ꓕꓲ-ꓬ ꓡꓳ ꓒꓱ ꓟꓸ ꓟꓲꓽ

ꓮ ꓠꓱ ꓕꓯ ꓟ ꓕꓲ-ꓬ ꓠꓬ ꓠꓬꓲꓸ ꓠꓬꓲ ꓟ ꓡꓰ-ꓐꓯ-ꓠꓷ ꓗꓴꓷꓼ ꓗꓪ ꓓꓹ ꓟ ꓥ ꓢꓲ꓾ ꓟꓲ-ꓠꓯ-ꓔꓱ-ꓦꓲ-ꓬꓲ-ꓡꓴ-ꓐꓱ ꓘꓶꓽ ꓬꓲ-ꓢꓷ-ꓡꓲ ꓟꓵꓽ ꓖꓴ ꓪꓴꓸ ꓕꓲꓽ ꓛꓱꓽ ꓗꓪ ꓓꓹ ꓟ ꓥ ꓡꓳ=  ꓖꓳ ꓗꓪ ꓠꓬ꓾ ꓮ ꓠꓱ ꓟ ꓦꓬꓼ ꓠꓬꓲ ꓕꓯ꓾  ꓟꓲ ꓠꓯ ꓕꓯꓽ ꓢꓲꓺ ꓗꓪ ꓶꓻ ꓡꓯꓼ ꓟꓬꓱꓽ ꓮ ꓟꓬꓹ ꓬꓰ ꓗꓷ ꓟ ꓥ ꓡꓳ= ꓶꓻ ꓡꓯꓼ ꓟꓬꓱꓽ ꓚꓱꓹ ꓮ ꓟꓬꓹ ꓐꓰ ꓬꓲꓸ ꓒꓵꓽ ꓙꓳˍ ꓟ ꓶꓻ ꓤ ꓮ ꓟꓬꓹ ꓠꓬ ꓖꓳ ꓗꓪ ꓟ ꓙ ꓖꓴ ꓔꓯ ꓗꓳꓸ ꓙꓰ ꓗꓷ ꓟ ꓥꓳ= ꓕꓲ-ꓬ ꓞꓳ ꓫꓵꓽ ꓶꓻ ꓡꓯꓼ ꓟꓬꓱꓽ ꓬꓰ ꓢꓴ ꓐꓴ ꓠꓬ ꓮ ꓠꓱ ꓟ ꓦꓬꓼ ꓠꓬꓲ ꓕꓯ ꓡꓰ ꓟꓵꓽ ꓗꓳꓹ ꓓꓵꓺ ꓓꓵꓺ ꓗꓪ ꓶꓻ ꓡꓯꓼ ꓬꓰ ꓗꓷ ꓢꓲ colonie ꓟꓵꓽ ꓐꓴ ꓔꓯ ꓾ ꓬꓲꓸ ꓪ ꓐꓴ ꓟꓵꓽ ꓥ ꓟ ꓕꓲ-ꓬ ꓐꓰ ꓙ ꓡꓯꓽ ꓘꓳ ꓝꓲ ꓗꓷꓳ=

ꓚꓺ ꓟꓲꓽ ꓔꓯ ꓟꓳꓸ ꓢꓷꓸ ꓠꓲꓹ ꓙꓳ ꓢꓴ ꓥ ꓟ Ernest Renan ꓠꓬ ꓾ ꓕꓲ-ꓬ ꓠꓬ ꓐꓬ ꓡꓰ ꓟ ꓬꓲ ꓒꓵꓹ ꓔꓯ ꓫꓬꓹ ꓔ ꓟ ꓡꓳ ꓒꓱ ꓐꓰ ꓐꓯ ꓓ ꓡꓳ꓾ ꓐꓰ ꓐꓯ ꓔ ꓡꓳ=

ꓠꓬꓲꓸ ꓠꓬꓲ ꓟ ꓕꓲ-ꓬ ꓠꓬ Beirut꓾ Tripoli꓾ Aley ꓐꓰ ꓢꓲ-ꓓꓳ ꓐꓴ ꓗꓳꓸ ꓗꓷ ꓠꓬ ꓡꓰ-ꓐꓯ-ꓠꓷ ꓗꓪ ꓟꓽ ꓓ ꓪꓴꓽ ꓓꓰˍ ꓟ No.(5) ꓡꓳ ꓒꓱ ꓕꓲ ꓟ ꓥ ꓡꓳ=  

