ꓝꓴꓲ ꓬꓰ ꓛꓬ ꓢꓴ ꓐꓱ ꓶ ꓪꓴ-ꓢ ꓚꓬꓴ ꓙ ꓟ ꓚꓱꓹ ꓥꓳ ꓡꓳꓸ ꓓꓴ ꓠꓬ ꓮ ꓕꓯ ꓟꓲ ꓙꓳ_ ꓡꓳ꓾

ꓝꓴꓲ ꓬꓰ ꓛꓬ ꓢꓴ ꓐꓱ ꓶ ꓪꓴ-ꓢ ꓚꓬꓴ ꓙ ꓟ ꓚꓱꓹ ꓥꓳ ꓡꓳꓸ ꓓꓴ ꓠꓬ ꓮ ꓕꓯ ꓟꓲ ꓙꓳ_ ꓡꓳ꓾

ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓙꓲ ꓢꓴ ꓢꓲ ꓤ ꓐꓴ ꓠꓬ ꓫꓸ ꓓꓴ ꓟꓷꓼ ꓓꓴ ꓔꓯ ꓪꓴ-ꓢ ꓠꓯꓼ ꓗꓪ ꓒꓴ ꓒꓴ ꓡꓯ ꓡꓯ ꓐꓰ ꓐꓯ ꓠꓹ ꓟ ꓐꓰ ꓣꓳ ꓚꓲ ꓛꓬ ꓬꓰ ꓗꓷ ꓛꓬ ꓗꓷ ꓟ ꓮ ꓙꓵ ꓚꓲꓸ ꓛꓬ ꓢꓷꓸ ꓗꓴꓸ ꓠ ꓔ ꓡꓳ꓾ ꓐꓰ ꓐꓯ ꓔ ꓡꓳ꓾

ꓔꓲꓺ ꓒ ꓪ ꓔꓲ ꓡꓰ ꓡꓳꓹ ꓬꓰ ꓟ ꓠꓽ ꓫꓵ ꓠꓬꓲ ꓟꓲ-ꓢ ꓪꓽ ꓘꓴ ꓙꓵꓹ ꓕꓯ ꓙꓲ ꓢꓴ ꓢꓲ ꓤ ꓐꓴ ꓔꓯ ꓚꓲꓸ ꓛꓬ ꓡꓰ ꓢꓷꓸ ꓔ ꓟ꓾ ꓖꓶ ꓘꓹ ꓔ ꓟ ꓠꓲꓹ ꓟ ꓟꓽ ꓙꓳ ꓠꓹ ꓟ ꓐꓰ ꓚꓲꓸ ꓛꓬ ꓫꓸ ꓓꓴ ꓟꓷꓼ ꓓꓴ ꓚꓱꓹ ꓞꓳꓸ ꓡꓰ ꓚꓱꓹ ꓮ ꓙꓵ ꓔꓯ ꓪꓴ-ꓢ ꓠꓯꓼ ꓗꓪ ꓑꓲꓸ ꓞꓹ ꓫꓵ ꓟꓽ ꓙꓳ ꓒꓴ ꓒꓴ ꓡꓯ ꓡꓯ ꓗꓷ ꓠꓹ ꓟ ꓐꓯ ꓖꓶ_ ꓡꓳ꓾

