ꓠꓲꓹ ꓟ ꓗꓸ ꓘꓶꓽ ꓒꓴ ꓢꓲ ꓪꓴ-ꓢ ꓫꓱꓸ ꓤ ꓟ ꓠꓲꓹ ꓠꓵ_ ꓟ ꓔꓯ ꓘꓳꓹ ꓣꓴ ꓓꓴ ꓬꓰ ꓡꓯ

ꓠꓲꓹ ꓟ ꓗꓸ ꓘꓶꓽ ꓒꓴ ꓢꓲ ꓪꓴ-ꓢ ꓫꓱꓸ ꓤ_ ꓟ ꓠꓲꓹ ꓟ ꓔꓯ ꓘꓳꓹ ꓣꓴ ꓓꓴ ꓬꓰ ꓡꓯ

3 ꓦ 27 ꓠꓽ ꓦꓬꓼ ꓠꓬꓲ ꓮꓠꓖꓰꓡꓴꓢ ꓪꓽ ꓘꓴ ꓙꓵꓹ ꓗꓪ ꓔꓲꓸꓸ ꓒ ꓪ ꓔꓲ ꓡꓰ ꓖꓳ ꓕꓲꓽ ꓠꓬꓲ ꓗꓪ ꓕꓲꓸ ꓠꓹ ꓟ ꓢꓲ ꓫꓬ ꓕꓳ ꓶ ꓝꓲꓸ ꓗꓪ ꓐꓰ ꓣꓳ ꓠꓲꓹ ꓟ ꓗꓸ ꓘꓶꓽ ꓒꓴ ꓢꓲ-ꓸ ꓪꓴ-ꓢ ꓫꓱꓸ ꓤ ꓠꓵ ꓠꓲꓹ ꓔꓯ ꓘꓳꓹ ꓣꓴ ꓓꓴ ꓬꓰ ꓡꓯ ꓐꓰ ꓐꓯ_ ꓡꓳ=

ꓶꓽ ꓓꓳ ꓫꓱꓸ ꓓꓳ ꓗꓪ ꓬꓰ-ꓢꓴ ꓡꓰ ꓐꓯ_ ꓟ ꓔꓯ ꓥꓳꓽ ꓠꓬ ꓐꓹ ꓐ ꓐꓰ ꓬꓲ ꓤ ꓠꓬꓲ ꓫꓵꓸ ꓚꓱꓹ ꓥ ꓡꓳ= ꓤ ꓣꓳ ꓠꓬ ꓬꓲ ꓐꓹ ꓐꓽ ꓔꓯ ꓬꓲ ꓟꓶ ꓙꓲꓽ ꓙꓳ_ ꓟ ꓡꓯꓼ ꓪ ꓔꓯ ꓐꓱ ꓖꓶ ꓡꓯ ꓐꓰ ꓓꓰꓽ ꓢꓲ-ꓸ ꓛꓬ ꓥꓳꓽ ꓡꓰ_ ꓟ ꓐꓰ ꓝꓮꓲ ꓠꓲꓹ ꓟ ꓓꓵꓽ ꓙ ꓒꓳꓹ ꓡꓶꓸ ꓢꓲ-ꓸ ꓬꓲ ꓐꓹ ꓐꓽ ꓠꓯꓼ ꓗꓪ ꓡ ꓡ_ ꓟ ꓚꓱꓹ ꓥ ꓡꓳ= ꓤ ꓪꓴꓽ ꓠꓬ ꓬꓲ ꓐꓹ ꓐꓽ ꓐꓰ ꓕꓲꓽ ꓪꓼ ꓔꓬ ꓥ ꓟꓲ ꓬꓲ ꓠꓬꓲ ꓤ ꓠꓲꓹ ꓟ ꓓꓵꓼ ꓙ ꓒꓳꓹ ꓡꓶꓸ ꓢꓲ-ꓸ ꓦꓲ ꓗꓪ ꓡ ꓡ_ ꓟ ꓔꓯ ꓬꓲ ꓠꓬ ꓟꓽ ꓘꓳꓹ ꓣꓴ ꓟ ꓥꓳ= ꓬꓲ ꓐꓹ ꓐꓽ ꓠꓬ ꓬꓲ ꓤ ꓤ ꓣꓳ ꓠꓲꓹ ꓟ ꓓꓵꓽ ꓙ ꓒꓳꓹ ꓡꓶꓸ ꓢꓲ-ꓸ ꓡ ꓡ ꓟ ꓔꓯ ꓟꓳ ꓕꓯ ꓡꓳꓹ ꓬꓰ_ ꓟ ꓡꓰ ꓐꓰ ꓬꓲ ꓤ ꓚꓵ ꓚꓵ ꓥ ꓟ ꓠꓲꓹ ꓟ ꓟꓽ ꓒꓳꓹ ꓘꓳꓹ ꓣꓴ_ ꓟ ꓥꓳ=

