ꓟꓲ-ꓚꓲ-ꓠ ꓡꓳ ꓒꓱ ꓗꓪ ꓡꓲ-ꓢꓴ ꓫꓵꓽ ꓐꓴ ꓐꓱ ꓶ ꓫꓴꓹ ꓣꓴ ꓚꓬꓴꓸ ꓣꓴˍ ꓟ ꓢꓳ ꓦꓲ ꓒꓴ ꓔ ꓡꓳ

ꓟꓲ-ꓚꓲ-ꓠ ꓡꓳ ꓒꓱ ꓗꓪ ꓡꓲ-ꓢꓴ ꓫꓵꓽ ꓐꓴ ꓐꓱ ꓶ ꓫꓴꓹ ꓣꓴ ꓚꓬꓴꓸ ꓣꓴˍ ꓟ ꓢꓳ ꓦꓲ ꓒꓴ ꓔ ꓡꓳ

ꓗ-ꓛꓲ ꓗꓴꓷꓼ ꓫꓴ ꓟꓲ-ꓚꓲ-ꓠ ꓡꓳ ꓒꓱ꓾ ꓟꓯ-ꓘꓰ ꓐꓵ-ꓜ ꓘꓹ ꓗꓪ ꓡꓲ-ꓢꓴ ꓫꓵꓽ ꓐꓴ ꓐꓱ ꓶ ꓫꓴꓹ ꓣꓴ ꓚꓬꓴꓸ ꓣꓴˍ ꓟ ꓢꓳ ꓦꓲꓻ ꓕꓲꓽ ꓟ ꓒꓴ ꓔ ꓡꓳ꓾ ꓐꓰ ꓢꓷꓸ ꓪ ꓡꓳ= ꓢꓳ ꓦꓲꓻ ꓖꓳ ꓟ ꓔꓯ ꓠꓬ ꓗꓳꓸ ꓗꓷ ꓟ 7ꓸ6ꓸ2015 ꓕꓯ ꓡꓰ ꓐꓵ-ꓜ ꓡꓲ-ꓢꓴ ꓖꓳ ꓓꓱꓽ ꓔꓲꓹ ꓘꓴ-ꓜꓲ-ꓞꓳ ꓐꓴ ꓡꓰ ꓖꓪ ꓙꓱ ꓠꓲꓹ ꓧꓳꓹ ꓡꓯꓽ ꓘꓳ ꓢꓲ ꓒꓴ ꓔ ꓟ ꓥ ꓡꓳ= ꓮ ꓟꓶ ꓕꓯ ꓠꓬ ꓟꓸ ꓒ ꓡꓯ-ꓟꓯ-ꓒꓴ ꓡꓰ ꓧꓳꓽ ꓣꓱꓽ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓢꓳꓺ ꓦꓲ ꓗꓪ ꓢꓳ ꓡ ꓠ ꓗꓹ ꓢꓴ ꓐꓴ ꓠꓬ ꓜꓽ ꓬꓲꓼ ꓓꓳ ꓬꓲꓼ ꓔꓬ ꓢꓴ (ꓬꓯꓼ ꓒꓲꓸ ꓚꓳ ꓑ/ꓚꓳ ꓟ ꓒꓬꓱꓼ ꓡꓰ ꓢꓴ ꓐꓴ)꓾ ꓫ ꓢꓴ ꓟꓷꓼ ꓢꓴ ꓐꓴ꓾ ꓤꓽ ꓛꓵꓽ ꓟꓶꓼ ꓛꓵꓽ ꓐꓴ꓾ ꓢꓷꓸ ꓠꓲꓹ ꓟꓽ ꓡꓳꓼ ꓢꓴ ꓐꓴ ꓔꓯ ꓟꓸ ꓖꓶ ꓔꓬ ꓟ ꓥ ꓢꓲ ꓢꓳꓺ ꓚꓱꓹ ꓠꓬ ꓕꓲꓽ ꓘꓳꓼ ꓢꓳꓺ ꓚꓱꓹ ꓐꓰ ꓠꓬꓲꓽ ꓘꓳꓼ ꓢꓳꓺ ꓚꓱꓹ ꓐꓯ ꓢꓲ ꓠꓬꓲꓽ ꓚꓱꓹ ꓙꓳˍ ꓟ ꓥ ꓢꓲ ꓠꓬꓲ꓾ ꓢꓳꓺ ꓘꓳꓼ ꓮ ꓙꓵꓽ ꓠꓬ 3 ꓘꓳꓼ ꓢꓳꓺ ꓠ ꓗꓹ ꓡꓳ= ꓬꓲ ꓪꓴꓸ ꓕꓲ ꓘꓳꓼ ꓗꓪ ꓠꓬ ꓚꓲꓸ ꓛꓬꓽ ꓖꓳ ꓓꓱꓽ ꓫꓬꓹ ꓡꓶꓸˍ ꓟ ꓘꓳꓼ꓾ ꓠꓬꓲꓽ ꓘꓳꓼ ꓕꓲꓽ ꓘꓳꓼ ꓗꓪ ꓠꓬ ꓟꓸ ꓒ/ ꓟꓸ ꓟ ꓒꓬꓱꓼ ꓢꓳꓺˍ ꓟ ꓘꓳꓼ ꓐꓯ ꓢꓲ ꓐꓱ ꓔ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓬꓲ ꓔꓶ ꓙꓱꓼ ꓠꓬ ꓡꓲ-ꓢꓴ ꓫꓵꓽ ꓗꓪ ꓜꓽ ꓬꓲꓼ ꓓꓳ ꓬꓲꓼ ꓢꓴ ꓔꓯ ꓚꓬꓴꓸˍ ꓟ ꓢꓳꓺ ꓦꓲꓻ ꓟꓽ ꓙꓳ ꓢꓰꓽ ꓟ ꓑꓶꓸ ꓓꓴ ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳ ꓢꓲ ꓒꓴ ꓔ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ= ꓢꓳꓺ ꓤ ꓐꓴ ꓠꓬ ꓦ ꓗꓪ ꓚꓬꓴꓸ ꓣꓴ ꓟꓶ ꓠꓹ ꓟ꓾ ꓧꓪꓽ ꓖꓳ ꓓꓱꓽ ꓚꓬꓴꓸ ꓣꓴ ꓟꓶ ꓠꓹ ꓟ ꓐꓰ ꓞꓳ ꓫꓵꓽ ꓔꓯ ꓚꓬꓴꓸ ꓣꓴˍ ꓟ ꓐꓱ ꓶˍ ꓟꓲ ꓔꓶ ꓙꓱꓼ ꓗꓶ ꓔ ꓟ ꓥ ꓡꓳ=

