ꓢꓲ-ꓗ-ꓑꓴ ꓗꓴꓷꓼ ꓑ ꓫꓬ ꓐꓴ ꓐꓰ ꓕꓲ ꓪ ꓞꓳ ꓤ ꓪꓴꓽ ꓜꓽˍ ꓟ ꓟꓶ ꓡꓰ ꓢꓴ ꓕꓲ ꓔꓴ ꓟꓽ ꓞꓲꓺ ꓔꓯ ꓒꓲ-ꓡꓲ-ꓒꓲ ꓟꓯꓼ ꓐꓴ ꓡꓰ ꓚꓬꓴꓸ ꓙ ꓐ ꓡ ꓗꓷꓳ

ꓒꓲ-ꓡꓲ-ꓒꓲ ꓗꓴꓷꓼ꓾ ꓟ-ꓠꓲ-ꓡ ꓡꓳ ꓒꓱ ꓗꓪ ꓳꓠꓡꓲꓠꓰ ꓗ-ꓢꓲ-ꓠꓳ ꓟꓬꓱꓽ ꓬꓰ ꓓꓴ ꓐꓱ ꓶ ꓟꓽ ꓙꓲꓻ ꓢꓴ ꓐꓴ ꓡꓰ ꓪꓴꓽ ꓜꓽˍ ꓟ ꓟꓶ ꓡꓰ ꓢꓴ 1000 ꓣꓳ ꓟꓽ ꓞꓲꓺ ꓔꓯ ꓒꓲ-ꓡꓲ-ꓒꓲ ꓟꓯꓼ ꓜꓴ ꓡꓰ ꓚꓬꓴꓸ ꓙ ꓐ ꓡ ꓗꓷꓳ꓾ ꓐꓰ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓐꓯ ꓡꓳ=

ꓟ-ꓠꓲ-ꓡ ꓡꓳ ꓒꓱ ꓦꓲꓻ ꓕꓲ ꓟ ꓔꓯ 6 ꓦ 26 ꓠꓬꓲ ꓠꓽ ꓕꓲꓽ ꓠꓬꓲ ꓕꓯ ꓟꓯꓼ ꓐꓴ ꓡꓰ ꓧꓪ ꓙꓰˍ ꓕꓯ ꓧꓶꓽ꓾ ꓦꓲꓰꓔꓠꓮꓟ꓾ ꓢꓲ-ꓗ-ꓑꓴ ꓐꓰ ꓟ-ꓡꓰꓹ-ꓫ ꓗꓴꓷꓼ ꓢꓴ ꓐꓴ ꓔꓯ ꓧꓪ ꓟꓳꓻ ꓡꓰ ꓗꓷ ꓟ ꓥ ꓡꓳ=

ꓟꓯꓼ ꓐꓴ ꓡꓰ ꓐꓯ ꓟ ꓠꓬ ꓕꓱ ꓡꓱ ꓞꓳ ꓤ ꓪꓴꓽ ꓜꓽˍ ꓟ ꓟꓶ ꓡꓰ ꓢꓴ ꓐꓴ ꓠꓬ ꓳꓠꓡꓲꓠꓰ ꓗꓪ ꓚꓳꓸ ꓬꓰˍ ꓟ ꓟꓬꓱꓽ ꓔꓯ ꓒꓲ-ꓡꓲ-ꓒꓲ ꓗꓴꓷꓼ ꓗꓪ ꓔꓬ ꓢꓲ ꓬꓰ ꓠꓹ ꓟ ꓝꓮꓚꓰꓐꓳꓳꓗ ꓗꓪ ꓐꓯ ꓑꓶ ꓔ ꓟ ꓔꓯ ꓟꓳꓻ ꓡꓰ ꓢꓲ ꓟꓬꓱꓽ ꓬꓰ ꓡ ꓢꓴ ꓐꓴ ꓥ ꓡꓳ ꓐꓰ ꓢꓷꓸ ꓪ ꓡꓳ꓾ ꓐꓰ ꓐꓯ ꓡꓳ=

ꓗꓳꓸ ꓗꓷ ꓟ ꓥꓪꓽ ꓦ ꓕꓯ ꓮꓢꓲꓮ ꓗꓴꓷꓼ ꓮ ꓟꓬꓹ ꓗꓪ ꓐꓰ ꓒꓲ-ꓡꓲ-ꓒꓲ ꓗꓴꓷꓼ ꓗꓪ ꓪꓴꓽ ꓜꓽ ꓟꓶ ꓡꓰ ꓟ ꓕꓲ ꓔꓴ ꓟꓽ ꓞꓲꓺ ꓔꓯ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓚꓬꓴꓸ ꓙ ꓗꓷ ꓟ ꓥ ꓢꓲ ꓬꓲ ꓪ ꓮ ꓙꓵꓽ ꓥˍ ꓟꓲ ꓳꓠꓡꓲꓠꓰ ꓗꓪ ꓚꓳꓸ ꓗꓶꓸ ꓜꓽ ꓟꓬꓱꓽ ꓬꓰ ꓠꓹ ꓟ ꓐꓱ ꓶ ꓟꓽ ꓓ ꓟꓽ ꓞ ꓝꓲ ꓔ ꓟ ꓟꓶ ꓢꓴ ꓐꓴ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=