NYI. NYI M DO:

ꓠꓬꓲꓸ ꓠꓬꓲ 7 ꓦ 15 ꓠꓬꓲ 2022 ꓘꓳꓼ ꓗꓪ ꓟ ꓓꓳꓽ ꓐꓴ ꓠꓬ

(1) ꓙꓼ ꓧꓪꓽ ꓞꓶꓻ ꓒꓵꓽ ꓞꓰꓻ ꓡꓰ ꓔꓬ ꓟ ꓥ ꓢꓲ 92 ꓧꓪꓽ ꓞꓶꓻ 1 ꓡꓲ-ꓔ ꓠꓬ ꓟꓬ-ꓟ ꓒꓴ 1800 ꓒꓯꓼ ꓠꓯꓸ ꓘꓴ ꓗꓪ ꓝꓸ ꓢꓲ ꓞꓰꓻ ꓡꓰ ꓔꓬ ꓟ

ꓟꓵꓽ ꓗꓳꓹ ꓓꓵꓺ ꓓꓵꓺ ꓗꓪ ꓟ ꓧꓪꓽ ꓞꓶꓻ ꓒꓴꓽ ꓞꓰꓻ ꓡꓰ ꓔꓬ ꓠꓬꓲ ꓙꓼ ꓧꓪꓽ ꓞꓶꓻ ꓒꓵꓽ ꓥˍ ꓟꓲ ꓞꓰꓻ ꓡꓰ ꓓꓴ ꓥꓳ= ꓕꓲ ꓡꓲ-ꓔ ꓔꓯ 1500 ꓗꓪ ꓛꓲꓺ ꓗꓷ ꓡꓰˍ ꓕꓯ ꓠꓽ ꓙꓲˍ ꓥꓳ= ꓖꓳ ꓡꓱ ꓥˍ ꓟꓲ ꓮ ꓟꓬ ꓗꓪ ꓛꓲꓺ ꓞꓰꓻ ꓡꓰˍ ꓟ ꓔꓯ ꓠꓽ ꓟꓽ ꓢꓷꓸ꓾ ꓐꓰ ꓙꓼ ꓧꓪꓽ ꓞꓶꓻ ꓒꓵꓽ ꓔꓯ ꓢꓷꓸ ꓢꓴ ꓕꓲ ꓣꓳ ꓡꓰ ꓐꓯ ꓡꓳ=

6 ꓦ ꓘꓴꓽ ꓗꓪ ꓙꓼ ꓧꓪꓽ ꓞꓶꓻ ꓕꓳꓽ ꓔ ꓡꓲꓺ ꓓꓽ ꓟ 17 ꓟ ꓛꓲꓺ ꓡ ꓗꓷ ꓟ ꓥ ꓢꓲ ꓗꓴꓷꓼ ꓘꓴꓽ ꓗꓪ ꓣꓱꓽ ꓓꓴ ꓡꓰꓽ ꓟꓽ ꓞꓲꓺ ꓢꓸ ꓖꓶ ꓧꓪꓽ ꓞꓶꓻ ꓟꓽ ꓛꓲꓺ ꓡ ꓕꓯ ꓣꓱꓽ ꓓꓴ ꓐꓱ ꓶ ꓫ ꓔ ꓡꓳ꓾ ꓐꓰ ꓗꓴꓷꓼ ꓙꓵꓽ ꓔꓶꓸ ꓗꓪ ꓐꓰ ꓐꓯ ꓙꓵꓽ ꓪ ꓙꓳ ꓢꓴ ꓕꓲ ꓣꓳ ꓐꓯ ꓡꓳ=