ꓢꓔꓸ ꓑꓰꓔꓰꓣ ꓪꓽ ꓘꓴ ꓦꓲꓻ ꓓꓽ ꓗꓪ ꓮꓠꓖꓰꓡꓴꓢ ꓪꓽ ꓘꓴ ꓙꓵꓹ ꓕꓯ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓠꓽ ꓫꓵ ꓠꓬꓲ ꓪꓴ-ꓢ ꓶꓼ ꓓꓳ ꓫꓱꓸ ꓓꓳꓽ (ꓟ-ꓕꓲ 21ꓽ28-32) ꓗꓪ ꓐꓰ ꓤ ꓠꓬꓲꓽ ꓫꓵꓸ ꓔꓯ ꓛꓱꓼ ꓡꓱꓼ ꓐꓱ ꓗꓪ ꓟꓬꓱꓽ ꓬꓰ ꓝꓲ_ ꓟ ꓚꓱꓹ ꓐꓰ ꓔꓱꓹ ꓕ ꓖꓶ_ ꓡꓳ= ꓤ ꓪꓴꓽ ꓠꓬ ꓟꓽ ꓙꓰ ꓐꓰ ꓐꓯ ꓥ ꓟꓲ ꓙꓰ_ ꓟ ꓚꓱꓹ꓾ ꓣꓳꓺ ꓢꓴ ꓕꓲ ꓣꓳ ꓠꓬ ꓬꓲ ꓐꓹ ꓐꓽ ꓡꓰ ꓝꓲ ꓕꓯ ꓥꓪ ꓙꓱ_ ꓥꓳ꓾ ꓐꓰ ꓐꓯ ꓥ ꓟꓲ ꓬꓲ ꓟꓽ ꓙꓰ_ ꓟ ꓚꓱꓹ ꓥ ꓡꓳ꓾ ꓬꓲꓸ ꓪ ꓠꓬꓲꓽ ꓣꓳ ꓬꓰ_ ꓟ ꓚꓱꓹ ꓔꓯ ꓔꓲꓺ ꓒ ꓪ ꓔꓲ ꓡꓰ ꓔꓱꓹ ꓕ ꓖꓶ_ ꓡꓳ꓾

ꓛꓱꓼ ꓡꓱꓼ ꓐꓱ ꓗꓪ ꓟꓬꓱꓽ ꓬꓰ ꓟ ꓗꓪ ꓠꓲꓹ ꓟ ꓐ ꓢꓲ ꓬꓰ_ ꓟ ꓐꓰ ꓕꓱ ꓗꓪ ꓥ ꓟꓲ ꓬꓲꓸ ꓒꓵꓽ ꓣꓱꓽ ꓬꓯꓼ ꓟ ꓔꓯ ꓐꓯ ꓔ ꓡꓳ꓾ “ꓕꓱ ꓗꓪ ꓠꓬ ꓛꓱꓼ ꓡꓱꓼ ꓐꓱ ꓗꓪ ꓟꓬꓱꓽ ꓬꓰ ꓙꓰ_ ꓟ꓾ ꓟꓽ ꓙꓰ_ ꓟ ꓐꓰ ꓣꓳꓸ ꓚꓵ_ ꓟ ꓟꓽ ꓥ꓾ ꓬꓲꓸ ꓪ ꓠꓬꓲꓽ ꓣꓳ ꓠꓲꓹ ꓟ ꓗꓪ ꓐꓰ ꓬꓲ ꓪ ꓐꓹ ꓐꓽ ꓔꓯ ꓔꓱꓹ ꓟ ꓐꓰ ꓟꓽ ꓔꓱꓹ ꓟ ꓚꓱꓹ ꓥ ꓡꓳ꓾”

ꓔꓲꓺ ꓒ ꓪ ꓔꓲ ꓡꓰ ꓤ ꓕꓲ ꓣꓳ ꓠꓬ ꓬꓲ ꓐꓹ ꓐꓽ ꓔꓯ ꓗꓶꓸ ꓥ ꓟꓲ ꓬꓲ ꓠꓲꓹ ꓟ ꓗꓪ ꓒꓴ ꓒꓴ ꓡꓯ ꓡꓯ ꓐꓰ ꓥ ꓡꓳ꓾ ꓠꓬꓲꓽ ꓣꓳ ꓕꓲ ꓣꓳ ꓟ ꓠꓬ ꓬꓲꓸ ꓐꓹ ꓐꓽ ꓡꓰ ꓝꓲ_ ꓟ ꓔꓯ ꓬꓰ ꓠꓲꓹ ꓟꓽ ꓫꓵ꓾ ꓜꓲ ꓠꓲꓹ ꓟꓽ ꓫꓵ ꓟ ꓔꓯ ꓡꓳꓸ ꓟꓳ ꓪ ꓡꓳ꓾ ꓐꓰ ꓐꓯ ꓔ ꓡꓳ꓾

