ꓑ-ꓡ ꓟꓸ ꓟꓲꓽ (1) ꓕꓱ

{ꓑ ꓫꓬꓼ ꓵ 22ꓽ1-21}

ꓑ-ꓡ ꓬꓲ ꓟꓸ ꓟꓲꓽ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓟꓳ-ꓮ-ꓐꓷ ꓟꓵꓽ ꓓꓲꓺ ꓗꓪ ꓕꓲ ꓑꓹ ꓤ ꓠꓽ ꓔꓬ ꓕꓯ ꓒꓬꓱꓼ ꓗꓷ ꓟ ꓥ ꓡꓳ= ꓟꓳ-ꓫꓲ ꓡꓰ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓔꓯ ꓧꓳꓽ ꓪꓴꓸ ꓟꓴ ꓔꓬ ꓕꓯ꓾ ꓬꓲ-ꓢꓷ-ꓡꓰ ꓐꓴ ꓠꓬ ꓬꓳ-ꓔ ꓬꓲꓽ ꓟ ꓔꓯ ꓗꓳꓸ ꓗꓷ ꓢꓲ ꓬꓲ ꓘꓳꓼ 40 ꓘꓳꓼ ꓓꓴ ꓓꓳ ꓙꓰ ꓔꓬ ꓟ ꓦꓬꓼ ꓠꓬꓲ ꓕꓯ ꓬꓳ-ꓔ ꓬꓲꓽ ꓟ ꓐꓶ ꓓꓳ ꓗꓪ ꓟ ꓟꓳ-ꓮ-ꓐꓷ ꓟꓵꓽ ꓓꓲꓺ ꓗꓪ ꓟ ꓟꓸ ꓟꓲꓽ ꓥ ꓡꓳ= ꓬꓲ-ꓢꓷ-ꓡꓰ ꓐꓴ ꓠꓬ ꓬ-ꓟꓳ-ꓡꓲ ꓪ ꓔꓲ ꓥ ꓟ ꓪ ꓔꓲ ꓢꓲ-ꓦꓶ ꓐꓰ ꓐ-ꓫ-ꓠ ꓪ ꓔꓲ ꓳ-ꓗꓷ ꓐꓴ ꓔꓯ ꓧꓶꓸ ꓕꓯ ꓡꓰ ꓓꓶꓽ ꓧꓪꓸ ꓡꓰ ꓗꓷꓳ=

ꓑ-ꓡ ꓟꓸ ꓟꓲꓽ ꓠꓬ ꓕꓱ ꓡꓱ ꓥꓳ=

ꓬꓲ-ꓢꓷ-ꓡꓰ ꓐꓴ ꓠꓬ ꓬꓲ-ꓙꓲ ꓟꓵꓽ ꓗꓪ ꓐꓰ ꓓꓳ ꓡ ꓢꓲ ꓪꓴ-ꓢ ꓡꓰ ꓙ ꓟꓳ ꓘꓶꓽ ꓖꓶ ꓔ ꓟ ꓟꓵꓽ ꓗꓪ ꓠꓶꓽ ꓡ ꓔꓬ ꓡꓳ= ꓬꓲ ꓪ ꓐꓴ ꓠꓬ ꓟꓳ-ꓮ-ꓐꓷ ꓪ ꓔꓲ ꓟꓵꓽ ꓓꓲꓺ ꓗꓪ ꓟꓶ ꓔꓶꓸ ꓦꓲꓻ ꓚꓵꓹ ꓔꓶꓸ ꓢꓲ ꓠꓽ ꓔꓬ ꓡꓳ=ꓬꓲ ꓪ ꓖꓳ ꓡꓱ ꓓꓴ ꓓꓳ ꓙꓰ ꓔꓬ ꓕꓯ ꓬꓲ-ꓢꓷ-ꓡꓰ ꓐꓴ ꓠꓬ ꓬꓲ ꓪ ꓔꓯ ꓛꓴꓽ ꓙꓳ ꓡ ꓢꓴ ꓐꓴ ꓔꓯ ꓓꓶꓽ ꓧꓪꓸ ꓡꓰ ꓗꓷꓳ= ꓬꓰ-ꓧꓳ-ꓧꓪ ꓪꓴ-ꓢ ꓠꓬ ꓬꓲ ꓪ ꓕꓲ ꓛꓱꓽ ꓗꓪ ꓔꓬ ꓟ ꓑꓶꓸ ꓓꓴ ꓬꓲ-ꓢꓷ-ꓡꓰ ꓐꓴ ꓠꓬ ꓓꓶꓽ ꓡꓯ ꓘꓳꓹ ꓟ ꓮ ꓙꓵꓽ ꓗꓪ ꓧꓪꓸ ꓡꓰꓳ=

