ꓢꓲ ꓫꓬ ꓑ ꓑ ꓠꓬ ꓢꓲ ꓫꓬ ꓢꓴ ꓐꓴ ꓐꓱ ꓶ ꓡꓯꓼ ꓫꓴꓸꓹ ꓟꓽ ꓥ-ꓸ ꓝꓴꓲ ꓙꓳ ꓢꓴ ꓐꓴ ꓐꓱ ꓶ ꓑ ꓑ ꓥ ꓡꓳ=

ꓢꓲ ꓫꓬ ꓑ ꓑ ꓠꓬ ꓢꓲ ꓫꓬ ꓢꓴ ꓐꓴ ꓐꓱ ꓶ ꓡꓯꓼ ꓫꓴꓸꓹ ꓟꓽ ꓥ-ꓸ ꓝꓴꓲ ꓙꓳ ꓢꓴ ꓐꓴ ꓐꓱ ꓶ ꓑ ꓑ ꓥ ꓡꓳ=

                ꓔꓲꓸꓸ ꓒ ꓪ ꓔꓲ ꓡꓰ ꓢꓲ ꓫꓬ ꓑ ꓑ ꓑꓮꓲ ꓓꓽ ꓗꓪ ꓙꓲ ꓢꓴ ꓢꓲ ꓤ ꓐꓴ ꓔꓯ ꓪꓴ-ꓢ ꓡꓯꓼ ꓫꓴꓸꓹ ꓥ ꓟ ꓑ ꓑ ꓔꓯ ꓘꓳꓹ ꓣꓴ ꓠꓹ ꓟ ꓐꓰ ꓣꓳ ꓤꓶꓸꓹ ꓗꓪ ꓡꓯꓼ ꓫꓴꓸꓹ ꓡꓰ ꓘꓳꓹ ꓣꓴ ꓠꓹ ꓟ ꓘꓴꓽ_ ꓟ ꓥꓳ=

Italy ꓥ ꓟꓲ-ꓸ ꓠꓱꓸ ꓐꓯꓼ ꓗꓴꓷꓼ ꓗꓪ ꓥ ꓟꓲ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪꓽ ꓑꓮꓲ ꓓꓽ ꓔꓯ ꓬꓰ ꓕꓯ ꓔꓲꓸꓸ ꓒ ꓪ ꓔꓲ ꓡꓰ ꓢꓲ ꓫꓬ ꓑ ꓑ ꓡꓯꓼ ꓫꓴꓸꓹ ꓚꓱꓹ ꓔꓯ ꓓꓵꓽ ꓙ ꓟꓶ ꓠꓹ ꓟ ꓙꓲ ꓢꓴ ꓢꓲ ꓤ ꓐꓴ ꓔꓯ ꓬꓰ-ꓢꓴ ꓡꓲ ꓐꓰ ꓬꓲ ꓪ ꓤꓶꓸꓹ ꓗꓪ ꓡꓯꓼ ꓫꓴꓸꓹ ꓡꓰ ꓢꓯꓸ ꓔꓬ ꓟꓶ ꓠꓹ ꓟ ꓐꓯ_  ꓟ ꓥꓳ=

                ꓠꓽ ꓫꓵꓽ ꓠꓬꓲ Angelus ꓙꓵꓹ ꓗꓪ St. Peter ꓗꓪ ꓜꓲꓼ ꓔꓬ ꓟ ꓡꓽ ꓞꓳ ꓐꓴ ꓔꓯ Media ꓗꓪ ꓐꓰ ꓕꓲꓽ ꓞꓸ ꓡꓳꓸ ꓔꓬ ꓢꓴ ꓐꓴ ꓔꓯ ꓟꓸ ꓟꓲꓽ ꓚ ꓕꓯ ꓔꓲꓸꓸ ꓒ ꓪ ꓔꓲ ꓡꓰ ꓟꓶꓽ ꓘꓶꓼ ꓜ ꓜꓽ ꓟ-ꓸ (ꓟ-ꓘꓳ 14ꓽ12-16/ 22-26) ꓗꓪ ꓐꓰ ꓢꓲ ꓫꓬ ꓕꓳ ꓶ ꓝꓲꓸ ꓔꓯ ꓔꓱ ꓕ ꓡꓳ=