“ꓬꓰꓢ” ꓐꓰ ꓐꓯ ꓢꓲ꓾ ꓚꓲꓸ ꓛꓬ ꓟꓽ ꓙꓲ_ ꓟ ꓠꓲꓹ ꓟ ꓐꓴ_ ꓟ ꓔꓯ ꓕꓲ ꓑꓹ ꓞ ꓡꓰ ꓐꓲꓸ ꓞꓹ ꓟꓶ ꓥꓳ꓾ ꓕꓱ ꓡꓱ ꓬꓰ_ ꓟ ꓠꓬ ꓐꓹ ꓐꓽ ꓔꓯ ꓥ ꓟꓲ ꓞꓳ ꓟꓽ ꓒꓵ_ ꓟ ꓚꓱꓹ ꓥ ꓡꓳ꓾ ꓖꓳ ꓟ ꓑꓶ ꓓꓴ ꓕꓱ ꓟ ꓠꓬ “ꓠꓳ” ꓟꓽ ꓬꓰ ꓐꓰ ꓐꓯ ꓗꓷ ꓟ ꓓꓲ ꓢ ꓟꓽ ꓙꓲ_ ꓟ ꓗꓷ ꓡꓰ ꓟ ꓥ ꓡꓳ꓾ ꓕꓱ ꓡꓱ ꓬꓰ_ ꓟ ꓡ ꓞꓳ ꓠꓬ ꓝꓴꓲ ꓓꓰ ꓡꓰ ꓫꓵ ꓟꓽ ꓥ ꓥ ꓟꓲ ꓟꓽ ꓠ ꓠꓹ ꓢꓴ ꓔꓯ ꓔꓱꓹ ꓔꓱꓹ ꓐꓰ ꓫꓸ ꓕꓱ ꓓꓴ ꓟꓽ ꓬꓰ꓾ ꓐꓲꓸ ꓞꓹ ꓟ ꓠꓲꓹ ꓟ ꓟꓽ ꓔꓱꓹ ꓢꓴ ꓐꓰ ꓐꓯ ꓔ ꓡꓳ꓾

 ꓤ ꓪꓴꓽ ꓠꓬ ꓟꓽ ꓙꓰ ꓐꓰ ꓐꓯ ꓥ ꓟꓲ ꓬꓲ ꓓꓵꓽ ꓙ ꓡꓰꓼ ꓡ ꓢꓲ ꓛꓱꓼ ꓡꓱꓼ ꓐꓱ ꓗꓪ ꓟꓬꓱꓽ ꓬꓰ ꓙꓰ_ ꓡꓳ꓾ “He is not perfect but sincere” ꓬꓲꓸ ꓠꓬ ꓟꓽ ꓐꓲ ꓞꓲꓼ ꓥ ꓟꓲ ꓠꓲꓹ ꓟ ꓔꓱꓹ ꓡꓳ꓾ ꓐꓰ ꓐꓯ ꓖꓶ_ ꓡꓳ꓾ ꓬꓲꓸ ꓠꓬ ꓟꓽ ꓙꓰ ꓐꓰ ꓐꓯ ꓥ ꓟꓲ ꓚꓲꓸ ꓛꓬ ꓓꓵꓽ ꓙ ꓡꓰꓼ ꓡ ꓢꓲ ꓬꓲ ꓬꓰ ꓠ ꓔ ꓟ ꓟꓬꓱꓽ ꓔꓯ ꓬꓰ_ ꓟ ꓚꓱꓹ ꓐꓯ ꓔ ꓡꓳ꓾