ꓬꓲ ꓪ ꓐꓴ ꓧꓪꓸ ꓡꓰ ꓟ ꓓꓳꓽ ꓠꓬ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓑ ꓙꓽ ꓛꓲꓺ ꓬꓰꓳ= ꓟꓳ-ꓮ-ꓐꓷ ꓪ ꓔꓲ ꓥ ꓟꓲ ꓬ-ꓟꓳ-ꓡꓲ ꓡ ꓞꓳ ꓐꓴ ꓔꓯ ꓬꓰ ꓗꓷ ꓟ ꓮ ꓙꓵꓽ ꓔꓯ ꓢꓷꓸˍ ꓡꓳ= ꓮ ꓟꓶ ꓕꓲ ꓙꓵꓹ ꓗꓪ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓪ ꓔꓲ ꓟꓵꓽ ꓓꓲꓺ ꓗꓪ ꓟꓶ ꓔꓶꓸ ꓦꓲꓻ ꓚꓵꓹ ꓔꓶꓸ ꓢꓲ ꓠꓽ ꓔꓬ ꓟ ꓔꓯˍ ꓟꓲ ꓢꓷꓸˍ ꓡꓳ= ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓮ ꓘꓶꓸ ꓟꓬꓽˍ ꓟ ꓑꓶꓸ ꓓꓴ ꓟꓳ-ꓮ-ꓐꓷ ꓡ ꓞꓳ ꓐꓴ ꓠꓬ ꓬꓲ-ꓢꓷ-ꓡꓰ ꓐꓴ ꓔꓯ ꓮ ꓘꓶꓸ ꓙꓳꓺˍ ꓡꓳ=

ꓖꓳ ꓕꓲ ꓙꓵꓹ ꓗꓪ ꓟꓳ-ꓮ-ꓐꓷ ꓪ ꓔꓲ ꓑ-ꓡ-ꓘꓷ ꓠꓬ ꓬꓲ-ꓢꓷ-ꓡꓰ ꓐꓴ ꓔꓯ ꓬꓲ ꓪ ꓕꓲ ꓔꓲˍ ꓟꓲ ꓧꓪꓸ ꓡꓰ ꓟꓽ ꓘꓴ ꓟ ꓔꓯ ꓢꓷꓸˍ ꓡꓳ= ꓖꓳ ꓡꓱ ꓠꓬꓲ ꓬꓲꓸ ꓠꓬ ꓑ-ꓡ ꓟꓬꓱ ꓔ ꓢꓴ ꓡ ꓞꓳ ꓕꓲ ꓣꓳ ꓔꓯ ꓝꓲ ꓩꓴ ꓠꓹ ꓟ ꓓꓵꓽ ꓙˍ ꓡꓳ= ꓦꓬꓼ ꓠꓬꓲ ꓖꓳ ꓟ ꓗꓪ ꓑ-ꓡ ꓡꓰ ꓶꓼ ꓥꓳꓽ ꓙꓱꓽ ꓖꓶ ꓔ ꓟ ꓮ ꓙꓵꓽ ꓠꓬ ꓚꓵ ꓚꓵ ꓶꓼ ꓤ ꓫꓱꓹ ꓤ ꓟꓶ ꓡꓰ ꓢꓲ꓾ ꓑ-ꓡ ꓡꓰ ꓙꓱꓽ ꓗꓷ ꓟꓶ ꓢꓴ ꓐꓴ ꓠꓬ ꓚꓵ ꓚꓵ ꓙꓱꓽ ꓘꓶꓽ ꓶꓻ ꓡꓰˍ ꓟ ꓓꓳꓽ ꓑꓶꓸ ꓓꓴ ꓮ ꓘꓶꓸ ꓟꓬꓱꓽ ꓓꓳ ꓙꓳ ꓔꓬ ꓢꓴ ꓕꓲ ꓣꓳ ꓥ ꓡꓳ=