                ꓬꓲ ꓠꓬ ꓑ ꓑ ꓣꓴ ꓢꓲ ꓶꓼ ꓥꓳ ꓙꓱꓽ ꓗꓷ ꓠꓬ ꓦꓶꓹ ꓗꓷ ꓢꓲ ꓠꓬꓲ ꓬꓲ ꓛꓳ ꓒꓯꓹ ꓐꓴ ꓔꓯ ꓖꓶ ꓢꓲ-ꓸ ꓠꓴ ꓪ ꓣꓴ ꓢꓲ ꓜꓽ-ꓸ ꓕꓱ ꓟ ꓠꓽ ꓥꓪ ꓖꓳ ꓓꓱ ꓥ ꓡꓳ-ꓸ ꓐꓰ ꓐꓯ_ ꓡꓳ=

ꓟꓬ ꓠꓬꓲ ꓣꓳꓸ ꓛꓵ_ ꓟ ꓠꓬ ꓝꓲ ꓓꓴ ꓟꓬꓱꓽ ꓥ ꓡꓳ=

                ꓬꓰ-ꓢꓴ ꓠꓬ ꓬꓲ ꓤꓶꓸꓹ ꓬꓲꓸ ꓟꓶꓽ ꓕꓲ ꓙꓵꓹ ꓗꓪ ꓡꓽ ꓞꓳ ꓮ ꓟꓬꓹ ꓔꓯ ꓑ ꓑ ꓟꓽ ꓖꓶ-ꓸ ꓖꓳ ꓡꓱ ꓥ ꓟꓲ ꓬꓲ ꓛꓳꓽ ꓒꓯꓹ ꓐꓴ ꓐꓰ ꓟꓶꓽ ꓘꓶꓼ ꓜ ꓜꓽ ꓕꓯ ꓬꓲ ꓚꓲ ꓛꓬ ꓠꓲꓹ ꓟ ꓣꓳ ꓢꓲ-ꓸ ꓥꓳ ꓡꓳꓸ ꓓꓴ ꓠꓬ ꓣꓳ ꓚꓲ ꓛꓬ ꓡꓯꓼ ꓛꓱ_ ꓟ ꓥ ꓟ-ꓸ ꓟꓬ ꓠꓬꓲ ꓣꓳꓸ ꓛꓵ_ ꓟ ꓠꓬ ꓝꓲ ꓓꓴ ꓟꓬꓱꓽ ꓥ ꓟ ꓔꓯ ꓬꓰ-ꓢꓴ ꓡꓰ ꓣꓳ ꓔꓯ ꓟꓸ ꓖꓶ_ ꓡꓳ=

ꓢꓯꓼ ꓟꓬ ꓔꓯ ꓖꓶ_ ꓟ ꓠꓵ ꓠꓲꓹ ꓢꓯꓼ ꓪ

                ꓑ ꓑ ꓠꓬ ꓢꓯꓼ ꓟꓬ ꓥ ꓡꓳ= ꓣꓳ ꓚꓲ ꓛꓬ ꓘꓳꓹ ꓣꓴ ꓠꓹ ꓟ ꓐꓰ ꓟꓽ ꓙꓳ ꓠꓹ ꓟ ꓐꓱ ꓶ ꓠꓵ ꓠꓲꓹ ꓢꓯꓼ ꓪ-ꓸ ꓣꓳ ꓤꓶꓸꓹ ꓗꓪ ꓢꓯꓼ ꓪ ꓟꓶ ꓠꓹ ꓟ ꓐꓱ ꓶ ꓚꓲ ꓛꓬ ꓠꓲꓹ ꓟ ꓔꓯ ꓣꓳ ꓠꓹ ꓟ-ꓸ ꓣꓳ ꓔꓯ ꓕꓲ ꓠꓲꓹ ꓕꓲ ꓪ ꓔꓬ ꓠꓹ ꓟ ꓐꓱ ꓶ ꓣꓳ ꓚꓲ ꓛꓬ ꓠꓵ ꓠꓲꓹ ꓢꓯꓼ ꓪ ꓥ ꓡꓳ-ꓸ ꓐꓰ ꓐꓯ_ ꓡꓳ= ꓬꓰ-ꓢꓴ ꓔꓯ ꓟꓽ ꓣꓴ ꓡ ꓢꓲ ꓟꓶꓽ ꓘꓶꓼ ꓗꓪ ꓣꓳ ꓔꓯ ꓑ ꓑ ꓖꓶ_ ꓟ ꓥꓳ= ꓬꓲ ꓠꓬ ꓠꓲꓹ ꓟ ꓘꓴꓽ ꓗꓪ ꓠꓲꓹ ꓟ ꓫꓸ ꓓꓴ ꓔꓳꓹ ꓜꓳ ꓔꓬ ꓕꓯ ꓣꓳ ꓔꓯ ꓮ ꓘꓶꓸ ꓒꓵꓽ_ ꓟ ꓡꓯꓼ ꓫꓴꓸꓸ ꓖꓶ ꓡ_ ꓟ ꓥꓳ=

