ꓔꓲꓺ ꓒ ꓪ ꓔꓲ ꓡꓰ “ꓣꓳ ꓔꓬ ꓦꓲꓻ” ꓔꓯ ꓪꓴ-ꓢ ꓐꓰ ꓕꓲ ꓪ ꓫꓬꓹ ꓠꓹ ꓟ ꓢꓯꓼ ꓖꓶ_ ꓡꓳ꓾

ꓔꓲꓺ ꓒ ꓪ ꓔꓲ ꓡꓰ “ꓣꓳ ꓔꓬ ꓦꓲꓻ” ꓔꓯ ꓪꓴ-ꓢ ꓐꓰ ꓕꓲ ꓪ ꓫꓬꓹ ꓠꓹ ꓟ ꓢꓯꓼ ꓖꓶ_ ꓡꓳ꓾

ꓡꓳꓹ ꓬꓰ ꓟ ꓠꓽ ꓫꓵ ꓠꓬꓲ ꓕꓯ ꓔꓲꓺ ꓒ ꓪ ꓔꓲ ꓡꓰ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓜ ꓚꓲꓸ ꓚꓲꓸ_ ꓟ ꓦꓬꓼ ꓠꓬꓲ ꓗꓪ ꓣꓳ ꓔꓬ ꓟ ꓔꓬ ꓦꓲꓻ ꓔꓯ ꓪꓴ-ꓢ ꓐꓰ ꓕꓲ ꓪꓼ ꓫꓬꓹ ꓠꓹ ꓟ ꓐꓱ ꓶ ꓣꓳ ꓬꓲꓼ ꓤ ꓠꓬꓲ ꓤ ꓠꓶꓽ ꓛꓳ ꓕꓲ ꓛꓳ ꓐꓰ ꓫꓱꓹ ꓡꓯꓽ ꓘꓳ ꓢꓲ꓾ ꓕꓲ ꓣꓳ ꓛꓳ ꓕꓲ ꓣꓳ ꓙꓵꓻ ꓟ ꓠꓲꓹ ꓟ ꓐꓰ ꓫꓱꓹ ꓡꓯꓽ ꓘꓳ ꓠꓹ ꓟ ꓐꓱ ꓶ ꓐꓰ ꓪꓽ ꓘꓴ ꓟ ꓚꓱꓹ ꓗꓪ ꓟꓬ ꓠꓬꓲ ꓢꓯꓼ ꓕꓵꓼ ꓢꓲ ꓙꓻ ꓫꓱꓽ ꓠꓹ ꓟ ꓐꓱ ꓶ ꓐꓯ ꓔ ꓡꓳ= ꓡꓳꓹ ꓬꓰ ꓟ ꓕꓲ ꓠꓽ ꓠꓽ ꓦꓬꓼ ꓠꓬꓲ ꓟꓲ-ꓢ ꓪꓽ ꓘꓴ ꓙꓵꓹ ꓗꓪ ꓢꓲ ꓒ ꓬꓰ-ꓢꓴ ꓡꓰ ꓶꓻ ꓡꓯꓼ ꓟꓬꓱꓽ ꓬꓰ ꓢꓴ ꓐꓰ ꓒꓴ ꓑ ꓢꓴ ꓔꓯ ꓖꓼ ꓓꓳ ꓗꓷ ꓟ ꓗꓪ ꓐꓰ “ ꓥꓪ ꓐꓹ ꓐ ꓦꓲ ꓔꓯ ꓠꓬ ꓠꓴ ꓪ ꓶꓻ ꓡꓯꓼ ꓟꓴ ꓖꓴ ꓗꓷ ꓡꓰ ꓝꓲ ꓟꓽ ꓓ꓾” ꓐꓰ ꓖꓳ ꓕꓲ ꓠꓬꓲ ꓪꓴ-ꓢ ꓶꓼ ꓓꓳ ꓫꓱꓸ ꓓꓳ ꓗꓪ ꓐꓰ ꓐꓯ ꓔ ꓡꓳ=