ꓖꓳ ꓡꓱ ꓠꓬꓲ ꓪ ꓔꓲ ꓑ-ꓡ-ꓘꓷ ꓠꓬ ꓑ-ꓡ ꓔꓯ ꓥꓪꓸ ꓠꓹ ꓟ ꓝꓲ ꓓꓴ ꓝꓲ ꓩꓴ ꓗꓷˍ ꓡꓳ= ꓪ ꓔꓲ ꓬꓲ ꓝꓲ ꓓꓴ ꓐꓴ ꓠꓬ ꓑ-ꓡ ꓔꓯ ꓙꓱꓽ ꓒꓵꓽ ꓖꓶ ꓠꓹ ꓟ ꓫꓵꓺ ꓮ ꓟꓬꓹ ꓔꓯꓹ ꓙꓰˍ ꓡꓳ= ꓑ-ꓡ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓟꓽ ꓥ꓾ ꓖꓳ ꓡꓱ ꓥˍ ꓟꓲ ꓬꓲ ꓠꓬ ꓪꓴ-ꓢ ꓔꓯ ꓙꓵꓻ ꓢꓴ ꓥ ꓡꓳ= ꓧꓶꓸ ꓕꓯ ꓕꓯ ꓬꓲ ꓠꓬ ꓟꓷꓽ ꓠꓷꓹ ꓝ ꓢꓴ ꓕꓲ ꓣꓳ ꓒꓬꓱꓼ ꓗꓷ ꓢꓲ꓾ ꓗ ꓠꓯꓸ ꓮ ꓘꓶꓸ ꓟꓬꓻ ꓠꓯꓻ ꓡ ꓢꓲ ꓪꓴ-ꓢ ꓔꓯ ꓟꓽ ꓣꓱꓽ ꓙꓻ ꓳ=

ꓝꓲ ꓓꓴ ꓐꓴ ꓛꓲ ꓡˍ ꓕꓯ ꓬꓲ ꓪ ꓐꓴ ꓡꓰ ꓑ-ꓡ ꓔꓯ ꓕꓱ ꓡꓱ ꓐꓯ ꓖꓶˍ ꓡꓳ= “ꓪ ꓔꓲ ꓟꓵꓽ ꓗꓪ ꓬꓲ-ꓙꓲ ꓟꓵꓽ ꓗꓪ ꓐꓰ ꓡˍ ꓟ ꓡ ꓞꓳ ꓕꓲ ꓧꓳꓽ ꓔꓬ ꓡꓳ= ꓬꓲ ꓪ ꓔꓯ ꓠꓬ ꓮ ꓘꓶꓸ ꓪꓽ ꓠꓬꓲˍ ꓟ ꓟꓯꓼ ꓮ ꓟꓬꓹ ꓙꓳ ꓢꓲ ꓮ ꓟꓶ ꓠꓬ ꓟꓳ-ꓮ-ꓐꓷ ꓟꓵꓽ ꓒ ꓕꓲ ꓗꓪ ꓟꓶ ꓔꓶꓸ ꓦꓲꓻ ꓚꓵꓹ ꓔꓶꓸ ꓔꓬ ꓡꓳ= ꓪ ꓔꓲ ꓡꓰ ꓠꓴ ꓔꓯ ꓬꓲ ꓪ ꓐꓴ ꓔꓯ ꓠꓴ ꓡꓰ ꓙꓱꓽ ꓗꓷ꓾ ꓖꓳ ꓡꓱ ꓠꓬ ꓪ ꓔꓲ ꓑ-ꓡ-ꓘꓷ ꓠꓬ ꓬꓲ ꓪ ꓔꓯ ꓓꓶꓽ ꓧꓪꓸ ꓡꓰˍ ꓥꓳ= ꓝꓮꓲ ꓬꓲ ꓪ ꓔꓯ ꓪ ꓔꓲ ꓟꓵꓽ ꓗꓪ ꓐꓰ ꓖꓼ ꓓꓳ ꓗꓷ”꓾ ꓐꓯ ꓖꓶˍ ꓡꓳ= ꓖꓳ ꓕꓯ ꓑ-ꓡ ꓠꓬ ꓪꓴ-ꓢ ꓡꓰ ꓥꓪ ꓔꓯ ꓫꓸ ꓕꓱ ꓡ ꓗ ꓠꓯꓸ ꓠꓬ ꓠꓴ ꓪ ꓔꓯ ꓥꓪ ꓒꓳꓹ ꓖꓶˍ ꓥꓳ꓾ ꓐꓰ ꓐꓯ ꓖꓶ ꓗꓷ ꓢꓲ ꓖꓳ ꓗꓪ ꓕꓲ ꓦꓬꓽ ꓬꓲꓼ ꓔ ꓠꓹ ꓟ ꓐꓯ ꓖꓶˍ ꓡꓳ= ꓖꓳ ꓕꓯ ꓪ ꓔꓲ ꓝꓲ ꓓꓴ ꓐꓴ ꓠꓬ ꓑ-ꓡ ꓦꓲꓻ ꓗꓪ ꓔꓬ ꓡꓳ=