ꓪ ꓔꓲ ꓓ-ꓪꓵ ꓦꓬꓼ ꓠꓬꓲ ꓕꓯ ꓠꓬ꓾ ꓕꓲ-ꓬ ꓪ ꓔꓲ ꓦꓲ-ꓣ-ꓟꓷ ꓡꓰ ꓬꓲ-ꓢꓷ-ꓡꓲ ꓟꓵꓽ ꓐꓰ ꓙ ꓡꓯꓽ ꓘꓳˍ ꓡꓳ= ꓬꓲꓸ ꓠꓬ ꓪ ꓔꓲ ꓓ-ꓪꓵ ꓐꓱ ꓶ ꓦꓲꓻ ꓕꓲ ꓦꓲ ꓫꓬꓹ ꓖꓶˍ ꓡꓳ= ꓪ ꓔꓲ ꓦꓲ-ꓣ-ꓟꓷ ꓠꓬ ꓓ-ꓪꓵ ꓬꓲꓸ ꓤ ꓪ ꓔꓲ ꓢꓳ-ꓡꓳ-ꓟꓳ ꓦꓬꓼ ꓠꓬꓲ ꓗꓪˍ ꓟꓲ ꓬꓴ-ꓔ ꓢꓲꓽ ꓫꓬ ꓦꓲ ꓕꓲ ꓦꓲ ꓫꓬꓹ ꓗꓷꓳ=

Old Tyre ꓐꓰ ꓘꓴˍ ꓟ ꓡꓳ ꓒꓱ ꓐꓰꓽ ꓟꓵꓽ ꓕꓯꓽ ꓢꓲ ꓗꓪ ꓟ ꓭꓸ ꓛꓲꓺ ꓧꓪꓸ ꓒꓱ ꓐꓰ ꓬꓲ-ꓡꓴ-ꓐꓱ ꓘꓶꓽ ꓗꓪ ꓐꓰ ꓕꓲ ꓕꓶꓹ ꓤ ꓡꓰꓽ ꓶˍ ꓟ ꓭꓸ ꓛꓲꓺ ꓟꓵꓽ ꓕꓯ ꓢꓲ ꓫꓬꓹ ꓜꓶ ꓔ ꓟ ꓡꓳ ꓒꓱ ꓐꓯ ꓢꓲ ꓾ ꓠꓬꓲꓽ ꓐꓴ ꓙꓳˍ ꓡꓳ= ꓖꓳ ꓟ ꓠꓬ ꓪꓽ ꓠꓬꓲˍ ꓟ ꓡꓳ ꓒꓱ ꓥ ꓡꓳ= ꓡꓳ ꓒꓱ ꓖꓳ ꓟ ꓔꓯ ꓫꓬ-ꓡꓷ-ꓟ-ꓠꓲ-ꓢ ꓡꓰ 5 ꓘꓳꓼ ꓛꓲ ꓗꓽ ꓚꓳꓸ ꓗꓷ ꓢꓲ꓾ ꓠꓱ-ꓐꓴ-ꓘ-ꓠꓱ-ꓜ ꓠꓬ 13 ꓘꓳꓼ ꓛꓲ ꓗꓽ ꓚꓳꓸ ꓗꓷꓳ= ꓖꓳ ꓡꓱ ꓥˍ ꓟꓲ ꓬꓲꓸ ꓪ ꓐꓴ ꓟꓽ ꓧꓪꓸ ꓡꓰ= ꓦ ꓐ 7 ꓟ ꓛꓲꓺ ꓟꓯꓼ ꓓꓶꓽ ꓡꓯ ꓘꓳ ꓗꓷ ꓗꓸ ꓠꓯ ꓡꓳ ꓒꓱ  ꓔꓯ ꓪ ꓔꓲ Alexander ꓡꓰ ꓣꓴ ꓧꓪꓸ ꓡꓰ ꓗꓷꓳ= ꓖꓳ ꓡꓱ ꓥˍ ꓟꓲ ꓙꓲ-ꓢꓴ ꓢꓲ ꓤ ꓦꓬꓼ ꓠꓬꓲ ꓗꓪ ꓛꓲꓺ ꓶꓻ ꓡꓯꓼ ꓟꓬꓱꓽ ꓬꓰˍ ꓟ ꓔꓯ ꓡꓯꓼ ꓫꓵ ꓪꓴꓽ ꓡ ꓟꓴ ꓡ ꓠꓹ ꓟ ꓢꓯꓼ ꓕꓵꓼ ꓗꓷꓳ= ꓕꓱ ꓟ ꓔꓯ ꓟ-ꓕꓲ 11ꓽ21 ꓐꓰ ꓝꓲ ꓓꓴ 12ꓽ20 ꓗꓪ ꓖꓴ ꓟꓸ ꓖꓶ ꓔ ꓡꓳ=

