ꓣꓳ ꓒꓲꓼ ꓬꓰ ꓟ ꓙꓵꓹ ꓗꓪ ꓪꓴ-ꓢ ꓠꓬ ꓣꓳ ꓔꓯ ꓮ ꓕꓯ ꓥ ꓟꓲ ꓧꓪ_ ꓟ ꓥꓳ꓾

• ꓣꓳ ꓒꓲꓼ ꓬꓰ ꓟ ꓙꓵꓹ ꓗꓪ ꓪꓴ-ꓢ ꓠꓬ ꓣꓳ ꓔꓯ ꓮ ꓕꓯ ꓥ ꓟꓲ ꓧꓪ_ ꓟ ꓥꓳ꓾

9 ꓦ 11 ꓠꓬꓲ ꓠꓽ ꓫꓵꓽ ꓠꓬꓲ ꓕꓯ ꓢꓲ ꓫꓬ ꓟ ꓒꓲ-ꓕꓱ ꓪꓽ ꓘꓴ ꓦꓲꓻ ꓓꓲ ꓗꓪ ꓮꓠꓖꓰꓡꓴꓢ ꓪꓽ ꓘꓴ ꓙꓵꓹ ꓕꓯ ꓔꓲꓺ ꓒ ꓪ ꓔꓲ ꓡꓰ ꓪꓴ-ꓢ ꓠꓬ ꓣꓳ ꓒꓲꓼ ꓬꓰ ꓟ ꓙꓵꓹ ꓗꓪ ꓮ ꓕꓯ ꓥ ꓟꓲ ꓧꓪ_ ꓟ ꓥꓳ ꓐꓰ ꓐꓯ ꓔ ꓡꓳ= ꓕꓱ ꓟ ꓠꓬ ꓬꓲ ꓮ ꓟꓬ ꓠꓲꓹ ꓠꓵ_ ꓟ꓾ ꓫꓱꓸ ꓤ_ ꓟ꓾ ꓣꓳ ꓐꓰ ꓔꓬ ꓟ ꓔꓯ ꓟꓸ ꓖꓶ_ ꓟ ꓥꓳ=

ꓖꓳ ꓕꓲ ꓠꓬꓲ ꓵ ꓠꓹ ꓟ ꓶꓼ ꓓꓳ ꓫꓱꓸ ꓓꓳ ꓗꓪ ꓐꓰ ꓫꓱꓸ ꓤ ꓠꓲꓹ ꓪꓴꓽ_ ꓟ ꓬꓰ-ꓢꓴ ꓒꓲꓼ ꓬꓰ ꓟ ꓮ ꓣꓳ ꓤ ꓚꓱꓹ ꓓꓵꓽ ꓙ ꓒꓳꓹ ꓬꓲꓼ ꓡ_ ꓟ ꓬꓲꓼ ꓠꓬꓲ ꓤ ꓕꓱ ꓡꓱ ꓔꓯ ꓥꓳꓽ ꓗꓪ ꓐꓰ ꓐꓯ ꓔ ꓟ ꓥꓳ=

ꓝꓴꓲ ꓙꓳ ꓢꓴ ꓐꓰ ꓕꓲꓽ ꓪꓼ ꓜ ꓜ_ ꓟ ꓬꓲ ꓔꓯ ꓒ-ꓡꓲ-ꓢꓷ ꓐꓴ ꓡꓰ ꓝꓴꓲ ꓐꓯ_ ꓟ ꓔꓯ ꓢꓷꓸ _ ꓟ ꓬꓰ-ꓢꓴ ꓬꓲ ꓪ ꓔꓯ ꓐꓯ_ ꓟ ꓐꓯ ꓘꓶꓽ ꓥ ꓡꓳ= ꓪꓴ-ꓢ ꓠꓬ ꓮ ꓡꓲ ꓕꓲ ꓣꓳ ꓔꓯ ꓥ ꓟꓲ ꓟꓽ ꓒꓲꓹ ꓗꓷ꓾ ꓮ ꓙꓵ ꓔꓯ ꓬꓲ ꓜ_ ꓟ ꓑꓮꓲ ꓗꓪ ꓐ ꓟꓶ ꓠꓹ ꓟ ꓥ ꓡꓳ= ꓮ ꓙꓵ ꓔꓯ ꓬꓲ ꓤ ꓠꓱ ꓤ ꓡꓰ ꓐꓰ ꓠꓲꓹ ꓠꓵ_ ꓟ ꓥꓳ=