ꓟꓽ ꓙꓲ_ ꓟ ꓔꓯ ꓙꓲ_ ꓟ ꓐꓰ ꓫꓬꓹ ꓔꓱ_ ꓔ ꓟ

                ꓬꓰ-ꓢꓴ ꓔꓯ ꓪꓴꓽ ꓜꓽ ꓡꓰ ꓢꓴ ꓖꓳ ꓕꓲ ꓣꓳ ꓗꓪ ꓐꓰ ꓫꓸ ꓓꓴ ꓔꓳꓹ ꓜꓳ ꓥ ꓟꓲ ꓬꓰ-ꓢꓴ ꓠꓬ ꓟꓽ ꓙꓲ_ ꓟ ꓔꓯ ꓙꓲ_ ꓟ ꓠꓲꓹ ꓟ ꓗꓪ ꓐꓰ ꓬꓰ_ ꓟ ꓥꓳ= ꓬꓲ ꓠꓬ ꓝꓴꓲ ꓙꓳ ꓢꓴ ꓐꓴ ꓔꓯ ꓝꓴꓲ ꓟꓽ ꓖꓶ_ ꓟ ꓡꓰ ꓐꓰ ꓝꓴꓲ ꓙꓳ ꓢꓴ ꓐꓴ ꓐꓱ ꓶ ꓬꓲ ꓢꓯꓼ ꓟꓬ ꓔꓯ ꓖꓶ_ ꓟ ꓥꓳ= ꓣꓳ ꓠꓬ ꓢꓲ ꓫꓬ ꓖꓳ ꓓꓱꓽ ꓑ ꓑ ꓔꓯ ꓘꓳꓹ ꓣꓴ ꓕꓯ ꓬꓰ-ꓢꓴ ꓠꓬ ꓖꓳ ꓡꓱ ꓬꓰ_ ꓡꓳ= ꓬꓲ ꓠꓬ ꓣꓳ ꓔꓯ ꓢꓷꓸ ꓔ ꓡꓳ= ꓣꓳ ꓠꓬ ꓝꓴꓲ ꓙꓳ ꓢꓴ ꓥ ꓟ-ꓸ ꓝꓴꓲ ꓮ ꓟꓬꓹ ꓬꓰ ꓢꓴ ꓬꓲ ꓢꓷꓸ ꓔ ꓟ ꓥꓳ= ꓖꓳ ꓡꓱ ꓥ ꓟꓲ ꓣꓳ ꓤꓶꓸꓹ ꓗꓪ ꓬꓲ ꓔꓬ ꓠꓹ ꓟ ꓬꓲ ꓮ ꓕꓯ ꓥ ꓟꓲ ꓠꓲꓹ ꓟ ꓟꓽ ꓐꓬ ꓡꓰ-ꓸ ꓢꓲ ꓫꓬ ꓖꓳ ꓓꓱꓽ ꓑ ꓑ ꓠꓬ ꓢꓲ ꓫꓬ ꓢꓴ ꓐꓴ ꓐꓱ ꓶ ꓡꓯꓼ ꓫꓴꓸꓸ ꓟꓽ ꓥ-ꓸ ꓝꓴꓲ ꓙꓳ ꓢꓴ ꓐꓴ ꓐꓱ ꓶ ꓑ ꓑ ꓥ ꓡꓳ= ꓢꓯꓼ ꓟꓬ ꓑ ꓑ ꓔꓯ ꓘꓳꓹ ꓣꓴ ꓟꓶ ꓢꓴ ꓠꓬ ꓪꓴ-ꓢ ꓡꓰ ꓣꓳ ꓢꓯꓼ ꓐ_ ꓟ ꓠꓯꓼ ꓗꓪ ꓬꓲ ꓡꓰ ꓝꓮꓲ ꓢꓯꓼ ꓖꓶ ꓓꓴ ꓡ_ ꓟ ꓥꓳ ꓐꓰ ꓐꓯ ꓔ ꓡꓳ=

