ꓡ ꓠꓹ ꓟ ꓤꓶꓻ ꓠꓬ ꓠꓴ ꓪ ꓡꓯꓽ ꓒꓯꓹ ꓗꓪ ꓥ ꓡꓳ꓾

ꓔꓲꓺ ꓒ ꓪ ꓔꓲ ꓡꓰ Congo ꓗꓪ ꓔꓬ ꓟ ꓞꓳ ꓡꓱ ꓤ ꓐꓴ ꓔꓯ ꓢꓯꓼ ꓖꓶ_ ꓟ꓾

ꓔꓲꓺ ꓒ ꓪ ꓔꓲ ꓡꓰ ꓚꓳꓠꓖꓳ ꓗꓪ ꓶꓽ ꓓꓳ ꓫꓱꓸ ꓓꓳ ꓙꓰ ꓚꓳ ꓟ 3 ꓠꓬꓲ ꓕꓲ ꓠꓬꓲ ꓕꓯ ꓘꓴ ꓜꓲꓼ ꓞꓳ ꓗꓪ ꓟ ꓞꓳ ꓡꓱ ꓤ ꓐꓴ ꓐꓰ ꓘꓴ ꓜꓲꓼ ꓞꓳ ꓟꓬꓱꓽ ꓟꓯ ꓢꓴ ꓐꓴ ꓐꓰ ꓜꓲ ꓡꓯꓼ ꓘꓳ ꓟ ꓥꓳ=

ꓠꓽ ꓡꓲ ꓠꓬꓲ ꓠꓯꓼ ꓙꓵꓹ ꓕꓯ Kinshasa ꓗꓪ ꓔꓬ ꓟ Martyr’s Stadium ꓗꓪ ꓜꓲ ꓡꓯꓼ ꓘꓳ ꓕꓯ Congo ꓞꓳ ꓡꓱ ꓤ ꓐꓴ ꓗꓪ ꓐꓰ ꓠꓲꓹ ꓡꓱ ꓡꓱ ꓘꓳꓹ ꓣꓴ ꓢꓲ꓾ ꓢꓯꓸ ꓒꓬꓱꓽ ꓔꓯ ꓟꓸ ꓖꓶ ꓡ ꓟ ꓔꓯ ꓫꓸ ꓟꓳ ꓐꓰ ꓐꓯ ꓔ ꓡꓳ=

ꓕꓱ ꓗꓪ ꓔꓲꓺ ꓒ ꓪ ꓔꓲ ꓡꓰ ꓞꓳ ꓡꓱ ꓤ ꓐꓴ ꓔꓯ ꓣꓳ ꓡꓯꓽ ꓠꓬꓲ ꓕꓲ ꓟ ꓡꓲ ꓕꓲ ꓟꓽ ꓪ ꓟ ꓠꓬ ꓡ ꓠ_ ꓟ ꓦꓬ ꓠꓬꓲ ꓐꓱ ꓶ ꓣꓱ ꓬꓯꓼ_ ꓟ ꓣꓳꓸ ꓚꓵ_ ꓟ ꓚꓱꓹ ꓔꓯ ꓢꓯꓼ ꓖꓶ_ ꓡꓳ= ꓣꓳ ꓕꓲ ꓣꓳ ꓡꓲ ꓕꓲ ꓣꓳ ꓠꓬ ꓮ ꓘꓶꓸ ꓒꓵ_ ꓟ ꓒꓴ ꓫꓵꓺ ꓡꓰ ꓐꓰ ꓥ ꓟ ꓪꓴꓸ ꓠꓬꓲ ꓮ ꓡꓲ ꓕꓲ ꓣꓳ ꓐꓰ ꓪ_ ꓡꓳ ꓫꓵꓽ ꓡꓯꓽ ꓒꓯꓹ ꓐꓰ ꓟꓽ ꓙꓳ=

