ꓣꓳ ꓙꓵꓻ ꓠꓲꓹ ꓔꓯ ꓕꓲ ꓣꓳ ꓐꓰ ꓕꓲ ꓣꓳ ꓙꓻ ꓡꓯꓽ ꓘꓳ ꓟ ꓠꓬ ꓮ ꓟꓬ ꓛꓲ ꓡꓳꓸ ꓐꓲ_ ꓟ꓾

ꓣꓳ ꓙꓵꓻ ꓠꓲꓹ ꓔꓯ ꓕꓲ ꓣꓳ ꓐꓰ ꓕꓲ ꓣꓳ ꓙꓻ ꓡꓯꓽ ꓘꓳ ꓟ ꓠꓬ ꓮ ꓟꓬ ꓛꓲ ꓡꓳꓸ ꓐꓲ_ ꓟ꓾

ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓡꓳꓹ ꓬꓰ ꓟ ꓑꓮꓢꓮꓗꓮ ꓠꓽ ꓦꓬꓼ ꓠꓬꓲ ꓢ ꓠꓽ ꓕꓲ ꓠꓽ ꓕꓯ ꓣꓳ ꓔꓯ ꓪꓴ-ꓢ ꓐꓰ ꓕꓲ ꓪꓼ ꓚꓲ ꓛꓬ ꓐꓰ ꓮ ꓡꓰ ꓫꓱꓹ ꓡꓯꓽ ꓘꓳ ꓠꓹ ꓟ ꓔꓯ ꓢꓷꓸ ꓠꓹ ꓟ ꓐꓰ ꓣꓳ ꓙꓵꓻ ꓠꓲꓹ ꓔꓯ ꓠꓱꓸ ꓐꓯꓼ ꓢꓴ ꓔꓯ ꓙꓻ ꓡꓯꓽ ꓘꓳ ꓟ꓾ ꓠꓬ ꓮ ꓟꓬ ꓛꓲ ꓡꓳꓸ ꓐꓲ_ ꓟ ꓔꓯ ꓐꓯ ꓡꓳꓹ ꓬꓰ ꓟ ꓥꓳ=

ꓣꓳ ꓪꓴ-ꓢ ꓐꓰ ꓕꓲ ꓪ ꓙꓻ ꓡꓯꓽ ꓘꓳ ꓟ ꓠꓬ ꓮ ꓟꓬ ꓡꓳꓸ ꓐꓲ_ ꓡ꓾ ꓕꓱ ꓟ ꓡꓰ ꓐꓰ ꓣꓳ ꓘꓳꓹ ꓣꓴ ꓟꓶ ꓟ ꓗꓹ ꓛꓲ ꓟ ꓔꓯ ꓠꓱꓸ ꓐꓯꓼ ꓔꓯ ꓥ ꓟꓲ ꓙ ꓡꓯꓽ ꓘꓳ ꓠꓹ ꓟ ꓫꓸ ꓔ ꓡꓳ ꓐꓰ ꓐꓯ ꓔ ꓡꓳ= ꓡꓴ-ꓘ ꓕꓳ ꓶ ꓶꓼ ꓓꓳ ꓫꓱꓸ ꓓꓳ ꓗꓪ ꓐꓰ ꓙꓱ-ꓣꓴ-ꓢ-ꓡꓱ ꓗꓪ ꓬꓲꓼ ꓙꓰ ꓟ ꓝꓲ ꓓꓴ ꓠꓬꓲꓽ ꓣꓳ ꓠꓬ ꓬꓲ ꓪ ꓛꓳ ꓒꓯꓹ ꓝꓲ ꓓꓴ ꓐꓴ ꓜꓲꓼ ꓞꓹ ꓟ ꓗꓪ ꓬꓲ ꓪ ꓔꓳꓹ ꓜꓳ ꓗꓷ ꓟ꓾ ꓬꓰ-ꓢꓴ ꓐꓰ ꓮ ꓡꓰ ꓡꓳꓸ ꓢꓷꓸ ꓡꓰ ꓟ ꓚ ꓟꓸ ꓖꓶ_ ꓡꓳ= ꓔꓲꓺ ꓒ ꓪ ꓔꓲ ꓡꓰ ꓕꓱ ꓟ ꓔꓯ ꓡꓳꓸ ꓠꓬꓲ ꓡꓯ꓾ ꓬꓲ ꓪ ꓠꓬꓲ ꓣꓳ ꓤꓶꓻ ꓔꓯ ꓮ ꓟꓬ ꓛꓲ ꓒꓳꓹ ꓡꓶꓸ ꓗꓷ ꓟ ꓔꓯ ꓓꓵꓽ ꓙ ꓔꓱꓹ ꓕ ꓠꓬꓲ ꓠꓹ ꓟ ꓐꓰ ꓣꓳ ꓥ ꓟꓲ ꓢꓲ ꓒ ꓬꓰ-ꓢꓴ ꓐꓰ ꓔꓳꓹ ꓜꓳ ꓡꓰ ꓟ ꓠꓬ ꓣꓳ ꓕꓲ ꓤꓶꓻ ꓡꓱꓼ ꓔꓯ ꓒꓳꓹ ꓡꓶꓸ ꓐ ꓡ ꓟ ꓔꓯ ꓓꓵꓽ ꓙ ꓔꓱꓹ ꓕ ꓠꓹ ꓟ ꓐꓱ ꓶ ꓐꓯ ꓔ ꓡꓳ=

