ꓣꓦꓮ ꓡꓲ-ꓢꓴ ꓓꓳꓽ

 1ꓸꓟꓬ-ꓟ ꓗꓴꓷꓼ ꓗꓪ Covid-19 ꓠꓻ ꓫꓵ: ꓠꓸꓹꓢꓴ (17) ꓣꓳ ꓙꓳˍ ꓡꓳ ꓐꓰ ꓠꓯꓻ ꓞꓲꓼ ꓟꓬꓱꓽ ꓣꓱꓽ ꓜꓴ ꓐꓴ ꓡꓰ ꓐꓯ ꓟ ꓓꓳꓽ

ꓟꓬ-ꓟ ꓗꓴꓷꓼ ꓗꓪ Covid-19 ꓠꓻ ꓫꓵꓽ ꓠꓸꓹꓢꓴ (17) ꓣꓳ ꓙꓳˍ ꓡꓳ ꓐꓰ ꓠꓯꓻ ꓞꓲꓼ ꓟꓬꓱꓽ ꓣꓱꓽ ꓜꓴ ꓐꓴ ꓡꓰ ꓐꓯ ꓡꓳ ꓐꓰ ꓢꓷꓸ ꓪ ꓡꓳ=

ꓮ ꓟꓶ covid-19 ꓠꓸꓹ ꓫꓵꓽ ꓠꓬ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓠꓸꓹ ꓔꓬ ꓟ ꓑꓶꓸ ꓓꓴ ꓑ ꓫꓬ ꓐꓴ ꓤ ꓟꓴ ꓓꓴ ꓬꓰ ꓡꓯ ꓐꓰ ꓠꓯꓸꓹ ꓞꓲꓼ ꓟꓬꓱꓽ ꓣꓱꓽ ꓜꓴ ꓐꓴ ꓡꓰ ꓐꓯ ꓩꓴ ꓡ ꓡꓳ ꓐꓰ ꓢꓷꓸ ꓪ ꓡꓳ= ꓠꓯꓸꓹ ꓞꓲꓼ ꓟꓽ ꓗꓸꓦ ꓢꓴ ꓐꓴ ꓮ ꓙꓵꓽ ꓚꓳꓦꓲꓓ-19 ꓠꓸꓹ ꓗ ꓠꓯꓸꓹ ꓞꓲꓼ ꓗꓸ ꓓꓴ ꓬꓰ ꓡꓯ ꓐꓰ ꓠꓯꓻ ꓞꓲꓼ ꓟꓬꓱꓽ ꓣꓱꓽ ꓜꓴ ꓐꓴ ꓡꓰ ꓢꓷꓸ ꓝꓲ ꓩꓴ ꓡ ꓡꓳ꓾ ꓐꓰ Popular News Journal ꓓꓳꓽ ꓗꓪ ꓐꓯ ꓔ ꓡꓳ=

2ꓸ ꓡꓯꓹ-ꓗꓴꓸ ꓡꓳ ꓒꓱ ꓢꓲꓸ-ꓑꓬꓲꓠ-ꓟꓬꓳꓴꓔ ꓞꓳ ꓘꓹ ꓘꓴꓽ ꓗꓪ ꓬꓲꓸꓹ ꓙꓬ ꓓꓵꓽ ꓡ ꓟ ꓓꓳꓽ

 ꓟꓶꓽ ꓦ ꓮ ꓟꓬꓹ ꓦ ꓡˍ ꓟ ꓪꓴꓸ ꓠꓬꓲ ꓡꓯꓹ-ꓗꓴꓸ ꓡꓳ ꓒꓱ ꓢꓲꓸ-ꓑꓬꓲꓠ-ꓟꓬꓳꓴꓠꓔ ꓞꓳ ꓘꓹ ꓘꓴꓽ ꓗꓪ ꓬꓲꓸꓹ ꓙꓬ ꓓꓵꓽ ꓡ ꓟ ꓪꓴꓸ ꓠꓬꓲ ꓞꓳ ꓘꓹ ꓘꓴꓽ ꓗꓪ ꓔꓬ ꓟ ꓙꓲꓻ ꓟ ꓑꓶꓸ ꓓꓴ ꓠꓱꓸ ꓐꓯ ꓬꓲꓸꓹ ꓙꓬ ꓟꓽ ꓓꓵꓽ ꓡ ꓟ ꓞꓳ ꓘꓹ ꓗꓪ ꓔꓬ ꓠꓹ ꓟ ꓐꓱ ꓶ ꓮ ꓔꓳꓸ ꓢꓰꓼ ꓜꓴ ꓐꓴ ꓡꓰ ꓬꓰ ꓙ ꓪ ꓡꓰꓳ ꓐꓰ ꓐꓯ ꓡꓳ ꓐꓰ ꓢꓷꓸ ꓪ ꓡꓳ=

