ꓬꓰ-ꓢꓴ ꓔꓯ ꓙꓵꓻ ꓢꓲ꓾ ꓢꓲ ꓡꓲꓹ ꓗꓹ ꓛꓲ_ ꓟ ꓔꓯ ꓧꓪ ꓓꓴ ꓬꓰ ꓡꓯ=

ꓬꓰ-ꓢꓴ ꓔꓯ ꓙꓵꓻ ꓢꓲ꓾ ꓢꓲ ꓡꓲꓹ ꓗꓹ ꓛꓲ_ ꓟ ꓔꓯ ꓧꓪ ꓓꓴ ꓬꓰ ꓡꓯ=

  

ꓬꓰ-ꓢꓴ ꓔꓯ ꓙꓵꓻ ꓢꓲ꓾ ꓢꓲ ꓡꓲꓹ ꓗꓹ ꓛꓲ_ ꓟ ꓔꓯ ꓧꓪ ꓓꓴ ꓬꓰ ꓡꓯ=

ꓔꓲꓺ ꓒ ꓪ ꓔꓲ ꓡꓰ Medjugorje ꓗꓪ ꓬꓰ_ ꓟ ꓟꓵꓽ ꓗꓳꓸ ꓓꓵ ꓓꓵ ꓞꓳ ꓡꓱ ꓑꓮꓲ (International Youth Festival) ꓗꓪ ꓞꓳ ꓡꓱ ꓐꓴ ꓔꓯ ꓢꓲ ꓡꓲꓹ ꓗꓹ ꓛꓲ_ ꓟ ꓖꓶ ꓢꓴ ꓬꓰ-ꓢꓴ ꓔꓯ ꓙꓵꓻ ꓠꓹ ꓟ ꓛꓳ ꓠꓹ ꓟ ꓢꓯꓼ ꓖꓶ_ ꓟ ꓕꓳ ꓶ ꓦ ꓩꓴ_ ꓟ ꓥꓳ=

“Mladifest” ꓟꓵꓽ ꓗꓳꓸ ꓓꓵ ꓓꓵ ꓞꓳ ꓡꓱ ꓑꓮꓲ (International Youth Festival) ꓔꓯ Medjugorje, Bosnia-Herzegovina ꓗꓪ ꓕꓱ ꓕꓲ ꓘꓳꓼ 8 ꓦ 1 ꓠꓬꓲ ꓗꓪ ꓐꓰ 6 ꓠꓬꓲ ꓗꓪ ꓛꓲ ꓬꓰ_ ꓟ ꓥ ꓡꓳ=

ꓥꓪ ꓔꓯ ꓢꓳ ꓡꓯ꓾ ꓢꓲ ꓡꓲꓹ ꓗꓹ ꓛꓲ ꓓꓴ ꓧꓪ ꓟꓶ ꓡ ꓥꓳ= (ꓟ-ꓕꓲ 11ꓽ 28-30) ꓕꓱ ꓟ ꓠꓬ ꓢꓯꓼ ꓕꓵꓼ ꓪꓴꓽ ꓧꓶ ꓢꓲ ꓶꓻ ꓡꓲꓽ ꓓꓽ ꓟ ꓟꓯꓻ ꓢꓴ ꓐꓴ ꓮ ꓙꓵꓽ ꓔꓯ ꓝꓮꓲ ꓓꓵꓽ ꓙ ꓝꓲ_ ꓟ ꓥꓳ= ꓣꓳ ꓮ ꓙꓵꓽ ꓔꓯ ꓬꓰ-ꓢꓴ ꓡꓰ ꓟꓸ ꓖꓶ_ ꓟ ꓠꓬ ꓙꓵꓻ ꓠꓲꓹ ꓙꓳ ꓠꓹ ꓟ ꓥ ꓡꓳ= ꓠꓯ ꓞꓲꓹ ꓟ ꓙꓵꓹ ꓫꓸ ꓔꓬ ꓟ ꓙꓵꓹ ꓗꓪ ꓣꓳ ꓚꓲ ꓛꓬ ꓡꓰ ꓠꓶꓽ ꓞꓹ ꓠꓹ ꓟ ꓢꓯꓼ ꓕꓵꓼ ꓥ ꓟꓲ ꓣꓳ ꓖꓳ ꓟ ꓗꓪ ꓐꓰ ꓡꓲꓹ ꓙꓰ ꓠꓹ ꓟ ꓠꓬ ꓣꓳ ꓔꓯ ꓔꓱ_ ꓟ ꓠꓵ ꓠꓲꓹ ꓐꓰ ꓠꓲꓹ ꓠꓵ ꓢꓴ ꓬꓰ-ꓢꓴ ꓠꓯꓼ ꓗꓪ ꓣꓳ ꓠꓲꓹ ꓟ ꓗꓸ ꓘꓶꓽ ꓒꓴ ꓠꓹ ꓟ ꓥ ꓡꓳ=

