ꓜ ꓚꓲꓸ ꓚꓲꓸ_ ꓟ ꓦꓬꓼ ꓠꓬꓲ ꓗꓪ ꓔꓲꓸꓸ ꓒ ꓪ ꓔꓲ ꓢꓷꓸ ꓙ ꓟꓳ ꓙ ꓘꓶꓽ ꓠꓬ ꓙꓲꓸꓹ_ ꓟ ꓬꓲ ꓫꓵꓸ ꓫꓵꓸ ꓠꓹ ꓟ

ꓜ ꓚꓲꓸ ꓚꓲꓸ_ ꓟ ꓦꓬꓼ ꓠꓬꓲ ꓗꓪ ꓔꓲꓸꓸ ꓒ ꓪ ꓔꓲ ꓢꓷꓸ ꓙ ꓟꓳ ꓙ ꓘꓶꓽ ꓠꓬ ꓙꓲꓸꓹ_ ꓟ ꓬꓲ  ꓫꓵꓸ ꓫꓵꓸ ꓠꓹ ꓟ

2 ꓦ 24 ꓠꓬꓲ ꓠꓽ ꓡꓲꓸ ꓠꓬꓲ ꓗꓪ ꓔꓲꓸꓸ ꓒ ꓪ ꓔꓲ ꓡꓰ  2022 ꓘꓳꓼ ꓐꓱ ꓶ ꓜ ꓚꓲꓸ ꓚꓲ_ ꓟ ꓦꓬꓼ ꓠꓬꓲ ꓗꓪ ꓣꓳ ꓚꓲ ꓛꓬ ꓐꓰ ꓠꓱꓸ ꓐꓯꓼ ꓢꓴ ꓐꓱ ꓶ ꓙꓵꓸꓹ ꓠꓲꓹ ꓫꓵꓸ ꓢꓶꓽ ꓔꓯ ꓶꓼ ꓟꓶ ꓡꓰ ꓠꓹ ꓟ ꓔꓱ ꓔꓱ ꓐꓰ ꓛꓳ ꓠꓹ ꓟ ꓐꓱ ꓶ ꓘꓴ_ ꓟ ꓥꓳ=

ꓖ-ꓡ-ꓕꓲ-ꓬ 6ꓽ9-10 ꓗꓪ ꓐꓰ “ꓣꓳ ꓠꓬ ꓙꓲ_ ꓟ ꓗꓪ ꓠꓲꓹ ꓟ ꓕꓽ ꓙꓬ ꓡꓰ ꓝꓲ ꓡꓯ= ꓠꓲꓹ ꓟ ꓟꓽ ꓙꓬ ꓡꓰ ꓠꓬ ꓬꓲ ꓝꓲꓸ ꓛꓲ ꓡ ꓕꓯ ꓣꓳ ꓶꓼ ꓫ ꓟꓶ_ ꓥꓳ= ꓖꓳ ꓡꓱ ꓠꓬꓲ ꓣꓳ ꓠꓬ ꓬꓲ ꓝꓲꓸ ꓙꓳ_ ꓕꓯ_ ꓡꓰ ꓞꓳ ꓤ ꓥ ꓕ ꓑꓳ ꓔꓯ ꓙꓲ_ ꓟ ꓬꓰ ꓖꓶ ꓠꓯꓹ ꓡꓳ= ꓙꓵꓸꓹ ꓠꓲꓹ ꓗꓪ ꓕꓲ ꓦꓲ ꓡ ꓞꓳ ꓥ ꓟ ꓣꓳ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓪ ꓜꓲ ꓬꓲ ꓕꓱ ꓡꓱ ꓙꓲ_ ꓟ ꓬꓰ ꓖꓶ ꓠꓯꓹ ꓡꓳ=” ꓐꓰ ꓚ ꓟꓸ ꓖꓶ_ ꓟ ꓥꓳ=