ꓣꓳ ꓔꓯ ꓪꓴ-ꓢ ꓡꓰ ꓫꓱꓸ ꓤ ꓟ ꓠꓵ ꓠꓲꓹ ꓐꓰ ꓝꓴꓲ ꓬꓰ_ ꓟ ꓙꓵꓹ ꓗꓪ ꓥ ꓟꓲ ꓬꓲ ꓠꓬ ꓣꓳ ꓔꓯ ꓝꓴꓲ ꓣꓷꓠꓸ ꓖꓶ ꓢꓲ-ꓸ ꓑꓮꓲ ꓬꓰ ꓖꓶ ꓢꓲ ꓠꓲꓹ ꓡꓱ ꓡꓱ ꓐꓰ ꓘꓳꓹ ꓣꓴ ꓟ ꓥꓳ= ꓬꓲ ꓤ ꓚꓵ ꓚꓵ ꓡꓰ ꓐꓰ ꓘꓳꓹ ꓣꓴ_ ꓟ ꓥꓳ= ꓣꓳ ꓠꓬ ꓒꓲꓼ ꓬꓰ_ ꓟ ꓤ ꓣꓳ ꓡꓰ ꓐꓰ ꓠꓲꓹ ꓟ ꓒꓳꓹ ꓡꓶꓸ ꓠꓹ ꓟ ꓐꓱ ꓶ ꓣꓳ ꓔꓯ ꓓꓵꓽ ꓙ ꓟꓶ ꓝꓲ_ ꓡꓳ= ꓐꓹ ꓐꓽ ꓠꓬ ꓮ ꓕꓯ ꓥ ꓟꓲ ꓣꓳ ꓔꓯ ꓠꓲꓹ ꓠꓵ_ ꓡꓳ=

ꓠꓲꓹ ꓟ ꓗꓸ ꓘꓶꓽ ꓒꓴ ꓓꓴ ꓬꓰ ꓡꓯ

ꓬꓰ-ꓢꓴ ꓔꓯ ꓥꓳꓽ ꓗꓪ ꓐꓰ ꓤ ꓪꓴꓽ ꓠꓬ ꓬꓲ ꓠꓬꓲ ꓤ ꓡ ꓡ ꓟ-ꓸ ꓬꓲ ꓐꓹ ꓐꓽ ꓡꓰ ꓘꓳꓹ ꓣꓴ ꓟ ꓔꓯ ꓟꓽ ꓠꓲꓹ ꓫꓵꓽ_ ꓟ ꓕꓱ ꓟ ꓠꓬ ꓠꓲꓹ ꓟ ꓗꓸ ꓘꓶꓽ ꓟꓽ ꓒꓴ ꓦ ꓟ ꓥ ꓡꓳ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ ꓔ ꓡꓳ= ꓕꓱ ꓤ ꓪꓴꓽ ꓡꓰ ꓐꓰ ꓣꓳ ꓠꓯꓼ ꓗꓪ ꓥ ꓟꓲ ꓙꓳ_ ꓟ ꓥꓳ= ꓣꓳ ꓠꓯꓼ ꓗꓪ ꓘꓶꓽ ꓡꓶꓽ ꓓꓴ ꓔꓳꓹ ꓜꓳ ꓡ ꓥꓳ= ꓕꓱ ꓘꓶꓽ ꓡꓶꓽ ꓓꓴ ꓔꓳꓹ ꓜꓳ ꓡ ꓟ ꓔꓯ ꓣꓳ ꓜꓲꓽ_ ꓠꓬ ꓧꓪꓸ ꓡꓰ ꓓꓴ ꓟꓶ ꓡ ꓥꓳ=

ꓠꓲꓹ ꓡꓱ ꓗꓹ ꓛꓲ ꓓꓴ ꓬꓰ ꓡꓯ

ꓔꓯ ꓥꓳꓽ ꓗꓪ ꓐꓰ ꓐꓹ ꓐꓽ ꓠꓬ ꓤ ꓣꓳ ꓡꓰ ꓡ ꓡ ꓟ ꓔꓯ ꓠꓲꓹ ꓡꓱ ꓗꓹ ꓛꓲ ꓢꓲ ꓘꓳꓹ ꓣꓴ ꓟ ꓥꓳ= ꓕꓱ ꓟ ꓔꓯ ꓟꓽ ꓠꓲꓹ ꓫꓵꓽ_ ꓟ ꓤ ꓪꓴꓽ ꓔꓯ ꓥ ꓟꓲ ꓠꓲꓹ ꓟ ꓗꓸ ꓘꓶꓽ ꓒꓴ ꓢꓲ-ꓸ ꓠꓲꓹ ꓡꓱ ꓗꓹ ꓛꓲ ꓟ ꓠꓲꓹ ꓟ ꓐꓰ ꓘꓳꓹ ꓣꓴ ꓠꓹ ꓟ ꓐꓯ ꓔ ꓡꓳ= ꓮ ꓫꓵꓽ ꓑꓶ ꓓꓴ ꓥ ꓡ ꓐꓯ ꓠꓬ ꓝꓮꓲ ꓡ ꓡ ꓢꓴ ꓠꓬ ꓬꓲ ꓠꓬꓲ ꓤ ꓥ ꓟ ꓐꓰ ꓒꓲꓼ ꓬꓰ ꓢꓲ ꓝꓮꓲ ꓜꓲ ꓪ ꓟ ꓠꓬꓲ ꓤ ꓚꓵ ꓚꓵ ꓥ ꓟ ꓑꓶ ꓓꓴ ꓥ ꓡꓳ= ꓖꓳ ꓟ ꓑꓶ ꓓꓴ ꓠꓲꓹ ꓡꓱ ꓗꓹ ꓛꓲ ꓠꓹ ꓟ ꓤ ꓪꓴꓽ ꓔꓯ ꓥ ꓟꓲ ꓟꓸ ꓖꓶ ꓟ ꓥꓳ= ꓪꓴ-ꓢ ꓥ ꓟꓲ ꓣꓳ ꓔꓯ ꓕꓱ ꓡꓱ ꓔꓳꓹ ꓜꓳ ꓡ ꓕꓯ ꓣꓳ ꓠꓲꓹ ꓟ ꓗꓸ ꓘꓶꓽ ꓔꓯ ꓒꓴ ꓢꓲ-ꓸ ꓠꓲꓹ ꓡꓱ ꓗꓹ ꓛꓲ ꓠꓹ ꓟ ꓐꓱ ꓶ ꓟꓸ ꓖꓶ_ ꓟ ꓥꓳ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ ꓔ ꓟ ꓥꓳ=

