ꓔꓲ ꓓꓴ ꓟꓸ ꓟꓲ

ꓠꓲ ꓠꓵꓹ ꓟ ꓬꓲꓼ ꓤꓼ ꓠꓬꓲ ꓤꓼ ꓐꓴ-ꓳꓼ-ꓸ ꓗꓳꓹ ꓡꓳꓹ ꓬꓰ ꓟ ꓕꓲꓽ ꓠꓽ ꓗꓪ ꓟꓴ ꓗꓪ ꓗꓴꓷ ꓗꓪ ꓛꓲ ꓬꓰ ꓓꓵꓽ ꓙꓰ ꓟꓶ ꓠꓹ ꓟ-ꓸ ꓐꓰ-ꓸ ꓕꓲꓽ ꓞꓲꓼ ꓕꓲꓽ ꓑ ꓟ ꓢꓯꓼ ꓟꓬ ꓦ ꓜꓽ ꓓꓴ-ꓸ ꓫꓵꓼ ꓥ ꓟꓲ ꓝꓮꓲ ꓢꓯꓸ ꓬꓯꓼ ꓡ ꓠꓹ ꓟ ꓠꓬ-ꓸ ꓬꓰ-ꓢꓴ ꓫꓵꓽ ꓬꓰ-ꓢꓴ ꓧꓪꓽ ꓥ ꓟ ꓟꓸ ꓟꓲ ꓢꓳ ꓡꓳꓹ ꓬꓰꓳ= ꓮ ꓟꓶ ꓠꓬꓲ ꓠꓬꓲ-ꓸ ꓘꓶꓽ ꓫꓵꓼ ꓡꓵ ꓗꓪ ꓬꓲꓸ ꓑ ꓫꓬ ꓐꓰ ꓪꓴ-ꓢ ꓙ ꓡꓯ ꓘꓳꓹ ꓟ ꓗꓪ ꓔꓲ ꓓꓴ ꓥ ꓢꓲ-ꓸ ꓘꓶꓽ ꓫꓵꓼ ꓦꓬꓼ ꓠꓬꓲ ꓗꓪ ꓪꓴ-ꓢ ꓐꓰ ꓬꓲꓸ ꓑ ꓫꓬꓽ ꓙ ꓡꓯ ꓘꓳꓹ ꓟ ꓚꓱꓹ ꓗꓪ ꓪꓴꓽ ꓓꓲ ꓡꓰ ꓟ ꓬꓰ-ꓢꓴ ꓬꓲꓸ ꓚꓲꓸ ꓛꓬꓽ ꓔꓲ ꓖꓶ ꓗꓷ ꓟ ꓔꓲ ꓓꓴ ꓥ ꓟ ꓢꓳ ꓣꓴ ꓡꓯ= ꓪꓴ-ꓢ ꓦ ꓡꓱ ꓢꓴ ꓪꓴ-ꓢ ꓔꓯ ꓙ ꓡꓯ ꓘꓳꓹ ꓟ ꓗꓪ ꓙ ꓖꓴ ꓠꓬꓲꓽ ꓚꓱꓹ ꓙꓳ ꓡꓳ=

1. ꓔꓲ ꓓꓴ ꓗꓪ ꓐꓰ-ꓸ
2. ꓟꓷꓽ ꓠꓷꓹ ꓗꓴ ꓙꓲ ꓫꓸ ꓪ ꓘꓶꓽ ꓗꓪ ꓐꓰ ꓶ ꓓꓰꓽ ꓪ ꓘꓴ ꓟ ꓕꓱ ꓠꓬꓲꓽ ꓚꓱꓹ ꓥ_ ꓡꓳ=

ꓘꓶꓽ ꓫꓵꓼ ꓡꓵ ꓗꓪ ꓟ ꓔꓲ ꓓꓴ ꓡꓲꓽ ꓒꓰꓼ ꓓꓴꓸ ꓓꓴ ꓤꓽ ꓐꓯ ꓠꓬ-ꓸ ꓮ ꓠꓱ ꓬꓲꓸ ꓑ ꓫꓬꓽ ꓬꓲ-ꓢꓷ-ꓡꓰ ꓡ ꓞꓳ ꓔꓯ ꓔꓲ ꓖꓶ ꓓꓴ ꓚꓱꓹ ꓜꓲ ꓜꓲ ꓟꓴ ꓟꓴ ꓤꓽ ꓟ ꓠꓱ ꓑꓱ ꓔꓸ ꓠꓬꓲ ꓘꓶꓽ ꓫꓵꓼ ꓡꓵ ꓙꓵ ꓚꓱꓹ ꓔꓯ ꓛꓳ ꓔꓬ ꓢꓴ ꓐꓴ ꓠꓬ ꓠꓬꓲ ꓠꓬꓲ ꓗꓪ ꓛꓲ ꓔꓲ ꓖꓶ ꓟ ꓡꓲꓽ ꓒꓰꓼ ꓖꓳ ꓟ ꓛꓳ ꓔꓬ ꓡꓳ= ꓪꓴ-ꓢ ꓡꓰ ꓬꓲꓸ ꓪꓽ ꓔꓯ ꓤꓽ ꓟ ꓠꓱ ꓑꓱ ꓟ ꓗꓪ ꓬꓳꓹ ꓚꓲꓸ ꓟ ꓕꓲꓽ ꓫꓵꓼ ꓠꓬ-ꓸ ꓔꓲ ꓓꓴ ꓚꓱꓹ ꓥ_ ꓡꓳ= ꓪ ꓘꓴ ꓦꓲ ꓘꓴꓽ ꓗꓪ ꓔꓲ ꓓꓴ ꓬꓰ ꓔꓸ ꓟ ꓗꓪ (1) ꓮꓸ ꓣꓳ (2) ꓮꓸ ꓛꓵꓼ (3) ꓮꓸ ꓠꓬꓲꓽ ꓮꓸ ꓖꓴꓽ (4) ꓜꓽ ꓪꓳ ꓡꓳꓸ ꓪꓳ ꓛꓱꓼ ꓡꓱꓼ ꓙꓵ ꓑꓸ ꓑꓸ ꓔꓯꓹ ꓡ ꓢꓲꓸ ꓛꓴ ꓔꓲ ꓓꓴ ꓡꓰꓽ ꓛꓳ ꓠꓹ ꓟ ꓚꓱꓹ ꓠꓬ-ꓸ ꓪꓴ-ꓢ ꓡꓰ ꓬꓲ-ꓢꓷ-ꓡꓰ-ꓸ ꓔꓯ ꓤꓽ ꓟ ꓠꓱ ꓑꓱ ꓟ-ꓸ ꓬꓲꓸ ꓓꓽ ꓟ ꓕꓲꓽ ꓫꓵꓽ ꓥ ꓐꓭ ꓕꓯ ꓢꓲ ꓗꓪ ꓐꓯ ꓡꓳꓹ ꓬꓰ ꓟ ꓔꓲ ꓓꓴ ꓮ ꓡꓰ ꓫꓬꓹ ꓚꓱꓹ ꓮ ꓡꓰ ꓕꓲꓽ ꓫꓵꓽ ꓐꓱ ꓶ ꓮ ꓡꓰ ꓛꓴ ꓔꓲ ꓠꓹ ꓟ ꓚꓱꓹ ꓓꓳ ꓙꓰ ꓕꓳ ꓶ ꓡꓱ-ꓬꓲ-ꓑ-ꓫꓬ-ꓵ ꓕꓳ ꓶ ꓕꓱ ꓢ ꓑꓷꓠ ꓗꓪ ꓬꓲꓸ ꓓꓽ ꓟ ꓪꓴ-ꓢ ꓡꓰ ꓤ ꓟ ꓠꓱ ꓑꓱ ꓘꓶꓽ ꓓꓯ ꓡꓳ= ꓝꓮꓲ ꓔꓲ ꓓꓴ ꓟꓬꓱꓽ ꓟꓯ ꓢꓴ ꓔꓲ ꓒꓽ ꓔꓯ ꓥ ꓟꓲ ꓬꓲꓸ ꓫꓳꓹ ꓫꓳꓹ ꓞꓳ ꓫꓵꓽ ꓪꓳꓼ ꓢꓲ ꓓ ꓢꓲꓹ ꓔ ꓓꓴ ꓗꓪ ꓟꓬꓱꓽ ꓬꓰ ꓠꓹ ꓟ ꓯ-ꓣꓷ ꓕꓲꓽ ꓪꓼ ꓟ ꓔꓯ ꓢꓲ ꓢꓲꓹ ꓔꓲ ꓓꓴ ꓟꓬꓱꓽ ꓗꓪ ꓣꓹꓱꓽ ꓝꓲ_ ꓡꓳ= ꓠꓱꓹ ꓐꓯ ꓪꓴ-ꓢ ꓡꓰ ꓢꓲ ꓔꓹ ꓟ ꓟꓽ ꓥ ꓮ ꓟ ꓥ ꓟꓲ ꓔꓲ ꓓꓴ ꓟꓬꓱꓽ ꓗꓪ ꓣꓱꓽ ꓙ ꓟꓽ ꓓ= ꓕꓯ ꓢꓲ ꓗꓪ ꓪꓴ-ꓢ ꓡꓰ ꓬꓲ-ꓢꓷ-ꓡꓰ ꓔꓯ ꓤꓽ ꓟ ꓠꓱꓹ ꓑꓱ ꓟ ꓗꓪ ꓔꓲ ꓓꓴ ꓔꓲ ꓚꓱꓹ ꓮꓽ ꓟꓬꓹ ꓫꓵꓽ ꓟꓸ ꓔꓹ ꓟ ꓔꓱꓹ ꓕ ꓠꓬꓲ ꓟꓶ ꓡꓳ= ꓮ ꓫꓵꓽ ꓪꓴꓸ ꓠꓬꓲ ꓔꓲ ꓓꓴ ꓔꓲ ꓚꓱꓹ ꓡꓲꓽ ꓛꓳ ꓝꓲ ꓡꓳ= ꓬꓲꓸ ꓑ ꓫꓬ ꓟꓷꓽ ꓠꓷꓹ ꓗꓴꓹ ꓙꓲ ꓡꓰ ꓪꓴ-ꓢ-ꓳ-ꓸ ꓘꓴ ꓟ ꓡꓰ ꓟꓽ ꓐꓲ ꓜꓲꓼ-ꓸ ꓚꓲꓸ ꓚꓲꓸ ꓠꓲꓹ ꓟ ꓗꓪ ꓐꓰ ꓙꓵ ꓢꓲ ꓦ ꓡꓱ ꓢꓲꓸ ꓚꓲꓸ ꓛꓬꓽ ꓒꓵꓽ ꓶꓽ ꓔꓯꓹ ꓡ ꓢꓲꓹ ꓔꓲ ꓖꓶ ꓡ ꓟ ꓠꓬ-ꓸ ꓠꓴ ꓙꓵ ꓚꓱꓹ ꓗꓪ ꓬꓰ ꓐꓲ ꓡꓰ ꓟ ꓟꓬꓱꓽ ꓕꓲꓽ ꓟ ꓥ ꓠꓬꓲ-ꓸ ꓬꓲꓸ ꓪꓽ ꓔꓯ ꓡꓲꓽ ꓒꓰꓼ ꓕꓱ ꓟ ꓟꓽ ꓓꓽ ꓢ ꓛꓳ ꓝꓲ ꓬꓰ ꓝꓲ ꓟ ꓥꓳ= ꓕꓯ ꓢꓲ ꓗꓪ ꓘꓶꓽ ꓫꓵꓼ ꓡꓵ ꓦꓬꓼ ꓠꓬꓲ ꓪꓴ-ꓢ ꓐꓰ ꓬꓲꓸ ꓑ ꓫꓬ ꓙ ꓡꓯ ꓘꓳ ꓟ ꓚꓱꓹ ꓐꓯ ꓡꓳꓸ ꓬꓰꓳ= ꓮ ꓟꓶ ꓠꓬ ꓘꓶꓽ ꓫꓵꓼ ꓫꓵꓼ ꓗꓪ ꓟ ꓔꓲ ꓓꓴ ꓟꓸ ꓟꓲ ꓐꓯ ꓝꓸ ꓬꓰ ꓥꓳ= ꓬꓲ-ꓢꓷ-ꓡꓰ ꓪꓴ-ꓢ ꓑ ꓫꓬ ꓚ ꓟꓲꓽ ꓔꓯ ꓡꓳꓸ ꓠꓬꓲ ꓔꓯꓽ ꓮ-ꓐ-ꓡ-ꓦ ꓕꓲꓽ ꓞꓲꓼ ꓗꓪ ꓐꓰ ꓪꓴ-ꓢ ꓑ ꓫꓬ ꓢꓲ ꓓꓳ ꓡ ꓢꓲꓸ ꓬꓲꓸ ꓪ ꓔꓯꓸ ꓬꓰ ꓙ ꓟ ꓦꓵꓽ ꓙ ꓟ ꓟꓸ ꓟꓲ ꓢꓲ-ꓫꓬ ꓕꓳ ꓶ ꓗꓪ ꓓꓯꓹ ꓡꓳ= ꓥ_ ꓡꓳ= ꓖꓳ ꓡꓱ ꓥ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓟꓽ ꓥ ꓟ ꓠꓱ ꓐꓯ ꓡ ꓞꓳ ꓞꓳ ꓫꓵꓽ ꓥ ꓖꓴ ꓟꓽ ꓓ ꓙꓳ ꓔꓬ ꓡꓳ= ꓬꓲꓸ ꓪꓽ ꓔꓯ ꓮ ꓟ ꓡꓰ ꓚꓰꓼ ꓔꓸ ꓡꓽ? ꓪꓴ-ꓢ ꓡꓰ ꓚꓰꓼ ꓔꓸ ꓡꓳ= ꓬꓲꓸ ꓪ ꓮ ꓙꓵꓽ ꓪꓴ-ꓢ ꓑ ꓫꓬ ꓪꓴ-ꓢ ꓤ ꓠꓱꓹ ꓒꓬꓱꓼ ꓡ ꓠꓹ ꓟ-ꓸ ꓪꓴ-ꓢ ꓤ-ꓔꓲ ꓫꓵꓼ ꓠ ꓗꓷ ꓡꓰꓳ= ꓟꓬꓱꓽ ꓕꓱ ꓟ ꓟꓯ ꓠ ꓟ ꓬꓰ ꓠꓹ ꓟ ꓮꓽ ꓟ ꓥ ꓟꓲ ꓬꓰ ꓟꓽ ꓐ ꓡ-ꓸ ꓬꓰ-ꓢꓴ ꓡꓰ ꓟꓯ ꓠ ꓗꓷ ꓡꓰ ꓠꓬꓲ-ꓸ ꓡꓯ ꓐꓳ ꓔꓲ ꓓꓴ ꓗꓪ ꓫꓵꓳ-ꓸ ꓪꓴ-ꓢ ꓡꓰ ꓚꓰꓼ ꓔꓸ ꓟ ꓡ ꓞꓳ ꓮꓽ ꓙꓵꓽ ꓪꓴ-ꓢ ꓡꓰ ꓚꓰꓼ ꓔꓸ ꓟ ꓡ ꓞꓳ ꓮꓽ ꓙꓵꓽ ꓪꓴ-ꓢ ꓑ ꓫꓬ ꓒꓬꓱꓼ ꓡ ꓠꓹ ꓟ ꓬꓰ-ꓢꓴ ꓫꓵꓼ ꓡꓯ ꓐꓳ ꓔꓶꓸ ꓓꓴ ꓗꓪ ꓟꓰ ꓗꓷ ꓟ ꓗꓪ ꓐꓰ ꓬꓲ-ꓢꓷ-ꓡꓰ ꓕꓲꓽ ꓪꓳꓼ ꓟ ꓡꓰ ꓪꓴ-ꓢ ꓑ ꓫꓬ ꓟꓽ ꓥ-ꓸ ꓪꓴ-ꓢ ꓚꓰꓼ ꓔꓸ ꓟ ꓡ ꓞꓳ ꓮꓽ ꓙꓵꓽ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓟ ꓡ ꓞꓳ ꓬꓰ ꓪ ꓓꓹ ꓟ ꓤꓶ ꓦꓬꓼ ꓠꓬꓲ ꓬꓰ-ꓢꓴ ꓫꓵꓽ ꓗꓪ ꓐꓰ ꓒꓳꓹ ꓡꓶꓸ ꓗꓷꓳ= ꓬꓰ-ꓢꓴ ꓣꓳ ꓐꓱ ꓶ ꓫꓵꓽ ꓙ ꓗꓷ ꓟ ꓕꓲ ꓤꓶ ꓖꓳ ꓕꓲꓽ ꓤꓶ ꓗꓪ ꓟ ꓡ ꓞꓳ ꓚꓲꓸ ꓟꓶ ꓠꓹ ꓟ ꓢꓲꓽ ꓫꓬ ꓟ ꓠꓽ ꓡꓲꓹ ꓠꓬꓲ ꓟꓶꓽ ꓘꓶꓼ ꓬꓲꓸ ꓛꓳ ꓒꓯꓹ ꓥꓪ ꓔꓯ ꓓꓵꓽ ꓙ ꓛꓲ ꓡ ꓓꓴ ꓕꓱ ꓡꓱ ꓬꓰ-.

