ꓪꓴ-ꓢ ꓢꓯꓼ ꓔꓯ ꓠ ꓠꓹ ꓢꓲ ꓜ ꓚꓲꓸ ꓚꓲꓸ_ ꓟ ꓦꓬꓼ ꓠꓬꓲ ꓗꓪ ꓙꓻ ꓫꓱꓽ ꓓꓴ ꓬꓰ ꓡꓯ꓾(Journey through Lent listening to voice of God)

ꓪꓴ-ꓢ ꓢꓯꓼ ꓔꓯ ꓠ ꓠꓹ ꓢꓲ ꓜ ꓚꓲꓸ ꓚꓲꓸ_ ꓟ ꓦꓬꓼ ꓠꓬꓲ ꓗꓪ ꓙꓻ ꓫꓱꓽ ꓓꓴ ꓬꓰ ꓡꓯ꓾

ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓜ ꓚꓲꓸ ꓚꓲꓸ_ ꓟ ꓦꓬꓼ ꓠꓬꓲ ꓗꓪ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓪꓴ-ꓢ ꓔꓯ ꓣꓳ ꓠꓲꓹ ꓟ ꓘꓴꓽ ꓗꓪ ꓐꓰ ꓫꓸ ꓕꓱ ꓢꓲ ꓬꓲꓸ ꓙꓵꓹ ꓖꓶ ꓠꓹ ꓟ ꓐꓱ ꓶ ꓐꓯ ꓡꓳꓹ ꓬꓰ ꓟ ꓥꓳ= ꓜ ꓚꓲꓸ ꓚꓲꓸ_ ꓟ ꓬꓲꓸ ꓪꓴꓸ ꓕꓲ ꓠꓽ ꓠꓽ ꓦꓬꓼ ꓠꓬꓲ ꓕꓯ ꓪꓴ-ꓢ ꓶꓼ ꓓꓳꓽ ꓫꓱꓸ ꓓꓳ ꓟ-ꓘꓳ 1ꓽ12-15 ꓗꓪ ꓐꓰ ꓬꓰ-ꓢꓴ ꓠꓬ ꓠꓲꓽ ꓪ ꓔꓲ ꓢ-ꓓꓯ ꓡꓰ ꓫꓵꓽ ꓠꓬꓲ_ ꓟ ꓔꓯ ꓮ ꓡꓰ ꓐꓰ ꓧꓪꓸ ꓡꓰ ꓘꓴ ꓐ ꓡ ꓟ ꓚꓱꓹ ꓣꓳ ꓔꓯ ꓟꓸ ꓖꓶ ꓔ ꓟ ꓥꓳ=

ꓙꓲ ꓢꓴ ꓢꓲ ꓤ ꓐꓴ ꓔꓯ ꓣꓳ ꓔꓯ ꓡꓲ ꓛꓲ ꓟꓵꓽ ꓛꓱꓹ ꓐꓰ ꓲꓠꓠꓰꓣ ꓪꓳꓣꓡꓓ ꓠꓯꓸꓼ ꓗꓪ ꓛꓲ ꓓꓵꓽ ꓢꓲ ꓔꓱꓹ ꓟ ꓐꓰ ꓫꓱꓹ ꓢꓲ ꓣꓳ ꓠꓲꓹ ꓟ ꓗꓪ ꓐꓰ ꓫꓸ ꓕꓱ ꓟ ꓐꓯ ꓘꓶꓽ ꓔꓯ ꓠ ꓠꓹ ꓠꓹ ꓟ ꓐꓯ ꓔ ꓡꓳ= ꓝꓮꓲ ꓢꓲ ꓒ ꓬꓰ-ꓢꓴ ꓔꓯ ꓡꓲ ꓛꓲ ꓟꓵꓽ ꓛꓱꓹ ꓬꓲ ꓡꓽ ꓬꓲ ꓗꓳꓸ ꓗꓳ ꓡꓳ ꓗꓪ ꓔꓬ ꓥ ꓟꓲ ꓟꓴ ꓗꓪ ꓝꓲ ꓓꓴ ꓐꓴ ꓠꓬ ꓬꓲ ꓔꓯ ꓠ ꓠꓹ ꓢꓲ ꓣꓱꓽ ꓙ_ ꓟ ꓥꓳ꓾ ꓐꓯ ꓠꓬ ꓬꓲ ꓪ ꓠꓬ ꓣꓳ ꓛꓳ ꓒꓯꓹ ꓥ ꓡꓳ꓾ ꓣꓳ ꓥ ꓟꓲ ꓚꓲ ꓛꓬ ꓠꓲꓹ ꓟ ꓘꓴꓽ ꓡꓲ ꓛꓲ ꓟꓵꓽ ꓗꓪ ꓓꓵꓽ ꓡꓰ ꓕꓯ ꓬꓲ ꓡꓽ ꓬꓲ ꓗꓳꓸ ꓙꓱꓽ ꓤꓽ ꓐꓰ ꓟꓴ ꓗꓪ ꓝꓲ ꓓꓴ ꓐꓴ ꓔꓯ ꓔꓳꓹ ꓜꓳ ꓡ ꓟ ꓔꓯ ꓐꓯ ꓔ ꓡꓳ=

ꓣꓳ ꓦ ꓕꓲ ꓒꓳꓹ ꓗꓪ ꓕꓱ ꓟ ꓡꓰ ꓐꓰ ꓬꓲ ꓡꓽ ꓬꓲ ꓗꓳꓸ ꓙꓱꓽ ꓤꓽ ꓐꓴ ꓠꓬ ꓣꓳ ꓠꓲꓹ ꓟ ꓔꓯ ꓐꓱꓻ ꓡꓰ ꓝꓲ ꓗꓴꓸ_ ꓡꓳ꓾ ꓣꓳ ꓠꓲꓹ ꓟ ꓔꓯ ꓙꓵꓽ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓢꓴ ꓥ ꓟ ꓔꓯ ꓣꓳ ꓓꓵꓽ ꓙ ꓠꓹ ꓟ ꓥꓳ꓾ ꓕꓱ ꓟ ꓡꓰ ꓐꓰ ꓣꓳ ꓔꓯ ꓤꓹ ꓠꓬꓲ_ ꓟ ꓕꓱ ꓟ ꓔꓯ ꓣꓳ ꓤ ꓟꓳ ꓠꓹ ꓟ ꓟꓽ ꓙꓳ ꓠꓬ ꓬꓲ ꓪ ꓑꓶ ꓓꓴ ꓣꓳ ꓫꓸ ꓓꓴ ꓔꓳꓹ ꓜꓳ ꓡ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰ ꓓꓵꓽ ꓙ ꓡꓰ ꓝꓲ_ ꓡꓳ= ꓒꓴ ꓫꓵ ꓔꓯ ꓠꓲꓹ ꓥꓳ_ ꓟ ꓠꓲꓹ ꓟ ꓕꓱ ꓟ ꓠꓬ ꓣꓳ ꓔꓯ ꓮ ꓕꓯ ꓟꓲ ꓠꓲꓹ ꓘꓪ ꓟꓽ ꓫꓴ ꓡꓰ ꓝꓲ ꓟ ꓥꓳ꓾ ꓗꓹ ꓛꓲ ꓓꓴ ꓚꓱꓹ ꓔꓯ ꓡꓰ ꓠꓲꓹ ꓫꓵ ꓟ ꓠꓲꓹ ꓟ ꓠꓬ ꓣꓳ ꓠꓯꓼ ꓗꓪ ꓟꓽ ꓡꓳꓼ ꓟ ꓠꓲꓹ ꓟ ꓦ ꓙꓱꓽ ꓤꓽ ꓡꓰ ꓐꓰ ꓥ ꓟ ꓔꓯ ꓐꓯ ꓔ ꓡꓳ= ꓕꓱ ꓟ ꓡꓰ ꓐꓰ ꓣꓳ ꓐꓱ ꓶ ꓬꓲ ꓡꓽ ꓬꓲ ꓗꓳꓸ ꓙꓱꓽ ꓤꓽ ꓡꓰ ꓐꓰ ꓠꓲꓹ ꓟ ꓥ ꓠꓬ ꓕꓱ ꓟ ꓔꓯ ꓞ ꓞꓽ ꓐꓰ ꓒꓰꓹ ꓗꓷ ꓠꓹ ꓟ ꓢꓰꓼ ꓠꓹ ꓟ ꓥ ꓡꓳ= ꓟꓽ ꓥ ꓠꓬ ꓬꓲ ꓪ ꓡꓰ ꓙꓵꓽ ꓧꓪꓸ ꓡꓰ ꓡ ꓟ ꓥꓳ ꓐꓰ ꓢꓷꓸ ꓠ ꓔ ꓡꓳ꓾ ꓖꓳ ꓟ ꓑꓶ ꓓꓴ ꓣꓳ ꓠꓬ ꓡꓲ ꓛꓲ ꓟꓵꓽ ꓛꓱꓹ ꓬꓲꓸ ꓠꓯꓸꓼ ꓟ ꓗꓪ ꓓꓵꓽ ꓡꓰ ꓢꓲ ꓕꓱ ꓟ ꓚꓱꓹ ꓔꓯ ꓢꓷꓸ ꓠꓹ ꓟ ꓐꓱ ꓶ ꓬꓰ ꓠꓹ ꓟ ꓚꓱꓹ ꓐꓯ ꓔ ꓡꓳ=

 ꓔꓲꓺ ꓒ ꓪ ꓔꓲ ꓡꓰ ꓡꓲ ꓛꓲ ꓟꓵꓽ ꓗꓪ ꓐꓰ ꓟꓴ ꓗꓪ ꓝꓲ ꓓꓴ ꓐꓴ ꓬꓲ ꓪ ꓠꓬ ꓪꓴ-ꓢ ꓶꓼ ꓓꓳ ꓫꓱꓸ ꓓꓳ ꓛꓱꓻ ꓓꓳ ꓐꓯ ꓒꓬꓱꓽ ꓢꓴ ꓥ ꓡꓳ꓾ ꓣꓳ ꓔꓯ ꓙꓲ_ ꓟ ꓐꓰ ꓮ ꓕꓯ ꓟꓲ ꓬꓰ ꓙ ꓠꓹ ꓟ ꓥ ꓡꓳ= ꓫꓵ ꓠꓬꓲ_ ꓟ ꓠꓲꓹ ꓟ ꓣꓳ ꓠꓯꓼ ꓗꓪ ꓐꓰ ꓧꓹ ꓙꓰ ꓟ ꓙꓵꓹ ꓗꓪ ꓣꓳ ꓠꓲꓹ ꓟ ꓘꓴꓽ ꓗꓪ ꓐꓰ ꓙꓲ_ ꓟ ꓡꓰ ꓣꓳ ꓔꓯ ꓢꓯꓼ ꓖꓶ_ ꓟ꓾ ꓮꓽ ꓔꓳ ꓬꓲꓸ ꓖꓳ ꓡꓰ ꓟꓽ ꓗꓷ ꓡꓰ ꓝꓲ ꓕꓲ ꓠꓲꓹ ꓕꓲ ꓪꓼ ꓗꓷ ꓡꓰ ꓝꓲ_ ꓟ ꓥꓳ= ꓪꓴ-ꓢ ꓡꓰ ꓖꓶ_ ꓟ ꓢꓲ ꓡꓲꓹ ꓟ ꓠꓲꓹ ꓟ ꓐꓰ ꓠꓲꓹ ꓟ ꓓꓵꓽ ꓙ_ ꓟ ꓔꓯ ꓪ ꓡꓰ ꓠꓹ ꓟ ꓐꓱ ꓶ ꓢꓲ ꓡꓲꓹ ꓡꓲꓹ ꓐꓰ ꓔꓬ ꓢꓲ ꓪꓽ ꓘꓴ ꓠꓹ ꓟ ꓐꓯ ꓔ ꓡꓳ=