ꓪꓴ-ꓢ ꓐꓰ ꓙꓻ ꓡꓯꓽ ꓘꓳ ꓔꓳꓹ ꓜꓳ ꓟ ꓗꓪ ꓐꓰ ꓣꓳ ꓤꓶꓻ ꓒꓳꓹ ꓡꓶꓸ ꓥ ꓟꓲ ꓕꓱ ꓟ ꓡꓰ ꓐꓰ ꓮ ꓟꓬ ꓛꓲ ꓡꓳꓸ ꓐꓲ_ ꓟ ꓣꓳ ꓠꓯꓼ ꓗꓪ ꓔꓬ ꓥ ꓟꓲ ꓠꓱꓸ ꓐꓯꓼ ꓢꓴ ꓔꓯ ꓙꓻ ꓠꓹ ꓟ ꓐꓱ ꓶ ꓫꓸ ꓔ ꓡꓳ ꓫꓵ ꓙꓳ_ ꓟ ꓔꓯ ꓐꓯ ꓔ ꓡꓳ= ꓣꓳ ꓕꓲ ꓣꓳ ꓡꓲ ꓕꓲ ꓣꓳ ꓕꓱ ꓟ ꓔꓯ ꓠꓱꓸ ꓐꓯꓼ ꓢꓴ ꓔꓯ ꓟꓸ ꓖꓶ_ ꓟ ꓡꓰ ꓟꓽ ꓥ꓾ ꓬꓲ ꓠꓬ ꓚꓵ ꓚꓵ ꓣꓳ ꓠꓲꓹ ꓟ ꓔꓯ ꓗꓹ ꓛꓲ ꓡꓰ ꓝꓲ ꓟ꓾ ꓣꓳ ꓟꓬ ꓐꓲ ꓔꓯ ꓛꓱꓸ ꓡꓰ ꓝꓲ_ꓟ꓾ ꓣꓳ ꓔꓯ ꓑꓶꓸ_ ꓟ ꓢꓯꓼ ꓪ ꓖꓶ_ ꓟ꓾ ꓣꓳ ꓔꓯ ꓠꓲꓹ ꓡꓱ ꓗꓹ ꓛꓲ ꓓꓴ ꓖꓶ_ ꓟ꓾ ꓢꓲ ꓡꓲꓹ ꓗꓹ ꓛꓲ_ ꓟ ꓖꓶ_ ꓟ꓾ ꓝꓴꓲ ꓖꓽ ꓖꓶ ꓖꓶ_ ꓟ ꓔꓯ ꓙꓻ ꓡꓯꓽ ꓘꓳ ꓠꓹ ꓟ ꓐꓯ ꓔ ꓡꓳ=

ꓕꓱ ꓟ ꓡꓰ ꓐꓰ ꓗꓷ ꓔꓬ ꓟ ꓔꓯ ꓣꓳ ꓕꓲ ꓦꓲꓻ ꓡ ꓞꓳ ꓘꓴꓽ ꓗꓪ꓾ꓛꓳ ꓒꓯꓹ ꓐꓴ ꓚꓳ ꓡꓳ ꓗꓪ ꓙ ꓡꓯꓼ ꓘꓳ ꓠꓹ ꓟ ꓟꓬ ꓠꓬꓲ ꓫꓸ ꓔ ꓟ ꓔꓯ ꓐꓯ ꓔ ꓡꓳ= ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓪꓴ-ꓢ ꓠꓬ ꓣꓳ ꓚꓲ ꓛꓬ ꓔꓯ ꓡꓯꓼ ꓙꓱ ꓟ ꓗꓪ ꓐꓰ ꓣꓳ ꓠꓯꓼ ꓗꓪ ꓒꓬꓱꓼ ꓡ ꓟ ꓙꓵꓻ ꓠꓲꓹ ꓐꓰ ꓓꓵꓽ ꓙ ꓔꓱꓹ ꓕ ꓟ ꓠꓬ ꓣꓳ ꓙꓻ ꓫꓱꓽ ꓟ ꓚꓱꓹ ꓗꓪ ꓟꓬ ꓠꓬꓲ ꓙꓲ ꓠꓹ ꓟ ꓓꓵꓽ ꓙ ꓔꓱꓹ ꓕ ꓝꓲ_ ꓟ ꓐꓰ ꓣꓳ ꓙꓵꓻ ꓠꓲꓹ ꓐꓰ ꓢꓯꓸ ꓔꓬ ꓟ ꓚꓱꓹ ꓗꓪ ꓢꓯꓼ ꓕꓵꓼ ꓐ ꓡ ꓠꓹ ꓟ ꓢꓯꓼ ꓪ ꓐꓰ ꓬꓰ ꓟ ꓟꓬꓱꓽ ꓔꓯ ꓟꓬ ꓠꓬꓲ ꓪꓴ ꓟꓴ ꓡ ꓠꓹ ꓟ ꓢꓯꓼ ꓪ ꓖꓶ_ ꓡꓳ ꓐꓰ ꓐꓯ ꓔ ꓡꓳ=