(2) ꓗꓽ-ꓡꓰꓹ ꓩ-ꓡꓯꓸ ꓟꓳ ꓓꓳ ꓙ ꓖꓴ ꓐꓬ ꓡꓰ ꓟ ꓪꓴꓸ ꓠꓬꓲ ꓟꓳ ꓓꓳ ꓙꓰ ꓟꓽ ꓓ ꓗꓷ ꓡꓰ ꓟ

ꓚꓧꓲꓠ ꓟꓵꓽ ꓖꓴ ꓪꓴꓸ ꓗꓽ-ꓡꓰꓹ ꓐꓰ ꓩ-ꓡꓯꓸ ꓙ ꓖꓴ ꓗꓪ ꓙꓳˍ ꓟ ꓡꓳ ꓔ 32 ꓐꓰ 33 ꓕꓷꓹ ꓘꓴꓽ ꓗꓪ 7 ꓦ 13 ꓠꓬꓲ ꓕꓯ ꓟꓶꓽ ꓦ ꓬꓲ ꓓꓽ ꓟ ꓦ ꓗꓷ ꓟ ꓪꓴꓸ ꓠꓬꓲ ꓟꓳ ꓓꓳ ꓙ ꓖꓴ ꓠꓬ ꓐꓬ ꓡꓰ ꓢꓲ ꓟꓳ ꓓꓳ ꓙꓰ ꓙꓰ ꓡ ꓡ ꓬꓰ ꓟꓽ ꓓꓺꓳ꓾ ꓐꓰ ꓢꓷꓸ ꓪ ꓡꓳ=

ꓗꓽ-ꓡꓰꓹ ꓐꓰ ꓩ-ꓡꓯꓸ ꓗꓪ ꓙꓰ ꓔꓬ ꓟ ꓟꓳ ꓓꓳ ꓜꓴꓻ ꓕꓲ ꓟ ꓗꓪ ꓙꓵꓽ ꓪ ꓙꓳ ꓢꓴ ꓕꓲ ꓣꓳ ꓡꓰ ꓙ ꓖꓴ ꓠꓬ ꓕꓲꓽ ꓐꓶꓽ ꓟꓽ ꓞꓲꓺ ꓐꓶꓽ ꓡꓰ ꓠꓬꓲ ꓗꓽ-ꓡꓰꓹ ꓗꓪ ꓐꓰ ꓩ-ꓡꓯꓸ ꓡꓳ ꓒꓱ ꓗꓪ ꓙꓰˍ ꓟ ꓶꓻ ꓤ ꓚꓰꓹ ꓟ ꓟꓳ ꓓꓳ꓾ ꓓꓴ ꓓꓳ ꓢꓴ ꓐꓴ ꓔꓯ ꓚꓰꓹ ꓟ ꓟꓳ ꓓꓳ ꓐꓴ ꓙꓰ ꓟꓽ ꓓ ꓟ ꓪꓴꓸ ꓠꓬꓲ ꓗꓽ-ꓡꓰꓹ ꓡꓳ ꓒꓱ ꓗꓪ ꓚꓱꓹ ꓬꓲꓼ ꓡ ꓪˍ ꓡꓳ꓾ ꓐꓰ ꓐꓯ ꓡꓳ=

ꓮ ꓟꓶ ꓟ ꓡꓰ ꓗꓽ-ꓡꓰꓹ ꓩ-ꓡꓯꓸ ꓟꓳ ꓓꓳ ꓙ ꓖꓴ ꓐꓬ ꓡꓰ ꓐꓶꓽ ꓡꓰ ꓟ ꓐꓰ ꓗꓴꓸ ꓙꓲꓽ ꓙꓳ ꓢꓲ ꓠꓬꓲ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓮ ꓟꓶ ꓗꓪ ꓛꓲꓺ ꓮ ꓫꓵꓽ ꓬꓰ ꓖꓶ ꓡ ꓔꓬ ꓟ ꓟꓽ ꓙꓳ꓾ ꓐꓰ ꓢꓷꓸ ꓪ ꓡꓳ=