ꓕꓱ ꓟ ꓔꓯ ꓛꓳ ꓫꓱꓽ ꓠꓹ ꓟ ꓠꓬ ꓮ ꓟꓶ ꓜ ꓚꓲꓸ ꓚꓲꓸ_ ꓟ ꓦꓬꓼ ꓠꓬꓲ ꓗꓪ ꓢꓯꓼ ꓕꓵꓼ ꓠꓹ ꓟ ꓟꓬ ꓠꓬꓲ ꓙꓲ_ ꓟ ꓔꓯ ꓐꓯ ꓡꓳꓹ ꓬꓰ ꓟ ꓥꓳ= ꓔꓲꓺ ꓒ ꓪ ꓔꓲ ꓡꓰ ꓣꓳ ꓔꓯ ꓠ ꓠꓬꓲ ꓘꓶꓽ ꓠꓬꓲꓽ ꓟ ꓐꓰ ꓠ ꓠꓬꓲ ꓔ ꓡꓳ꓾ “ ꓮ ꓡꓰ ꓫꓵ ꓬꓲꓸ ꓡꓽ ꓬꓲ ꓗꓳꓸ ꓙꓱꓽ ꓤ ꓠꓬ ꓚꓲ ꓛꓬ ꓠꓲꓹ ꓟ ꓔꓯ ꓢꓴꓺ ꓡ ꓙꓴꓽ ꓡ ꓝꓲ ꓢꓴ ꓥ ꓡ?”” ꓪꓴ-ꓢ ꓢꓯꓼ ꓔꓯ ꓚꓲ ꓛꓬ ꓠꓲꓹ ꓟ ꓘꓴꓽ ꓗꓪ ꓫꓸ ꓕꓱ ꓠꓹ ꓟ ꓬꓲ ꓙꓵꓹ ꓖꓶ ꓢꓲ꓾ ꓙꓲ_ ꓟ ꓚꓱꓹ ꓔꓯ ꓛꓳ ꓫꓱꓽ ꓠꓹ ꓟ ꓐꓱ ꓶ ꓡꓲ ꓛꓲ ꓟꓵꓽ ꓗꓪ ꓐꓰ ꓒꓳꓹ ꓡꓶꓼ ꓡ ꓢꓲ꓾ ꓚꓲꓸ ꓛꓬ ꓠꓲꓹ ꓟ ꓘꓴꓽ ꓗꓪ ꓔꓬ ꓖ ꓕꓲ ꓠꓶꓸ ꓤ ꓡꓰ ꓖꓶ ꓠꓹ ꓟ ꓚꓲꓸ ꓛꓬ ꓓꓵꓽ ꓙ_ ꓡ?”ꓐꓰ ꓥ ꓡꓳ꓾ “ꓪꓴ-ꓢ ꓢꓯꓼ ꓔꓯ ꓠ ꓠꓹ ꓢꓲ ꓠꓲꓽ ꓢ-ꓓꓯ ꓫꓵꓽ ꓠꓬꓲ_ ꓟ ꓗꓪ ꓟꓽ ꓛꓳ ꓐ ꓡꓰ ꓡꓰ ꓬꓲ ꓐꓯ ꓘꓶꓽ ꓔꓯ ꓡꓰ ꓛꓳ ꓫꓱꓽ_ ꓟ ꓟꓹ ꓟ ꓟ-ꓡꓲ ꓗꓪ ꓐꓰ ꓣꓳ ꓔꓯ ꓮ ꓟꓶ ꓜ ꓚꓲꓸ ꓚꓲꓸ_ ꓟ ꓦꓬꓼ ꓠꓬꓲ ꓗꓪ ꓬꓰ ꓙ ꓠꓹ ꓟ ꓐꓱ ꓶ ꓪꓽ ꓘꓴ ꓙ ꓢꓲ ꓬꓲꓸ ꓟꓶ ꓢꓰꓼ ꓗꓷ ꓟ ꓥꓳ=