ꓔꓲꓺ ꓒ ꓪ ꓔꓲ Francis ꓠꓬ Ukraine ꓗꓴꓷꓼ ꓙꓵꓽ ꓢꓴ ꓢꓲ ꓒꓽ Volodymyr Zelenskyy ꓔꓯ Vatican ꓡꓳ ꓒꓱ ꓗꓪ ꓜꓲ ꓡꓯꓼ ꓘꓳ_ ꓟ ꓓꓳꓽ

Monday, May 15, 2023

ꓔꓲꓺ ꓒ ꓪ ꓔꓲ Francis ꓠꓬ Ukraine ꓗꓴꓷꓼ ꓙꓵꓽ ꓢꓴ ꓢꓲ ꓒꓽ Volodymyr Zelenskyy ꓔꓯ Vatican ꓡꓳ ꓒꓱ ꓗꓪ ꓜꓲ ꓡꓯꓼ ꓘꓳ_ ꓟ ꓓꓳꓽ

5 ꓦ ꓟ 13 ꓠꓬꓲ 2023 ꓘꓳꓼ ꓕꓯ ꓔꓲꓺ ꓒ ꓪ ꓔꓲ Francis ꓠꓬ Ukraine ꓗꓴꓷꓼ ꓙꓵꓽ ꓢꓴ ꓢꓲ ꓒꓽ Volodymyr Zelenskyy ꓔꓯ Vatican ꓡꓳ ꓒꓱ ꓗꓪ ꓜꓲ ꓗꓷꓳ ꓐꓰ ꓐꓯ ꓔ ꓡꓳ꓿ ꓕꓱ ꓜꓲ ꓡꓯꓼ ꓘꓳ_ ꓟ ꓠꓬ ꓴꓗꓣꓮꓲꓠꓰ ꓗꓴꓷꓼ ꓔꓯ ꓣ‐ꓫ ꓗꓴꓷꓼ ꓡꓰ ꓟꓯꓼ ꓓꓶꓽ ꓡ ꓗꓷ ꓗ. ꓠꓯ ꓬꓲ. ꓪꓴ. ꓕꓲ ꓧꓪ, ꓟ ꓜꓲ ꓡꓯꓼ ꓘꓳ, ꓟ ꓥ ꓡꓳ꓿ ꓔꓲꓺ ꓒ ꓪ ꓔꓲ ꓐꓰ ꓴꓗꓣꓮꓲꓠꓰ ꓗꓴꓷꓼ ꓙꓵꓽ ꓢꓲ ꓒꓽ ꓐꓴ ꓠꓬ ꓬꓲ. ꓗꓳ, ꓤ ꓕꓲ ꓗꓳ, ꓗꓪ ꓜꓲ ꓡꓯꓼ ꓘꓳ, ꓗꓷ ꓟ ꓥ ꓡꓳ꓿

ꓓꓽ ꓪꓴ. ꓕꓯ ꓔꓲꓺ ꓒ ꓪ ꓔꓲ ꓠꓬ ꓘꓳ, ꓣꓴ ꓢꓲ ꓠꓬꓲ ꓡꓯꓽ ꓒꓯ, ꓧꓪ. ꓗꓷ ꓟ ꓥ ꓡꓳ꓿ ꓝꓮꓲ ꓟꓯꓼ ꓢꓰꓼ ꓡꓯ ꓘꓳ, ꓟ ꓪꓴ. ꓠꓬꓲ ꓑ ꓫꓬ ꓐꓴ ꓫ. ꓔꓬ ꓟ ꓔꓯ ꓠꓲ, ꓟ ꓟꓽ ꓢ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰ ꓐꓯ ꓟ. ꓖꓶ ꓗꓷ ꓟ ꓥ ꓡꓳ꓿ ꓴꓗꓣꓮꓲꓠꓰ ꓗꓴꓷꓼ ꓗꓪ ꓔꓬ ꓟ ꓑ ꓫꓬ ꓐꓴ ꓮ ꓘꓶ. ꓛꓲ ꓫ. ꓔꓬ ꓟ ꓔꓯ ꓠꓻ ꓡꓳ ꓢꓷ. ꓔꓬ ꓟ ꓪꓴ. ꓠꓬꓲ ꓮ ꓘꓶ. ꓠꓲ, ꓟ ꓫ. ꓔꓬ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓗꓷ ꓟ ꓥ ꓡꓳ꓿