ꓣꓳ ꓡꓯꓽ ꓑꓼ ꓟꓻ ꓠꓬ ꓣꓳ ꓠꓲꓹ ꓟ ꓐꓰ ꓠꓶꓽ ꓞ ꓟ ꓥ ꓢꓲ ꓣꓳ ꓤꓶꓺ ꓗꓪ ꓢꓯꓼ ꓪ ꓖꓶ_ ꓟ ꓪꓽ ꓘꓴ ꓠꓹ ꓟ ꓔꓯ ꓥꓳꓽ ꓐꓰ ꓥ ꓡꓳ= ꓪꓽ ꓘꓴ_ ꓟ ꓠꓬ ꓣꓳ ꓠꓲꓹ ꓟ ꓘꓴꓽ ꓗꓪ ꓐꓰ ꓙꓵꓻ ꓠꓲꓹ ꓪꓴ ꓡ ꓠꓹ ꓟ ꓐꓱ ꓶ ꓪꓴ-ꓢ ꓙꓵꓽ ꓗ ꓔꓯ ꓒꓵꓽ ꓛꓳ ꓢꓲ ꓮ ꓕꓯ ꓥ ꓟꓲ ꓪꓽ ꓘꓴ ꓢꓯꓸ ꓔꓬ ꓠꓹ ꓟ ꓣꓱꓽ ꓬꓯꓼ_ ꓡꓳ= ꓣꓳ ꓠꓬ ꓬꓰ-ꓢꓴ ꓔꓯ ꓮ ꓘꓶꓸ ꓙꓲ_ ꓟ ꓣꓳ ꓟꓯꓼ ꓛꓳꓽ ꓒꓯꓹ ꓡꓰ ꓐꓰ ꓫꓸ ꓕꓱ ꓠꓹ ꓟ ꓥ ꓡꓳ= ꓣꓳ ꓙꓳꓻ_ ꓟ ꓮ ꓙꓵꓽ ꓔꓯ ꓪꓴ-ꓢ ꓔꓯ ꓡꓯꓼ ꓙꓱ ꓢꓲ꓾ ꓪꓴ-ꓢ ꓔꓯ ꓣꓳ ꓬꓲꓸ ꓠꓯꓸ_ ꓟ ꓙꓻ ꓟꓶ ꓔ ꓟ ꓓꓵꓽ ꓙ_ ꓟ ꓮ ꓙꓵꓽ ꓔꓯ ꓟꓸ ꓖꓶ ꓠ ꓔ ꓡꓳ ꓐꓰ ꓔꓲꓺ ꓒ ꓪ ꓔꓲ ꓢꓯꓼ ꓖꓶ_ ꓡꓳ=

ꓣꓳ ꓡꓯꓽ ꓠꓬꓲꓺ ꓠꓬ ꓞꓳ ꓜꓴ ꓥ ꓡꓳ= ꓣꓳ ꓕꓲ ꓣꓳ ꓕꓵꓼ ꓔꓬ ꓡꓳ ꓐꓰ ꓟꓽ ꓓꓵꓽ ꓙ ꓠꓹ ꓟ꓾ ꓕꓱ ꓡꓱ ꓕꓲ ꓣꓳ ꓕꓵꓼ ꓡꓰ ꓔꓬ ꓢꓴ꓾ ꓫꓸ ꓢꓴ ꓕꓯ ꓟ ꓠꓬ ꓢꓯꓼ ꓖꓶ ꓠꓹ ꓟ ꓥ ꓡꓳ= ꓬꓲꓸ ꓒꓵꓽ ꓒꓳꓹ ꓟꓽ ꓓ_ ꓟ ꓢꓯꓼ ꓪ ꓠꓬ ꓕꓲ ꓠꓲꓹ ꓕꓲ ꓪꓼ ꓔꓬ ꓟ꓾ ꓟꓬ ꓢꓶꓽ ꓗꓪ ꓗꓹ ꓛꓲ ꓓꓴ ꓔꓯ ꓟꓳ ꓪ_ ꓟ꓾ ꓣꓳ ꓕꓲ ꓣꓳ ꓐꓰ ꓕꓲ ꓣꓳ ꓙ ꓡꓯꓼ ꓘꓳ ꓢꓲ ꓗꓹ ꓛꓲ ꓓꓴ ꓥ ꓡꓳ= ꓖꓳ ꓟ ꓑꓶ ꓓꓴ ꓬꓲ ꓠꓬꓲ ꓤ ꓠꓵ ꓠꓲꓹ ꓐꓰ ꓟꓲ ꓠꓯ ꓔꓯ ꓟꓬ ꓠꓬꓲ ꓙꓲ ꓠꓹ ꓟ꓾ ꓣꓳ ꓓꓵꓽ ꓙ_ ꓟ ꓮ ꓙꓵꓽ ꓔꓯ ꓕꓲ ꓠꓲꓹ ꓕꓲ ꓪꓼ ꓫꓬꓹ ꓠꓹ ꓟ ꓘꓴ_ ꓡꓳ=

ꓡꓯ ꓗꓳ ꓡꓳ ꓠꓬ ꓝꓴꓲ ꓣꓷꓠꓸ_ ꓟ꓾ ꓡꓯ ꓠꓬꓲ ꓤ ꓠꓬ ꓢꓯꓼ ꓐ_ ꓟ꓾ ꓢꓯꓼ ꓕꓵꓼ ꓪꓴꓽ ꓧꓶꓻ ꓓꓴ ꓐꓰ ꓡꓯ ꓠꓬꓲ ꓗꓶꓸ ꓔꓶꓸ ꓠꓬ ꓣꓱꓽ ꓙ_ ꓟ ꓥ ꓟ ꓔꓯ ꓓꓵꓽ ꓙ ꓢꓲ ꓟꓬ ꓠꓬꓲ ꓙꓲ_ ꓟ ꓤꓶꓻ ꓔꓯ ꓬꓰ ꓠꓹ ꓟ ꓢꓯꓼ ꓕꓵꓼ ꓠꓹ ꓟ Congo ꓞꓳ ꓡꓱ ꓤ ꓐꓴ ꓔꓯ ꓢꓯꓼ ꓖꓶ ꓡꓳ=