ꓬꓰ-ꓢꓴ ꓡꓰ ꓥꓪ ꓡꓽ ꓡꓰ ꓟꓯꓻ ꓢꓲ ꓥꓪ ꓔꓯ ꓢꓳ ꓡꓯ= ꓥꓪ ꓠꓬ ꓠꓲꓹ ꓟ ꓠꓴꓽ ꓢꓲ ꓙ ꓣꓳꓽ_ ꓡꓳ= ꓖꓳ ꓡꓱ ꓠꓬ ꓠꓴ ꓪ ꓶ ꓟꓬ ꓐꓱ ꓶ ꓪꓴꓽ ꓧꓶ ꓠꓽ ꓖꓴ ꓧꓪ ꓟꓶ_ ꓥꓳ꓾ ꓐꓰ ꓐꓯ_ ꓡꓳ= ꓖꓳ ꓟ ꓑꓶ ꓓꓴ ꓞꓳ ꓡꓱ ꓤ ꓐꓴ  ꓬꓰ-ꓢꓴ ꓔꓯ ꓔꓱ_ ꓟ ꓠꓵ ꓠꓲꓹ ꓐꓰ ꓛꓳ ꓠꓹ ꓟ ꓬꓲ ꓡꓰ ꓐꓯ_ ꓟ ꓢꓲ ꓡꓲꓹ ꓗꓹ ꓛꓲ ꓟ ꓔꓯ ꓘꓳꓹ ꓣꓴ ꓗꓴꓸ ꓠꓹ ꓟ ꓢꓯꓼ ꓖꓶ_ ꓡꓳ=

ꓕꓱ ꓡꓱ ꓬꓰ ꓟ ꓠꓬ ꓪꓴ-ꓢ ꓠꓲꓹ ꓡꓶ ꓔꓯ ꓧꓪ ꓟꓶ ꓢꓲ꓾ ꓬꓰ-ꓢꓴ ꓡꓰ ꓐꓯ_ ꓟ ꓶꓻ ꓡꓲꓽ ꓓꓽ ꓟ ꓠꓬ ꓠꓵ ꓠꓲꓹ ꓥ ꓟ ꓔꓯ ꓬꓲ ꓛꓳꓽ ꓒꓯꓹ ꓐꓴ ꓐꓱ ꓶ ꓐꓯ ꓔ ꓟ ꓐꓯ ꓘꓶꓽ ꓥ ꓡꓳ= ꓠꓴ ꓪ ꓔꓯ ꓥꓪ ꓠꓲꓹ ꓠꓵ_ ꓟ ꓡꓰ ꓐꓰ ꓠꓴ ꓪ_ ꓟꓲ ꓕꓲ ꓣꓳ ꓛꓳ ꓕꓲ ꓣꓳ ꓠꓲꓹ ꓠꓵ ꓡꓯ ꓘꓳ꓾ (ꓬꓳ-ꓦ 15ꓽ12) ꓐꓰ ꓕꓵꓼ ꓪ ꓖꓶ ꓔ ꓟ ꓥ ꓡꓳ= ꓡ ꓞꓳ ꓐꓴ ꓔꓳꓹ ꓜꓳ ꓔꓬ ꓟ ꓠꓻ ꓓꓴ ꓐꓱ ꓶ ꓔꓱ_ ꓟ ꓠꓯ ꓞꓲꓼ ꓠꓬ ꓪꓴ-ꓢ ꓡꓰ ꓣꓳ ꓔꓯ ꓠꓲꓹ ꓠꓵ_ ꓟ ꓡꓰ ꓐꓰ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓥ ꓟꓲ ꓠꓲ ꓠꓵ_ ꓟ ꓚꓱꓹ ꓗꓪ ꓐꓰ ꓙꓻ ꓫꓱꓽ ꓠꓹ ꓟ ꓥ ꓡꓳ=

