ꓠꓬꓲ. ꓠꓬꓲ ꓐꓱ ꓶ ꓣꓦꓮ ꓡꓲ‐ꓢꓴ ꓓꓳꓽ

(1)ꓟꓯꓼ ꓘꓶ ꓡꓶꓽˍ ꓟ ꓪꓴꓸ ꓠꓬꓲ ꓘꓰꓹ ꓙꓬ ꓙꓰ ꓢꓴ ꓐꓴ ꓔꓯ ꓘꓴ ꓜꓲ ꓞꓳ ꓐꓴ ꓡꓰ ꓜꓽ ꓓꓴ ꓬꓰ ꓙˍ ꓟ ꓓꓳꓽ

ꓗ-ꓛꓲ ꓗꓴꓷꓼ ꓫꓴ ꓑꓴ-ꓔ-ꓳ ꓡꓳ ꓒꓱ ꓗꓪ ꓟ ꓘꓴ ꓜꓲꓼ ꓞꓳ ꓐꓴ ꓡꓰ 2 ꓦ 14 ꓠꓬꓲ ꓕꓯ ꓟꓯꓼ ꓘꓶ ꓡꓶꓽˍ ꓟ ꓪꓴꓸ ꓠꓬꓲ ꓘꓰꓹ ꓑꓬ ꓔꓬ ꓢꓴ ꓐꓴ ꓐꓱ ꓶ ꓜꓽ ꓓꓴ ꓔꓳꓹ ꓙ ꓗꓷꓳ꓾ ꓐꓰ ꓢꓷ ꓪˍ ꓡꓳ=

2022 ꓘꓳꓼ 2 ꓦ 1 ꓠꓬꓲ ꓕꓯ ꓙꓱ ꓦꓲ ꓕꓲ ꓢꓶꓽ ꓗꓪ ꓐꓰ ꓐꓳꓽ ꓡꓳ ꓩꓴˍ ꓟ ꓟꓶ ꓡꓰ ꓗ ꓠꓯ ꓢꓴ-ꓑꓲ-ꓬꓯꓥ ꓞꓳ ꓘꓹ ꓢꓴ ꓐꓴ ꓠꓬ ꓢꓲꓹ ꓠꓯ ꓗꓪ ꓘꓰꓹ ꓑꓬ ꓔꓬ ꓪˍ ꓟ ꓥ ꓡꓳ=

ꓮ ꓟꓶ ꓠꓬ ꓢꓴ-ꓑꓲ-ꓬꓯꓥ ꓘꓹ ꓗꓪ ꓐꓰ ꓞꓳ ꓦꓲꓻ 170 ꓦꓲꓻ꓾ ꓲ-ꓢꓰ-ꓬꓯꓥ ꓗꓪ ꓐꓰ 50 ꓦꓲꓻ꓾ ꓡꓴ-ꓫꓬ-ꓬꓯꓥ ꓗꓪ ꓐꓰ 600 ꓦꓲꓻ ꓛꓲ ꓘꓰꓹ ꓑꓬ ꓔꓬ ꓖꓴˍ ꓟ ꓥ ꓢꓲ꓾ ꓦꓲꓻ ꓔꓯ ꓡꓳꓸ ꓠꓹ ꓟ ꓕꓲ ꓦꓲꓻ ꓗꓪ ꓕꓲ ꓣꓳˍ ꓡꓰꓽ ꓤꓰꓻ ꓞꓹ ꓟ ꓥ ꓡꓳ꓾ ꓐꓰ ꓣꓦꓮ ꓓꓳꓽ ꓗꓪ ꓐꓯ ꓔ ꓡꓳ=

(2) ꓲ-ꓓꓲ-ꓬ ꓗꓪ 45 ꓠꓬꓲ ꓘꓴꓽ ꓠꓯꓸꓼ ꓗꓪ ꓙꓲ-ꓢꓴ ꓢꓲꓺ ꓤ ꓐꓴ ꓔꓯ ꓘꓶ ꓙꓵˍ ꓟ 53 ꓟ ꓙꓳ ꓡꓰ ꓟ ꓓꓳꓽ

United Christian Forum (UCF) ꓗꓪ ꓐꓰ ꓧꓪ ꓟꓰꓹ ꓓꓳ ꓔ ꓟ ꓗꓪ ꓠꓬ ꓲ-ꓓꓲ-ꓬ ꓗꓪ 2021 ꓘꓳꓼ ꓕꓯ ꓙꓲ-ꓢꓴ ꓢꓲꓺ ꓤ ꓐꓴ ꓔꓯ ꓘꓶ ꓙꓵˍ ꓟ 505 ꓟ ꓙꓳ ꓗꓷ ꓟ ꓥ ꓢꓲ ꓠꓬꓲ꓾ ꓮ ꓟꓶ 2022 ꓘꓳꓼ ꓗꓪ ꓠꓬ 45 ꓠꓬꓲꓽ ꓘꓴꓽ ꓠꓯꓸꓼ ꓗꓪ ꓘꓶ ꓙꓵˍ ꓟ 53 ꓟ ꓙꓳ ꓡꓰꓳ꓾ ꓐꓰ ꓢꓷꓸ ꓪˍ ꓡꓳ=

ꓲ-ꓓꓲ-ꓬ ꓗꓪ ꓗꓴꓷꓼ ꓙꓵꓽ ꓢꓴ ꓟꓯꓹ ꓢꓲˍ ꓟ ꓦꓬꓼ ꓠꓬꓲ ꓠꓶꓽ ꓡ ꓔꓬ ꓠꓬꓲ ꓑ-ꓔꓲ ꓐꓴ ꓠꓬ ꓔꓯꓺ ꓡꓯ ꓘꓳꓹ ꓟ ꓮ ꓟꓬꓹ ꓓꓳ ꓡ ꓥˍ ꓟꓲ꓾ ꓞꓳ ꓤ ꓮ ꓟꓬꓹ ꓟꓽ ꓙꓳ ꓟ ꓢꓲꓺ ꓤ ꓠꓲˍ ꓟ ꓙꓲ-ꓢꓴ ꓢꓲꓺ ꓤ ꓐꓰ ꓟꓴ-ꓢ-ꓡꓲ ꓐꓴ ꓐꓱ ꓶ ꓮ ꓡꓰ ꓑ-ꓔꓲ ꓕꓲ ꓟˍ ꓟꓲ ꓫꓸ ꓕꓱ ꓔꓬ ꓟ ꓟꓽ ꓙꓳ=

2011 ꓘꓳꓼ ꓗꓴꓷꓼ ꓗꓪ ꓞꓳ ꓵ ꓟꓬꓱ ꓖꓳ ꓔ ꓟ ꓗꓪ ꓙꓲ-ꓢꓴ ꓢꓲꓺ ꓤ ꓐꓴ ꓠꓬ ꓗꓴꓷꓼ ꓑ ꓫꓬ ꓮ ꓙꓵꓽ ꓘꓴꓽ ꓗꓪ 2ꓸ3% ꓡꓰꓽ ꓙꓳˍ ꓡꓳ=

ꓧꓲꓠꓓꓴ ꓦ ꓡꓱ ꓢꓴ ꓟꓽ ꓓ ꓟꓬꓹ ꓟ ꓗꓴꓷꓼ ꓗꓪ ꓢꓲꓺ ꓤ ꓠꓲˍ ꓟ ꓙꓲ-ꓢꓴ ꓢꓲꓺ ꓤ ꓐꓴ ꓠꓬ ꓥꓳ ꓡꓳꓸ ꓖꓴ ꓟꓽ ꓙꓳ ꓓꓹ ꓡꓳ ꓐꓰ꓾ ꓣꓦꓮ ꓓꓳꓽ ꓗꓪ ꓐꓯ ꓔ ꓡꓳ=

(3) ꓟꓬ-ꓟ ꓟꓯꓼ ꓙꓱ ꓦꓲ ꓕꓲ ꓢꓶꓽ ꓞꓰ ꓡꓰ ꓟ ꓓꓳꓽ

ꓢꓰꓼ-ꓗꓸ ꓟꓵꓽ ꓫꓴ꓾ ꓢꓰꓼ-ꓗꓸ ꓡꓳ ꓒꓱ꓾ ꓳ-ꓔꓮꓪ ꓘꓹ ꓒ ꓕꓲ ꓗꓪ ꓟ ꓬꓲꓻ ꓙꓬ ꓘꓴꓽ ꓗꓪ 2 ꓦ 16 ꓠꓬꓲ ꓮ ꓟꓰ ꓕꓯ ꓟꓯꓼ ꓙꓱ ꓦꓲ ꓕꓲ ꓢꓶꓽ ꓞꓰ ꓡꓰ ꓢꓲ ꓫꓵꓻ ꓟꓳ ꓕꓲ ꓟ ꓟꓳ ꓔ ꓡꓳ꓾ ꓐꓰ ꓢꓷꓸ ꓪˍ ꓡꓳ=