ꓪꓴ-ꓢ ꓠꓬ ꓣꓳ ꓒꓲꓼ ꓬꓰ ꓟ ꓙꓵꓹ ꓙ ꓖꓴ ꓥꓳꓽ ꓡꓰ ꓟ ꓙꓵꓹ ꓗꓪ ꓐꓹ ꓐ ꓕꓲ ꓣꓳ ꓡꓰ ꓐꓰ ꓣꓳ ꓔꓯ ꓧꓪ_ ꓟ ꓥꓳ꓾  ꓒꓲꓼ ꓬꓰ ꓟ ꓒꓴ ꓒꓯꓼ ꓔꓯ ꓧꓪ ꓢꓲ ꓟꓳꓻ ꓡꓰ ꓟ ꓤ ꓟꓶ ꓤ ꓕꓲ ꓣꓳ ꓡꓰ ꓐꓰ ꓒꓲꓼ ꓬꓰ ꓢꓲ ꓝꓮꓲ ꓓꓵꓽ ꓙ ꓒꓳꓹ ꓡꓲꓼ ꓡ_ ꓟ ꓬꓲ ꓤ ꓠꓱ ꓤ ꓔꓯ ꓘꓳꓹ ꓣꓴ_ ꓟ ꓐꓹ ꓐ ꓡꓰ ꓐꓰ ꓪꓴ-ꓢ ꓣꓳ ꓔꓯ ꓧꓪ_ ꓟ ꓥꓳ=

ꓒꓲꓼ ꓬꓰ ꓢꓴ ꓔꓯ ꓬꓲ ꓡꓰ ꓡꓳꓸ ꓙ ꓙꓬ ꓫꓸ ꓙ_ ꓟ ꓥꓳ= ꓟꓽ ꓛꓲ ꓡ ꓠꓬ ꓧꓪ_ ꓟ ꓥꓳ꓾ ꓕꓲ ꓣꓳ ꓒꓲꓼ ꓡꓰ ꓟ ꓔꓯ ꓥ ꓟꓲ ꓪꓴ-ꓢ ꓠꓬ ꓟꓽ ꓠꓲꓹ ꓫꓵ_ ꓟ ꓥꓳ= ꓪꓴ-ꓢ ꓠꓬ ꓬꓲ ꓡꓯ ꓒꓯꓹ ꓙꓱꓼ ꓢꓲ ꓡꓳꓸ ꓙ ꓔꓬ ꓟ ꓥꓳ= ꓬꓲ ꓡꓯ ꓒꓯꓹ ꓗꓪ ꓛꓲ ꓡ ꓗꓪ ꓛꓲ ꓙꓱꓼ ꓢꓲ ꓣꓳ ꓔꓯ ꓡꓳꓸ ꓔꓬ ꓟ ꓥꓳ꓾ ꓘꓳꓹ ꓣꓴ ꓔꓬ ꓟ ꓥꓳ=

ꓒꓲꓼ ꓬꓰ ꓢꓴ ꓟꓶ ꓬꓰ ꓢꓴ ꓝꓴꓲ ꓬꓰ ꓢꓴ ꓔꓯ ꓘꓴ_ ꓟ ꓥꓳ꓾ ꓪꓴ-ꓢ ꓠꓬ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓔꓯ ꓥ ꓟꓲ ꓬꓲ ꓡꓰ ꓐꓰ ꓗꓷ ꓠꓹ ꓟ ꓠꓲꓹ ꓫꓵ_ ꓡꓳ= ꓟꓹ ꓟ ꓟ-ꓡꓲ ꓥ ꓟꓲ ꓬꓲ ꓤ ꓠꓱ ꓤ ꓠꓴ ꓔꓯ ꓧꓪ_ ꓟ ꓮ ꓕꓯ ꓥ ꓟꓲ ꓢꓯꓼ ꓐ ꓡꓳ ꓐꓰ ꓟꓽ ꓐꓯ ꓮ ꓕꓯ ꓥ ꓟꓲ ꓪꓴ-ꓢ ꓟꓲ ꓕꓯ ꓗꓪ ꓪꓽ ꓘꓴ ꓙ ꓔꓬ ꓟ ꓥꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓢꓲ ꓓꓵꓽ ꓙ ꓡꓰ ꓝꓲ_ ꓟ ꓥꓳ=