ꓮ ꓟꓶ ꓕꓯ ꓢꓳ ꓦꓲꓻ ꓠꓬ 10 ꓦꓲꓻ ꓒꓴ ꓐ ꓡ ꓗꓷ ꓟ ꓥ ꓢꓲ ꓠꓬꓲ꓾ ꓟꓸ ꓒꓽ ꓟꓸ ꓟ ꓮ ꓙꓵꓽ 40 ꓣꓳ ꓟꓽ ꓞꓲ ꓙꓳˍ ꓡꓳ= 2023 ꓘꓳꓼ ꓗꓪ ꓢꓳꓺ ꓦꓲ ꓮ ꓙꓵꓽ ꓗꓪ ꓟ ꓢꓳꓺ ꓤ ꓮ ꓙꓵꓽ ꓠꓬ 250 ꓣꓳ ꓟꓽ ꓞꓲꓺ ꓙꓳˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓢꓳꓺ ꓦꓲ 10 ꓦꓲꓻ ꓔꓯ ꓠꓬ꓾ ꓟ-ꓓꓲ-ꓡꓰ꓾ ꓓ-ꓓꓮ-ꓴꓸ꓾ ꓬꓥ-ꓖꓳꓥ꓾ ꓟꓴ-ꓖꓴ꓾ ꓐ-ꓟꓳ꓾ ꓪꓮꓲ-ꓟꓳ꓾ ꓑ-ꓪ꓾ ꓗ-ꓩ꓾ ꓓ-ꓠꓮꓲ꓾ ꓖ-ꓟꓶ-ꓓꓰ ꓡꓳ ꓒꓱ ꓐꓴ ꓗꓪ ꓒꓴ ꓔ ꓟ ꓥ ꓡꓳ=

ꓢꓳꓺ ꓦꓲ ꓗꓪ ꓢꓳꓺ ꓡ ꓠꓲꓹ ꓫꓵ ꓢꓴ ꓐꓴ ꓠꓬ 16 ꓘꓳꓼ ꓖꓼ ꓑꓳꓸ ꓥ ꓠ ꓗꓹ ꓟ ꓥ ꓢꓲ ꓠꓬꓲ꓾ ꓜꓽ ꓬꓲꓼ ꓓꓳ ꓬꓲꓼ ꓢꓴ ꓔꓯ ꓠꓬ ꓬꓲꓸ ꓞꓲꓼ ꓟꓽ ꓐꓱ ꓔ ꓐꓰ ꓢꓷꓸ ꓪ ꓡꓳ= ꓢꓳꓺ ꓦꓲ ꓟꓬꓱꓺ ꓓꓵꓽ ꓒꓵꓽ ꓠꓬ 50000꓾ ꓜꓽ ꓒꓵꓽ ꓦ ꓐ ꓕꓲꓽ ꓟ ꓗꓪ 100000꓾ ꓟꓸ ꓖꓶꓽ ꓒꓵꓽ ꓠꓬ ꓖꓶꓽ ꓟꓽ ꓛꓵ꓾ ꓕꓱ ꓡꓱ ꓐꓱ ꓔ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓢꓳꓺ ꓡ ꓠꓲꓹ ꓫꓵˍ ꓥ ꓟꓲ ꓬꓲ ꓒꓵꓽ ꓟꓽ ꓐ ꓡ ꓢꓴ ꓠꓬ ꓶꓻ ꓙꓳ ꓢꓴ ꓐꓴ ꓔꓯ ꓖꓪ ꓙꓱ ꓐ ꓡˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓮ ꓟꓶ ꓠꓬ ꓟꓲ-ꓚꓲ-ꓠ ꓢꓳꓺ ꓦꓲ ꓗꓪ ꓢꓳꓺ ꓤ ꓬꓲ ꓫꓵꓼ ꓘꓳ ꓣꓴ ꓔꓬ ꓟ ꓥ ꓢꓲ꓾ ꓮ ꓟꓶ ꓛꓲ ꓡ ꓢꓴ ꓔꓯ ꓠꓬ ꓡꓲ-ꓢꓴ ꓕꓳꓽ ꓶ ꓟꓸ ꓪꓴꓸ ꓔꓴ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=