ꓔꓲꓺ ꓒ ꓪ ꓔꓲ ꓡꓰ ꓮ ꓡꓰ ꓠꓲꓹ ꓟ ꓐꓰ ꓪꓴ-ꓢ ꓠꓯꓼ ꓗꓪ ꓛꓳ ꓫꓱꓽ ꓔꓬ ꓡ꓾ ꓢꓲ ꓫꓬ ꓦꓲꓻ ꓔꓯ ꓶꓻ ꓡꓯꓼ ꓟꓴ ꓡꓰ ꓐꓰ ꓟꓽ ꓥ ꓠꓬ ꓚꓲ ꓛꓬ ꓔꓬ ꓦꓲꓻ ꓠꓲꓹ ꓟ ꓐꓰ ꓪꓴ-ꓢ ꓠꓯꓼ ꓗꓪ ꓠꓶꓽ ꓞꓹ ꓠꓹ ꓟ ꓢꓯꓼ ꓕꓵꓼ ꓟ ꓚꓱꓹ ꓠꓬ ꓮ ꓡꓰ ꓐꓰ ꓚꓬꓹ ꓡ ꓐꓰ ꓣꓳ ꓓꓵꓽ ꓙ ꓔꓱꓹ ꓕ ꓠꓬꓲ ꓠꓹ ꓟ ꓥ ꓡꓳ= ꓢꓲ ꓫꓬ ꓦꓲ ꓗꓪ ꓶꓻ ꓡꓯꓼ ꓟꓴ ꓬꓰ_ ꓟ ꓠꓲꓹ ꓟ ꓐꓰ ꓣꓳ ꓢꓯꓼ ꓕꓵꓼ ꓠꓬ ꓮ ꓣꓳ ꓤꓼ ꓕꓲ ꓟ ꓔꓯ ꓪꓴꓺ ꓢꓲ꓾ ꓪꓴ-ꓢ ꓐꓰ ꓕꓲ ꓪ ꓛꓴ ꓔꓲꓺ ꓘꓳꓹ ꓣꓴ ꓟ ꓡꓰ ꓥ ꓡꓳ꓾ ꓕꓱ ꓟ ꓠꓬ ꓣꓳ ꓪꓴꓺ ꓗꓷ ꓟ ꓗꓪ ꓐꓰ ꓡꓰ ꓛꓴꓺ ꓔꓲ ꓟ ꓥ ꓡꓳ ꓐꓰ ꓐꓯ ꓔ ꓡꓳ= ꓣꓳ ꓪꓽ ꓘꓴ ꓦꓲ ꓢꓲ ꓫꓬ ꓦꓲꓻ ꓔꓯ ꓣꓳ ꓚꓲ ꓛꓬ ꓦꓲꓻ ꓡꓰ ꓐꓰ ꓓꓵꓽ ꓙ ꓠꓬ ꓐꓯ ꓡꓳꓹ ꓬꓰ ꓟ ꓡꓰ ꓐꓰ ꓚꓬꓹ ꓟ ꓥꓳ= ꓣꓳ ꓖꓳ ꓗꓪ ꓙꓰ ꓟ ꓠꓬ ꓪꓴ-ꓢ ꓐꓰ ꓕꓲ ꓪ ꓫꓸ ꓕꓱ ꓢꓲ꓾ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓬꓲꓼ ꓠꓬꓲ ꓤ ꓠꓲꓹ ꓟ ꓐꓰ ꓫꓱꓹ ꓡꓯꓽ ꓘꓳ ꓟ ꓡꓰ ꓐꓰ ꓬꓲ ꓐꓰ ꓗꓹ ꓛꓲ ꓥ ꓟꓲ ꓫꓸ ꓥ ꓟꓲ ꓕꓲ ꓣꓳ ꓐꓰ ꓕꓲ ꓣꓳ ꓓꓵꓽ ꓙ ꓙ ꓠꓹ ꓟ ꓐꓱ ꓶ ꓥ ꓡꓳ=

ꓝꓮꓲ ꓶꓻ ꓡꓯꓼ ꓟꓴ ꓠꓲꓹ ꓟ ꓙꓳ ꓢꓴ ꓠꓬ ꓠꓱꓸ ꓐꓯꓼ ꓢꓴ ꓣꓱꓽ ꓬꓯꓼ ꓟ ꓔꓯ ꓛꓳ_ ꓡꓳ꓾ ꓶꓻ ꓡꓯꓼ ꓢꓳ_ ꓡꓳ꓾ ꓪꓴꓺ ꓢꓴ ꓐꓰ ꓪꓴꓽ ꓢꓴ ꓬꓲꓸ ꓒꓵꓽ ꓔꓯ ꓚꓬꓹ ꓔ ꓡꓳ꓾ ꓠꓱꓸ ꓐꓯꓼ ꓕꓲ ꓛꓱ ꓗꓪ ꓠꓬꓲꓸ ꓠꓸ ꓠꓬ ꓔꓬ ꓦꓲ ꓡꓰ ꓐꓰ ꓓꓵꓽ ꓙ ꓢꓴ ꓠꓬ ꓬꓲ ꓒꓵꓽ ꓔꓯ ꓟꓽ ꓢꓪꓼ ꓢꓪꓼ ꓕꓲ ꓣꓳ ꓛꓳ ꓕꓲ ꓣꓳ ꓠꓵ ꓠꓲꓹ ꓐꓰ ꓬꓰ ꓙ ꓔꓳꓹ ꓙ ꓟ ꓚꓱꓹ ꓗꓪ ꓐꓰ ꓡꓰ ꓬꓰ ꓙ_ ꓟ ꓔꓯ ꓐꓯ ꓔ ꓟ ꓥꓳ=

