ꓔꓲꓺ ꓒ ꓪ ꓔꓲ Francis ꓠꓬ ꓧꓶꓽ ꓙꓵꓽ ꓪ ꓙꓳˍ ꓢꓴ ꓐꓴ ꓡꓰ ꓗꓽ ꓕ ꓔꓬ ꓥ ꓟꓲ Shanghai ꓔꓲꓺ ꓒ ꓔꓯ ꓔꓲꓺ ꓒ ꓓꓽ ꓙꓵꓽ ꓪ ꓖꓶ ꓟ ꓓꓳꓽ

ꓔꓲꓺ ꓒ ꓪ ꓔꓲ Francis ꓠꓬ ꓧꓶꓽ ꓙꓵꓽ ꓪ ꓙꓳˍ ꓢꓴ ꓐꓴ ꓡꓰ ꓗꓽ ꓕ ꓔꓬ ꓥ ꓟꓲ Shanghai ꓔꓲꓺ ꓒ ꓔꓯ ꓔꓲꓺ ꓒ ꓓꓽ ꓙꓵꓽ ꓪ ꓖꓶ ꓟ ꓓꓳꓽ

7 ꓦ ꓟ 15 ꓠꓬꓲ 2023 ꓘꓳꓼ ꓕꓯ ꓔꓲꓺ ꓒ ꓪ ꓔꓲ Francis ꓠꓬ ꓧꓶꓽ ꓙꓵꓽ ꓪ ꓙꓳˍ ꓢꓴ ꓐꓴ ꓡꓰ ꓗꓽ ꓕꓽ ꓔꓬ ꓥ ꓟꓲ Shanghai ꓔꓲꓺ ꓒ ꓔꓯ ꓔꓲꓺ ꓒ ꓓꓽ ꓙꓵꓽ ꓪ ꓡꓯ ꓙꓱ ꓓꓴ ꓥꓳ ꓐꓰ ꓐꓯ ꓔ ꓡꓳ꓿ Vatican ꓗꓴꓷꓼ ꓗꓪ ꓐꓰ ꓫ. ꓕꓱ ꓠ, ꓟ ꓙꓵꓽ ꓪ ꓙꓳˍ ꓢꓴ ꓔꓲꓺ ꓒ ꓓꓽ Pietro Parolin ꓡꓰ ꓐꓯ ꓔ ꓟ ꓠꓬ ꓧꓶꓽ ꓗꓴꓷꓼ ꓗꓪ ꓐꓰ ꓙꓵꓽ ꓪ ꓙꓳˍ ꓢꓴ ꓐꓴ ꓠꓬ Shanghai ꓗꓪ ꓔꓬ ꓟ ꓗ‐ꓔꓳ‐ꓡꓲ ꓔꓲꓺ ꓒ ꓐꓴ ꓡꓰ ꓟꓽ ꓔꓱ, ꓟꓽ ꓜꓳ, ꓟ ꓚꓱ, ꓗꓪ ꓐꓰ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓠ, ꓟ ꓐꓯ ꓔꓬ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓘꓴ ꓜꓲꓼ ꓞꓳ ꓔꓯ ꓔꓱ, ꓚꓵ ꓟ ꓚꓱ, ꓗꓪ ꓐꓰ ꓙꓲ‐ꓢꓴ ꓢꓲꓺ ꓒ ꓐꓴ ꓔꓯ ꓧꓳꓽ ꓠ, ꓟ ꓮ ꓕꓯ ꓥ ꓟꓲ ꓢꓯꓼ ꓕꓵꓼ ꓔꓬ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿

ꓔꓲꓺ ꓒ ꓓ ꓡꓰ ꓐꓯ ꓔ ꓟ ꓠꓬ ꓔꓲꓺ ꓒ ꓪ ꓔꓲ ꓡꓰ ꓒꓬꓱꓼ ꓠꓲ, ꓫꓵ ꓟ ꓠꓬ ꓔꓲꓺ ꓒ ꓓ ꓐꓴ ꓙꓵꓽ ꓪ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓐꓱ ꓶ ꓶꓼ ꓓꓳꓽ ꓫꓱ, ꓓꓳ ꓚꓺ ꓟ ꓖꓶ ꓟ ꓐꓰ ꓦꓻ ꓕꓲ ꓒꓳ, ꓗꓪ ꓮ ꓡꓰ ꓪꓴꓽ ꓟꓴ ꓡ ꓠ, ꓟ ꓐꓰ ꓟꓲ ꓠꓯ ꓢꓷ. ꓠꓲ, ꓔꓯ ꓙꓲ‐ꓢꓴ ꓢꓲꓺ ꓒ ꓐꓴ ꓐꓱ ꓶ ꓮ ꓡꓰ ꓐꓰ ꓟ. ꓖꓶ ꓠ, ꓟ ꓬꓰ ꓠ, ꓟ ꓓꓵꓽ ꓙ ꓔ ꓡꓳ ꓐꓰ ꓐꓯ ꓔ ꓡꓳ꓿ Vatican ꓠꓬ ꓧꓶꓽ ꓙꓵꓽ ꓪ ꓙꓳˍ ꓢꓴ ꓐꓴ ꓗꓽ ꓕꓽ ꓔꓬ ꓥ ꓟꓲ ꓔꓲꓺ ꓒ ꓓꓽ ꓙꓳꓢꓰꓑꓧ ꓢꓧꓰꓠꓑꓲꓠ ꓔꓯ ꓗꓳ. ꓗꓷ ꓟ 4 ꓦ ꓕꓯ ꓔꓲꓺ ꓒ ꓓꓽ ꓙꓵꓽ ꓪ ꓖꓶ ꓗꓷ ꓟ ꓥ ꓡꓳ꓿