ꓕꓵꓽ ꓪꓽ ꓡꓯ ꓙꓱ ꓔ ꓡꓳ= ꓡꓴ-ꓘ 22ꓽ19

ꓮ ꓟꓶ ꓕꓵꓽ ꓪꓽ ꓕꓱ ꓟ ꓡꓯ ꓙꓱ ꓕꓯꓽ ꓑꓸ ꓑꓸ ꓔꓯ ꓥꓪ ꓧꓪꓽ ꓥꓪ ꓖꓳ ꓓꓱꓽ ꓥ ꓡꓳ= ꓐꓯ ꓡꓳ= ꓝꓮꓲ ꓛꓱꓼ ꓡꓱꓼ ꓙꓵ ꓔꓯ ꓥ ꓟꓲ ꓥꓪ ꓫꓵꓽ ꓥ_ ꓡꓳ= ꓑꓸ ꓑꓸ ꓐꓰ ꓛꓱꓼ ꓡꓱꓼ ꓙꓵ ꓠꓬ-ꓸ ꓬꓲꓸ ꓫꓵꓽ ꓬꓲꓸ ꓧꓪꓽ ꓚꓲ ꓥ_ ꓟ ꓬꓰ-ꓢꓴ ꓐꓯ ꓘꓶꓽ ꓬꓳꓹ ꓚꓲꓸ ꓟ ꓐꓯ ꓘꓶ ꓥ_ ꓡꓳ= ꓮ ꓟꓶ ꓬꓰ-ꓢꓴ ꓧꓪꓽ ꓬꓰ-ꓢꓴ ꓫꓵꓼ ꓒꓬꓱꓼ ꓡ ꓠꓹ ꓟ ꓔꓲ ꓒ ꓐꓴ ꓡꓰ ꓟꓲ-ꓢ ꓬꓰ ꓟ ꓗꓪ ꓬꓰ-ꓢꓴ ꓧꓪ ꓬꓰ-ꓢꓴ ꓫꓵꓼ ꓚꓰꓼ ꓢꓲꓸ ꓢꓲ-ꓤ ꓐꓴ ꓔꓯ ꓬꓰ-ꓢꓴ ꓫꓵꓼ ꓬꓰ-ꓢꓴ ꓧꓪꓼ ꓚꓲ ꓑꓶ ꓖꓶ ꓟ ꓥꓳ= ꓟꓸ ꓟꓲ ꓕꓱ ꓟ ꓬꓲꓸ ꓠꓯꓹ ꓟ ꓘꓶꓽ ꓥ ꓡꓳ= ꓬꓰ-ꓢꓴ ꓐꓯ ꓘꓶꓽ ꓗꓪ ꓐꓰ ꓘꓳꓹ ꓣꓴ ꓡꓯ= ꓕꓲꓽ ꓞꓲꓼ ꓕꓲꓽ ꓑ ꓟ ꓢꓯꓼ ꓟꓬ ꓑꓸ ꓑꓸ ꓫꓵꓼ ꓥ ꓟꓲ ꓝꓮꓲ ꓢꓯꓸ ꓬꓲꓼ ꓡ ꓟ ꓠꓬ ꓞꓲꓼ ꓬꓰ-ꓢꓴ ꓖꓳ ꓓꓱꓽ ꓟꓲ-ꓢ ꓬꓰ ꓟ ꓗꓪ ꓐꓰ ꓘꓳꓹ ꓣꓴ ꓟꓶ ꓡꓳ=