ꓫꓵꓽ ꓠꓬꓲ ꓓꓴ ꓔꓯ ꓪꓴ-ꓢ ꓢꓯꓼ ꓪ ꓗꓪ ꓐꓰ ꓒꓳꓹ ꓔꓴ

ꓫꓵꓽ ꓠꓬꓲ ꓓꓴ ꓔꓯ ꓪꓴ-ꓢ ꓢꓯꓼ ꓪ ꓗꓪ ꓐꓰ ꓒꓳꓹ ꓔꓴ

3 ꓦ 6 ꓠꓬꓲ ꓠꓽ ꓫꓵꓽ ꓠꓬꓲ ꓕꓲꓽ ꓠꓬꓲ ꓡꓲ ꓕꓲꓽꓠꓬꓲ ꓢꓯꓸ ꓔꓬ ꓟ ꓤꓶꓸꓹ ꓗꓪ ꓫꓵꓽ ꓠꓬꓲ ꓓꓴ ꓙꓳ_ ꓥꓳ= ꓕꓱ ꓡꓱ ꓢ- ꓓꓯ ꓗꓪ ꓐꓰ ꓫꓵꓽ ꓠꓬꓲ ꓓꓴ ꓔꓳꓹ ꓜꓳ ꓡ ꓠꓬ ꓠꓲꓹ ꓟ ꓟꓽ ꓐꓬ ꓡꓰ ꓬꓰ-ꓢꓴ ꓔꓯ ꓡꓳꓸ ꓠꓬꓲ ꓠꓹ ꓟ ꓐꓱ ꓶ ꓔꓲꓸꓸ ꓒ ꓪ ꓔꓲ ꓡꓰ ꓙꓲ ꓢꓴ ꓢꓲ ꓤ ꓐꓴ ꓮ ꓙꓵꓽ ꓔꓯ ꓐꓯ_ ꓡꓳ=

ꓜ ꓚꓲꓸ ꓚꓲꓸ_ ꓟ ꓦꓬꓼ ꓠꓬꓲ (1) ꓠꓽ ꓫꓵꓽ ꓠꓬꓲ ꓬꓰ-ꓢꓴ (40) ꓦꓬꓼ ꓜ ꓚꓲꓸ ꓚꓲꓸ_ ꓢꓲ-ꓸ ꓪꓽ ꓘꓴ ꓟ ꓗꓪ ꓢ-ꓓꓯ ꓡꓰ ꓫꓵꓼ ꓠꓬꓲ ꓓꓴ ꓔꓳꓹ ꓜꓳ_ ꓟ ꓔꓯ ꓜꓲꓽ ꓘꓴ ꓠꓲꓹ ꓐꓰ ꓧꓪꓸ ꓡꓰ_ ꓟ ꓥꓳ= ꓬꓰ-ꓢꓴ ꓠꓬ ꓮ ꓡꓲ ꓫꓵꓽ ꓕꓲꓽ ꓣꓳ ꓥ ꓟ ꓔꓯ ꓕꓱ ꓡꓱ ꓦ ꓕꓲꓽ ꓒꓳꓹ ꓗꓪ ꓢꓯꓼ ꓕꓵꓼ ꓟ ꓔꓯ ꓟꓳ ꓪ ꓟ ꓥꓳ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ_ ꓡꓳ=

ꓫꓵꓽ ꓠꓬꓲ_ ꓟ ꓔꓯ ꓒꓳꓹ ꓔꓴ ꓠꓹ ꓟ

ꓬꓰ-ꓢꓴ ꓡꓰ ꓡꓲ ꓛꓲ ꓟꓵꓽ ꓗꓪ ꓡꓲꓸ ꓞꓲ ꓦꓬꓼ ꓡꓲꓸ ꓞꓲ ꓠꓬꓲ ꓜ ꓚꓲꓸ ꓚꓲꓸ_ ꓟ ꓗꓪ ꓢ-ꓓꓯ ꓡꓰ ꓮ ꓡꓲ ꓫꓵꓽ ꓠꓬꓲ_ ꓟ ꓚꓱꓹ ꓬꓰ-ꓢꓴ ꓡꓰ ꓮ ꓡꓲ ꓧꓪꓸ ꓡꓰ_ ꓟ ꓚꓱꓹ ꓔꓲꓸꓸ ꓒ ꓪ ꓔꓲ ꓡꓰ ꓐꓯ_ ꓡꓳ= “ ꓠꓴ ꓠꓬ ꓪꓴ-ꓢ ꓮ ꓐꓲ ꓥ ꓕꓯ ꓠꓽ ꓕꓱ ꓙꓵꓽ ꓪ ꓔꓯ ꓣꓱꓽ ꓟꓵꓽ ꓗꓳꓹ ꓓꓵ ꓓꓵ ꓟ ꓗꓴꓷꓼ ꓮ ꓙꓵꓽ ꓠꓴ ꓝꓮꓲ ꓟꓶ ꓠꓹ ꓟ ꓔꓯ ꓓꓵꓽ ꓙ ꓐꓰ ꓫꓵꓽ ꓠꓬꓲ_ ꓡꓳ=”