(3) ꓕꓮꓲꓸ ꓗꓴꓷꓼ ꓗꓪ ꓕꓲ ꓠꓬꓲ ꓘꓴꓽ ꓗꓪ ꓚꓳꓦꓲꓓ-19 ꓠꓻ ꓗꓪ ꓐꓰ ꓫꓵꓻ ꓢꓴ 28 ꓣꓳ ꓗꓪ ꓛꓲꓺ ꓙꓳ ꓡ ꓟ

ꓕꓮꓲꓸ ꓗꓴꓷꓼ ꓗꓪ ꓗꓳꓸ ꓗꓷ ꓟ ꓕꓲ ꓠꓬꓲ ꓘꓴꓽ ꓗꓪ ꓚꓳꓦꓲꓓ-19 ꓠꓻ ꓫꓵꓽ ꓗꓪ ꓐꓰ ꓫꓵꓻ ꓢꓴ 28 ꓣꓳ ꓙꓳ ꓡ ꓢꓲ꓾ ꓠꓻ ꓟꓶ ꓡꓰ ꓢꓴ ꓬꓲ ꓫꓵꓼ 2257 ꓣꓳ ꓙꓳ ꓡ ꓔꓬ ꓡꓳ꓾ ꓐꓰ ꓕꓮꓲꓸ ꓠꓯꓻ ꓞꓲꓼ ꓟꓬꓱꓽ ꓬꓰ ꓜꓴ ꓗꓪ ꓐꓰ ꓮ ꓟꓰ 7 ꓦ 14 ꓠꓬꓲ ꓕꓯ ꓐꓯ ꓑꓶ ꓔ ꓡꓳ=

7 ꓦ 11 ꓠꓬꓲ꓾ ꓠꓽ ꓕꓲꓽ ꓠꓬꓲ ꓕꓯ ꓕꓮꓲꓸ ꓗꓴꓷꓼ ꓗꓪ ꓠꓻ ꓙꓳ ꓡꓰ ꓢꓴ ꓬꓲ ꓫꓵꓼ 1811 ꓣꓳˍ ꓡꓰꓽ ꓠꓻ ꓐꓶ ꓓꓲꓻ ꓟꓳˍ ꓟ ꓥ ꓢꓲ ꓫꓵꓻ ꓢꓴ 24 ꓣꓳ ꓙꓳ ꓡꓰ ꓟ ꓥꓳ= ꓖꓳ ꓟ ꓪꓴꓸ ꓠꓬꓲ ꓮ ꓟꓶ 3 ꓠꓬꓲ ꓘꓴꓽ ꓗꓪ ꓠꓻ ꓙꓳ ꓡꓰ ꓢꓴ ꓬꓲ ꓫꓵꓼ ꓟꓬꓽ ꓡ ꓔꓬꓹ ꓟ ˍ ꓡꓰ ꓐꓰ꓾ ꓫꓵꓻ ꓢꓴ ꓥˍ ꓟꓲ ꓮ ꓟꓬꓹ ꓟꓬꓽ ꓡ ꓔꓬ ꓡꓳ꓾ ꓐꓰ ꓕꓮꓲꓸ ꓠꓯꓻ ꓞꓲꓼ ꓟꓬꓱꓽ ꓬꓰ ꓜꓴ ꓗꓪ ꓐꓰ ꓐꓯ ꓑꓶ ꓔ ꓡꓳ=

Vietnam ꓗꓴꓷꓼ ꓗꓪ ꓥˍ ꓟꓲ ꓠꓻ ꓙꓳ ꓡꓰ ꓢꓴ ꓬꓲ ꓫꓵꓼ 1001 ꓣꓳ ꓛꓲꓺ ꓙꓳ ꓡˍ ꓡꓳ ꓐꓰ Vietnam ꓠꓯꓻ ꓞꓲꓼ ꓟꓬꓱꓽ ꓬꓰ ꓜꓴ ꓗꓪ ꓐꓰ 7 ꓦ 13 ꓠꓬꓲ ꓟꓶꓽ ꓘꓶꓼ ꓕꓯ ꓓꓳ ꓐꓯ ꓑꓶ ꓔ ꓡꓳ=

