ꓣꓳ ꓮ ꓙꓵ ꓠꓬ ꓪꓴ-ꓢ ꓝꓲ ꓓꓴ ꓒꓬꓱꓼ ꓡ ꓠꓹ ꓟ ꓐꓱ ꓶ ꓘꓴ ꓔ ꓟ ꓟꓶꓸ_ ꓡꓳ꓾

ꓣꓳ ꓮ ꓙꓵ ꓠꓬ ꓪꓴ-ꓢ ꓝꓲ ꓓꓴ ꓒꓬꓱꓼ ꓡ ꓠꓹ ꓟ ꓐꓱ ꓶ ꓘꓴ ꓔ ꓟ ꓟꓶꓸ_ ꓡꓳ꓾

3 ꓦ 15 ꓠꓬꓲ ꓠꓽ ꓢ ꓠꓬꓲ꓾ ꓔꓲꓺ ꓒ ꓪ ꓔꓲ ꓡꓰ ꓙꓲ-ꓢꓴ ꓢꓲ ꓤ ꓐꓴ ꓔꓲꓺ ꓒ꓾ ꓔꓲꓺ ꓟ꓾ Brother ꓐꓴ ꓐꓰ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓮ ꓙꓵ ꓠꓬ ꓢ-ꓢꓶ-ꓠ ꓟꓬꓱꓽ ꓗꓪ ꓝꓲ ꓓꓴ ꓟꓬꓱꓽ ꓬꓰ ꓠꓹ ꓟ ꓐꓱ ꓶ ꓘꓴ ꓔ ꓟꓶꓸ_ ꓟ ꓥꓳ ꓐꓰ ꓐꓯ ꓔ ꓡꓳ= ꓕꓱ ꓟ ꓔꓯ ꓠꓬ ꓘꓶꓽ ꓫꓵꓼ ꓫꓵꓼ ꓢꓲ ꓫꓬ ꓕꓳ ꓶ ꓝꓲꓸ ꓐꓰ ꓢꓯꓼ ꓖꓶ ꓔ ꓡꓳ=

ꓝꓲ ꓓꓴ ꓐꓯ_ ꓟ ꓠꓬ ꓮ ꓫꓵ ꓥ ꓡ? ꓝꓲ ꓓꓴ ꓐꓯ ꓟ ꓠꓬ ꓝꓲ ꓩꓴ ꓗꓷ ꓠꓹ ꓟ ꓐꓱ ꓶ ꓥ ꓡꓳ= ꓢꓯꓸ ꓬꓲꓼ ꓡ ꓟ ꓬꓰ-ꓢꓴ ꓠꓬ ꓝꓲ ꓓꓴ ꓐꓴ ꓔꓯ ꓕꓲ ꓖ ꓡꓲ ꓕꓲ ꓖ ꓗꓪ ꓝꓲ ꓩꓴ ꓗꓷ_ ꓟ ꓔꓯ ꓬꓳ-ꓦ 20ꓽ21 ꓗꓪ ꓡꓳꓸ ꓟꓳ ꓪ ꓓ_ ꓡꓳ= “ꓐꓹ ꓐ ꓡꓰ ꓥꓪ ꓔꓯ ꓝꓲ ꓩꓴ ꓡ ꓟ ꓡꓰ ꓐꓰ꓾ ꓥꓪ_ ꓟꓲ ꓠꓴ ꓪ ꓔꓯ ꓝꓲ ꓩꓴ ꓗꓷ_ ꓥꓳ=” (ꓬꓳ-ꓦ 20ꓽ21)