ꓟꓶꓽ ꓦ ꓮ ꓟꓬꓹ ꓦ ꓡˍ ꓟ ꓪꓴꓸ ꓠꓬꓲ ꓥ-ꓟꓳꓹ-ꓬꓰꓲꓗ ꓬꓲꓸꓹ ꓙꓬ ꓡꓳ ꓬꓲꓸꓹ ꓙꓬ ꓙꓵꓽ ꓡ ꓟ ꓑꓶꓸ ꓓꓴ ꓡꓳꓹ ꓬꓰ ꓟ (16) ꓠꓬꓲ ꓗꓪ ꓐꓰ ꓞꓳ ꓘꓹ ꓘꓴꓽ ꓗꓪ ꓬꓲꓸꓹ ꓙꓬ ꓓꓵꓽ ꓡ ꓟ ꓥ ꓡꓳ ꓐꓰ ꓢꓷꓸ ꓪ ꓡꓳ= ꓮ ꓟꓶ ꓠꓬ ꓟꓶꓽ ꓦ ꓦ ꓠꓽ ꓬꓰ ꓟ ꓪꓴꓸ ꓠꓬꓲ ꓥ-ꓟꓳꓹ-ꓬꓰꓲꓗ ꓬꓲꓸꓹ ꓙꓬ ꓡꓳˍ ꓟꓲ ꓙꓵꓽ ꓠꓽ ꓡꓰꓳ ꓐꓰ ꓐꓯ ꓡꓳ= 

3ꓸShin Bue Yang ꓡꓳ ꓒꓱ Lone Yone ꓞꓳ ꓘꓹ ꓗꓪ ꓟꓲꓽ ꓦꓲꓸꓹ ꓓ ꓟ ꓙꓱꓼ ꓡ ꓟ ꓪꓴꓸ ꓠꓬꓲ ꓞꓳ ꓘꓹ ꓕꓲ ꓐꓶꓽ ꓐꓬ ꓡꓰ ꓢꓲ (2) ꓣꓳ ꓫꓵꓻ ꓡꓰ ꓟ ꓓꓳꓽ

Shin Bue Yang ꓡꓳ ꓒꓱ Lone Yone ꓞꓳ ꓘꓹ ꓗꓪ ꓡꓳꓹ ꓬꓰ ꓟ (7) ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲ ꓟꓲꓽ ꓦꓲꓸꓹ ꓓ ꓟ ꓙꓱꓼ ꓡ ꓟ ꓪꓴꓸ ꓠꓬꓲ ꓞꓳ ꓘꓹ ꓕꓲ ꓐꓶꓽ ꓐꓬ ꓡꓰ ꓢꓲ (2) ꓣꓳ ꓫꓵꓳ꓾ ꓐꓰ ꓐꓯ ꓡꓳ ꓐꓰ ꓢꓷꓸ ꓪ ꓡꓳ= ꓐꓬ ꓡꓰ ꓟ ꓞꓳ ꓘꓹ ꓐꓱ ꓶ ꓬꓰ ꓙ ꓢꓴ ꓣꓱꓽ ꓬꓯꓼ ꓔꓬ ꓡꓳ ꓐꓰ ꓐꓯ ꓡꓳ= ꓟꓲꓽ ꓦꓲꓸꓹ ꓓ ꓟ ꓙꓱꓼ ꓡ ꓟ ꓪꓴꓸ ꓠꓬꓲ ꓢꓲꓹ ꓜꓲ ꓐꓱꓽ ꓡꓰ ꓢꓲ ꓦꓲꓸꓹ ꓘꓴꓽ ꓗꓪ ꓔꓬ ꓟ (4) ꓣꓳ ꓛꓲ ꓠꓸꓹ ꓓꓴ ꓡꓰꓳ꓾ ꓐꓰ ꓐꓯ ꓡꓳ= ꓞꓳ ꓦꓲꓸꓹ (35) ꓦꓲꓸꓹ ꓐꓬ ꓡꓰ ꓢꓲ ꓖꓳ ꓓꓱꓽ ꓔꓲꓹ ꓘꓴ ꓜꓲ ꓞꓳ ꓪ ꓘꓴ ꓦꓲꓸꓹ ꓥˍ ꓟꓲ ꓐꓬ ꓡꓰꓳ꓾ ꓐꓰ ꓬꓰ ꓙ ꓢꓴ ꓜꓴ ꓡꓰ ꓐꓯ ꓡꓳ ꓐꓰ ꓢꓷꓸ ꓪ ꓡꓳ=

