ꓪꓴ-ꓢ ꓠꓬ ꓣꓳ ꓐꓰ ꓪ ꓡꓯꓼ ꓘꓳ ꓫꓱꓹ ꓡꓯꓼ ꓘꓳ ꓠꓲꓹ ꓫꓵ_ ꓡꓳ=

       ꓪꓴ-ꓢ ꓠꓬ ꓣꓳ ꓐꓰ ꓪ ꓡꓯꓼ ꓘꓳ ꓫꓱꓹ ꓡꓯꓼ ꓘꓳ ꓠꓲꓹ ꓫꓵ_ ꓡꓳ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ_ ꓡꓳ= ꓪꓴ-ꓢ ꓠꓬ ꓬꓲ ꓚꓲ ꓛꓬ ꓐꓱ ꓶ ꓗꓪ ꓐꓰ ꓙ ꓢꓲ-ꓸ ꓣꓳ ꓐꓰ ꓪ ꓡꓯꓼ ꓘꓳ ꓠꓲꓹ ꓫꓵ_ ꓡꓳ= ꓮ ꓫꓵꓽ ꓔꓯ ꓥ ꓟꓲ ꓣꓳ ꓟꓽ ꓘꓳ ꓣꓴ ꓟꓲ ꓙꓬ ꓗꓪ ꓬꓲ ꓔꓯ ꓓ ꓪꓴꓸ ꓓꓵꓽ ꓙ ꓠ ꓔ ꓡꓳ= ꓠꓲꓹ ꓠꓵ ꓠ ꓔ ꓡꓳ= ꓕꓱ ꓠꓵ ꓠꓲꓹ ꓠꓬ ꓣꓳ ꓕꓲ ꓫꓵꓽ ꓔꓯ ꓘꓳꓹ ꓣꓴ ꓟꓶ ꓢꓲ ꓬꓲ ꓔꓯ ꓫ ꓟꓳ ꓟ ꓡꓰ ꓟꓽ ꓥ-ꓸ ꓣꓳ ꓟꓽ ꓘꓳꓹ ꓣꓴ ꓟ ꓟꓲ ꓕꓯ ꓗꓪ ꓡꓰ ꓐꓰ ꓫ ꓟꓳ ꓗꓴꓸ ꓠ ꓔ ꓡꓳ=

      ꓔꓲꓸꓸ ꓒ ꓪ ꓔꓲ ꓡꓰ ꓬꓳ-ꓦ ꓕꓳ ꓶ 6ꓽ24-35 ꓗꓪ ꓐꓰ ꓚ ꓟꓸ ꓖꓶ_ ꓡꓳ= ꓬꓰ-ꓢꓴ ꓠꓯꓼ ꓗꓪ ꓛꓳ ꓔꓬ ꓢꓴ ꓜꓴ ꓐꓴ ꓠꓬ ꓬꓰ-ꓢꓴ ꓢꓷꓸ ꓡꓰ ꓓꓴ ꓟꓳ ꓗꓷ ꓠꓬꓲ ꓟꓽ ꓥ-ꓸ ꓑ ꓑ ꓜꓽ ꓐꓳ ꓡꓰ ꓠꓬꓲ ꓥ ꓡꓳ= ꓕꓱ ꓢꓲ ꓫꓬ ꓕꓳ ꓶ ꓝꓲꓸ ꓗꓪ ꓐꓰ ꓣꓳ ꓤ ꓟꓳ ꓠ ꓔ ꓟ ꓠꓬ ꓣꓳ ꓠꓬ ꓮ ꓫꓵꓽ ꓑꓶꓸ ꓓꓴ ꓬꓰ-ꓢꓴ ꓔꓯ ꓧꓪ_ ꓡ? ꓚꓲ ꓛꓬ ꓙꓵꓸꓹ ꓠꓲꓹ ꓐꓱ ꓶ ꓮ ꓫꓵ ꓑꓶ ꓓꓴ ꓧꓪ_ ꓡ? ꓕꓱ ꓟ ꓔꓯ ꓣꓳ ꓢꓷꓸ ꓠ ꓔ ꓡꓳ= ꓣꓳ ꓤꓶꓸꓹ ꓠꓯꓼ ꓗꓪ ꓤꓹ ꓠꓬꓲ ꓫꓵꓽ ꓠꓬꓲ_ ꓟ ꓗꓪ ꓐꓰ ꓙ ꓫꓱꓽ_ ꓟ ꓚꓱꓹ ꓥꓳꓽ ꓡꓰ_ ꓟ ꓑꓶ ꓓꓴ ꓥ ꓡꓳ= ꓣꓳ ꓪ ꓠꓲꓹ ꓫꓵ_ ꓟ ꓔꓯ ꓣꓳ ꓚꓲ ꓛꓬ ꓟꓽ ꓐ ꓡ ꓥ ꓟꓲ-ꓸ ꓪꓴ-ꓢ ꓬꓲ ꓬꓰ ꓙ_ ꓟ ꓗꓪ ꓐꓰ ꓣꓳ ꓪ ꓟꓶ ꓡꓰ ꓟ ꓑꓶ ꓓꓴ ꓪꓴ-ꓢ ꓔꓯ ꓣꓳ ꓫꓱꓸ ꓖꓶ_ ꓟ ꓫ ꓟꓳ_ ꓟ ꓥꓳ= ꓪꓴ-ꓢ ꓔꓯ ꓣꓳ ꓣꓱꓽ ꓬꓯꓼ_ ꓟ ꓮ ꓙꓵꓽ ꓶ ꓓꓰꓽ_ ꓟ ꓥ ꓡꓳ= ꓕꓲ ꓧꓪ ꓧꓪꓹ ꓪꓴ-ꓢ ꓠꓬ ꓣꓳ ꓥꓳ ꓡꓳꓸ ꓟ ꓡꓰ ꓟ ꓞꓲ ꓬꓰ ꓖꓶ ꓡ_ ꓟ ꓥꓳ=ꓪꓴ-ꓢ ꓠꓬ ꓣꓳ ꓐꓰ ꓕꓲ ꓪꓼ ꓔꓬ ꓠꓲꓹ ꓫꓵ_ ꓡꓳ= ꓔꓱ_ ꓟ ꓠꓵ ꓠꓲꓹ ꓠꓬ ꓚꓲ ꓛꓬ ꓐꓱ ꓶ ꓟꓽ ꓛꓳ=

       ꓬꓰ-ꓢꓴ ꓡꓰ ꓬꓲ ꓪ ꓛꓬ ꓥꓳꓽ ꓡꓰ_ ꓟ ꓔꓯ ꓐꓯ ꓖꓶ ꓕꓯ ꓞꓳ ꓜꓴ ꓐꓴ ꓠꓬ ꓬꓲ ꓪ ꓛꓬ ꓗꓷ ꓟ ꓔꓯ ꓢꓷꓸ ꓡꓰ ꓢꓲ-ꓸ ꓬꓲ ꓪ ꓡꓰ ꓬꓲ ꓔꓯ ꓪꓴ-ꓢ ꓟꓬꓱꓽ ꓬꓰ ꓠꓹ ꓟ ꓥꓪ ꓠꓴꓽ ꓮ ꓫꓵꓽ ꓬꓰ ꓠ ꓗꓹ ꓡ? ꓐꓰ ꓠ ꓠꓬꓲ_ ꓡꓳ= ꓕꓱ ꓠ ꓠꓬꓲ_ ꓟ ꓠꓬ ꓞꓳ ꓜꓴ ꓬꓲ ꓪ ꓥꓳꓽ ꓡꓰ_ ꓟ ꓔꓯ ꓫꓬꓹ ꓔꓱꓹ ꓖꓶ ꓠꓲꓹ ꓫꓵ_ ꓟ ꓔꓯ ꓟꓸ ꓔ ꓡꓳ= ꓪꓴ-ꓢ ꓡꓰ ꓝꓲ ꓩꓴ ꓡ_ ꓟ ꓬꓰ-ꓢꓴ ꓔꓯ ꓣꓳ ꓤꓶꓸꓹ ꓗꓪ ꓐꓰ ꓘꓳꓹ ꓣꓴ ꓠꓹ ꓟ ꓥ ꓡꓳ= ꓕꓱ ꓗꓪ ꓐꓰ ꓬꓰ-ꓢꓴ ꓡꓰ ꓮ ꓡꓲ ꓘꓴ ꓞꓲꓼ ꓜꓳ ꓙꓵꓽ ꓗ ꓔꓯ ꓛꓳ-ꓸ ꓙꓸꓸ ꓫꓱꓽ ꓐꓰ ꓟꓽ ꓐꓯ ꓔ= ꓬꓰ-ꓢꓴ ꓔꓯ ꓣꓳ ꓤꓶꓸꓹ ꓠꓯꓼ ꓗꓪ ꓢꓯꓸ ꓔꓬ ꓠꓹ ꓟ-ꓸ ꓬꓲ ꓐꓰ ꓠꓵ ꓠꓲꓹ ꓗꓪ ꓐꓰ ꓢꓯꓸ ꓔꓬ ꓠꓹ ꓟ ꓥ ꓡꓳ= ꓬꓲ ꓠꓬ ꓣꓳ ꓙꓵꓸꓹ ꓠꓲꓹ ꓔꓯ ꓢꓲ ꓫꓬ ꓡꓰ ꓝꓲ ꓠꓹ ꓟ ꓥ ꓡꓳ= ꓕꓱ ꓠꓵ ꓠꓲꓹ ꓠꓬ ꓪꓴ-ꓢ ꓡꓰ ꓟꓽ ꓞꓲ ꓣꓳ ꓞꓳ ꓡꓲꓽ ꓪ ꓚꓱꓹ ꓗꓪ ꓥ ꓟꓲ ꓙꓳ ꓠꓹ ꓟ ꓥ ꓡꓳ=  ꓪꓴ-ꓢ ꓔꓯ ꓟꓽ ꓣꓱꓽ ꓥ ꓟꓲ ꓞꓳ ꓤ ꓔꓯ ꓣꓳ ꓚꓲ ꓛꓬ ꓐꓱ ꓶ ꓬꓲ ꓪ ꓔꓯ ꓣꓱꓽ ꓗꓷ_ ꓟ ꓑꓶ ꓓꓴ ꓥ ꓡꓳ= ꓕꓱ ꓣꓳ ꓟ ꓠꓬ ꓥꓪ ꓬꓰ ꓙ ꓓꓳ ꓕꓯ ꓥꓪ ꓔꓯ ꓟꓽ ꓓꓵꓽ ꓙ ꓐꓰ ꓕꓱ ꓡꓱ ꓫꓸ ꓕꓱ ꓘꓶꓽ ꓔꓯ ꓣꓳ ꓐꓯ ꓙ ꓠꓬꓲ ꓓꓴ ꓥꓳ= ꓣꓳ ꓚꓲ ꓛꓬ ꓐꓱ ꓶ ꓢꓴ ꓔꓯ ꓣꓱꓽ_ ꓟ ꓕꓱ ꓟ ꓠꓬ ꓟꓽ ꓙꓵꓸꓹ_ ꓟ ꓥ ꓡꓳ= ꓢꓲ ꓫꓬ ꓕꓳ ꓶ ꓗꓪ ꓐꓰ ꓠꓱꓸ ꓐꓯꓼ ꓜꓽ ꓫꓵꓽ ꓔꓯ ꓟꓽ ꓠꓲꓹ ꓥꓳ ꓟꓽ ꓧꓪ ꓢꓯꓼ ꓟꓬ ꓑ ꓑ ꓥ ꓟ ꓬꓰ-ꓢꓴ ꓔꓯ ꓘꓳꓹ ꓣꓴ ꓠꓹ ꓟ-ꓸ ꓬꓲ ꓐꓰ ꓫꓱꓹ ꓡꓯꓼ ꓘꓳ ꓠꓹ ꓟ ꓣꓳ ꓢꓯꓼ ꓕꓵꓼ ꓠ ꓔ ꓡꓳ ꓐꓰ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓚ ꓟꓸ ꓖꓶ_ ꓡꓳ=