ꓢꓲ-ꓖ-ꓑꓴ ꓗꓪ ꓥˍ ꓟꓲ ꓚꓳꓦꓲꓓ 10 ꓠꓻ ꓙꓳ ꓡꓰ ꓢꓴ ꓬꓲ ꓫꓵꓼ 10992 ꓣꓳ ꓙꓳ ꓡꓰ ꓢꓲ ꓫꓵꓻ ꓢꓴ 4 ꓣꓳ ꓛꓲꓺ ꓙꓳ ꓡˍ ꓡꓳ ꓐꓰ ꓢꓲ-ꓖ-ꓑꓴ ꓠꓯꓻ ꓞꓲꓼ ꓟꓬꓱꓽ ꓬꓰ ꓜꓴ ꓗꓪ ꓐꓰ 7 ꓦ 14 ꓟꓶꓽ ꓘꓶꓼ ꓕꓯ ꓐꓯ ꓑꓶ ꓔ ꓡꓳ=

(4) ꓔ-ꓠꓲꓹ-ꓔ-ꓬꓲ ꓡꓳ ꓒꓱ ꓗꓪ ꓬꓲꓻ ꓙꓬ ꓙꓵꓽ ꓓꓯꓻ ꓡˍ ꓠꓬꓲ ꓕꓳ ꓶ ꓢꓳꓺ ꓦꓲꓻ ꓠꓬꓲꓽ ꓟ ꓔꓯ ꓚꓵꓸ ꓔ ꓡꓳ꓾

ꓔ-ꓠꓲ,-ꓔ-ꓬꓲ ꓟꓵꓽ꓾ ꓔ-ꓠꓲ,-ꓔ-ꓬꓲ ꓡꓳ ꓒꓱ ꓗꓪ 7 ꓦ ꓬꓲ ꓪꓴꓸ ꓕꓲ ꓠꓽ ꓗꓪ ꓐꓰ ꓪꓴꓸ ꓔꓴ ꓢꓲ ꓟꓶꓽ ꓦ ꓮ ꓘꓶꓸ ꓦ ꓗꓷ ꓢꓲ ꓔ-ꓠꓲ,-ꓔ-ꓬꓲ ꓬꓲꓻ ꓙꓬ ꓡꓳ ꓗꓪ ꓟ ꓬꓲꓻ ꓙꓬ ꓙꓵꓽ ꓓꓯꓻ ꓡ ꓠꓬꓲ ꓢꓷꓸ ꓠꓲꓹ ꓢꓳ ꓦꓲꓺ ꓠꓬꓲꓽ ꓟ ꓔꓯ ꓚꓵꓸ ꓪ ꓡꓰꓳ꓾ ꓐꓰ ꓬꓰ ꓙ ꓜꓴꓻ ꓐꓴ ꓗꓪ ꓐꓰ ꓢꓷꓸ ꓪ ꓡꓳ=

ꓬꓲꓻ ꓙꓬ ꓙꓵꓽ ꓓꓯꓻ ꓡˍ ꓟ ꓪꓴꓸ ꓠꓬꓲ ꓞꓳ ꓘꓹ ꓕꓲ ꓐꓱ ꓗꓪˍ ꓟꓲ ꓬꓲꓻ ꓙꓬ ꓓꓵꓽ ꓙꓰ ꓢꓲ ꓙ ꓖꓴ ꓕꓯꓽ ꓢꓲ 2' ꓗꓪ ꓛꓲꓺ ꓬꓲꓻ ꓙꓬ ꓙꓵꓽ ꓓꓯꓻ ꓡ ꓟ ꓥꓳ= ꓖꓳ ꓟ ꓪꓴꓸ ꓠꓬꓲ 7 ꓦ 13 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲ ꓕꓳ ꓶ ꓢꓳ ꓔꓬ ꓟ ꓤ ꓠꓱ ꓤ ꓐꓴ ꓐꓱ ꓶ ꓓꓵꓽ ꓙ ꓢꓲ ꓠꓬꓲ ꓔ-ꓬ-ꓗꓳꓸ ꓘꓹ ꓐꓰ ꓒꓳꓸ-ꓟꓯꓹ ꓘꓹ ꓗꓪ ꓟ ꓢꓷꓸ ꓠꓲꓹ ꓢꓳ ꓦꓲ ꓐꓴ ꓔꓯ ꓕꓲ ꓑꓹ ꓤ ꓠꓽ ꓔ ꓡꓳ꓾ ꓐꓰ ꓢꓷꓸ ꓪ ꓡꓳ=