Mecca ꓗꓪ Hajj ꓪꓽ ꓘꓴꓽ ꓚꓳ ꓡ ꓢꓴ 10 ꓫꓬꓹ ꓘꓳꓹ ꓣꓴ ꓠꓹ ꓟ ꓓꓳꓽ

• Mecca ꓗꓪ Hajj ꓪꓽ ꓘꓴꓽ ꓚꓳ ꓡ ꓢꓴ 10 ꓫꓬꓹ ꓘꓳꓹ ꓣꓴ ꓠꓹ ꓟ ꓓꓳꓽ

Saudi Arabia ꓗꓴꓷꓼ Mecca ꓡꓳ ꓒꓱ ꓟꓵꓽ ꓗꓳꓸ ꓓꓵꓺ ꓓꓵꓺ ꓗꓪ ꓐꓰ Islam ꓘꓴ ꓜꓲꓼ ꓞꓳ Hajj ꓪꓽ ꓘꓴ ꓚꓳ ꓡ ꓢꓴ ꓐꓰ ꓮ ꓘꓶꓸ ꓜꓲꓼ ꓡ_ ꓟ ꓥꓳ=

Covid-19 ꓠꓸꓹ ꓫꓵꓽ ꓑꓶ ꓓꓴ Mecca ꓡꓳ ꓒꓱ ꓗꓪ ꓠꓸꓹ ꓫꓵꓽ ꓤ ꓟꓳ ꓓꓴ ꓛꓳ ꓠꓹ ꓟ ꓚꓱꓹ 2 ꓘꓳꓼ ꓐꓯ ꓑꓶ ꓓꓳ ꓗꓸ ꓠꓯꓸ ꓮ ꓟꓶ ꓝꓮꓲ ꓕꓲ ꓧꓪꓹ ꓞꓳ ꓤ ꓮ ꓘꓶꓸ ꓜꓲꓼ ꓡ_ ꓟ ꓥꓳ=

Islam ꓘꓴ ꓜꓲꓼ ꓞꓳ ꓐꓴ ꓐꓱ ꓶ ꓮ ꓘꓶꓸ ꓒꓵꓽ_ ꓟ ꓕꓲ ꓖ ꓥ ꓟ Mecca ꓡꓳ ꓒꓱ ꓗꓪ 2019 ꓘꓳꓼ ꓗꓸ ꓠꓯꓸ ꓬꓲ ꓪꓴꓸ ꓕꓲ ꓧꓪꓹ ꓠꓱꓸ ꓐꓯꓼ ꓗꓴꓷꓼ ꓪꓰ ꓤꓼ 8 ꓫꓬꓹ ꓛꓲ ꓐꓰ ꓪꓽ ꓘꓴꓽ ꓚꓳ ꓡ ꓢꓴ 10 ꓫꓬꓹ ꓗꓪ ꓛꓲ ꓘꓳꓹ ꓣꓴ ꓓꓴ ꓥꓳ ꓐꓰ ꓐꓯ ꓑꓶ ꓔ ꓟ ꓥꓳ=

ꓕꓲ ꓘꓳꓼ ꓕꓲ ꓧꓪꓹ ꓬꓰ_ ꓟ Mecca ꓪꓽ ꓘꓴꓽ ꓑꓮꓲ ꓔꓯ ꓠꓽ ꓢ ꓠꓬꓲ ꓗꓪ ꓐꓰ ꓪꓴꓸ ꓔꓴ ꓓꓴ ꓥ ꓡꓳ= 2019 ꓘꓳꓼ ꓕꓯ ꓪꓽ ꓘꓴ ꓜꓲꓼ ꓡ ꓢꓴ 20 ꓫꓬꓹ ꓛꓲ ꓙꓳ ꓥ ꓟꓲ 2020 ꓘꓳꓼ ꓗꓪ ꓠꓬ ꓪꓰ ꓤꓼ ꓕꓲ ꓣꓳ ꓡꓰ ꓟꓽ ꓡ ꓡꓳ ꓐꓰ ꓢꓷꓸ ꓪ ꓡꓳ=

2021 ꓘꓳꓼ ꓗꓪ ꓠꓬ Covid-19  ꓠꓸꓹ ꓫꓵꓽ ꓑꓶ ꓓꓴ Saudi ꓑ ꓫꓬ 6 ꓟꓶꓽ ꓔꓯ ꓡꓰ ꓪꓽ ꓘꓴ ꓜꓲꓼ ꓡ ꓝꓲ_ ꓟ ꓥꓳ= Islam ꓘꓴꓽ ꓜꓲꓼ ꓞꓳ ꓐꓴ ꓐꓱ ꓶ ꓮ ꓘꓶꓸ ꓒꓵꓽ ꓟ ꓕꓲ ꓟ ꓥ ꓟ ꓑꓶ ꓓꓴ ꓬꓲ ꓪ ꓠꓬ ꓕꓱ ꓪꓽ ꓘꓴ ꓑꓮꓲ ꓔꓯ ꓕꓲ ꓧꓪꓹ ꓛꓲ ꓪꓽ ꓘꓴꓽ ꓙꓰ ꓚꓳ ꓐ ꓡ ꓠꓹ ꓟ ꓐꓱ ꓶ ꓠꓲꓹ ꓡꓶꓽ ꓙꓳ_ ꓟ ꓥꓳ=