ꓮꓸꓓꓸ 1291 ꓕꓯ ꓡꓳ ꓒꓱ ꓔꓯ Saracens ꓐꓴ ꓡꓰ ꓧꓪꓸ ꓡꓰ ꓢꓲ ꓾ꓦꓬꓼ ꓠꓬꓲ ꓖꓳ ꓟ  ꓗꓪ ꓐꓰ ꓪꓴꓸ ꓔꓴ ꓢꓲ ꓠꓬꓲ ꓡꓳ ꓒꓱ ꓠꓬ ꓙꓬ ꓓꓷꓼ ꓓꓷꓼ ꓗꓷ ꓡꓰꓳ= “ ꓕꓲ-ꓬ ꓗꓪ ꓟ ꓠꓲꓹ ꓛꓵˍ ꓟ ꓟꓶꓻ  ꓠꓬ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓟꓬꓱꓺ ꓓꓳꓽ ꓪꓴꓽ ꓢꓲ ꓮ ꓘꓶꓸ ꓐꓲˍ ꓟ ꓪꓴꓸ ꓠꓬꓲ ꓟꓶ ꓫꓵꓽ ꓟꓶ ꓙꓰꓽ ꓫꓬꓹ ꓟ ꓡꓳ ꓒꓱ ꓗꓪ ꓔꓬꓹ ꓢꓴ ꓐꓴ ꓐꓱ ꓶ ꓾ ꓐꓳ ꓶ ꓮ ꓟꓬꓹ ꓙꓳ ꓡ ꓝꓲˍ ꓟ ꓥ ꓡꓳ=  ꓡꓳ ꓒꓱ ꓗꓪ ꓟ ꓞꓳ ꓫꓵꓽ ꓐꓴ ꓠꓬ ꓠꓲꓽ ꓐꓬꓱꓽ ꓢꓲꓺ ꓐꓬꓱꓽ ꓐꓴ ꓔꓯ ꓦ ꓡꓱꓻ ꓔꓬꓹ ꓟ ꓪꓴꓸ ꓠꓬꓲ ꓟꓷꓽ ꓠꓷꓹ ꓝꓸ ꓒ ꓐꓴ ꓠꓬ ꓾ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓗꓪ ꓡꓳ ꓒꓱ ꓔꓯ ꓒꓬ ꓗꓷˍ ꓟ ꓔꓯ ꓟꓷꓽ ꓠꓷꓹ ꓝ ꓗꓷꓳ= ( ꓬꓲ-ꓢ-ꓬ 23ꓽ1 ꓾ ꓬꓰ-ꓡꓲ-ꓟꓲ 25ꓽ22 ꓾ ꓬꓲ-ꓫꓲ-ꓚꓰ 26ꓽ 28ꓽ1- 19ꓽ ꓾ ꓮ-ꓟꓳ-ꓢꓲ 1ꓽ9 ꓾ ꓢ-ꓚꓬ-ꓡꓲ-ꓬ 9ꓽ2-4)

