ꓕꓮꓲꓹ ꓗꓴꓷꓼ꓾ ꓑ-ꓕꓳꓠ ꓗꓪ ꓟ ꓰꓡꓰꓚꓔꓣꓳꓠꓲꓚ ꓟꓬꓱꓽ ꓬꓰ ꓖꓴ ꓗꓪ ꓟꓬ-ꓟ ꓟꓬꓱꓽ ꓬꓰ ꓢꓴ 300 ꓣꓳ ꓛꓲꓺ ꓔꓯ ꓟꓬꓱꓽ ꓗꓪ ꓐꓰ ꓓꓳ ꓝꓲˍ ꓟ

Wednesday, September 14, 2022

ꓕꓮꓲꓹ ꓗꓴꓷꓼ꓾ ꓑ-ꓕꓳꓠ꓾ ꓠ-ꓪ-ꓠ-ꓘꓴꓠ ꓟꓵꓽ ꓗꓪ ꓟ ꓰꓡꓰꓚꓔꓣꓳꓠꓲꓚ ꓟꓬꓱꓽ ꓬꓰ ꓖꓴ ꓗꓪ ꓟꓬꓱꓽ ꓬꓰ ꓔꓬꓹ ꓟ ꓟꓬ-ꓟ ꓟꓬꓱꓽ ꓬꓰ ꓢꓴ 300 ꓣꓳ ꓛꓲꓺ ꓠꓬ 9 ꓦ 13 ꓠꓬꓲ ꓕꓯ ꓟꓬꓱꓽ ꓗꓪ ꓐꓰ ꓓꓳ ꓝꓲˍ ꓟ ꓟꓶ ꓗꓷ ꓟ ꓔꓯ ꓮꓮꓚ ꓜꓴꓻ ꓗꓪ ꓐꓰ ꓢꓷꓸ ꓪ ꓡꓳ=

ꓕꓱ ꓡꓱ ꓟꓬꓱꓽ ꓠꓽ ꓝꓲˍ ꓟ ꓔꓯ ꓟꓬꓱꓽ ꓢꓲ ꓒ ꓗꓪ ꓐꓰ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓧꓶꓸ ꓕꓯ ꓡꓰ ꓐꓯ ꓔ ꓟ ꓟꓽ ꓙꓳ ꓙꓳ꓾ ꓠꓽ ꓝꓲ ꓗꓷ ꓟ ꓥ ꓢꓲ ꓟꓬꓱꓽ ꓠꓽ ꓪ ꓡꓰ ꓢꓴ ꓐꓴ ꓘꓴꓽ ꓗꓪ ꓕꓮꓲꓹ ꓞꓳ ꓫꓵꓽ ꓐꓴˍ ꓟ ꓐꓹ ꓟ ꓥ ꓢꓲ ꓠꓬꓲ꓾ ꓟꓬꓱꓽ ꓟꓽ ꓙꓳ ꓗꓷ ꓡꓰ ꓟ ꓪꓴꓸ ꓠꓬꓲ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓠꓽ ꓝꓲ ꓗꓷ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓖꓳ ꓟ ꓪꓴꓸ ꓠꓬꓲ ꓟꓬ-ꓟ ꓟꓬꓱꓽ ꓬꓰ ꓢꓴ ꓐꓴ ꓠꓬ ꓟꓬꓱꓽ ꓬꓰ ꓖꓴ ꓗꓪ ꓟꓬꓱꓽ ꓢꓲ ꓒ ꓔꓯ ꓒꓳꓹ ꓔꓳꓹ ꓟ ꓬꓰ ꓗꓷ ꓢꓲ꓾ ꓟꓬ-ꓟ ꓟꓬꓱꓽ ꓬꓰ ꓢꓴ ꓐꓴ ꓫꓵꓽ ꓪꓴ ꓔꓯ ꓬꓰ ꓙ ꓖꓶ ꓔꓬꓹ ꓟ ꓮꓮꓚ ꓜꓴꓻ ꓗꓪ ꓬꓰ ꓙ ꓠꓹ ꓟ ꓓꓰꓽ ꓗꓷ ꓟ ꓥ ꓡꓳ= ꓖꓳ ꓡꓱ ꓬꓰ ꓙ ꓠꓹ ꓟ ꓓꓰꓽ ꓡ ꓟ ꓪꓴꓸ ꓠꓬꓲ ꓮꓮꓚ ꓜꓴꓻ ꓐꓴ ꓡꓰ ꓟꓬꓱꓽ ꓠꓽ ꓗꓷ ꓪ ꓡꓰ ꓟ ꓟꓬ-ꓟ ꓟꓬꓱꓽ ꓬꓰ ꓢꓴ ꓐꓴ ꓐꓱ ꓶ ꓒꓴ ꓟꓶ ꓡꓰ ꓠꓹ ꓟ꓾ ꓟꓬꓱꓽ ꓚꓵꓸ ꓙꓰˍ ꓟ ꓕꓳꓽ ꓶ ꓒꓬꓽ꓾ ꓑꓮꓢꓢꓑꓳꓣꓔ ꓗꓴꓷꓼ ꓘꓴꓽ ꓗꓪ ꓔꓬꓹ ꓦꓬꓼ ꓠꓬꓲ ꓔꓯ ꓟꓬꓽ ꓠꓬꓲꓽ ꓟꓶ ꓡꓰ ꓠꓹ ꓟ ꓔꓯ ꓖꓪ ꓙꓱ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓖꓳ ꓡꓱ ꓧꓶꓸ ꓕꓯ ꓡꓰ ꓐꓯ ꓑꓶ ꓔ ꓟ ꓟꓽ ꓙꓳ ꓙꓳ ꓟꓬꓱꓽ ꓠꓽ ꓪ ꓡꓰ ꓟ ꓫꓵꓽ ꓪꓴ ꓠꓬ 9 ꓦ 8 ꓠꓬꓲ ꓕꓯ ꓥˍ ꓟꓲ ꓳꓹ-ꓬꓮꓲꓠꓖ ꓗꓪ ꓟ ꓟꓬꓱꓽ ꓬꓰ ꓖꓴ ꓕꓲ ꓟ ꓗꓪ ꓒꓬꓱꓼ ꓗꓷ ꓟ ꓥ ꓢꓲ ꓟꓬ-ꓟ ꓟꓬꓱꓽ ꓬꓰ ꓢꓴ 200 ꓣꓳ ꓟꓽ ꓞꓲꓺ ꓠꓬ ꓟꓬꓱꓽ ꓠꓽ ꓗꓷ ꓪ ꓡꓰ ꓟ ꓪꓴꓸ ꓠꓬꓲ ꓟꓬꓱꓽ ꓢꓲ ꓒ ꓔꓯ ꓟꓬ-ꓟ ꓟꓬꓱꓽ ꓬꓰ ꓢꓴ ꓐꓴ ꓡꓰ ꓪꓽ ꓗꓳꓹ ꓔ ꓡꓳ꓾ ꓐꓰ ꓢꓷꓸ ꓪ ꓡꓳ=