 “He is sinner but he is not corrupt” ꓝꓴꓲ ꓙꓳ ꓥ ꓟꓲ ꓠꓲꓹ ꓟ ꓟꓽ ꓖꓳꓼ ꓟ꓾ ꓟꓽ ꓐꓬ ꓡꓰ ꓠꓹ ꓟ ꓥ ꓡꓳ꓾ ꓣꓳ ꓝꓴꓲ ꓬꓰ ꓛꓬ ꓗꓷ ꓡꓰ ꓠꓬ ꓮ ꓕꓯ ꓟꓲ ꓝꓴꓲ ꓓꓵꓽ ꓙ ꓒꓳꓹ ꓡꓰꓼ ꓡ ꓠꓹ ꓟ ꓐꓯ ꓔ ꓡꓳ꓾ ꓝꓴꓲ ꓬꓰ ꓛꓬ ꓢꓴ ꓐꓱ ꓶ ꓪꓴ-ꓢ ꓚꓬꓴ ꓙ ꓟ ꓚꓱꓹ ꓥꓳ ꓡꓳꓸ ꓓꓴ ꓠꓬ ꓮ ꓕꓯ ꓟꓲ ꓙꓳ_ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓐꓯ ꓔ ꓡꓳ꓾

ꓠꓲꓹ ꓟ ꓖꓳꓼ ꓢꓴ ꓐꓱ ꓶ ꓠꓬ ꓝꓮꓲ ꓒꓳꓹ ꓡꓰꓼ ꓠꓹ ꓟ ꓟꓬ ꓠꓬꓲ ꓫꓸ ꓔ ꓡꓳ꓾ ꓮ ꓫꓵ ꓑꓶ ꓓꓴ ꓐꓯ ꓠꓬ ꓬꓲꓸ ꓪ ꓚꓲꓸ ꓛꓬ ꓠꓬ ꓟꓬ ꓠꓬꓲ ꓢꓷꓸ ꓔ ꓡꓳ ꓐꓰ ꓓꓵꓽ ꓙ ꓟ꓾ ꓖꓶ ꓘꓹ ꓟ ꓠꓲꓹ ꓟ ꓙꓳ ꓢꓴ ꓠꓬ ꓬꓲ ꓪ ꓢꓷꓸ ꓡꓳꓹ ꓬꓰ ꓐꓰ ꓖꓶ ꓘꓹ ꓟ ꓠꓲꓹ ꓟ ꓐꓰ ꓗꓽ ꓕ ꓡꓰ ꓟ ꓥꓳ꓾ ꓖꓳ ꓟ ꓑꓶ ꓓꓴ ꓬꓲ ꓪ ꓠꓬ ꓒꓬꓱꓽ ꓠꓬꓲꓽ ꓒꓳꓹ ꓙꓳ ꓢꓴ ꓡꓰ ꓥꓳ ꓐꓰ ꓐꓯ ꓔ ꓡꓳ꓾

ꓪꓴ-ꓢ ꓔꓯ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓠꓲꓹ ꓡꓱ ꓡꓱ ꓐꓰ “ꓬꓰꓢ” ꓥ ꓡꓯ꓾ ꓐꓰ ꓐꓯ ꓠꓹ ꓟ ꓠꓲꓹ ꓟ ꓙꓳ_ ꓡ?

ꓔꓲꓺ ꓒ ꓪ ꓔꓲ ꓡꓰ ꓙꓲ ꓢꓴ ꓢꓲ ꓤ ꓐꓴ ꓔꓯ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓢꓯꓸ ꓔꓬ ꓙꓻ ꓫꓽ_ ꓟ ꓤꓶꓻ ꓗꓪ ꓫꓸ ꓓꓴ ꓔꓳꓹ ꓜꓳ ꓡ ꓥ ꓟꓲ ꓔꓱ ꓔꓱꓹ ꓐꓰ ꓬꓰ ꓙ ꓔꓳꓹ ꓙ ꓗꓴꓸ ꓟ ꓠꓲꓹ ꓟ ꓐꓰ ꓚꓲꓸ ꓛꓬ ꓤꓶꓻ ꓔꓯ ꓪꓴ-ꓢ ꓠꓲꓹ ꓡꓶꓽ ꓐꓰ ꓙꓻ ꓫꓱꓽ ꓠꓹ ꓟ ꓐꓱ ꓶ ꓢꓯꓼ ꓖꓶ_ ꓟ ꓐꓰ ꓣꓳ ꓔꓯ ꓠ ꓠꓬꓲ ꓘꓶꓽ ꓐꓰ ꓐꓯ ꓔ ꓡꓳ꓾

