ꓙꓵꓻ ꓠꓲꓹ ꓠꓬ ꓙꓲ ꓢꓴ ꓢꓲꓺ ꓤ ꓕꓲ ꓣꓳ ꓐꓱ ꓶ ꓪꓴ-ꓢ ꓡꓰ ꓖꓶ ꓔ ꓟ ꓡꓯꓼ ꓫꓴꓻ ꓥ ꓡꓳ꓾

ꓙꓵꓻ ꓠꓲꓹ ꓠꓬ ꓙꓲ ꓢꓴ ꓢꓲꓺ ꓤ ꓕꓲ ꓣꓳ ꓐꓱ ꓶ ꓪꓴ-ꓢ ꓡꓰ ꓖꓶ ꓔ ꓟ ꓡꓯꓼ ꓫꓴꓻ ꓥ ꓡꓳ꓾

ꓔꓲꓺ ꓒ ꓪ ꓔꓲ ꓡꓰ ꓙꓲ_ ꓟ ꓐꓰ ꓟꓽ ꓙꓲ_ ꓟ ꓔꓯ ꓟꓳꓸ ꓟꓸ ꓖꓶ ꓐꓯ ꓡꓳꓹ ꓬꓰ ꓟ ꓗꓪ ꓙꓵꓻ ꓠꓲꓹ ꓐꓯ ꓟ ꓠꓬ ꓘꓴ ꓜꓲꓼ ꓞꓳ ꓗꓪ ꓬꓲꓸ ꓪꓴꓸ ꓟ ꓦꓲꓣꓔꓴꓰꓢ ꓥ ꓟ ꓔꓯ ꓐꓯ ꓡꓳꓹ ꓬꓰ ꓟ ꓥꓳ꓾ ꓡꓳꓹ ꓬꓰ ꓟ ꓠꓽ ꓢ ꓠꓬꓲ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓐꓰ ꓜꓲ ꓡꓯꓽ ꓘꓳ_ ꓟ ꓙꓵꓹ ꓗꓪ “three theological virtues” ꓥ ꓟ ꓙꓵꓻ ꓠꓲꓹ꓾ ꓠꓵꓻ ꓠꓲꓹ ꓐꓰ ꓥꓳ ꓡꓳꓸ ꓓꓴ ꓟꓽ ꓙꓳ ꓠꓬ ꓠꓯ ꓞꓲꓹ ꓟ ꓘꓴꓽ ꓗꓪ ꓟꓳ ꓘꓴ ꓡꓰ ꓟ ꓟꓬ ꓢꓶꓽ ꓙꓳ ꓥ ꓟꓲ ꓟꓳ ꓟꓽ ꓓ꓾ ꓟꓽ ꓠꓲꓹ ꓠꓵꓻ ꓟ ꓗꓪ ꓐꓰ ꓠꓲꓹ ꓠꓵꓻ ꓗꓴꓸ_ ꓟ ꓠꓲꓹ ꓟ ꓟꓽ ꓙꓳ ꓡ꓾ ꓥꓳ ꓡꓳꓸ ꓓꓴ ꓮ ꓙꓵ ꓔꓯ ꓒꓳꓹ ꓔꓴ ꓐ ꓡ ꓟ ꓥꓳ ꓡꓳꓸ ꓓꓴ ꓙꓳ ꓡ ꓓꓴ ꓟꓽ ꓥ꓾ ꓐꓰ ꓐꓯ ꓡꓳꓹ ꓬꓰ ꓟ ꓥꓳ꓾