ꓢꓲꓹ-ꓕꓲ-ꓩ ꓫꓵꓻ ꓗꓷ ꓗꓸ ꓠꓯ ꓾ ꓒꓳ-ꓡꓳ ꓠꓬ ꓖꓳ ꓗꓪ ꓘꓴ ꓜꓲ ꓞꓳ ꓕꓲ ꓟ ꓫꓬꓹ ꓗꓷꓳ= ꓝꓲ ꓓꓴ ꓒꓳ-ꓡꓳ ꓠꓬ 3 ꓧꓪꓹ ꓕꓲ ꓧꓪꓹ ꓶꓼ ꓓꓳꓽ ꓫꓱꓹ ꓓꓳꓽ ꓚꓺ ꓟ ꓗꓪ ꓐꓰ ꓬꓲꓼ ꓡˍ ꓕꓯ ꓖꓳ ꓗꓪ ꓟ ꓢꓲ ꓤ  ꓐꓴ ꓐꓰ ꓫꓵꓽ ꓠꓬꓲ ꓛꓲꓺ ꓔꓬꓹ ꓗꓷꓳ(ꓝꓲ ꓓꓴ 21ꓽ4) ꓖꓳ ꓗꓪ ꓐꓰ ꓓꓳ ꓙꓰˍ ꓕꓯ ꓢꓲ ꓤ ꓐꓴ ꓐꓰ ꓬꓲ ꓪ ꓤ ꓟꓶꓻ ꓤ ꓠꓱ ꓐꓴ ꓠꓬ ꓡꓳ ꓒꓱ ꓠꓱ ꓫꓱꓸ ꓟꓸꓼ ꓬꓲꓻ ꓙꓬ ꓘꓶꓽ ꓗꓪ ꓛꓲ ꓧꓳꓽ ꓦ ꓖꓶ ꓗꓷꓳ= ꓝꓲ ꓓꓴ ꓐꓴ ꓶꓼ ꓓꓳꓽ ꓫꓱꓹ ꓓꓳꓽ ꓚꓺ ꓙꓰˍ ꓟ ꓠꓬ ꓾ ꓕꓲ-ꓬ ꓡꓳ ꓒꓱ ꓐꓰ 38 ꓔꓶꓹ ꓛꓲꓺ ꓶꓽˍ ꓟ ꓢꓲ-ꓢ-ꓡꓰ ꓗꓪ ꓠꓽ ꓗꓷꓳ(ꓝꓲ ꓓꓴ 21ꓽ5-8)=

ꓡꓳ ꓒꓱ ꓔꓯ ꓬꓲ-ꓙꓲ ꓐꓰ ꓬ-ꓫꓵ ꓐꓴ ꓡꓰ ꓟꓯꓼ ꓓꓶꓽ ꓡꓯ ꓘꓳ ꓗꓷ ꓢꓲ꓾ ꓐꓸꓚꓸ 332 ꓕꓯ ꓪ ꓔꓲ Alexander ꓡꓰ ꓓꓶꓽ ꓧꓪꓸ ꓡꓰ ꓗꓷꓳ= ꓠꓬꓲ ꓠꓬꓲ ꓗꓪ ꓡꓳ ꓒꓱ ꓠꓬ ꓮ ꓠꓱ ꓕꓯ ꓟ ꓡꓱꓼ ꓜꓴ ꓐꓰ ꓐꓬ ꓡꓰ ꓟ ꓪꓽ ꓘꓴ ꓦꓲ ꓓꓹ ꓟ꓾ ꓞꓳ ꓤ 3000 ꓣꓳ ꓛꓲ ꓔꓬꓹ ꓟ ꓡꓳ ꓒꓱ ꓕꓲ ꓟ ꓥ  ꓡꓳ=  