                ꓙꓲ ꓢꓴ ꓢꓲ ꓤ ꓐꓴ ꓔꓯ ꓬꓲ ꓪ ꓢꓯꓼ ꓐ_ ꓟ ꓮ ꓙꓵꓽ ꓔꓯ ꓪꓴ-ꓢ ꓐꓰ ꓕꓲ ꓪ ꓔꓬ ꓠꓹ ꓟ ꓢꓯꓼ ꓖꓶ_ ꓡꓳ= ꓪꓴ-ꓢ ꓫꓱꓸ ꓤ ꓟ ꓠꓲꓹ ꓟ ꓠꓬ ꓣꓳ ꓫꓸ ꓓꓴ ꓟꓽ ꓙꓳ ꓐꓰ ꓐꓯ ꓔ ꓡꓳ= ꓬꓲ ꓠꓬ ꓣꓳ ꓚꓲ ꓛꓬ ꓫꓬꓹ ꓡꓰ ꓟꓽ ꓓ ꓟ ꓔꓯ ꓬꓲ ꓠꓵ ꓠꓲꓹ ꓗꓪ ꓐꓰ ꓫꓬꓹ ꓓ ꓡꓰ ꓝꓲ_ ꓡꓳ=

ꓢꓲ ꓫꓬ ꓖꓳ ꓓꓱꓽ ꓑ ꓑ ꓠꓬ ꓣꓳ ꓐꓰ ꓬꓰ-ꓢꓴ ꓔꓯ ꓙꓸꓸ ꓡꓯꓼ ꓘꓳ ꓖꓶ_ ꓡꓳ=

                ꓔꓲꓸꓸ ꓒ ꓪ ꓔꓲ ꓐꓯ_ ꓟ ꓠꓬ ꓢꓲ ꓫꓬ ꓑ ꓑ ꓠꓬ ꓬꓰ-ꓢꓴ ꓐꓰ ꓙꓸꓸ ꓡꓯꓼ ꓘꓳ_ ꓟ ꓑꓶ ꓓꓴ ꓫꓬꓹ ꓖꓶ_ ꓡꓳ= ꓣꓳ ꓔꓯ ꓬꓰ-ꓢꓴ ꓬꓲ ꓟꓸ ꓖꓶ_ ꓟ ꓡꓰ ꓐꓰ ꓣꓳ ꓔꓯ ꓢꓳ ꓣꓴ ꓠꓹ ꓟ-ꓸ ꓟꓽ ꓙꓲ_ ꓟ ꓔꓯ ꓙꓲ_ ꓟ ꓠꓲꓹ ꓟ ꓗꓪ ꓐꓰ ꓔꓬ ꓠꓹ ꓟ ꓥ ꓡꓳ= ꓠꓱꓸ ꓐꓯꓼ ꓢꓴ ꓔꓯ ꓠꓲꓹ ꓠꓵ ꓠꓹ ꓟ-ꓸ ꓬꓲ ꓪ ꓢꓯꓼ ꓐ_ ꓟ ꓔꓯ ꓬꓰ ꓙ ꓠꓹ ꓟ-ꓸ ꓣꓳ ꓔꓯ ꓠꓲꓹ ꓠꓵ ꓢꓲ ꓣꓳ ꓠꓸꓸ ꓫꓵꓽ ꓔꓯ ꓫꓬꓹ ꓖꓶ_ ꓟ ꓬꓰ-ꓢꓴ ꓔꓯ ꓣꓳ ꓘꓳꓹ ꓣꓴ_ ꓟ ꓥꓳ= ꓬꓰ-ꓢꓴ ꓬꓲ ꓟꓹ ꓟ ꓡꓰ ꓢꓲ ꓫꓬ ꓑ ꓑ ꓔꓯ ꓘꓳꓹ ꓣꓴ ꓟꓶ ꓠꓹ ꓟ ꓐꓰ ꓣꓳ ꓤꓶꓸꓹ ꓡꓯꓼ ꓫꓴꓸꓸ ꓟꓶ ꓠꓹ ꓟ ꓥꓪ ꓠꓴ ꓔꓯ ꓬꓰ ꓙ ꓡꓯ -ꓸ ꓐꓰ ꓟꓹ ꓟ ꓟ-ꓡꓲ ꓔꓯ ꓶꓽ ꓓꓰꓽ ꓢꓲ-ꓸ ꓶꓼ ꓓꓳ ꓫꓱꓸ ꓓꓳ ꓔꓯ ꓬꓲ ꓟꓶꓽ ꓢꓰꓼ ꓗꓷ_ ꓡꓳ=