ꓔꓲꓺ ꓒ ꓪ ꓔꓲ ꓡꓰ ꓴꓗꓣꓮꓲꓠꓰ ꓗꓴꓷꓼ ꓔꓯ ꓣ‐ ꓫ ꓗꓴꓷꓼ ꓡꓰ ꓢꓰꓼ ꓡ ꓟ ꓠꓽ ꓡꓰ ꓠ, ꓟ ꓪꓴ‐ꓢ ꓠꓯꓼ ꓗꓪ ꓪꓽ ꓘꓴ ꓙ ꓔꓬ ꓟ ꓐꓰ ꓢꓲ ꓡꓲ, ꓟꓶ ꓠ, ꓟ ꓢꓯꓼ ꓕꓵꓼ ꓔꓬ ꓟ ꓔꓯ ꓔꓲꓺ ꓒ ꓪ ꓡꓰ ꓐꓯ ꓟ. ꓖꓶ ꓗꓷꓳ꓿ ꓴꓗꓣꓮꓲꓠꓰ ꓗꓴꓷꓼ ꓗꓪ ꓝꓴꓲ ꓟꓽ ꓙꓳ ꓟ ꓤ ꓠꓱ ꓤ ꓐꓴ ꓐꓰ ꓑ ꓫꓬ ꓐꓴ ꓮ ꓟꓬ, ꓫꓵꓻ ꓡꓰ ꓟ ꓔꓯ ꓠꓲ, ꓟ ꓟꓽ ꓢꓽ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓗꓷꓳ꓿

ꓝꓮꓲ ꓴꓗꓣꓮꓲꓠꓰ ꓗꓴꓷꓼ ꓙꓵꓽ ꓢꓲ ꓒꓽ ꓠꓬ ꓔꓲꓺ ꓒ ꓪ ꓔꓲ ꓡꓰ ꓟ, ꓟ ꓟ‐ꓡꓲ ꓐꓰ ꓢꓲꓺ ꓒ ꓬꓰ‐ꓢꓴ ꓐꓬꓱ ꓐꓳ ꓔ ꓟ ꓔꓯ ꓡꓯ ꓫꓴꓻ ꓖꓶ ꓗꓷ ꓟ ꓥ ꓡꓳ꓿ ꓕꓱ ꓟ ꓠꓬ ꓴꓗꓣꓮꓲꓠꓰ ꓗꓴꓷꓼ ꓘꓴꓽ ꓗꓪ ꓝꓴꓲ ꓟꓽ ꓙꓳˍ ꓟ ꓤ ꓠꓱ ꓤ ꓐꓴ ꓫꓵꓻ ꓡꓰ ꓟ ꓔꓯ ꓢꓷ. ꓡꓰ ꓓꓴ ꓥ ꓡꓳ ꓐꓰ ꓴꓗꓣꓮꓲꓠꓰ ꓗꓴꓷꓼ ꓙꓵꓽ ꓢꓲ ꓒꓽ ꓡꓰ ꓐꓯ ꓔ ꓡꓳ꓿

ꓔꓲꓺ ꓒ ꓪ ꓔꓲ ꓥ ꓟꓲ ꓴꓗꓣꓮꓲꓠꓰ ꓗꓴꓷꓼ ꓞ ꓞ ꓢꓲ ꓡꓲ, ꓟꓶ ꓠ, ꓟ ꓪꓽ ꓘꓴ ꓙ ꓖꓶ ꓟ ꓐꓰ ꓬꓲ. ꓒꓳ, ꓒꓳ, ꓗꓪ ꓐꓰ ꓬꓰ ꓙ ꓓꓴ ꓥꓳ ꓐꓰ ꓐꓯ ꓔ ꓡꓳ꓿ ꓴꓗꓣꓮꓲꓠꓰ ꓗꓴꓷꓼ ꓙꓵꓽ ꓢꓲ ꓒꓽ ꓠꓬ Vatican ꓡꓳ ꓒꓱ ꓗꓪ ꓠꓽ ꓡꓲ ꓕꓲ ꓙꓵ, ꓔꓬ ꓗꓷ ꓢꓲ ꓠꓬꓲ ꓮ ꓟꓬ, ꓚꓱ, ꓔꓯ ꓖꓪꓻ ꓙꓱ ꓡꓯ ꓘꓳ ꓗꓷ ꓐꓰ (Vatican news )ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