ꓐꓯ ꓟꓴ ꓫꓬꓹ ꓒꓽ ꓦꓬꓼ ꓠꓬꓲ ꓕꓲꓽ ꓤꓶ=

Thursday, December 10, 2020

ꓬꓲꓼ ꓤꓼ ꓠꓬꓲ ꓤꓼ ꓐꓴꓳ-ꓸ ꓐꓯ ꓟꓴ ꓫꓬꓹ ꓒꓽ ꓦꓬꓼ ꓠꓬꓲ ꓗꓪ ꓬꓲ-ꓢꓷ-ꓡꓰ ꓐꓴ ꓙꓵ ꓠꓲꓹ ꓚꓱꓹ ꓢꓯꓼ ꓐꓽ ꓡꓰ ꓢꓲ-ꓸ ꓪꓴ-ꓢ ꓙ ꓖꓴ ꓗꓪ ꓫꓱꓽ ꓥꓳꓽ ꓙꓰ ꓟ ꓔꓯ ꓟꓳꓸ ꓔꓱꓹ ꓕ ꓠꓬꓲ ꓡꓯ= ꓬꓲ ꓪ ꓬꓲ-ꓙꓲ ꓟꓵꓽ ꓗꓪ 430 ꓘꓳꓼ ꓛꓳ ꓑꓸ ꓬꓰ ꓔꓬ ꓢꓲ-ꓸ ꓫꓸ ꓙꓲ ꓔꓬ ꓟ ꓗꓪ ꓐꓰ ꓪꓴ-ꓢ ꓠꓬ ꓟꓳ-ꓫꓲ ꓐꓰ ꓕꓲꓽ ꓛꓳꓼ ꓟꓬꓱꓽ ꓬꓰ ꓢꓲ-ꓸ ꓜꓲꓽ ꓜꓲꓽ ꓑꓲꓹ ꓑꓲꓹ ꓬꓲ-ꓙꓲ ꓪ-ꓔꓲ ꓩ-ꓣꓳ ꓡꓯꓽ ꓒꓯꓹ ꓗꓪ ꓐꓰ ꓧꓳꓽ ꓓꓳ ꓡ ꓕꓯ ꓕꓲꓽ ꓙ ꓖꓴ ꓡꓱꓹ ꓗꓪ ꓪꓴ-ꓢ ꓡꓰ ꓬꓲ ꓪ ꓔꓯ ꓔ ꓙ ꓬꓰ ꓙ ꓟ ꓬꓲꓸ ꓪꓽ ꓚꓲꓸ ꓛꓬꓽ ꓟꓬ ꓢꓶꓽ ꓡꓰ ꓡꓳꓸ ꓟꓳ ꓡꓳ= ꓢꓲꓽ ꓒꓽ ꓬꓳ-ꓫꓴ ꓡꓰ ꓘꓷ-ꓠ ꓟꓵꓽ ꓗꓪ ꓟ ꓡꓽ ꓞꓳ ꓔꓯ ꓓꓶꓽ ꓧꓪꓸ ꓡꓰ ꓗꓪ ꓛꓲ ꓪꓴ-ꓢ ꓡꓰ ꓬꓲꓸ ꓪ ꓔꓯ ꓔ ꓙ ꓟ ꓫꓱꓸ ꓤꓼ ꓟ ꓔꓯ ꓥ ꓟꓲ ꓬꓲꓸ ꓪꓽ ꓚꓲꓸ ꓛꓬꓽ ꓟꓬ ꓢꓶꓽ ꓡꓰ ꓟꓳ ꓟ ꓢꓷꓸ ꓟ ꓞꓲ ꓘꓷ-ꓠ ꓟꓵꓽ ꓗꓪ ꓬꓲ ꓪ ꓚꓲꓸ ꓛꓬ ꓗꓴꓷꓼ ꓙꓵꓽ ꓪꓹ ꓟ ꓡꓳꓸ ꓟꓳ ꓗꓷꓳ=

ꓖꓳ ꓡꓱ ꓥ ꓟꓲ ꓘꓷ-ꓠ ꓟꓵꓽ ꓗꓪ ꓬꓲꓸ ꓪ ꓐꓳ ꓡ ꓢ ꓡ ꓗꓸ ꓠꓯ ꓧꓶꓸ ꓙꓬꓽ ꓟ ꓞꓳ ꓔꓲ ꓐꓴ ꓫꓵꓼ ꓖꓴ ꓗ ꓠꓯꓸ ꓗ ꓠꓯꓸ ꓪꓴꓽ ꓡꓹ ꓟ ꓕꓲꓽ ꓤꓶ ꓗꓪ ꓛꓲ ꓕꓯꓽ ꓬꓲ ꓪ ꓠꓬ ꓪꓴ-ꓢ ꓗ ꓫꓵ ꓔꓯ ꓟꓲ ꓟꓽ ꓛꓳ= ꓐꓶꓽ ꓒꓽ ꓠꓲꓽ ꓤꓽ ꓢꓲ ꓤꓼ ꓔꓯ ꓢꓲ ꓪꓴ ꓓꓵ ꓕꓱꓼ ꓙꓰ ꓠꓬꓲ ꓪꓴ-ꓢ ꓡꓰ ꓬꓲ ꓪ ꓔꓯ ꓟꓸ ꓙꓽ ꓠꓬꓲ ꓫꓸ ꓙꓲ ꓓꓴ ꓓꓽ ꓟ ꓔꓳꓹ ꓜꓳ ꓡꓰꓳ= ꓖꓳ ꓡꓱ ꓠꓬꓲ ꓬꓲ ꓪꓽ ꓔꓯ ꓡꓳꓸ ꓢꓴ ꓙꓵꓽ ꓢꓴ ꓐꓯ ꓟꓴ ꓫꓬꓹ ꓒꓽ ꓢꓲꓽ ꓒꓽ ꓐꓴ ꓓꓳ ꓡ ꓝꓲ ꓢꓲ-ꓸ 450 ꓘꓳꓼ ꓧꓳꓽ ꓣꓱꓽ ꓗꓷꓳ=