ꓑꓳꓸꓸ (ꓡ ꓛꓴꓸ) ꓔꓯ ꓡꓳ ꓩꓴ ꓗꓷ-. ꓢꓰꓼ ꓡꓯꓼ ꓘꓳ ꓢꓴ ꓠꓬ ꓡ ꓞꓳ ꓐꓴ ꓔꓯ ꓟꓽ ꓓꓵꓽ ꓙ-ꓸ ꓡ ꓞꓳ ꓠꓲꓹ ꓟ ꓟꓽ ꓙꓳ ꓢꓴ ꓥ ꓡꓳ=

ꓑꓳꓸꓸ (ꓡ ꓛꓴꓸ) ꓔꓯ ꓡꓳ ꓩꓴ ꓗꓷ-. ꓢꓰꓼ ꓡꓯꓼ ꓘꓳ ꓢꓴ ꓠꓬ ꓡ ꓞꓳ ꓐꓴ ꓔꓯ ꓟꓽ ꓓꓵꓽ ꓙ-ꓸ ꓡ ꓞꓳ ꓠꓲꓹ ꓟ ꓟꓽ ꓙꓳ ꓢꓴ ꓥ ꓡꓳ=

ꓑꓳꓸꓸ (ꓡ ꓛꓴꓸ) ꓔꓯ ꓡꓳ ꓩꓴ ꓗꓷ-. ꓢꓰꓼ ꓡꓯꓼ ꓘꓳ ꓢꓴ ꓠꓬ ꓡ ꓞꓳ ꓐꓴ ꓔꓯ ꓟꓽ ꓓꓵꓽ ꓙ-ꓸ ꓡ ꓞꓳ ꓠꓲꓹ ꓟ ꓟꓽ ꓙꓳ ꓢꓴ ꓥ ꓡꓳ=

2 ꓦ 27 ꓠꓬꓲ ꓠꓽ ꓫꓵꓽ ꓠꓬꓲ ꓗꓪ ꓔꓲꓸꓸ ꓒ ꓪ ꓔꓲ ꓡꓰ ꓑꓳꓸꓸ (ꓡ ꓛꓴꓸ) ꓔꓯ ꓡꓳ ꓩꓴ ꓗꓷ ꓠꓹ ꓟ ꓐꓱ ꓶ ꓐꓯ ꓔ ꓢꓲ-ꓸ ꓢꓰꓼ ꓡꓯꓼ ꓘꓳ ꓢꓴ ꓠꓬ ꓡ ꓞꓳ ꓐꓴ ꓔꓯ ꓟꓽ ꓓꓵꓽ ꓙ-ꓸ ꓡ ꓞꓳ ꓠꓲꓹ ꓟ ꓟꓽ ꓙꓳ ꓢꓴ ꓥꓳ ꓐꓰ Vatican News  ꓗꓪ ꓐꓰ ꓐꓯ ꓑꓶꓸꓸ ꓔ ꓡꓳ=

ꓠꓬꓲ ꓠꓬꓲ ꓟ ꓦꓬꓼ ꓠꓬꓲ ꓗꓪ ꓟꓯꓼ ꓢꓰꓼ ꓡꓯꓼ ꓘꓳ_ ꓟ ꓑꓶ ꓓꓴ ꓠꓲꓹ ꓫ ꓟꓬ ꓫꓸ ꓔꓳꓹ ꓜꓳ ꓔꓬ ꓟ ꓥꓳ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ ꓔ ꓡꓳ=

