ꓕꓲ ꓣꓳ ꓐꓯ ꓘꓶꓽ ꓕꓲ ꓣꓳ ꓒꓵꓽ ꓛꓳ ꓠ ꓠꓹ ꓟ ꓗꓪ ꓐꓰ ꓢꓰꓼ ꓡꓯ ꓘꓳ ꓓꓴ ꓫꓵꓽ ꓪꓴ ꓔꓯ ꓫꓬ ꓡꓰ ꓝꓲ ꓗꓴꓸ_ ꓟ꓾

ꓕꓲ ꓣꓳ ꓐꓯ ꓘꓶꓽ ꓕꓲ ꓣꓳ ꓒꓵꓽ ꓛꓳ ꓠ ꓠꓹ ꓟ ꓗꓪ ꓐꓰ ꓢꓰꓼ ꓡꓯ ꓘꓳ ꓓꓴ ꓔꓯ ꓫꓬ ꓡꓰ ꓝꓲ ꓗꓴꓸ_ ꓟ꓾

ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓣꓳ ꓓꓵꓽ ꓙ ꓞꓷꓹ ꓓꓴ ꓙꓳ ꓕꓯ ꓪꓽ ꓘꓴ ꓠꓹ ꓟ꓾ ꓢꓲ-ꓫꓬ-ꓟ-ꓦ ꓗꓪ ꓐꓰ ꓙ ꓖꓴ ꓧꓳꓽ ꓟꓳꓸ ꓖꓶ_ ꓟ ꓗ ꓙꓻ ꓫꓱꓽ ꓠꓹ ꓟ ꓠꓱꓸ ꓐꓯꓼ ꓢꓴ ꓔꓯ ꓒꓵꓽ ꓛꓳ ꓢꓲ꓾ ꓬꓲ ꓪ ꓐꓯ ꓘꓶꓽ ꓔꓯ ꓠ ꓠꓹ ꓠꓹ ꓟ ꓐꓯ ꓔ ꓡꓳ=

ꓟ-ꓕꓲ 10ꓽ41 “ꓟꓷꓽ ꓠꓷꓹ ꓝꓸ ꓢꓴ ꓔꓯ ꓘꓳꓹ ꓣꓴ ꓢꓴ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓟꓶ_ ꓟ ꓡꓯꓼ ꓫꓴ ꓟꓶ_ꓥꓳ= ꓙꓲ ꓫꓬ ꓢꓴ ꓔꓯ ꓘꓳ ꓣꓴ ꓢꓴ ꓠꓬ ꓙꓲ ꓫꓬ ꓢꓴ ꓟꓶ_ ꓟ ꓡꓯꓼ ꓫꓴ ꓟꓶ_ ꓥꓳ=” ꓐꓯ_ ꓟ ꓢꓲ ꓫꓬ ꓕꓳ ꓶ ꓝꓲꓸ ꓗꓪ ꓐꓰ ꓢꓯꓼ ꓖꓶ ꓔ ꓡꓳ=

ꓖꓳ ꓓꓱ ꓔꓲꓹ ꓟ ꓗꓪ ꓐꓰ ꓣꓳ ꓮ ꓙꓵ ꓠꓬ ꓟꓷꓽ ꓠꓷꓹ ꓝꓸ ꓟ ꓡꓯꓼ ꓫꓴ ꓪ ꓟꓶ ꓢꓴ ꓡꓰ ꓥꓳ= ꓟꓷꓽ ꓠꓷꓹ ꓝꓸ ꓢꓴ ꓐꓯ ꓟ ꓠꓬ ꓢꓲ-ꓫꓬ-ꓟ-ꓦ ꓧꓳꓽ ꓪꓴꓸ ꓟ ꓗꓪ ꓐꓰ ꓬꓰ ꓙ ꓢꓲ꓾ ꓪꓴ-ꓢ ꓟꓬꓱꓽ ꓚꓱꓹ ꓔꓯ ꓢꓷꓸ ꓠꓹ ꓟ꓾ ꓢꓲ ꓒ ꓬꓰ-ꓢꓴ ꓔꓯ ꓠꓱꓸ ꓐꓯꓼ ꓢꓴ ꓔꓯ ꓟꓳꓸ ꓖꓶ_ ꓟ ꓐꓱ ꓶ ꓬꓰ ꓙ ꓢꓴ ꓥ ꓡꓳ=