ꓬꓰ-ꓢꓴ ꓐꓰ ꓪꓴ-ꓢ ꓐꓯ ꓘꓶꓽ

ꓬꓰ-ꓢꓴ ꓠꓬ ꓢ-ꓓꓯ ꓔꓯ ꓧꓪꓸ ꓡꓰ_ ꓟ ꓕꓱ ꓡꓱ ꓫꓵꓽ ꓠꓬꓲ ꓓꓴ ꓔꓳꓹ ꓜꓳ ꓥ ꓟꓲ ꓜꓲꓽ ꓘꓴ ꓢꓲ ꓧꓪꓸ ꓡꓰ_ ꓟ ꓥꓳ= ꓕꓱ ꓟ ꓠꓬ ꓪꓴ-ꓢ ꓐꓯ ꓘꓶꓽ ꓗꓪ ꓐꓰ ꓥ ꓡꓳ= ꓪꓴ-ꓢ ꓔꓯ ꓙꓳ ꓒꓵꓽ ꓚꓱꓹ ꓪꓴ-ꓢ ꓟꓬꓱꓸꓸ ꓗꓪ ꓐꓰ ꓫꓸ ꓕꓱ ꓟꓽ ꓓ ꓟ ꓬꓰ ꓟꓽ ꓓ ꓟ ꓣꓳ ꓪ_ ꓟ ꓙꓵꓽ ꓪ ꓔꓯ ꓙꓲ ꓖꓴ ꓟꓽ ꓙꓳ ꓟ ꓗꓪ ꓟꓽ ꓣꓱꓽ_ ꓟ ꓚꓱꓹ ꓥ ꓡꓳ=

ꓔꓱ_ ꓟ ꓡꓲꓹ ꓙꓰ ꓚꓱꓹ

St Peter’s ꓪꓽ ꓘꓴ ꓔꓶꓸ ꓗꓪ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓗꓹ ꓛꓲ ꓓꓴ ꓐꓰ ꓚꓲ ꓛꓬ ꓡꓲꓹ ꓙꓰ ꓟ ꓚꓱꓹ ꓣꓳ ꓠꓯꓼ ꓗꓪ ꓟꓶꓽ_ ꓟ ꓡꓰ ꓐꓰ ꓠꓱꓸ ꓐꓯꓼ ꓢꓴ ꓔꓯ ꓥ ꓟꓲ ꓕꓱ ꓡꓱ ꓟꓶ ꓠꓹ ꓟ ꓬꓰ ꓖꓶ ꓠꓹ ꓟ ꓥꓳ= ꓬꓲ ꓪ ꓔꓯ ꓬꓲꓼ ꓠꓬꓲꓸ ꓔ ꓟ ꓡꓰ ꓟꓽ ꓥ ꓬꓲ ꓪ ꓔꓯ ꓠꓵ ꓠꓲꓹ ꓐꓰ ꓢꓲ ꓡꓲꓹ ꓗꓹ ꓛꓲ ꓠꓹ ꓟ ꓥ ꓡꓳ= ꓣꓳ ꓙꓵꓽ ꓪ ꓔꓯ ꓟꓸ ꓖꓶ ꓠꓹ ꓟ ꓟꓽ ꓥ-ꓸ ꓪꓴ-ꓢ ꓟꓬꓱꓸꓸ ꓬꓰ ꓟ ꓗꓪ ꓢꓲ ꓡꓲꓹ ꓗꓹ ꓛꓲ_ ꓟ ꓟꓶ ꓡ ꓥꓳ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ_ ꓡꓳ=

ꓕꓶꓸꓹ ꓕꓶꓸꓹ ꓡꓰ ꓔꓬ

ꓕꓶꓸꓹ ꓕꓶꓸꓹ ꓡꓰ ꓔꓬ ꓕꓽ ꓙꓳꓸꓸ= ꓕꓱ ꓟ ꓠꓬ ꓡ ꓞꓳ ꓮ ꓙꓵꓽ ꓠꓯꓼ ꓗꓪ ꓔꓳꓹ ꓜꓳ ꓡ ꓥꓳ= ꓖꓳ ꓟ ꓑꓶ ꓓꓴ ꓮ ꓕꓯ ꓥ ꓟꓲ ꓕꓶꓸꓹ ꓕꓶꓸꓹ ꓡꓰ ꓔꓬ ꓓꓴ ꓬꓰ ꓡꓯ= ꓢ-ꓓꓯ ꓠꓬ ꓫꓵꓽ ꓠꓬꓲ_ ꓟ-ꓸ ꓐꓬ ꓡꓰ ꓝꓲ ꓠꓹ ꓟ ꓠꓲꓹ ꓟ ꓡꓰ ꓙꓳ ꓢꓴ ꓥ ꓡꓳ= ꓬꓰ-ꓢꓴ ꓠꓬ ꓢ-ꓓꓯ ꓐꓰ ꓮ ꓕꓯ ꓥ ꓟꓲ ꓪ ꓡꓯꓼ ꓘꓳ ꓫꓱꓸ ꓡꓯꓼ ꓘꓳ ꓖꓪ ꓙꓱꓽ ꓓꓴ ꓕꓱ ꓡꓱ ꓟꓽ ꓬꓰ_ ꓟ ꓥꓳ= ꓬꓲ ꓔꓯ ꓙꓵꓸꓹ ꓢꓴ ꓥ ꓟꓲ ꓕꓱ ꓡꓱ ꓟꓽ ꓬꓰ_ ꓟ ꓥꓳ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ_ ꓡꓳ=