ꓣ-ꓫꓸ ꓡꓰ ꓬꓴ-ꓗ-ꓣꓲ ꓔꓯ ꓟꓯꓼ ꓢꓰꓼ ꓪꓴꓸ ꓔꓴꓸ ꓡꓳ ꓐꓰ ꓓꓳꓽ  ꓑ ꓙ ꓟ ꓥꓳ= ꓔꓲꓸꓸ ꓒ ꓪ ꓔꓲ ꓡꓰ ꓕꓱ ꓟ ꓡꓰ ꓐꓰ ꓗꓴꓷꓼ ꓢꓲ ꓡꓲꓹ ꓠꓹ ꓟ ꓐꓱ ꓶ ꓮ ꓘꓶꓸ ꓪꓽ ꓘꓴ ꓓꓴ ꓬꓰ ꓡꓯ= ꓟꓯꓼ ꓘꓰꓹ ꓔꓬ ꓢꓴ ꓐꓴ ꓐꓱ ꓶ ꓐ ꓡ ꓕꓯ ꓑꓳꓸ ꓬꓰ ꓙ ꓓꓴ ꓬꓰ ꓡꓯ=  ꓗꓴꓷꓼ ꓢꓰꓼ ꓡꓯꓼ ꓘꓳ ꓓꓴ ꓟꓽ ꓒꓬꓱꓼ ꓡꓯꓼ ꓘꓳ ꓠꓹ ꓟ ꓐꓱ ꓶ ꓐꓯ ꓡꓳꓹ ꓬꓰ_ ꓟ ꓮ ꓙꓵꓽ ꓔꓯ ꓕꓲꓽ ꓠꓬꓲ ꓡꓲ ꓕꓲꓽ ꓠꓬꓲ ꓬꓰ ꓔꓬ ꓟ ꓥ ꓡꓳ=

ꓕꓱ ꓡꓱ ꓟꓯꓼ ꓢꓰꓼ ꓡꓯꓼ ꓘꓳ ꓓꓴ ꓟꓽ ꓙꓳ ꓠꓹ ꓟ ꓐꓱ ꓶ ꓕꓲꓽ ꓠꓬꓲ ꓡꓲ ꓕꓲꓽ ꓠꓬꓲ ꓪꓽ ꓘꓴ ꓔꓬ ꓟ ꓥꓳ=

3 ꓦ 2 ꓠꓬꓲ ꓥꓷꓼ ꓛꓲꓸꓸ ꓗꓪ ꓗꓳ ꓦ ꓒꓴ ꓡꓰ ꓟꓲꓸꓸ ꓖꓶ_ ꓟ (Ash Wednesday) ꓠꓽ ꓢ ꓠꓬꓲ ꓕꓯ ꓜ ꓚꓲꓸ ꓚꓲꓸ_ ꓟ ꓦꓬꓼ ꓠꓬꓲ ꓥ ꓟ ꓡꓰ ꓐꓰ ꓟꓬ ꓠꓬꓲ ꓬꓴ-ꓗ-ꓣꓲꓸ ꓗꓴꓷꓼ ꓢꓲ ꓡꓲꓹ ꓗꓹ ꓛꓲ ꓠꓹ ꓟ ꓐꓱ ꓶ ꓪꓽ ꓘꓴ ꓙ ꓓꓴ ꓬꓰ ꓡꓯ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓢꓯꓼ ꓖꓶ_ ꓡꓳ=

ꓣꓳ ꓮ ꓙꓵꓽ ꓠꓬ ꓬꓲꓼ ꓠꓬꓲ ꓤ ꓥ ꓟ ꓔꓯ ꓓꓵꓽ ꓙ ꓓꓴ ꓬꓰ ꓡꓯ= ꓢꓲ ꓡꓲꓹ ꓗꓹ ꓛꓲ_ ꓟ ꓗꓴꓷꓼ ꓗꓷ ꓡꓰ ꓠꓹ ꓟ ꓪꓴ-ꓢ ꓡꓰ ꓬꓰ ꓙ ꓠꓹ ꓟ ꓐꓱ ꓶ ꓪꓽ ꓘꓴ ꓓꓴ ꓬꓰ ꓡꓯ= ꓟꓯꓼ ꓢꓰꓼ ꓡꓯꓼ ꓘꓳ_ ꓟ ꓑꓶ ꓓꓴ ꓠꓲꓹ ꓫ ꓟꓬ ꓫꓸ ꓔꓳꓹ ꓜꓳ ꓔꓬ ꓟ ꓬꓴ-ꓗ-ꓣꓲ ꓗꓴꓷꓼ ꓑ ꓫꓬ ꓐꓴ ꓐꓱ ꓶ ꓮ ꓘꓶꓸ ꓪꓽ ꓘꓴ ꓙ ꓓꓴ ꓬꓰ ꓡꓯ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓢꓯꓼ ꓖꓶ_ ꓡꓳ=