ꓞꓰ ꓡꓰ ꓟ ꓙꓱ ꓦꓲ ꓠꓬ ꓠꓮꓠꓚꓧꓮꓠꓖ ꓮ-5ꓚ ꓝꓮꓠꓔꓮꓠ ꓙꓱ ꓦꓲ ꓥ ꓢꓲ ꓠꓬꓲ ꓧꓶꓽ ꓟꓵꓽ ꓗꓪ ꓐꓰ ꓫꓬꓹ ꓔ ꓟ ꓥ ꓡꓳ꓾ ꓐꓰ ꓑ ꓙ ꓪˍ ꓡꓳ꓾ ꓐꓰ ꓣꓝꓮ ꓓꓳꓽ ꓗꓪ ꓐꓯ ꓔ ꓡꓳ=

(4) ꓬꓲ ꓪꓴꓸ ꓕꓲ ꓧꓪꓹ ꓟ ꓗ-ꓛꓲ ꓗꓴꓷꓼ ꓫꓴ ꓗꓪ ꓟ ꓞꓳ ꓫꓵꓽ ꓐꓴ ꓗꓪ ꓟ ꓤ ꓟꓶ ꓤ ꓐꓴ ꓜꓲꓼ ꓡꓯ ꓘꓳ ꓢꓲ ꓖꓪ ꓙꓱˍ ꓟ ꓓꓳꓽ

ꓗ-ꓛꓲ ꓗꓴꓷꓼ ꓫꓴ꓾ ꓟꓶꓽ-ꓚꓲ-ꓠ ꓡꓳ ꓒꓱ꓾ ꓫꓲ-ꓔ-ꓑꓴ ꓗꓪ ꓒꓴ ꓔ ꓟ ꓗ-ꓛꓲ ꓫꓵꓽ ꓐꓴ ꓕꓳꓽ ꓶ ꓐꓰ ꓡꓲꓽ ꓒꓰꓼ ꓜꓴꓻ ꓚꓰ ꓣꓳˍ ꓦꓲ ꓗꓪ ꓬꓲ ꓪꓴꓸ ꓕꓲ ꓧꓪꓹ ꓟ ꓤ ꓟꓶ ꓤ ꓐꓴ ꓜꓲꓼ ꓡꓯ ꓘꓳ ꓢꓲ ꓖꓪ ꓙꓱˍ ꓟ ꓔꓯ ꓮ ꓟꓰ 2 ꓦ 16 ꓠꓬꓲ ꓕꓯ ꓬꓰ ꓪꓴꓸ ꓔꓴ ꓗꓷꓳ=

ꓖꓪ ꓙꓱ ꓜꓲꓼ ꓓꓴ ꓔꓯ ꓠꓬ 2 ꓦ 16 ꓠꓬꓲ ꓗꓪ ꓐꓰ 2 ꓦ 18 ꓠꓬꓲ ꓗꓪ ꓛꓲ ꓬꓰ ꓠꓹ ꓟ ꓥ ꓡꓳ= ꓖꓪ ꓙꓱ ꓜꓲꓼ ꓓꓴ ꓕꓱ ꓟ ꓗꓪ ꓠꓬ ꓟꓬ-ꓟ ꓗꓴꓷꓼ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓚꓳꓸ ꓗ-ꓛꓲ ꓞꓳ ꓫꓵꓽ ꓤ ꓟꓶ ꓤ ꓬꓲ ꓞꓲ 150 ꓣꓳ ꓛꓲ ꓜꓲꓼ ꓡ ꓟ ꓥ ꓡꓳ=

ꓖꓪ ꓙꓱ ꓜꓲꓼ ꓓꓴ ꓗꓪ ꓠꓬ ꓟꓽ ꓪ ꓡꓯ ꓘꓳ꓾ ꓟꓽ ꓫꓱꓸ ꓡꓯ ꓘꓳ ꓟ ꓓꓵꓽ ꓙ ꓚꓱꓹ꓾ ꓞꓳ ꓫꓱꓽ ꓚꓱꓹ ꓐꓴ ꓔꓯ ꓡꓳꓽ ꓗꓷ ꓢꓲ ꓪꓽ ꓡꓯ ꓘꓳꓹ ꓟ ꓚꓱꓹ ꓔꓯ ꓫꓬꓹ ꓔꓶ ꓢꓲ ꓠꓬꓲ ꓕꓲ ꓠꓲꓹ ꓕꓲ ꓪ ꓐꓰ ꓟꓲ ꓕꓯ ꓢꓲ ꓗꓪ ꓞꓳ ꓫꓱꓽ ꓙꓰ ꓠꓹ ꓟ ꓔꓶꓻ ꓙꓱꓼ ꓗꓷ ꓢꓲ ꓮ ꓟꓶ ꓟ ꓡꓰ ꓖꓪ ꓙꓱꓻ ꓜꓲꓼ ꓓꓴ ꓔꓯ ꓬꓰˍ ꓟ ꓥ ꓡꓳ꓾ ꓐꓰ ꓢꓷꓸ ꓪˍ ꓡꓳ=