ꓬꓰ-ꓢꓴ ꓐꓰ ꓕꓲ ꓪꓼ ꓙꓻ ꓫꓱꓽ ꓢꓲ꓾ ꓬꓲ ꓡꓰ ꓬꓰ_ ꓟ ꓙꓻ ꓫꓱꓽ_ ꓟ ꓚꓱꓹ ꓔꓯ ꓢꓳ ꓠꓹ ꓟ ꓥ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ_ ꓡꓳ= ꓬꓰ-ꓢꓴ ꓠꓬ ꓟꓯ ꓟꓽ ꓘꓴ_ ꓟ ꓶꓻ ꓔꓯ ꓣꓳ ꓔꓯ ꓟꓽ ꓟꓯ ꓝꓲ_ ꓟ ꓥꓳ= ꓕꓱ ꓟ ꓠꓬ ꓣꓳ ꓚꓲ ꓛꓬ ꓬꓰ ꓐ ꓡ ꓡꓳ ꓐꓰ ꓙꓵꓻ_ ꓟ ꓕꓱ ꓡꓱ ꓖꓶ ꓘꓹ ꓟ ꓠꓲꓹ ꓟ ꓔꓯ ꓙꓽ ꓣꓳ ꓠꓹ ꓟ ꓥ ꓡꓳ= ꓣꓳ ꓚꓲ ꓛꓬ ꓢꓯꓼ ꓙꓳ ꓥ ꓟꓲ ꓣꓳ ꓠꓲꓹ ꓟ꓾ ꓣꓳ ꓟꓬ ꓢꓶꓽ꓾ ꓣꓳ ꓠꓸ ꓐꓳ ꓒꓴ ꓢꓲ꓾ ꓬꓲ ꓠꓯꓼ ꓗꓪ ꓛꓳ ꓠ ꓔ ꓡꓳ=

ꓔꓱ_ ꓟ ꓢꓲ ꓡꓲꓹ ꓗꓹ ꓛꓲ ꓟ ꓖꓶ ꓢꓴ ꓬꓰ-ꓢꓴ ꓠꓯꓼ ꓗꓪ ꓛꓳ ꓠꓹ ꓟ ꓕꓽ ꓙꓳ꓾ ꓣꓳ ꓠꓬ ꓪꓴ-ꓢ ꓬꓲ ꓤ ꓠꓱ ꓬꓲꓼ ꓠꓬꓲ ꓤ ꓐꓰ ꓐꓲ ꓜꓲꓼ ꓟ ꓘꓴ ꓟꓶ ꓢꓴ ꓥ ꓟ ꓪꓴꓸ ꓠꓬꓲ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓫꓱꓸ ꓤ ꓠꓵ ꓠꓲꓹ ꓟꓬ ꓡ ꓠꓹ ꓟ ꓐꓱ ꓶ ꓬꓰ ꓠꓹ ꓟ ꓥ ꓡꓳ=

  

Add new comment

6 + 0 =