ꓪ ꓔꓲ ꓟ Elizabeth ꓫꓵꓻ ꓟꓳꓻ London ꓡꓳ ꓒꓱ ꓓꓽ ꓟ ꓗꓪ ꓛꓲꓺ ꓡ ꓗꓷ ꓟ ꓓꓳꓽ

ꓐꓣꓲꓔꓮꓲꓠ ꓪ ꓔꓲ ꓟ ꓠꓬꓲꓽ ꓣꓳ ꓕꓲ ꓣꓳ ꓟ ꓰꓡꓲꓜꓮꓐꓰꓔꓧ ꓬꓲ ꓫꓵꓻ ꓟꓳꓻ ꓠꓬ ꓠꓽ ꓠꓬꓲꓽ ꓠꓬꓲ ꓕꓯ ꓡꓳꓠꓓꓳꓠ ꓡꓳ ꓒꓱ ꓗꓪ ꓟ ꓐꓴꓚꓗꓲꓠꓖꓧꓮꓟ ꓪ ꓔꓲ ꓦꓲꓻ ꓗꓪ ꓛꓲꓺ ꓬꓰ ꓟ ꓥ ꓡꓳ= ꓪ ꓔꓲ ꓟ ꓬꓲ ꓫꓵꓻ ꓟꓳꓻ ꓔꓯ ꓐꓴꓚꓗꓲꓠꓖꓧꓮꓟ ꓪ ꓔꓲ ꓦꓲꓻ ꓗꓪ ꓟꓳ ꓓꓳ ꓐꓰ ꓣꓴ ꓔꓯꓹ ꓡ ꓔꓬꓹ ꓕꓯ ꓞꓳ ꓤ ꓬꓲ ꓦꓬ ꓣꓳ ꓟꓽ ꓞꓲꓺ ꓠꓬ ꓪ ꓔꓲ ꓦꓲꓻ ꓠꓱ ꓫꓳꓸ ꓟꓸ ꓐꓰ ꓙ ꓖꓴ ꓡꓯꓼ ꓶꓸ꓾ ꓡꓯꓼ ꓙ ꓗꓪ ꓚꓬꓸ ꓡꓯ; ꓡꓯ; ꓔꓬ ꓢꓲ ꓒꓵꓽ ꓗ ꓬꓰ ꓗꓷꓳ= ꓢꓽ ꓣꓳ ꓕꓲ ꓣꓳ ꓟ ꓪ ꓔꓲ ꓚꓧꓮꓣꓡꓰꓢ ꓐꓰ ꓪ ꓔꓲ ꓟ ꓠꓶꓽ ꓛꓳ ꓐꓴ ꓕꓲ ꓐꓱ ꓥˍ ꓟꓲ ꓐꓴꓚꓗꓲꓠꓖꓧꓮꓟ ꓪ ꓔꓲ ꓦꓲꓻ ꓗꓪ ꓐꓰ ꓘꓳꓹ ꓣꓴ ꓗꓷ ꓟ ꓥ ꓡꓳ=

ꓪ ꓔꓲ ꓟ ꓬꓲ ꓫꓵꓻ ꓟꓳꓻ ꓔꓯ ꓢꓚꓳꓔꓡꓮꓠꓓ ꓟꓵꓽ ꓰꓓꓲꓠꓐꓴꓣꓖꓧ ꓡꓳ ꓒꓱ ꓗꓪ ꓐꓰ ꓗꓴꓷꓼ ꓚꓱꓹ ꓔꓯ ꓟꓳꓸ ꓣꓱꓽˍ ꓟ ꓚ-17 ꓐꓬꓱ ꓦꓲꓻ ꓐꓰ ꓡꓳꓠꓓꓳꓠ ꓗꓪ ꓣꓴ ꓔꓯꓹ ꓡˍ ꓟ ꓗꓪ ꓪ ꓔꓲ ꓟ ꓬꓲ ꓮ ꓟꓲꓽ ꓮꓠꓠꓰ ꓐꓰ ꓬꓲ ꓦꓲꓻ ꓢꓲ ꓒ ꓢꓲꓣ ꓔꓲꓟꓳꓔꓧꓬ ꓡꓮꓴꓣꓰꓠꓚꓰ ꓐꓴˍ ꓟꓲ ꓔꓺ ꓗꓷ ꓟ ꓥ ꓡꓳ=

ꓪ ꓔꓲ ꓟ ꓬꓲ ꓫꓵꓻ ꓟꓳꓻ ꓔꓯ ꓪ ꓔꓲ ꓦꓲ ꓗꓪ ꓟ ꓐꓳꓪ ꓣꓳꓳꓟ ꓗꓳꓹ ꓗꓪ ꓕꓲ ꓦꓬꓽ ꓗꓷ ꓗꓷ ꓗꓸ ꓠꓯꓸ ꓠꓽ ꓢꓽ ꓠꓬꓲ ꓕꓯ ꓠꓬ ꓚꓧꓮꓣꓡꓰꓢ ꓪ ꓔꓲ ꓐꓰ ꓕꓲ ꓪ ꓑ ꓫꓬ ꓐꓴ ꓮ ꓟꓬꓹ ꓐꓴ ꓡꓰ 11 ꓦꓬ ꓘꓳꓼ ꓕꓯ ꓫꓬꓹ ꓔ ꓟ ꓪꓰꓢꓔꓟꓲꓠꓢꓔꓰꓣ ꓪꓽ ꓘꓴ ꓦꓲ ꓗꓪ ꓗꓷ ꓗꓷ ꓢꓲ꓾ ꓖꓳ ꓗꓪ 4 ꓠꓬꓲ ꓗꓷ ꓔ ꓓꓴ ꓥꓳ= ꓖꓳ ꓗ ꓠꓯꓸ ꓪ ꓔꓲ ꓟ ꓬꓲ ꓟꓳꓻ ꓔꓯ ꓒꓵꓽ ꓗ ꓬꓰ ꓡꓳꓸ ꓠꓲꓹ ꓫꓵ ꓢꓴ ꓐꓴ ꓐꓱ ꓶ ꓕꓲ ꓠꓬꓲ ꓗꓪ 23 ꓙꓵꓹ ꓛꓲꓺ ꓒꓴ ꓔ ꓖꓶ ꓓꓴ ꓥ ꓢꓲ ꓖꓳ ꓗꓪ ꓠꓬ ꓪ ꓔꓲ ꓬꓲ ꓟꓯꓼ ꓐꓴ ꓡꓰ ꓡꓳꓸ ꓔꓬ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=