ꓝꓮꓲ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓗꓪ ꓬꓲꓸ ꓒꓵ ꓮ ꓘꓶꓸ ꓟꓬ ꓔꓬ ꓥ ꓟꓲ ꓪꓴ-ꓢ ꓔꓯ “ꓬꓰꓢ” ꓥ ꓡꓯ꓾ ꓐꓰ ꓐꓯ ꓠꓹ ꓟ ꓐꓱ ꓶ ꓠꓲꓹ ꓡꓶꓽ ꓙꓳ_ꓡ? ꓞꓳꓸ ꓡꓰ ꓓꓴ꓾ ꓫꓸ ꓓꓴ꓾ ꓢꓯꓼ ꓐ ꓓꓴ ꓙꓳ ꓥ ꓟꓲ ꓪꓴ-ꓢ ꓟꓲ ꓕꓯ ꓗꓪ ꓔꓱ ꓔꓱꓹ ꓐꓰ ꓙꓻ ꓫꓱꓽ_ ꓡ? ꓐꓰ ꓔꓲꓺ ꓒ ꓪ ꓔꓲ ꓡꓰ ꓠ ꓠꓬꓲ ꓘꓶꓽ ꓐꓰ ꓐꓯ ꓔ ꓡꓳ꓾

ꓛꓬ ꓥꓳꓽ ꓡꓰ ꓫꓵ ꓙꓳ ꓟ ꓙꓵꓹ ꓗꓪ ꓠꓲꓹ ꓟ ꓒꓳꓹ ꓡꓲꓼ ꓠꓹ ꓟ ꓠꓲꓹ ꓡꓶꓽ ꓙꓳ_ ꓡ? ꓟꓽ ꓥ ꓠꓬ ꓣꓳ ꓡꓰ ꓔꓱꓹ ꓟ꓾ ꓐꓰ ꓓꓵꓽ ꓙ ꓢꓲ꓾ ꓣꓳ ꓤꓶꓻ ꓔꓯ ꓙꓲ_ ꓡꓳ ꓐꓰ ꓐꓲꓸ ꓞꓹ ꓢꓲ꓾ ꓒꓬꓱꓽ ꓟꓬ ꓠꓬꓲꓽ ꓒꓳꓹ ꓐꓰ ꓔꓬ ꓡ? ꓐꓰ ꓠ ꓠꓬꓲ_ ꓡꓳ꓾ ꓬꓲ ꓟꓶꓽ ꓗꓪ ꓐꓰ ꓣꓳ ꓚꓲ ꓛꓬ ꓥꓪ ꓠꓬ “sinner” ꓝꓴꓲ ꓙꓳ ꓢꓴ ꓥ ꓡꓳ꓾ ꓟꓽ ꓥ ꓠꓬ “corrupt” ꓠꓲꓹ ꓟ ꓠꓬꓲꓽ ꓔꓱꓹ ꓙꓳ_ ꓟ ꓙꓵꓹ ꓙꓳ_ ꓡ ꓐꓰ ꓚꓲꓸ ꓛꓬ ꓔꓯ ꓔꓱꓹ ꓕ ꓝꓲ_ ꓡꓳ꓾

ꓔꓱꓹ ꓟ ꓙꓲ ꓢꓴ ꓢꓲ ꓤ ꓗꓷ ꓠꓹ ꓟ ꓣꓳ ꓔꓯ ꓬꓰ ꓙ ꓠꓹ ꓟ ꓐꓱ ꓶ ꓟꓹ ꓟ ꓟ-ꓡꓲ ꓠꓯꓼ ꓗꓪ ꓔꓲꓺ ꓒ ꓪ ꓔꓲ ꓡꓰ ꓪꓽ ꓘꓴ ꓙ ꓗꓷ ꓟ ꓥꓳ꓾