Lone Yone ꓞꓳ ꓘꓹ ꓗꓪ ꓙꓰˍ ꓕꓯ Tanai ꓡꓳ ꓒꓱ ꓗꓪ ꓐꓰ Shin Bue Yang ꓡꓳ ꓒꓱ ꓗꓪ ꓟꓳ ꓓꓳ ꓜꓶꓽ ꓠ ꓔ ꓢꓲ꓾ Shin Bue Yang ꓡꓳ ꓒꓱ ꓗꓪ ꓟꓽ ꓛꓲ ꓕꓯ Hka Lone ꓞꓳ ꓘꓹ ꓗꓪ ꓙꓳˍ ꓟ ꓓꓰꓼ ꓡꓲꓺ ꓠꓽ ꓔꓶꓸ ꓗꓪ ꓪꓴꓽ ꓧꓶ ꓠꓸꓹ ꓢꓲ Tanai ꓬꓲꓸꓹ ꓙꓬ ꓡꓳ ꓙꓼ ꓓꓰꓼ ꓡꓲꓸꓸ ꓜꓶꓽ ꓢꓲ ꓙꓰ ꓠ ꓔ ꓡꓳ ꓐꓰ ꓢꓷꓸ ꓪ ꓡꓳ=

4ꓸꓑꓴ-ꓔ-ꓳ ꓟꓶ-ꓡ-ꓫꓵ-ꓓꓰ ꓧꓳꓺ ꓚꓶꓹ ꓓꓽ ꓖꓴꓽ ꓫꓬꓹ ꓑꓱ ꓓꓳ ꓡꓰ ꓟ ꓓꓳꓽ

ꓟꓶ-ꓡ-ꓫꓵ-ꓓꓰ ꓧꓳ ꓚꓶꓹ ꓓꓽ ꓖꓴꓽ ꓢꓲꓹ ꓒꓲꓽ ꓬꓲꓸ ꓫꓵꓼ ꓘꓳꓽ ꓔꓬ ꓟ ꓮ ꓟꓰ 2022 ꓘꓳꓼ 7 ꓦ 19 ꓠꓬꓲ ꓕꓯꓽ ꓮ ꓡꓻ ꓘꓳꓽ ꓓꓳ ꓡꓰ ꓢꓲꓸ ꓞꓳ ꓤ ꓥ ꓟꓲ ꓖꓳ ꓑꓳꓸ ꓕ ꓑꓳꓸ ꓚꓺ ꓚꓳ ꓪꓴꓸ ꓔꓴ ꓔꓬ ꓡꓳ꓿ ꓧꓶꓸ ꓕꓯꓽ 1960 ꓖꓼ ꓡꓯꓼ ꓖꓼ ꓙꓲ ꓗꓪ ꓧꓪ ꓒꓴ ꓟꓸ ꓒꓽ ꓐꓴ ꓔꓬ ꓕꓯꓽ ꓧꓳꓺ ꓚꓶꓹ ꓔꓶꓺ ꓪꓴꓸ ꓔꓴ ꓗꓷ ꓟ ꓥ ꓢꓲ꓾ ꓕꓲ ꓝꓸ ꓕꓲ ꓝꓸ ꓫꓬꓹ ꓡꓶꓸ꓾ ꓫꓬꓹ ꓑꓱ ꓩꓴ ꓡ ꓟ ꓟꓬꓱꓺ ꓓꓳꓽ ꓙꓳˍ ꓟ ꓧꓳꓺ ꓚꓶꓹ ꓓꓽ ꓖꓴꓽ ꓥ ꓡꓳ꓿ ꓟꓶ-ꓡ-ꓫꓵ-ꓓꓰ ꓧꓳꓺ ꓚꓶꓹ ꓓꓽ ꓖꓴꓽ ꓠꓬ꓾ ꓑꓴ-ꓔ-ꓳ ꓟꓵꓽ ꓗꓪ ꓪꓰ ꓤ ꓚꓳꓺ ꓛꓲ ꓡ ꓢꓴ ꓐꓴ ꓙꓰ ꓛꓲ ꓠꓲꓹ ꓫꓵˍ ꓟ ꓬꓲꓸ ꓔꓶꓸ (Tourist Destination)꓾ ꓠꓲꓹ ꓠꓵꓺ ꓓꓰꓽ ꓙ ꓠꓯ ꓞꓲꓼ ꓙꓳˍ ꓟ ꓡꓰ ꓐꓰ ꓗꓹ ꓟ ꓓꓽ ꓖꓴꓽ꓾ ꓞꓳ ꓤ ꓗꓹ ꓚꓳ ꓗꓹ ꓛꓲˍ ꓟ ꓓꓽ ꓖꓴꓽ ꓕꓲꓽ ꓟ ꓥ ꓡꓳ ꓐꓰ the lisu time ꓓꓳꓽ ꓗꓪ ꓐꓯ ꓔ ꓡꓳ=