ꓔꓲꓺ ꓒ ꓓꓽ ꓙꓳꓢꓰꓑꓧ ꓠꓬ ꓠꓬꓲꓽ ꓣꓳ ꓕꓲ ꓣꓳ ꓟ ꓧꓶꓽ ꓙꓵꓽ ꓪ ꓙꓳˍ ꓢꓴ ꓐꓴ ꓡꓰ ꓗꓽ ꓕꓽ ꓔꓬ ꓥ ꓟꓲ ꓦꓮꓔꓲꓚꓮꓠ ꓗꓪ ꓐꓰ ꓔꓲꓺ ꓒ ꓓꓽ ꓙꓵꓽ ꓪ ꓡꓯ ꓙꓱꓼ ꓗꓷ ꓢꓴ ꓔꓲꓺ ꓒ ꓓ ꓥ ꓡꓳ꓿ ꓦꓮꓔꓲꓚꓮꓠ ꓐꓰ ꓧꓶꓽ ꓗꓴꓷꓼ ꓠꓬ ꓗꓳ. ꓗꓷ ꓟ 2018 ꓘꓳꓼ ꓕꓯ ꓪꓽ ꓡꓯ ꓘꓳ, ꓠ, ꓟ ꓕꓳ ꓶ ꓐꓳ ꓔꓲ. ꓗꓷ ꓟ ꓥ ꓡꓳ꓿ ꓝꓮꓲ 2021‐ꓐꓰ 2022 ꓘꓳꓼ ꓕꓯ ꓥ ꓟꓲ ꓪꓽ ꓡꓯ ꓘꓳ, ꓠ, ꓟ ꓕꓳ ꓶ ꓐꓳ ꓔ ꓟ ꓥ ꓡꓳ꓿ ꓧꓶꓽ ꓗꓴꓷꓼ ꓐꓰ ꓦꓮꓔꓲꓚꓮꓠ ꓗꓴꓷꓼꓙ ꓐꓴ ꓮ ꓕꓯ ꓥ ꓟꓲ ꓙꓻ ꓡꓯ ꓘꓳ, ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓗꓪ ꓪꓴꓽ ꓟꓴ ꓡ ꓠ, ꓟ ꓖꓪ ꓙꓱ ꓡꓯ ꓘꓳ, ꓠ, ꓟ ꓢꓯꓼ ꓕꓵꓼ ꓔꓬ ꓟ ꓥ ꓡꓳ꓿ ꓗꓳ. ꓗꓷ ꓟ ꓙꓵ, ꓕꓯ ꓧꓶꓽ ꓗꓴꓷꓼ ꓗꓪ ꓠꓬ ꓦꓻ ꓡꓱ ꓢꓴ ꓐꓴ ꓔꓯ ꓮ ꓟꓬ, ꓫ. ꓓꓴ ꓟꓷꓼ ꓓꓴ ꓖꓶ ꓟ ꓗꓴꓷꓼ ꓕꓲ ꓗꓴꓷꓼ ꓟꓲ ꓥ ꓡꓳ꓿

ꓖꓳ ꓡꓱ ꓥ ꓟꓲ ꓮ ꓟꓶ ꓟ ꓙꓵ, ꓗꓪ ꓠꓬ ꓦꓻ ꓡꓱ ꓢꓴ ꓐꓴ ꓪꓴ‐ꓢ ꓔꓯ ꓗ, ꓛꓲꓽ ꓛꓲ ꓡꓰ ꓪꓽ ꓘꓴ ꓟꓶ ꓟ ꓟꓲ ꓥ ꓡꓳ꓿ ꓧꓶꓽ ꓗꓴꓷꓼ ꓗꓪ ꓠꓬ ꓗ‐ꓔꓳ‐ꓡꓲ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓟꓬ, ꓔꓬ ꓟ ꓗꓴꓷꓼ ꓕꓲ ꓗꓴꓷꓼ ꓟꓲ ꓥ ꓡꓳ ꓐꓰ (Catholic News Agency) ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