ꓪꓴ-ꓢ ꓟꓬꓱꓽ ꓬꓰ ꓢꓴ

ꓜ ꓫꓵꓸ ꓫꓵꓸ_ ꓟ ꓔꓯ ꓥꓳꓽ ꓗꓪ ꓐꓰ ꓜ ꓚꓲꓸ ꓚꓲꓸ_ ꓟ ꓦꓬꓼ ꓠꓬꓲ ꓠꓬ ꓣꓳ ꓚꓲ ꓛꓬ ꓔꓱ_ ꓟ ꓠꓲꓹ ꓟ ꓒꓳꓹ ꓡꓲꓼ ꓠꓹ ꓟ ꓘꓴ_ ꓡꓳ= ꓠꓲꓹ ꓟ ꓗꓪ ꓐꓰ ꓛꓬ ꓥꓳꓽ ꓡꓰ_ ꓟ ꓔꓯ ꓒꓳꓹ ꓡꓲꓼ ꓠꓹ ꓟ ꓥ ꓡꓳ= ꓖꓳ ꓕꓯ ꓢꓲ ꓔꓱ_ ꓟ ꓤꓶꓸꓹ ꓔꓯ ꓣꓳ ꓬꓲ ꓚꓱꓹ ꓟꓳ ꓡ_ ꓥꓳ= ꓔꓱ_ ꓟ ꓚꓱꓹ ꓔꓯ ꓟꓳꓸ ꓖꓶ ꓓꓴ ꓬꓰ ꓡꓯ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ_ ꓡꓳ= ꓙꓲ_ ꓟ ꓬꓲ ꓫꓵꓸ ꓫꓵꓸ ꓕꓯ ꓢꓲ ꓙꓲ_ ꓟ ꓢꓶꓸ ꓢꓶꓽ ꓶꓼ ꓟꓶ ꓡ ꓟ ꓚꓱꓹ ꓥ ꓡꓳ=

ꓪꓴ-ꓢ ꓠꓬ ꓣꓳ ꓕꓲꓽ ꓦꓲ ꓡ ꓞꓳ ꓗꓪ ꓙꓲ_ ꓟ ꓬꓲ ꓫꓵꓸ ꓔꓯ ꓓ ꓪꓴꓸ ꓫꓵꓸ ꓢꓴ ꓥ ꓡꓳ= ꓜ ꓚꓲꓸ ꓚꓲꓸ_ ꓟ ꓦꓬꓼ ꓠꓬꓲ ꓗꓪ ꓣꓳ ꓚꓲ ꓛꓬ ꓤꓶꓸꓹ ꓗꓪ ꓙꓲ_ ꓟ ꓢꓶꓸ ꓢꓶꓽ ꓶꓼ ꓤ ꓫꓱꓸ ꓤ ꓔꓯ ꓪ ꓟꓶ ꓠꓹ ꓟ ꓘꓴ_ ꓡꓳ= ꓣꓳ ꓦ ꓢꓯꓼ ꓪ ꓪꓴ-ꓢ ꓶꓼ ꓤ ꓫꓱꓸ ꓤ ꓔꓯ ꓠ ꓠꓹ ꓢꓲ-ꓸ ꓪꓴ-ꓢ ꓔꓯ ꓝꓮꓲ ꓫ ꓟꓳ ꓠꓹ ꓟ ꓥ ꓡꓳ= ꓕꓱ ꓟ ꓗꓪ ꓐꓰ ꓣꓳ ꓠꓬ ꓪꓴ-ꓢ ꓟꓬꓱꓽ ꓬꓰ ꓢꓴ ꓗꓷ ꓡꓰ ꓢꓲ-ꓸ ꓪꓴ-ꓢ ꓐꓲ ꓜꓲꓼ_ ꓟ ꓶꓼ ꓤ ꓫꓱꓸ ꓤ ꓔꓯ ꓟꓶ ꓠꓹ ꓟ ꓥ ꓡꓳ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ_ ꓡꓳ=