ꓬꓰ-ꓢꓴ ꓔꓯ ꓡꓳꓸ ꓠꓬꓲ

ꓶꓽ ꓓꓳ ꓫꓱꓸ ꓓꓳ ꓬꓲꓸ ꓟꓶꓽ ꓗꓪ ꓢ-ꓓꓯ ꓐꓰ ꓪ ꓡꓯꓼ ꓘꓳ ꓓꓴ ꓫꓱꓹ ꓡꓯꓼ ꓘꓳ ꓓꓴ ꓟꓽ ꓬꓰ_ ꓟ ꓬꓰ-ꓢꓴ ꓙꓵꓸꓹ ꓠꓲꓹ ꓔꓯ ꓡꓳꓸ ꓠꓬꓲ ꓠꓹ ꓟ ꓔꓲꓸꓸ ꓒ ꓪ ꓔꓲ ꓡꓰ ꓐꓯ_ ꓡꓳ= ꓬꓰ-ꓢꓴ ꓠꓬ ꓪꓴ-ꓢ ꓐꓯ ꓘꓶꓽ ꓗꓪ ꓐꓰ ꓢ-ꓓꓯ ꓔꓯ ꓧꓪꓸ ꓡꓰ_ ꓟ ꓥꓳ= ꓪꓴ-ꓢ ꓐꓯ ꓘꓶꓽ ꓠꓬ ꓢ-ꓓꓯ ꓓꓲ ꓢ ꓪꓴꓽ_ ꓟ ꓥꓳ= ꓫꓵꓽ ꓠꓬꓲ_ ꓟ ꓚꓱꓹ ꓮ ꓙꓵꓽ ꓔꓯ ꓧꓪꓸ ꓡꓰ_ ꓟ ꓥꓳ=

ꓕꓱ ꓜ ꓚꓲꓸ ꓚꓲꓸ_ ꓦꓬꓼ ꓠꓬꓲ ꓗꓪ ꓠꓬ ꓜ ꓚꓲꓸ ꓚꓲꓸ_ ꓪꓽ ꓘꓴ ꓠꓹ ꓟ ꓬꓲꓸ ꓙꓵꓹ ꓥ ꓡꓳ= ꓕꓲꓽ ꓒ ꓞꓼ ꓥ ꓟꓲ ꓪꓽ ꓘꓴ ꓓꓴ ꓬꓰ ꓡꓯ= ꓕꓱ ꓟ ꓠꓬ ꓣꓳ ꓔꓯ ꓶꓼ ꓤ ꓫꓱꓸ ꓤ ꓡꓴ ꓖꓶ ꓡ ꓥꓳ= ꓣꓳ ꓔꓬ ꓟ ꓗꓪ ꓐꓰ ꓕꓲꓽ ꓒꓹ ꓞꓼ ꓥ ꓟꓲ ꓔꓬ ꓢꓲ-ꓸ ꓣꓳ ꓠꓲꓹ ꓟ ꓘꓴ ꓗꓪ ꓔꓱ_ ꓟ ꓔꓯ ꓡꓳꓸ ꓠꓬꓲ-ꓸ ꓪꓴ-ꓢ ꓟꓲ ꓕꓯ ꓗꓪ ꓣꓳ ꓔꓱ_ ꓟ ꓖꓳ ꓓꓱꓽ ꓐꓰ ꓦꓰꓼ ꓞꓹ ꓣꓳ ꓔꓯ ꓟꓽ ꓙꓲ_ ꓟ ꓘꓶꓸꓸ ꓡꓶꓽ ꓓꓴ ꓔꓯ ꓧꓪꓸ ꓡꓰ ꓠꓹ ꓟ ꓬꓰ= ꓖꓳ ꓕꓯ ꓪꓴ-ꓢ ꓐꓯ ꓘꓶꓽ ꓠꓬ ꓣꓳ ꓠꓯꓼ ꓗꓪ ꓔꓬ ꓡ ꓥꓳ ꓐꓰ ꓜ ꓚꓲꓸ ꓚꓲꓸ_ ꓟ ꓦꓬꓼ ꓠꓬꓲ ꓗꓪ ꓪꓽ ꓘꓴ ꓠꓹ ꓟ ꓐꓱ ꓶ ꓔꓲꓸꓸ ꓒ ꓪ ꓔꓲ ꓡꓰ ꓢꓯꓼ ꓖꓶ_ ꓡꓳ=