ꓟꓶꓽ ꓘꓶꓼ ꓕꓯ ꓪꓴ-ꓢ ꓡꓰ ꓑ-ꓡ ꓔꓯ ꓫꓸ ꓕꓱ ꓡ ꓢꓲ꓾ “ꓠꓴ ꓐꓰ ꓕꓲ ꓪ ꓔꓬ ꓟ ꓡ ꓞꓳ ꓐꓴ ꓠꓬ ꓮꓽ ꓟ ꓥ ꓡ?” ꓖꓳ ꓔꓯ ꓑ-ꓡ ꓡꓰ ꓕꓱ ꓡꓱ ꓒꓳꓹ ꓖꓶˍ ꓡꓳ= “ꓬꓲ ꓪ ꓠꓬ ꓟꓳ-ꓮ-ꓐꓷ ꓪ ꓔꓲ ꓑ-ꓡ-ꓘꓷ ꓡꓰ ꓝꓲ ꓩꓴ ꓡˍ ꓟ ꓝꓲ ꓓꓴ ꓐꓴ ꓥ ꓡꓳ= ꓬꓲ-ꓙꓲ ꓟꓵꓽ ꓗꓪ ꓐꓰ ꓡˍ ꓟ ꓡ ꓞꓳ ꓕꓲ ꓧꓳꓽ ꓟ ꓠꓬ ꓪ ꓔꓲ ꓕꓯ ꓢꓲ ꓪꓽ ꓠꓬꓲˍ ꓟ ꓑꓶꓸ ꓓꓴ ꓬꓲ ꓪ ꓐꓴ ꓔꓯ ꓙꓱꓽ ꓠꓹ ꓟ ꓐꓯ ꓖꓶ ꓡˍ ꓟ ꓪ ꓔꓲ ꓡꓰ ꓝꓲ ꓩꓴ ꓔ ꓢꓴ ꓐꓴ ꓥ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ= ꓖꓳ ꓡꓱ ꓥ ꓟꓲ ꓪꓴ-ꓢ ꓡꓰ ꓑ-ꓡ ꓔꓯ “ꓠꓴ ꓠꓬ ꓬꓲ ꓪ ꓐꓴ ꓔꓯ ꓕꓽ ꓛꓳ ꓙꓰ= ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓠꓬ ꓶꓼ ꓙꓳ ꓫꓱꓹ ꓙꓳ ꓢꓴ ꓥ ꓟ ꓑꓶꓸ ꓓꓴ ꓠꓴ ꓠꓬ ꓬꓲ ꓪ ꓔꓯ ꓕꓽ ꓙꓱꓽ”꓾ ꓐꓯ ꓖꓶˍ ꓡꓳ=