ꓶꓼ ꓟꓶ ꓡꓰ ꓠꓹ ꓟ

ꓫꓱꓸ ꓤ ꓠꓲꓹ ꓐꓰ ꓣꓳ ꓫꓵꓸ ꓠꓬ ꓣꓳ_ ꓟ ꓕꓲ ꓢꓶꓽ ꓡꓰ ꓫꓵꓸ ꓥ ꓟꓲ ꓣꓳ ꓤꓶꓸꓹ ꓗꓪ ꓪꓴ-ꓢ ꓠꓬꓲ ꓟꓳ ꓓꓴ ꓔꓯ ꓟꓲ ꓠꓯ ꓗꓪ ꓠꓬꓲ ꓟꓳ ꓓꓴ ꓖꓶ ꓐ ꓡ ꓥꓳ= ꓬꓲ ꓫꓵꓸ ꓫꓵꓸ ꓢꓲ ꓶꓼ ꓟꓶ ꓡꓰ ꓠꓹ ꓟ ꓥ ꓡꓳ= ꓕꓱ ꓢꓲ ꓫꓬ ꓕꓳ ꓶ ꓝꓲꓸ ꓗꓪ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓣꓳ ꓔꓯ ꓓꓵꓽ ꓙ ꓡꓰ ꓝꓲ_ ꓡꓳ= ꓣꓳ ꓫꓵꓸ ꓔ ꓟ ꓬꓲ ꓫꓵꓸ ꓠꓬ ꓣꓳ_ ꓟ ꓬꓲ ꓫꓵꓸ ꓥ ꓟ ꓔꓯ ꓣꓳ ꓡꓳꓸ ꓟꓳ_ ꓡꓳ= ꓣꓳ ꓚꓲ ꓛꓬ ꓐꓱ ꓶ ꓡꓰ ꓟꓽ ꓓꓵꓽ ꓙ ꓙꓲ_ ꓟ ꓬꓲ ꓫꓵꓸ ꓔꓯ ꓣꓳ ꓬꓲ ꓤ ꓠꓬꓲ ꓤ ꓐꓴ ꓐꓱ ꓶ ꓫꓵꓸ ꓠꓬ ꓪꓴ-ꓢ ꓡꓰ ꓟꓬ ꓡ ꓝꓲ_ ꓟ ꓥꓳ= ꓣꓳ ꓣꓳ_ ꓟ ꓫꓵꓸ ꓥ ꓟꓲ ꓪꓴ-ꓢ ꓟꓬꓱꓸꓸ ꓗꓪ ꓐꓰ ꓙꓲ_ ꓟ ꓢꓶꓸ ꓢꓶꓽ ꓠꓬ ꓮ ꓟꓬꓹ ꓶꓼ ꓟꓶ ꓡ_ ꓥꓳ=

ꓪꓽ ꓘꓴ ꓓꓴ ꓬꓰ ꓡꓯ-ꓸ ꓜ ꓚꓲꓸ ꓚꓲꓸ ꓡꓯ-ꓸ ꓣꓱꓽ ꓬꓯꓼ_ ꓢꓴ ꓔꓯ ꓬꓰ ꓙ ꓓꓴ ꓬꓰ ꓡꓯ-ꓸ ꓝꓮꓲ ꓪ ꓠꓹ ꓟ ꓟꓽ ꓓꓵꓽ ꓙ ꓠꓲꓹ ꓡꓱꓽꓡꓱꓽ ꓐꓰ ꓬꓰ ꓙ ꓓꓴ ꓬꓰ ꓡꓯ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ ꓔ ꓡꓳ=

ꓕꓲꓽ ꓘꓳꓼ ꓡꓲ ꓕꓲ ꓘꓳꓼ ꓜ ꓚꓲꓸ ꓚꓲꓸ ꓟ ꓦꓬꓼ ꓠꓬꓲ ꓗꓪ ꓔꓱ_ ꓟ ꓐꓰ ꓠꓵ ꓠꓲꓹ ꓐꓰ ꓕꓲ ꓠꓲꓹ ꓟ ꓡꓱꓼ ꓗꓷ ꓡꓰ ꓠꓹꓟ ꓐꓱ ꓶ ꓢꓷꓸ ꓡꓰ ꓝꓲ_ ꓡꓳ= ꓣꓳ ꓢꓯꓸ ꓔꓬ ꓟ ꓤꓶꓸꓹ ꓗꓪ ꓙꓲ_ ꓟ ꓔꓯ ꓢꓯꓼ ꓕꓵꓼ ꓬꓰ ꓓꓴ ꓬꓰ ꓡꓯ ꓐꓰ ꓜ ꓚꓲꓸ ꓚꓲꓸ ꓟ ꓦꓬꓼ ꓠꓬꓲ ꓗꓪ ꓣꓳ ꓔꓯ ꓢꓯꓼ ꓖꓶ_ ꓟ ꓥꓳ=