ꓠꓲꓹ ꓟ ꓒꓳꓹ ꓬꓲꓼ ꓡ ꓢꓴ ꓐꓴ ꓐꓰ ꓠꓶꓽ ꓞꓹ ꓢꓲ ꓔꓬ ꓓꓴ ꓬꓰ ꓡꓯ

ꓠꓲꓹ ꓟ ꓗꓹ ꓛꓲ ꓝꓲ ꓟ ꓠꓬ ꓠꓲꓹ ꓟ ꓒꓳꓹ ꓬꓲꓼ ꓡ ꓢꓴ ꓐꓴ ꓐꓰ ꓠꓶꓽ ꓞꓹ ꓢꓲ ꓔꓬ ꓓꓴ ꓬꓰ ꓠꓹ ꓟ ꓥꓳ= ꓬꓲ ꓪ ꓫꓸ ꓓꓴ ꓛꓬ ꓥꓳꓽ ꓓꓴ ꓔꓳꓹ ꓜꓳ ꓟ ꓛꓬ ꓥꓳꓽ ꓡꓰ ꓟ ꓗꓪ ꓐꓰ ꓝꓮꓲ ꓢꓯꓼ ꓪ ꓪ ꓠꓹ ꓟ ꓐꓱ ꓶ ꓙꓲ_ ꓟ ꓚꓱꓹ ꓗꓪ ꓝꓮꓲ ꓙꓸꓹ ꓫꓱꓽ ꓘꓴ ꓠꓹ ꓟ ꓐꓱ ꓶ ꓐꓰ ꓙꓲ_ ꓟ ꓚꓱꓹ ꓗꓪ ꓝꓮꓲ ꓙꓸꓹ ꓫꓱꓽ ꓠꓹ ꓟ ꓠꓬ ꓠꓲꓹ ꓟ ꓒꓳꓹ ꓬꓲꓼ ꓡ ꓢꓴ ꓐꓴ ꓐꓰ ꓕꓲꓽ ꓪꓼ ꓔꓬ ꓢꓲ ꓢꓯꓼ ꓖꓶ ꓪ ꓖꓶ_ ꓟ ꓕꓱ ꓡꓱ ꓬꓰ ꓠ ꓔ ꓟ ꓥꓳ=

ꓣꓳ ꓠꓲꓹ ꓟ ꓔꓯ ꓒꓴ ꓢꓲ ꓔꓱꓹ ꓔꓱ_ ꓐꓰ ꓬꓲ ꓪ ꓐꓰ ꓕꓲꓽ ꓪꓼ ꓠꓲꓹ ꓟ ꓫꓸ ꓙ ꓢꓴ ꓠꓬ ꓠꓲꓹ ꓟ ꓡꓳꓸ ꓐꓲ ꓢꓴ ꓥ ꓡꓳ= ꓠꓱꓸ ꓐꓯꓼ ꓢꓴ ꓔꓯ ꓥ ꓟꓲ ꓠꓲꓹ ꓟ ꓗꓹ ꓛꓲ ꓓꓴ ꓖꓶ ꓢꓴ ꓥ ꓡꓳ ꓐꓰ ꓢꓯꓼ ꓖꓶ ꓢꓲ-ꓸ ꓟꓹ ꓟ ꓟ-ꓡꓲ ꓡꓰ ꓪꓴ-ꓢ ꓫꓱꓸ ꓤ ꓟ ꓠꓲꓹ ꓟ ꓔꓯ ꓮ ꓡꓲ ꓐꓰ ꓘꓳꓹ ꓣꓴ ꓠꓹ ꓟ ꓟꓸ ꓖꓶ ꓝꓲ ꓐꓰ ꓶꓽ ꓓꓳ ꓫꓱꓸ ꓓꓳ ꓔꓯ ꓬꓲ ꓟꓶꓽ ꓢꓰꓼ ꓗꓷ_ ꓡꓳ=

 

Add new comment

5 + 1 =