ꓡꓳꓹ ꓬꓰ ꓟ ꓠꓽ ꓦꓬꓼ ꓠꓬꓲ ꓶꓼ ꓓꓳ ꓫꓱꓸ ꓓꓳ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓑꓶꓸ ꓑꓶꓸ ꓡꓰ ꓬꓰ_ ꓟ ꓔꓯ ꓡꓳꓸ ꓟꓳ ꓪ ꓡꓳ= ꓔꓬ ꓦꓲꓻ ꓡꓰ ꓐꓰ ꓢꓲ ꓫꓬ ꓦꓲꓻ ꓔꓯ ꓶꓻ ꓡꓯꓼ ꓟꓴ ꓡꓰ ꓐꓰ ꓬꓰ_ ꓟ ꓠꓬ ꓪꓴ-ꓢ ꓡꓰ ꓟꓽ ꓘꓳꓹ ꓣꓴ ꓟ ꓔꓯ ꓐꓯ ꓔ ꓡꓳ= ꓔꓬ ꓦꓲꓻ ꓡꓰ ꓐꓰ ꓓꓵꓽ ꓙ ꓢꓴ ꓠꓬ ꓪꓴ-ꓢ ꓐꓰ ꓕꓲ ꓪ ꓕꓲ ꓣꓳ ꓐꓰ ꓕꓲ ꓣꓳ ꓙꓵꓻ ꓢꓲ꓾ ꓕꓲ ꓣꓳ ꓐꓰ ꓕꓲ ꓣꓳ ꓢꓷꓸ ꓡꓯ ꓘꓳ ꓟ꓾ ꓢꓲ ꓡꓲꓹ ꓗꓹ ꓛꓲ_ ꓟ ꓔꓬ ꓦꓲꓻ ꓗꓷ ꓡꓰ ꓝꓲ_ ꓟ ꓔꓯ ꓐꓯ ꓔ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓣꓳ ꓐꓰ ꓔꓬ ꓢꓲ꓾ ꓫꓱꓸ ꓤ_ ꓟ ꓐꓰ ꓕꓲ ꓣꓳ ꓐꓰ ꓕꓲ ꓣꓳ ꓙꓻ ꓡꓯꓽ ꓘꓳ ꓠꓹ ꓟ ꓐꓱ ꓶ ꓬꓯꓼ ꓡ ꓔꓬ ꓟ ꓔꓯ ꓢꓯꓼ ꓖꓶ ꓡꓳꓹ ꓬꓰ ꓟ ꓥꓳ=

ꓔꓲꓺ ꓒ ꓪ ꓔꓲ ꓡꓰ ꓣꓳ ꓔꓯ ꓕꓱ ꓜ ꓚꓲꓸ ꓚꓲꓸ_ ꓟ ꓦꓬꓼ ꓠꓬꓲ ꓗꓪ ꓠꓬ ꓚꓲ ꓛꓬ ꓐꓰ ꓣꓳ ꓠꓶꓽ ꓛꓳ ꓕꓲ ꓛꓳ ꓐꓴ ꓐꓰ ꓕꓲ ꓪ ꓕꓲ ꓦꓲꓻ ꓡ ꓞꓳ ꓡꓰ ꓐꓰ ꓠꓲꓹ ꓟ ꓔꓬ ꓠꓹ ꓟ ꓙꓵꓹ ꓥ ꓟꓲ ꓥ ꓡꓳ꓾ ꓖꓳ ꓟ ꓗꓪ ꓐꓰ ꓬꓲ ꓪꓴꓸ ꓕꓲ ꓚꓱꓹ ꓠꓬ ꓪꓴ-ꓢ ꓠꓯꓼ ꓗꓪ ꓪꓽ ꓘꓴ ꓢꓲ ꓛꓳ ꓫꓱꓽ_ ꓟ꓾ ꓮ ꓫꓵ ꓡꓲ ꓟꓽ ꓢꓷꓸ ꓟ ꓤ ꓠꓱ ꓤ ꓕꓲ ꓣꓳ ꓡꓰ ꓐꓰ ꓐꓹ ꓐ ꓔꓬ ꓦꓲꓻ ꓗꓸ ꓘꓶꓽ ꓠꓯꓼ ꓗꓪ ꓟꓽ ꓠꓽ ꓠꓽ ꓱ’ ꓔꓬ ꓟ ꓡꓰ ꓐꓰ ꓪꓽ ꓘꓴ ꓠꓹ ꓟ ꓚꓱꓹ ꓐꓯ ꓡꓳꓹ ꓬꓰ ꓟ ꓥꓳ= ꓝꓮꓲ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓬꓲꓼ ꓠꓬꓲ ꓤ ꓡꓰ ꓐꓰ ꓪꓽ ꓡꓯꓽ ꓘꓳ ꓫꓱꓹ ꓡꓯ ꓘꓳ ꓢꓲ ꓔꓬ ꓗꓴꓸ ꓠꓹ ꓟ ꓠꓲꓹ ꓟ ꓠꓬ ꓚꓵ ꓚꓵ ꓣꓳ ꓠꓯꓼ ꓗꓪ ꓛꓬꓹ ꓟ ꓚꓱꓹ ꓔꓯ ꓢꓯꓼ ꓖꓶ ꓡꓳꓹ ꓬꓰ ꓟ ꓥꓳ=

ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓢꓯꓸ ꓔꓬ ꓟ ꓤꓶꓻ ꓗꓪ ꓣꓳ ꓔꓯ ꓧꓹ ꓙꓰ ꓟ ꓟꓽ ꓥ ꓠꓬ ꓝꓴꓲ ꓡꓰ ꓧꓪꓹ ꓟ ꓮ ꓘꓶꓸ ꓔꓳꓹ ꓜꓳ ꓡ ꓥꓳ꓾ ꓕꓱ ꓟ ꓡꓰ ꓐꓰ ꓔꓳꓹ ꓜꓳ ꓡ ꓕꓯ ꓥ ꓟꓲ ꓚꓲ ꓛꓬ ꓓꓵꓽ ꓙ ꓔꓱꓹ ꓕ ꓗꓴꓸ ꓠ ꓔ ꓡꓳ= ꓣꓳ ꓠꓬ ꓠꓱꓸ ꓐꓯꓼ ꓢꓴ ꓐꓰ ꓕꓲ ꓪ ꓪꓽ ꓡꓯ ꓘꓳ ꓫꓱꓹ ꓡꓯꓽ ꓘꓳ ꓟ ꓗꓪ ꓮ ꓕꓯ ꓟꓲ ꓔꓱꓹ ꓕ ꓠꓹ ꓟ ꓥꓳ꓾ ꓬꓲꓸ ꓪꓴꓸ ꓗꓪ ꓐꓰ ꓣꓳ ꓐꓰ ꓠꓱꓸ ꓐꓯꓼ ꓢꓴ ꓠꓬꓲꓽ ꓗꓳꓸ ꓚꓸ ꓗꓪ ꓔꓬ ꓟ ꓢꓲ ꓡꓲꓹ ꓐꓰ ꓔꓬ ꓟ ꓐꓰ ꓙꓲ ꓖꓴ ꓟꓽ ꓙꓳ ꓟ ꓚꓱꓹ ꓔꓯ ꓧꓶꓸ ꓕꓯ ꓟꓶꓽ ꓡꓰ ꓠꓹ ꓟ ꓬꓰ ꓠꓹ ꓟ ꓐꓯ ꓔ ꓡꓳ= ꓣꓳ ꓠꓬ ꓪꓴ-ꓢ ꓔꓯ ꓬꓲꓸ ꓙꓵꓹ ꓔꓯ ꓡꓳꓸ ꓠꓬꓲ ꓢꓲ ꓣꓳ ꓠꓯꓼ ꓗꓪ ꓬꓰ ꓠ ꓔ ꓟ ꓟꓬꓱꓽ ꓐꓰ ꓢꓯꓼ ꓕꓵꓼ ꓢꓲ ꓬꓲꓸ ꓙꓵꓹ ꓕꓲ ꓙꓵꓹ ꓖꓶ ꓟ꓾ ꓟꓽ ꓥ ꓠꓬ ꓪꓴ-ꓢ ꓔꓯ ꓙꓵꓻ ꓠꓲꓹ ꓚꓱꓹ ꓗꓪ ꓐꓰ ꓡꓳ ꓒꓲꓹ ꓗꓷ ꓟ꓾ ꓣꓳ ꓠꓯꓼ ꓗꓪ ꓪꓽ ꓘꓴ ꓟ ꓔꓯ ꓬꓰ ꓠ ꓔ ꓟ ꓟꓬꓱꓽ ꓕꓲ ꓟ ꓡꓰ ꓐꓰ ꓬꓰ ꓔꓬ ꓡ ꓐꓰ ꓓꓵꓽ ꓙ ꓔꓱꓹ ꓕ ꓠꓹ ꓟ ꓢꓯꓼ ꓖꓶ ꓔ ꓡꓳ=