ꓗ-ꓣꓲ (Greece) ꓗꓪ ꓧꓳꓽ ꓞꓱ ꓙꓵꓽ ꓡꓰ ꓢꓲ ꓞꓳ ꓤ ꓫꓵꓻ ꓡꓰ ꓟ ꓑꓶ ꓓꓴ ꓑ ꓫꓬ ꓐꓴ ꓒꓳꓹ ꓔꓴ ꓔꓬ ꓢꓲ꓾ ꓲ-ꓙꓲꓼ (Egypt) ꓗꓪ ꓥ ꓟꓲ ꓧꓳꓽ ꓞꓱ ꓗꓪꓼ ꓡꓰ ꓟ ꓓꓳꓽ

ꓗ-ꓣꓲ (Greece) ꓗꓪ ꓧꓳꓽ ꓞꓱ ꓙꓵꓽ ꓡꓰ ꓢꓲ ꓞꓳ ꓤ ꓫꓵꓻ ꓡꓰ ꓟ ꓑꓶ ꓓꓴ ꓑ ꓫꓬ ꓐꓴ ꓒꓳꓹ ꓔꓴ ꓔꓬ ꓢꓲ꓾ ꓲ-ꓙꓲꓼ (Egypt) ꓗꓪ ꓥ ꓟꓲ ꓧꓳꓽ ꓞꓱ ꓗꓪꓼ ꓡꓰ ꓟ ꓓꓳꓽ

ꓡꓳꓹ ꓬꓰ ꓟ ꓙꓵꓹ ꓕꓯ ꓗ-ꓣꓲ ꓗꓪ ꓧꓳꓽ ꓞꓱ ꓠꓬꓲ ꓟ ꓙꓵꓽ ꓡꓰ ꓟ ꓗꓪ ꓞꓳ ꓤ 57 ꓣꓳ ꓫꓵꓻ ꓡꓰ ꓟ ꓥꓳ= ꓕꓱ ꓟ ꓔꓯ ꓑ ꓫꓬ ꓐꓴ ꓮ ꓘꓶꓸ ꓠꓲꓹ ꓦꓶꓻ ꓢꓲ꓾ ꓗꓴꓷꓼ ꓗꓪ ꓑ ꓫꓬ ꓐꓴ ꓒꓳꓹ ꓔꓴ ꓔꓬ ꓟ ꓥꓳ= 3 ꓦ 8 ꓠꓬꓲ ꓕꓯ ꓥ ꓟꓲ ꓝꓮꓲ ꓒꓳꓹ ꓔꓴ ꓔꓬ ꓟ ꓥꓳ=

ꓕꓱ ꓟ ꓗꓪ ꓐꓰ ꓠꓬꓲꓸ ꓠꓬꓲ ꓗꓪ ꓛꓲ 14 ꓣꓳ ꓠꓯꓺ ꓞꓲꓼ ꓦꓲ ꓗꓪ ꓔꓬ ꓟ ꓥ ꓢꓲ꓾ ꓫꓵꓻ ꓢꓴ ꓮ ꓟꓬꓹ ꓠꓬ ꓟꓴ ꓕꓲꓸ ꓢꓳ ꓤ ꓐꓴ ꓥ ꓡꓳ ꓐꓰ ꓢꓷꓸ ꓪ ꓡꓳ=

ꓣꓴ ꓦ ꓟ ꓧꓳꓽ ꓞꓱ ꓗꓪ ꓟꓬꓱꓽ ꓬꓰ ꓢꓴ 1 ꓣꓳ ꓡꓰ ꓧꓳꓽ ꓞꓱ ꓕꓲ ꓟ ꓬꓲꓸ ꓚꓱꓹ ꓔꓯ ꓙꓵꓻ ꓠꓹ ꓟ ꓟꓲ ꓡꓰ ꓟ ꓥꓳ ꓐꓰ ꓐꓯ ꓔ ꓡꓳ꓾ ꓕꓱ ꓟ ꓔꓯ ꓝꓮꓲ ꓚꓬꓹ ꓢꓲ ꓜꓳ ꓡꓰ ꓠꓬ ꓐꓱ ꓓꓵꓽ ꓕꓲ ꓞꓲꓼ ꓡꓵꓽ ꓠ ꓗꓪ ꓛꓲ ꓡꓵꓽ ꓪ ꓡ ꓥꓳ ꓐꓰ ꓐꓯ_ ꓡꓳ= ꓖꓳ ꓡꓱ ꓥ ꓟꓲ ꓑ ꓫꓬ ꓐꓴ ꓧꓳꓽ ꓞꓱ ꓗꓪ ꓟꓬꓱꓽ ꓬꓰ ꓔꓬ ꓢꓴ ꓙꓵꓽ_ ꓟ ꓟꓽ ꓧꓻ ꓟ ꓔꓯ ꓒꓳꓹ ꓔꓴ_ ꓟ ꓥꓳ=

3 ꓦ 7 ꓠꓬꓲ ꓕꓯ ꓥ ꓟꓲ ꓧꓳꓽ ꓞꓱ ꓙꓵꓽ ꓓꓴ ꓗꓷ ꓡꓰ ꓢꓲ꓾ 2 ꓣꓳ ꓫꓵꓻ꓾ 16 ꓣꓳ ꓠꓻ ꓓꓴ ꓡꓰꓳ ꓐꓰ ꓢꓷꓸ ꓪ ꓡꓳ= ꓕꓱ ꓟ ꓠꓬ ꓧꓳꓽ ꓞꓱ ꓔꓯ ꓠꓽ ꓓꓴ ꓟꓸ ꓔ ꓥ ꓟꓲ ꓞꓳ ꓤ ꓚꓰꓹ ꓧꓳꓽ ꓞꓱ ꓠꓬ ꓠꓽ ꓓꓴ ꓬꓲ ꓙꓵꓹ ꓞꓷ ꓡꓰ ꓟ ꓑꓶ ꓓꓴ ꓥ ꓡꓳ= ꓕꓱ ꓡꓱ ꓬꓲ ꓙꓵꓹ ꓗꓹ ꓟꓽ ꓠꓽ ꓡꓰ ꓟ ꓑꓶ ꓓꓴ ꓗꓪꓼ ꓡꓰ ꓓꓴ ꓗꓷ ꓡꓰ ꓟ ꓥꓳ ꓐꓰ ꓐꓯ_ ꓡꓳ= ꓠꓻ ꓓꓴ ꓡꓰ ꓢꓴ ꓔꓯ ꓠꓯꓺ ꓞꓲꓼ ꓦꓲ ꓗꓪ ꓔꓯꓹ ꓦ ꓔꓬ ꓡꓳ ꓐꓰ ꓢꓷꓸ ꓪ ꓡꓳ=