ꓣꓳ ꓟꓲ ꓠꓯ ꓞꓳ ꓤ ꓐꓴ ꓠꓬ꓾ꓚꓲ ꓛꓬ ꓔꓱꓹ ꓚꓲ ꓛꓬ ꓪꓴ-ꓢ ꓔꓯ ꓡꓯꓽ ꓙꓱ_ ꓟ ꓚꓱꓹ ꓔꓯ ꓟꓳꓸ “theological virtue” ꓕꓲ ꓚꓱꓹ  ꓥ ꓟ “ꓝꓮꓲꓔꓧ” ꓙꓵꓻ ꓠꓲꓹ ꓚꓱꓹ ꓔꓯ ꓟꓸ ꓖꓶ ꓡꓳꓹ ꓬꓰ ꓟ ꓥꓳ꓾ ꓔꓲꓺ ꓒ ꓪ ꓔꓲ ꓡꓰ ꓙꓵꓻ ꓠꓲꓹ ꓔꓯ ꓟꓳꓸ ꓪꓴ-ꓢ ꓐꓯ ꓘꓶꓽ ꓔꓯ ꓠ ꓠꓹ ꓢꓲ꓾ ꓢꓲꓺ ꓒ ꓠꓬ ꓬꓲ ꓔꓬ ꓦꓲꓻ ꓔꓯ ꓒꓰꓹ ꓗꓷ ꓟ ꓐꓰ ꓪꓴ-ꓢ ꓔꓯ ꓙꓵꓻ ꓢꓲ꓾ ꓬꓲ ꓤ ꓬꓲ-ꓢ ꓔꓯ ꓡꓲ ꓛꓴ ꓔꓲ ꓑꓶꓸ_ ꓟ ꓮ-ꓐ-ꓡ-ꓦ ꓚꓱꓹ ꓔꓯ ꓐꓯ ꓖꓶ ꓔ ꓡꓳ= ꓝꓮꓲ ꓟꓳ-ꓫꓲ ꓥ ꓟꓲ ꓪꓴ-ꓢ ꓠꓯꓼ ꓗꓪ ꓚꓵ ꓚꓵ ꓙꓵꓻ ꓢꓲ꓾ ꓙꓵꓻ ꓠꓲꓹ ꓟꓽ ꓙꓳ ꓟ ꓞꓳ ꓤ ꓐꓴ ꓔꓯ ꓡꓳꓸ ꓙ ꓔ ꓙ_ ꓟ ꓥꓳ꓾ ꓟꓹ ꓟ ꓟ-ꓡꓲ ꓡꓰ ꓢꓲ-ꓫꓬ-ꓟ-ꓦ ꓔꓯ ꓝꓮꓲ ꓒꓳꓹ ꓖꓶ_ ꓟ ꓠꓬ꓾ “ꓥꓪ ꓠꓬ ꓢꓲ ꓒꓽ ꓚꓳ ꓟ ꓥꓳ꓾” ꓐꓰ ꓐꓯ_ ꓟ ꓕꓱ ꓟ ꓠꓬ ꓬꓲ ꓠꓲꓹ ꓟ ꓘꓴꓽ ꓗꓪ ꓐꓰ ꓪꓴ-ꓢ ꓔꓯ ꓙꓵꓻ ꓟ ꓑꓶ ꓓꓴ ꓥ ꓡꓳ꓾ ꓟꓹ ꓟ ꓟ-ꓡꓲ ꓠꓬ ꓬꓲ ꓔꓳꓹ ꓜꓳ ꓡ ꓟ ꓫꓸ ꓓꓴ ꓔꓯ ꓟꓽ ꓓꓵꓽ ꓙ ꓥ ꓟꓲ ꓪꓴ-ꓢ ꓠꓲꓹ ꓡꓶꓽ ꓗꓪ ꓐꓰ ꓡꓰ ꓛꓳ ꓬꓰ ꓟ ꓥꓳ꓾