“ꓗ ꓠꓯꓸ ꓬꓰ-ꓢꓴ ꓠꓬ ꓪꓽ ꓚꓲ ꓗꓪ ꓓꓯ ꓙꓰ ꓢꓲ꓾ ꓬꓲ ꓘꓴ ꓠꓲꓹ ꓫꓵ_ ꓟ ꓕꓲ ꓧꓳꓽ ꓔꓯ ꓘꓴ ꓗꓷ ꓠꓬ ꓬꓲ ꓪ ꓠꓽ ꓬꓲ ꓔꓯ ꓡ_ ꓡꓳ=” (ꓟ-ꓘꓳ 3ꓽ13) ꓬꓰ-ꓢꓴ ꓬꓲ ꓠꓲꓹ ꓫꓵ_ ꓟ ꓡꓰ ꓐꓰ ꓬꓲ ꓠꓯꓼ ꓗꓪ ꓡ ꓠꓹ ꓟ ꓐꓱ ꓶ ꓘꓴ ꓟ ꓥ ꓢꓲ꓾ ꓬꓲ ꓪ ꓥ ꓟꓲ ꓬꓲ ꓠꓯꓼ ꓗꓪ ꓡ ꓠꓹ ꓟ ꓚꓱꓹ ꓥ ꓡꓳ= “ꓪꓴ-ꓢ ꓠꓲꓹ ꓡꓶꓽ ꓗꓪ ꓐꓰ ꓘꓴ ꓔ ꓟ ꓒꓳ-ꓡꓳ ꓥꓪ_ ꓐꓰ ꓣꓳ ꓬꓲꓼ ꓠꓬꓲ ꓐꓴ ꓥ ꓟꓲ ꓔꓬ ꓟ ꓔꓯ ꓢꓲ ꓫꓬ ꓢꓴ ꓒꓳ-ꓡꓳ ꓡꓰ ꓢꓷꓸ ꓙ ꓟꓳ ꓙ ꓟ ꓔꓯ 1 ꓘꓳ-ꓡꓱ-ꓕꓴ ꓗꓪ ꓐꓰ ꓡꓳꓸ ꓟꓳ ꓪ ꓡꓳ=

ꓢꓲ ꓫꓬ ꓢꓴ ꓒꓳ-ꓡꓳ ꓡꓰ ꓬꓰ-ꓢꓴ ꓙꓲ-ꓢꓴ ꓬꓲ ꓚꓳ ꓑꓸ ꓒꓳ-ꓡꓳ ꓥꓪ ꓔꓯ ꓠꓬ ꓝꓲ ꓓꓴ ꓬꓰ ꓠꓹ ꓟ ꓘꓴ ꓔ ꓟ ꓥ ꓟ ꓚꓱꓹ ꓔꓯ ꓣꓳ-ꓟ 1ꓽ1 ꓗꓪ ꓡꓳꓸ ꓟꓳ ꓪ ꓡꓳ= ꓘꓴ ꓟꓶ ꓟ ꓔꓯ ꓘꓳꓹ ꓣꓴ ꓠꓹ ꓟ ꓚꓱꓹ ꓔꓲꓺ ꓒ ꓪ ꓔꓲ ꓡꓰ ꓐꓯ ꓟꓸ ꓖꓶ ꓔ ꓡꓳ= ꓙꓲ-ꓢꓴ ꓢꓲ ꓤ ꓐꓴ ꓠꓬ ꓪꓴ-ꓢ ꓝꓲ ꓓꓴ ꓒꓬꓱꓼ ꓡ ꓠꓹ ꓟ ꓐꓱ ꓶ ꓘꓴ ꓔ ꓟ ꓟꓶꓸ_ ꓟ ꓥ ꓡꓳ= ꓙꓵꓻ ꓢꓴ ꓤ ꓾ ꓤ ꓟꓶꓼ ꓮ ꓙꓵ ꓠꓬ ꓬꓰ-ꓢꓴ ꓙꓲ-ꓢꓴ ꓝꓲ ꓓꓴ ꓒꓬꓱꓼ ꓠꓹ ꓟ ꓐꓱ ꓶ ꓢꓲ ꓚꓰꓸ ꓔ ꓟꓶ ꓢꓴ ꓥ ꓡꓳ=

 ꓔꓲꓺ ꓒ ꓐꓰ ꓢꓲ ꓚꓰꓸ ꓟꓶ ꓢꓴ ꓠꓬ ꓙꓵꓻ_ ꓟ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓐꓰ ꓧꓹ ꓡꓰ ꓗꓷ_ ꓟ ꓒꓯ ꓗꓷ_ ꓟ ꓟꓽ ꓥ꓾ ꓙꓲ-ꓢꓴ ꓢꓲ ꓤ ꓐꓴ ꓮ ꓙꓵ ꓠꓬ ꓮ ꓙꓵ ꓟ ꓗꓳꓸ ꓡꓳ ꓗꓪ ꓐꓰ ꓢꓲ ꓚꓰꓸ ꓟꓶ ꓡꓰ ꓢꓴ ꓡꓰ ꓥꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ= ꓔꓲꓺ ꓒ ꓤꓶꓻ ꓐꓰ ꓦ ꓢꓯꓼ ꓪ ꓚꓱꓹ ꓕꓲ ꓒꓳꓹ ꓗꓪ ꓐꓰ ꓪꓽ ꓘꓴ ꓧꓳꓽ ꓟꓳꓸ ꓖꓶ_ ꓟ꓾ ꓢꓲ ꓫꓬ ꓚꓱꓹ ꓟꓸ ꓖꓶ_ ꓟ꓾ ꓧꓳꓽ ꓪꓴꓸ ꓡꓳꓹ ꓬꓰ ꓟ ꓝꓲ ꓓꓴ ꓐꓴ ꓬꓲꓸ ꓚꓵꓺ ꓟꓬꓱꓽ ꓟꓯ ꓔꓬ ꓟ ꓥꓳ꓾ ꓙꓵꓻ ꓢꓴ ꓙꓲ-ꓢꓴ ꓢꓲ ꓤ ꓐꓴ ꓥ ꓟꓲ ꓔꓲꓺ ꓒ ꓐꓴ ꓟꓬꓱꓽ ꓙꓵꓽ ꓪ ꓔꓯ ꓕꓲ ꓠꓲꓹ ꓕꓲ ꓪꓼ ꓛꓳ ꓫꓱꓽ ꓟꓬꓱꓽ ꓟꓯ ꓙ ꓠ ꓔ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ=

ꓘꓴ ꓜꓲꓼ ꓞꓳ ꓘꓴꓽ ꓗꓪ ꓮ ꓡꓲ ꓕꓲ ꓣꓳ ꓟꓬ ꓠꓬꓲ ꓣꓳꓸ ꓚꓵ_ ꓡ? ꓔꓲꓺ ꓒ ꓓꓽ ꓥ ꓡ? ꓔꓲꓺ ꓒ ꓥ ꓡ? ꓟꓽ ꓥ꓾ ꓙꓲ-ꓢꓴ ꓢꓲ ꓤ ꓐꓴ ꓮ ꓙꓵ ꓕꓲ ꓣꓳ ꓐꓰ ꓕꓲ ꓣꓳ ꓬꓰ ꓙ ꓔꓳꓹ ꓙ ꓠꓹ ꓟ ꓥꓳ꓾ ꓣꓳ ꓮ ꓙꓵ ꓠꓬ ꓕꓲ ꓪ ꓡꓰ ꓥꓳ꓾ ꓐꓰ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓢꓯꓼ ꓖꓶ_ ꓡꓳ= ꓬꓲꓸ ꓟꓶ ꓗꓪ ꓐꓰ Argentina ꓐꓰ Ukraine ꓗꓴꓷꓼ ꓫꓵꓽ ꓪꓴ ꓚꓱꓹ ꓔꓯ ꓢꓑꓮꓲꓠ ꓥꓳꓽ ꓗꓪ ꓐꓰ ꓢꓷꓸ ꓠꓹ ꓟ ꓐꓯ_ ꓡꓳ=

ꓗꓴꓷꓼ ꓙꓵꓽ ꓪꓴ ꓢꓴ꓾ ꓧꓳꓽ ꓪꓴꓸ ꓟꓴ ꓢꓴ꓾ ꓞꓳ ꓫꓵꓽ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓥꓪ ꓔꓲꓺ ꓒ ꓪ ꓔꓲ ꓟꓬꓱꓽ ꓟꓯ ꓙꓵ ꓪ (10) ꓘꓳꓼ ꓐꓲ_ ꓟ ꓙꓵꓹ ꓗꓪ ꓠꓴ ꓪ ꓕꓱ ꓡꓱ ꓜꓲꓼ ꓡ ꓢꓲ꓾ ꓫꓸ ꓕꓱ ꓡ ꓟ ꓠꓬ ꓮ ꓘꓶꓸ ꓙꓲ_ ꓟ ꓥ ꓡꓳ ꓐꓰ ꓐꓯ ꓢꓲ꓾ ꓗꓴꓷꓼ ꓪꓴꓽ ꓟꓴ ꓡ ꓚꓱꓹ ꓐꓰ ꓢꓲ ꓡꓲꓹ ꓠꓹ ꓟ ꓚꓱꓹ ꓔꓯ ꓟꓳꓸ ꓖꓪ ꓙꓱ ꓡꓯꓼ ꓘꓳ꓾ ꓜꓲ ꓡꓯꓼ ꓘꓳ ꓠꓹ ꓟ ꓐꓱ ꓶ ꓥ ꓟꓲ ꓶꓽ ꓓꓰ ꓘꓶꓽ ꓐꓯ ꓠꓲꓹ ꓫꓵ ꓟ ꓐꓰ ꓘꓴ ꓜꓲꓼ ꓞꓳ ꓟꓬꓱꓽ ꓟꓯ ꓔꓬ ꓢꓴ ꓔꓯ ꓥ ꓟꓲ ꓞꓳ ꓒꓵꓽ ꓠꓹ ꓟ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓟ ꓥꓳ=