓰ ꓲ-ꓙꓬꓹ-ꓬꓯ ꓡꓳ ꓒꓱ ꓗꓪ ꓟ ꓑ ꓫꓬ ꓐꓴ ꓬꓲ ꓪ ꓦ ꓟꓲ ꓗꓪ ꓜ ꓒꓴ ꓒꓬꓹ ꓟ ꓚꓺ ꓑꓴ ꓠꓬ ꓧꓶꓸ ꓕꓯ ꓟ ꓕꓯꓽ ꓢꓲ ꓛꓲꓺ ꓠꓬꓲꓹ ꓕꓲ ꓘꓳꓼ ꓗꓪ ꓪ ꓜꓲ ꓟꓬꓽ ꓡ ꓔꓬ ꓟ ꓪꓴꓸ ꓠꓬꓲ ꓖꓳ ꓟ ꓔꓯ ꓗꓽ ꓕꓸ ꓐ ꓡ ꓠꓹ ꓟ ꓚꓴꓽ ꓬꓲꓹ ꓖꓶ ꓢꓲ ꓬꓰ ꓙ ꓠꓹ ꓟ ꓑ ꓫꓬ ꓐꓴ ꓡꓰ ꓓꓰꓽ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓗ-ꓛꓲ ꓗꓴꓷꓼ ꓫꓴ ꓟꓰ-ꓘ ꓐꓰ ꓟꓽ-ꓡꓲ-ꓘ ꓬꓲꓻ ꓙꓬ ꓠꓬꓲꓽ ꓗꓴꓸ ꓚꓸꓼ ꓗꓪ ꓜ ꓐꓰ ꓜꓽ ꓪꓳꓽ ꓡꓳ ꓪꓳꓽ ꓐꓴ ꓔꓯ ꓐꓬ ꓡꓰ ꓝꓲˍ ꓟ ꓐꓶꓽ ꓓꓲꓻ꓾ ꓚꓺ ꓑꓴ ꓐꓰ ꓦꓯꓹ ꓒꓶꓼ ꓐꓴ ꓠꓬ ꓮ ꓠꓬꓲꓹ ꓟ ꓕꓯꓽ ꓢꓲ ꓪ ꓜꓲ ꓟꓬꓽ ꓡ ꓔꓬ ꓟ ꓡꓰꓽ ꓟꓽ ꓞꓲꓺ ꓮ ꓟꓶ ꓕꓯ ꓡꓰ ꓜ ꓜꓲ ꓠꓬ ꓐꓬ ꓡꓰ ꓔꓬ ꓡꓳ꓾ ꓐꓰ ꓑ ꓫꓬ ꓕꓲ ꓣꓳ ꓡꓰ ꓐꓯ ꓡꓳ=

ꓲ-ꓖꓴꓟ-ꓡ꓾ ꓲ-ꓐꓮꓳ-ꓔꓴ ꓞꓳ ꓘꓹ ꓐꓴ ꓗꓪ ꓓꓰꓺ ꓟꓲ ꓕꓲ ꓐꓱ ꓦꓯꓹ ꓒꓶꓼ ꓐꓴ ꓡꓰ ꓒꓬꓹ ꓜꓽ ꓗꓷ ꓟ ꓪꓴꓸ ꓠꓬꓲ ꓟꓬꓱꓽ ꓬꓰˍ ꓟ ꓗꓪ ꓐꓰ ꓠꓽ ꓔ ꓪ ꓡꓰ ꓢꓴˍ ꓟꓲ ꓙꓳˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓓꓰꓺ ꓟꓲˍ ꓡꓰꓽ ꓬꓰ ꓜꓽ ꓔꓬ ꓟ ꓑ ꓫꓬ ꓐꓴ ꓐꓱ ꓶ ꓛꓲꓺ ꓠꓬꓲꓹ ꓕꓲ ꓘꓳꓼ ꓗꓪ ꓜ ꓠꓱꓻ ꓟꓽ ꓓꓱꓼ ꓡ ꓢꓰꓽ ꓕꓯ ꓡꓰ ꓚꓺ ꓑꓴ꓾ ꓦꓯꓹ ꓒꓶꓼ ꓐꓴ ꓡꓰ ꓓꓰꓺ ꓟꓲ ꓔꓯ ꓒꓬꓹ ꓡ ꓟ ꓪꓴꓸ ꓠꓬꓲ ꓜꓽ ꓓꓴ ꓟꓽ ꓙꓳ ꓗꓷ ꓡꓰ ꓟ ꓔꓯ ꓙꓳꓺ ꓔꓬ ꓡꓳ꓾ ꓐꓰ ꓖꓳ ꓗꓪ ꓟ ꓑ ꓫꓬ ꓕꓲ ꓣꓳ ꓡꓰ ꓐꓯ ꓟ ꓗꓪ ꓐꓰ ꓢꓷꓸ ꓪ ꓡꓳ=