 ꓢꓲ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓐꓴ ꓐꓰ ꓕꓲ ꓪ ꓬꓲ ꓟꓶ ꓟꓶꓽ ꓘꓶꓼ ꓜ ꓜ ꓑꓮꓲ ꓗꓪ ꓬꓰ ꓟ ꓡꓰ ꓣꓳ ꓬꓲ ꓐꓰ ꓫꓸ ꓕꓱ ꓙꓻ ꓡꓯꓽ ꓘꓳ ꓟ ꓡꓰ ꓐꓰ ꓣꓳ ꓠꓶꓽ ꓛꓳ ꓕꓲ ꓛꓳ ꓔꓯ ꓥ ꓟꓲ ꓟꓬ ꓠꓬꓲ ꓐꓲ ꓜꓲꓼ ꓡꓰ ꓝꓲ ꓐ ꓡ ꓟ ꓔꓯ ꓐꓯ ꓔ ꓡꓳ= ꓣꓳ ꓡ ꓞꓳ ꓮ ꓙꓵ ꓠꓬ ꓪꓴ-ꓢ ꓐꓰ ꓔꓳꓹ ꓜꓳ ꓠꓬꓲ ꓟ ꓔꓯ ꓝꓮꓲ ꓓꓵꓽ ꓙ ꓠꓬꓲ ꓠꓹ ꓟ ꓐꓯ ꓔ ꓡꓳ= ꓔꓲꓺ  ꓪ ꓔꓲ ꓡꓰ “ ꓣꓳ ꓕꓲ ꓑꓹ ꓞ ꓢꓲ ꓡꓲꓹ ꓐꓰ ꓔꓬ ꓢꓲ” ꓥꓪ ꓪꓴ-ꓢ ꓐꓰ ꓕꓲ ꓪ ꓮ ꓕꓯ ꓙꓻ ꓗꓷ ꓔꓳꓹ ꓜꓳ ꓗꓷ ꓐꓷ ꓡ꓾? ꓐꓰ ꓓꓵꓽ ꓙ ꓔꓱꓹ ꓕ ꓠꓹ ꓟ ꓐꓱ ꓶ ꓢꓯꓼ ꓖꓶ ꓔ ꓡꓳ= ꓣꓳ ꓠꓬ ꓪꓴ-ꓢ ꓐꓰ ꓕꓲ ꓪ ꓫꓱꓹ ꓪ ꓟ ꓑꓶ ꓓꓴ ꓶ ꓤ ꓫꓱꓸ ꓤ ꓘꓳꓹ ꓣꓴ ꓟꓶ ꓟ ꓔꓯ ꓠꓱꓸ ꓐꓯꓼ ꓢꓴ ꓔꓯ ꓥ ꓟꓲ ꓙꓻ ꓗꓴꓸ ꓠꓹ ꓟ꓾ ꓬꓲ ꓔꓯ ꓫꓱꓸ ꓖꓶ ꓔꓬ ꓡ ꓐꓰ ꓠ ꓠꓬꓲ ꓔ ꓡꓳ= ꓕꓱ ꓟ ꓡꓰ ꓐꓰ ꓣꓳ ꓔꓯ ꓠꓱꓸ ꓐꓯꓼ ꓢꓴ ꓥ ꓟꓲ ꓬꓲ ꓪ ꓪꓴ-ꓢ ꓐꓰ ꓕꓲ ꓪ ꓔꓳꓹ ꓜꓳ ꓗꓷ ꓟ ꓔꓯ ꓙꓻ ꓡꓯꓼ ꓘꓳ ꓠꓬ ꓣꓳ ꓠ ꓠꓹ ꓖꓶ_ ꓡ꓾ ꓐꓰ ꓠ ꓠꓬꓲ ꓗꓷ ꓟ ꓥꓳ= ꓔꓲꓺ ꓒ ꓪ ꓔꓲ ꓡꓰ ꓣꓳ ꓙꓵꓻ ꓠꓲꓹ ꓔꓯ ꓙꓻ ꓡꓯꓼ ꓘꓳ ꓢꓲ꓾ ꓣꓳ ꓚꓳ ꓡꓳ ꓚꓳ ꓫꓵ ꓗꓪ ꓪꓴ-ꓢ ꓐꓰ ꓙꓻ ꓡꓯꓽ ꓘꓳ ꓠꓹ ꓟ ꓬꓲꓸ ꓔꓶꓸ ꓓꓽ ꓗꓷ ꓡꓰ ꓠꓹ ꓟ ꓐꓱ ꓶ ꓟꓹ ꓟ ꓟ-ꓡꓲ ꓠꓯꓼ ꓗꓪ ꓶꓽ ꓓꓰꓽ ꓪꓽ ꓘꓴ ꓖꓶ ꓗꓷ ꓢꓲ ꓬꓲꓸ ꓟꓶꓼ ꓢꓰꓼ ꓗꓷ ꓟ ꓥꓳ=