ꓙꓲ ꓢꓴ ꓢꓲꓺ ꓤ ꓐꓴ ꓙꓵꓻ ꓠꓲꓹ ꓠꓬ꓾ “ꓙꓲ ꓢꓴ ꓢꓲꓺ ꓤ ꓕꓲ ꓣꓳ ꓐꓱ ꓶ ꓠꓬ ꓪꓴ-ꓢ ꓐꓰ ꓕꓲ ꓪ ꓙꓻ ꓡꓯꓽ ꓘꓳ ꓫꓱꓹ ꓡꓯꓽ ꓘꓳ ꓠꓹ ꓟ ꓠꓬ ꓠ ꓑ ꓕꓲꓽ ꓗꓷ ꓠ ꓔ ꓡꓳ ꓐꓰ ꓐꓯ ꓔ ꓡꓳ= ꓪꓴ-ꓢ ꓶꓼ ꓓꓳ ꓫꓱꓸ ꓓꓳ ꓗꓪ ꓖ-ꓡꓲ-ꓡꓲ ꓬꓲꓻ ꓡꓴꓽ ꓐꓱ ꓗꓪ ꓕꓳꓽ ꓥꓳꓽ ꓓꓽ ꓟ ꓙꓱꓼ ꓔꓴ ꓡ ꓕꓯ ꓬꓲ ꓛꓳ ꓒꓯꓹ ꓐꓴ ꓙꓳꓺ ꓔꓬ ꓟ ꓥꓳ꓾ ꓕꓱ ꓟ ꓠꓬ ꓙꓵꓻ ꓠꓲꓹ ꓢꓯꓼ ꓪ ꓙꓳ ꓠꓹ ꓟ ꓥ ꓡꓳ꓾

ꓬꓲꓸ ꓟꓶꓽ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰ ꓣꓳ ꓡ ꓞꓳ ꓮ ꓙꓵ ꓠꓯꓼ ꓗꓪ ꓙꓵꓻ ꓠꓲꓹ ꓙꓳ ꓢꓴ ꓡꓰ ꓟꓽ ꓥ꓾ ꓣꓳ ꓙꓲ ꓢꓴ ꓢꓲꓺ ꓤ ꓐꓴ ꓠꓯꓼ ꓗꓪ ꓥ ꓟꓲ ꓙꓵꓻ ꓠꓲꓹ ꓣꓳ ꓔꓬ ꓟ꓾ ꓙꓵꓻ ꓠꓲꓹ ꓟꓽ ꓟꓬꓹ ꓫꓵ ꓡꓳꓸ ꓟꓳ ꓪ ꓡꓳ꓾ ꓙꓵꓻ ꓠꓲꓹ ꓠꓬ ꓣꓳ ꓐꓱ ꓶ ꓡꓯꓼ ꓫꓴꓻ ꓥ ꓟ ꓑꓶ ꓓꓴ ꓣꓳ ꓔꓯ ꓠꓱꓸ ꓐꓯꓼ ꓢꓴ ꓡꓰ ꓟꓬ ꓔꓳꓹ ꓠ ꓗꓪ ꓛꓲ ꓙꓵꓽ ꓪ ꓖꓶ ꓔ ꓟ ꓕꓲ ꓚꓱꓹ ꓥ ꓡꓳ꓾ ꓝꓮꓲ ꓪꓴ-ꓢ ꓬꓲ ꓠꓯꓸ ꓟ ꓔꓯ ꓒꓴ ꓖꓶ ꓔ ꓢꓲ꓾ ꓣꓳ ꓔꓯ ꓶꓼ ꓤ ꓫꓱꓸ ꓤ ꓖꓶ_ ꓟ ꓕꓲ ꓟ ꓟꓲ ꓥ ꓡꓳ ꓐꓰ ꓐꓯ ꓔ ꓡꓳ= “ꓝꓲ ꓓꓴ ꓐꓴ ꓡꓰ ꓐꓰ ꓢꓲ ꓒꓽꓳ꓾ ꓥꓪ ꓙꓵꓻ ꓠꓲꓹ ꓔꓯ ꓟꓬ ꓠꓬꓲ ꓟꓬ ꓡ ꓠꓹ ꓟ꓾ ꓕꓶꓻ ꓡꓰ ꓠꓹ ꓟ ꓬꓰ ꓙ ꓖꓶ ꓡꓯ꓾” ꓐꓰ ꓐꓯ ꓢꓲ ꓬꓲꓸ ꓟꓶꓽ ꓢꓰꓼ ꓗꓷ ꓟ ꓥꓳ=­