ꓝꓮꓲ ꓕꓲ ꓠꓬꓲ ꓗꓪ ꓑ-ꓡ ꓠꓬ ꓪ ꓔꓲ ꓝꓲ ꓓꓴ ꓐꓴ ꓔꓯ ꓪ ꓔꓲ ꓔꓬ ꓗꓪ ꓬꓲꓼ ꓙꓰ ꓝꓲˍ ꓡꓳ= ꓖꓳ ꓡꓱ ꓥˍ ꓟꓲ ꓪ ꓔꓲ ꓑ-ꓡ-ꓘꓷ ꓠꓬ ꓬꓲ ꓪꓴꓸ ꓝꓲ ꓩꓴ ꓗꓷ ꓟ ꓞꓳ ꓪꓴꓽ ꓐꓴ ꓕꓯꓽ ꓢꓲ ꓟꓬꓱꓽ ꓓꓳ ꓙꓳˍ ꓟ ꓕꓲ ꓜꓴ ꓔꓯ ꓝꓲ ꓩꓴ ꓗꓷˍ ꓡꓳ= ꓬꓲ ꓪ ꓐꓴ ꓡꓰ ꓑ-ꓡ ꓔꓬ ꓗꓪ ꓛꓲ ꓬꓰ ꓠꓬ꓾ ꓪ ꓔꓲ ꓡꓰ ꓕꓱ ꓡꓱ ꓐꓯ ꓝꓲˍ ꓡꓳ= ꓪ ꓔꓲ ꓔꓬ ꓗꓪ ꓟꓽ ꓙꓰ ꓕꓽ ꓬꓰ= ꓬꓲ ꓡꓰ ꓠꓴ ꓔꓯ ꓡꓯꓼ ꓫꓴ ꓓꓽ ꓟ ꓖꓶˍ ꓥꓳ= ꓖꓳ ꓟ ꓕꓯꓽ ꓢꓲ ꓠꓱꓸ ꓐꓯ ꓮ ꓫꓵꓽ ꓓꓰꓽˍ ꓟꓲ ꓖꓶꓽˍ ꓥꓳ= ꓮ ꓟꓲꓸ ꓡ ꓢꓲ ꓡ ꓞꓳ ꓕꓱ ꓕꓲ ꓜꓴ ꓔꓯ ꓙꓱꓽ ꓕꓼ ꓙ ꓡꓯ꓾ ꓐꓰ ꓐꓯ ꓖꓶˍ ꓡꓳ=

ꓖꓳ ꓕꓯ ꓑ-ꓡ ꓡꓰ ꓑ-ꓡ-ꓘꓷ ꓪ ꓔꓲ ꓡꓰ ꓒꓴ ꓐꓰ ꓫꓵꓺ ꓐꓲ ꓞꓹ ꓟ ꓪ ꓔꓲ ꓙꓺ ꓖꓶˍ ꓥ ꓟꓲ ꓪꓴ-ꓢ ꓕꓵꓼ ꓘꓶꓽ ꓟꓽ ꓖꓶ ꓡ ꓕꓯ ꓠꓽ ꓥꓪ ꓬꓰ ꓟꓽ ꓐ ꓡ= ꓪꓴ-ꓢ ꓡꓰ ꓥꓪ ꓔꓯ ꓝꓮꓲ ꓮ ꓡꓰ ꓐꓯ ꓖꓶ ꓡˍ ꓟ ꓔꓯ ꓥꓪ ꓢꓷꓸ ꓡꓰ ꓠꓹ ꓟ꓾ ꓠꓴ ꓪ ꓠꓬ ꓠꓬꓲꓸ ꓟꓶꓽ ꓘꓶꓼ ꓕꓱ ꓗꓪ ꓬꓲꓼ ꓔ꓾ ꓐꓯ ꓖꓶˍ ꓡꓳ= ꓖꓳ ꓕꓲ ꓦꓬꓽ ꓗꓪ ꓪꓴ-ꓢ ꓡꓰ ꓑ-ꓡ ꓔꓯ ꓕꓱ ꓡꓱ ꓐꓯ ꓖꓶ ꓡˍ ꓡꓳ= ꓡ ꓞꓳ ꓕꓱ ꓕꓲ ꓜꓴ ꓟˍ ꓠꓲ ꓠꓴ ꓔꓯ ꓘꓴ ꓠꓹ ꓟ ꓛꓲ ꓡ ꓗꓷꓳ= ꓠꓴ ꓠꓬ ꓬꓲ ꓪ ꓔꓯ ꓛꓳ ꓙꓰ ꓛꓵˍ ꓡꓳ= ꓖꓳ ꓡꓱ ꓥˍ ꓟꓲ ꓠꓴ ꓠꓽ ꓥꓪ ꓐꓯˍ ꓟ ꓡꓰꓽ ꓬꓰ ꓠ ꓗꓹ ꓡꓳ꓾ ꓐꓯ ꓖꓶˍ ꓡꓳ=

ꓗ ꓠꓯꓸ ꓠꓯꓼ ꓕꓯ ꓑ-ꓡ ꓠꓬ ꓕꓳꓽ ꓡ ꓟꓴꓽ ꓙ ꓖꓶ ꓢꓲ ꓟꓳ-ꓮ-ꓐꓷ ꓞꓳ ꓪꓴꓽ ꓐꓴ ꓔꓯ ꓛꓳ ꓙꓰˍ ꓡꓳ=