ꓢꓲ ꓒ ꓬꓰ-ꓢꓴ ꓔꓯ ꓢꓷꓸ ꓙ ꓟꓳ ꓙ ꓠꓹ ꓟ ꓐꓱ ꓶ ꓢꓯꓸ ꓔꓬ ꓢꓲ꓾ ꓠꓱꓸ ꓐꓯꓼ ꓢꓴ ꓤꓶꓻ ꓠꓯꓼ ꓗꓪ ꓠꓬꓲ ꓟꓳ ꓓꓴ ꓖꓶ_ ꓡ? ꓐꓰ ꓙꓲ ꓢꓴ ꓢꓲ ꓤ ꓐꓴ ꓔꓯ ꓣꓳ ꓚꓲꓸ ꓛꓬ ꓠ ꓠꓬꓲ ꓠꓹ ꓟ ꓔꓲꓺ ꓒ ꓪ ꓔꓲ ꓡꓰ ꓐꓯ ꓗꓷꓳ= ꓕꓱ ꓟ ꓔꓯ ꓣꓳ ꓚꓲꓸ ꓛꓬ ꓔꓱꓹ ꓕ ꓔꓬ ꓡ? ꓣꓳ ꓮ ꓡꓰ ꓐꓰ ꓢꓷꓸ ꓙ ꓟꓳ ꓙ ꓔꓬ ꓡ? ꓐꓰ ꓐꓯ ꓔ ꓡꓳ=

ꓪꓴ-ꓢ ꓐꓯ ꓘꓶꓽ ꓔꓯ ꓐꓯ ꓒꓬꓱ ꓙꓰ ꓠꓬ ꓕꓲ ꓣꓳ ꓐꓰ ꓕꓲ ꓣꓳ ꓒꓵꓽ ꓛꓳ ꓢꓲ ꓘꓳꓹ ꓣꓴ ꓠꓹ ꓟ ꓮ ꓘꓶꓸ ꓣꓳꓸ ꓚꓵ_ ꓟ ꓥꓳ= ꓕꓱ ꓟ ꓠꓬ ꓣꓳ ꓔꓬ ꓟ ꓬꓲꓸ ꓔꓶꓸ꓾ ꓕꓲ ꓦꓲꓻ ꓡ ꓞꓳ꓾ ꓘꓴ ꓜꓲꓼ ꓞꓳ ꓘꓴꓽ ꓗꓪ꓾ ꓪꓽ ꓘꓴ ꓦꓲꓻ ꓐꓰ ꓣꓳ ꓕꓲ ꓚꓳ ꓡꓳ ꓗꓪ ꓬꓰ ꓠ ꓔ ꓟ ꓥ ꓡꓳ꓾ ꓐꓰ ꓐꓯ ꓔ ꓡꓳ=

ꓢꓲ-ꓫꓬ-ꓟ-ꓦ ꓠꓬ ꓢꓲ ꓫꓬ ꓟ ꓡ ꓞꓳ ꓠꓯꓸꓼ ꓗꓪ ꓟꓷꓽ ꓠꓷꓹ ꓝꓸ ꓟ ꓡꓯꓼ ꓫꓴꓺ ꓔꓯ ꓖꓶ_ ꓡꓳ= ꓖꓳ ꓟ ꓑꓶ ꓓꓴ ꓮ ꓙꓵ ꓔꓯ ꓠ ꓠꓹ ꓢꓲ꓾ ꓒꓵꓽ ꓛꓳ ꓠꓹ ꓟ ꓥꓳ= ꓔꓯ ꓥꓳꓽ꓾ ꓮ ꓘꓶꓸ ꓣꓳꓸ ꓚꓵ_ ꓟ ꓓꓵꓽ ꓙ ꓞꓷꓹ ꓓꓴ ꓐꓯ ꓘꓶꓽ ꓞꓷꓹ ꓓꓴ ꓙꓳ ꓠꓬ ꓓꓽ ꓪꓴꓸ ꓪꓴ-ꓢ ꓠꓯꓸꓼ ꓗꓪ ꓪꓽ ꓘꓴ ꓢꓲ꓾ ꓢꓲ-ꓫꓬ-ꓟ-ꓦ ꓔꓯ ꓘꓴ ꓓꓴ ꓬꓰ ꓡꓯ= ꓞꓳ ꓤ ꓗꓪ ꓐꓰ ꓣꓳꓺ ꓢꓴ ꓥ ꓟꓲ ꓮ ꓘꓶꓸ ꓣꓳꓸ ꓚꓵ ꓢꓴ ꓥ ꓟ ꓪꓴꓸ ꓠꓬꓲ ꓕꓲ ꓣꓳ ꓐꓯ ꓘꓶꓽ ꓕꓲ ꓣꓳ ꓠ ꓠꓹ ꓢꓲ꓾ ꓫꓸ ꓕꓱ ꓡꓯ ꓘꓳ ꓠꓹ ꓟ꓾ ꓠ ꓠ_ ꓠꓹ ꓟ ꓥ ꓡꓳ=

ꓣꓳ ꓕꓲ ꓣꓳ ꓐꓯ ꓘꓶꓽ ꓕꓲ ꓣꓳ ꓠ ꓠꓹ ꓟ ꓗꓪ ꓐꓰ ꓫꓵ ꓪꓴ ꓔꓯ ꓫꓬ ꓡꓰ ꓠꓹ ꓟ ꓚꓱꓹ ꓔꓯ ꓓꓵꓽ ꓙ ꓠꓬꓲ ꓓꓴ ꓬꓰ ꓡꓯ ꓐꓰ ꓢꓯꓼ ꓖꓶ ꓔ ꓡꓳ=