ꓟꓯꓼ ꓢꓰꓼ ꓡꓯꓼ ꓘꓳ ꓓꓴ ꓕꓱ ꓡꓱ ꓪꓴꓸ ꓔꓴ ꓢꓴ ꓠꓬ ꓟꓲ ꓠꓯ ꓡ ꓞꓳ ꓔꓯ ꓟꓽ ꓓꓵꓽ ꓙ ꓟ ꓡꓳ= ꓬꓲ ꓪ ꓠꓬ ꓡꓽ ꓞꓳ ꓐꓴ ꓔꓯ ꓟꓽ ꓡꓳꓸ ꓠꓬꓲ ꓬꓲꓸ ꓪ ꓚꓲ ꓛꓬ ꓙꓵꓽ ꓪ ꓔꓯ ꓡꓰ ꓣꓱꓽ_ ꓟ ꓥꓳ= ꓬꓲ ꓪ ꓠꓬ ꓪꓴ-ꓢ ꓠꓲꓹ ꓡꓶꓽ ꓐꓰ ꓗꓴꓷꓼ ꓢꓲ ꓡꓲꓹ ꓠꓲꓹ ꓫꓵꓽ ꓢꓴ ꓡ ꓞꓳ ꓐꓴ ꓐꓰ ꓶꓽ ꓡꓰ_ ꓟ ꓥꓳ=

ꓟꓯꓼ ꓘꓰꓹ ꓡꓰ ꓟ ꓗꓪ ꓞꓲꓼ ꓪꓴꓽ ꓡꓰ ꓢꓴ-ꓸ ꓤ ꓠꓱ ꓤ ꓐꓴ ꓐꓰ ꓤ ꓠꓱ ꓟꓹ ꓟ ꓐꓴ ꓐꓱ ꓶ ꓮ ꓘꓶꓸ ꓓꓵꓽ ꓙ ꓫꓸ ꓔꓬ ꓟ ꓥꓳ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ_ ꓡꓳ=

ꓬꓲ ꓪ ꓮ ꓙꓵꓽ ꓠꓬ ꓬꓲꓼ ꓠꓬꓲ ꓤ ꓐꓴ ꓡꓰ ꓥ ꓡꓳ= ꓟꓲ ꓠꓯ ꓡ ꓞꓳ ꓙꓳ ꓙꓳ ꓠꓲꓹ ꓟ ꓐꓰ ꓬꓰ ꓙ ꓠ ꓔ ꓡꓳ= ꓕꓱ ꓟ ꓠꓬ ꓬꓴ-ꓗ-ꓣꓲ ꓗꓪ ꓒꓬꓱꓼ ꓔꓬ ꓟ ꓥ ꓡꓳ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ_ ꓡꓳ=

ꓢꓰꓼ ꓡꓯꓼ ꓘꓳ_ ꓟ ꓠꓬ ꓕꓱ ꓟꓲ ꓠꓯ ꓗꓪ ꓗꓷ ꓡꓰ ꓟꓽ ꓓ-ꓸ ꓟꓲ ꓠꓯ ꓡ ꓞꓳ ꓔꓬ ꓟ ꓗꓪ ꓢꓰꓼ ꓡꓯꓼ ꓘꓳ ꓟꓽ ꓓ-ꓸ ꓥꓪ ꓝꓮꓲ ꓕꓲ ꓧꓪꓹ ꓐꓯ ꓖꓶ_ ꓥꓳ= ꓠꓴ ꓪ ꓑꓳꓸꓸ(ꓡ ꓛꓴꓸ) ꓔꓯ ꓡꓳ ꓩꓴ ꓗꓷ= ꓪꓴ-ꓢ ꓠꓬ ꓢꓰꓼ ꓡꓯꓼ ꓘꓳ ꓢꓴ ꓐꓰ ꓟꓽ ꓔꓬ-ꓸ ꓢꓲ ꓡꓲꓹ ꓢꓴ ꓐꓴ ꓐꓰ ꓔꓬ ꓡꓳ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ_ ꓡꓳ=

Add new comment

8 + 9 =