Greek ꓞꓳ ꓫꓵꓽ ꓐꓴ ꓠꓬ ꓕꓲ-ꓬ ꓔꓯ Tyros ꓐꓰ ꓘꓴˍ ꓟ ꓥ ꓢꓲ꓾ ꓮ ꓠꓱ ꓕꓯ ꓟ ꓬ-ꓫꓵ ꓞꓳ ꓫꓵꓽ ꓐꓴ ꓠꓬ Zara ꓐꓰ ꓘꓴˍ ꓟ ꓥ ꓡꓳ= ꓕꓲ-ꓬ ꓠꓬ ꓬꓲ-ꓡꓴꓽ-ꓐꓱ-ꓘꓶꓽ ꓗꓪ ꓓꓹ ꓢꓲ ꓮ ꓠꓱ ꓕꓯ ꓟ ꓒꓲ-ꓠꓲ-ꓢꓲ ꓞꓳ ꓫꓵꓽ ꓐꓴ ꓡꓳ ꓒꓱ ꓥ ꓡꓳ= ꓡꓳ ꓒꓱ ꓔꓯ ꓐꓚ 573 ꓕꓯ ꓐ-ꓐꓲ-ꓡꓶ ꓐꓴ ꓡꓰ ꓓꓶꓽ ꓧꓪꓸ ꓡꓰ ꓢꓲ꓾ ꓐꓚ 332 ꓕꓯ ꓠꓬ ꓪ ꓔꓲ Alexander ꓡꓰ ꓓꓶꓽ ꓧꓪꓸ ꓡꓰ ꓗꓷ ꓟ ꓥꓳ= ꓪ ꓔꓲ Alexander ꓪꓽ ꓠꓬꓲ ꓡˍ ꓟ ꓠꓬ ꓕꓲ-ꓬ ꓡꓳ ꓒꓱ  ꓐꓬ ꓡꓰ ꓓꓴ ꓕꓲꓽ ꓫꓵꓽ ꓒꓬꓱꓼ ꓡ ꓗꓷꓳ=  ꓐꓚ 273 ꓕꓯ ꓡꓳ ꓒꓱ ꓠꓬ ꓔꓳ-ꓡꓯ-ꓟꓲ ꓐꓴ ꓙꓵꓽˍ ꓟ ꓠꓯꓸꓼ ꓗꓪ ꓓꓵꓽ ꓡꓰ ꓢꓲ꓾ ꓐꓚ 198 ꓕꓯ ꓠꓬ Seleucids ꓐꓴ ꓡꓰ ꓬꓰ ꓙˍ ꓟ ꓗꓪ ꓐꓰ ꓩꓴ ꓗꓷˍ ꓟ ꓟꓶ ꓗꓷꓳ= ꓐꓚ 126 ꓕꓯ Pompey ꓡꓰ ꓡꓳ ꓒꓱ ꓔꓯ ꓓꓶꓽ ꓧꓪꓸ ꓡꓰ ꓢꓲ ꓡꓳ ꓒꓱ ꓗꓪ ꓟ ꓞꓳ ꓫꓵꓽ ꓐꓴ ꓔꓯ ꓖꓶꓽ ꓗꓷꓳ= ꓡꓳ ꓒꓱ ꓠꓬ ꓣꓳ-ꓟ ꓦꓬꓼ ꓠꓬꓲ ꓗꓪ ꓟꓽ ꓓ ꓬꓳꓸ ꓚꓵˍ ꓟ ꓶꓻ ꓡꓯꓼ ꓟꓬꓱꓽ ꓬꓰˍ ꓟ ꓡꓳ ꓒꓱ ꓕꓲ ꓟ ꓒꓬꓱꓼ ꓡ ꓗꓷꓳ= ꓬꓰ-ꓢꓴ ꓠꓬ ꓕꓲ-ꓬ ꓡꓳ ꓒꓱ ꓗꓪ ꓚꓳꓺ ꓙꓰˍ ꓡꓳ(ꓟ-ꓕꓲ 7ꓽ2)= ꓝꓲ ꓓꓴ ꓒꓳ-ꓡꓳ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓙꓰˍ ꓕꓯ ꓾ ꓬꓲꓸ ꓡꓰ ꓘꓴ-ꓜꓲ-ꓞꓳ ꓫꓬꓹ ꓔ ꓟ ꓡꓳ ꓒꓱ ꓥ ꓟ ꓕꓲ-ꓬ ꓡꓳ ꓒꓱ ꓗꓪ ꓐꓰ ꓗꓳꓸ ꓙꓰˍ ꓡꓳ (ꓝꓲ ꓓꓴ 21ꓽ3-7)= ꓡꓳ ꓒꓱ ꓗꓪ ꓓꓽ ꓪꓴꓸ ꓟ ꓗ-ꓔꓳ-ꓡꓲ ꓔꓲꓺ ꓒ ꓓꓽ ꓙꓵꓽ ꓪꓽ ꓙꓳ ꓪꓴꓸ ꓔꓴ ꓗꓷꓳ=

1 ꓪ ꓔꓲ 9:11 ꓾  2 ꓚꓺ ꓟꓲꓽ 2:14 ꓾ ꓬꓳ-ꓫꓴ 19:29 ꓾ 1 ꓪ ꓔꓲ 7:14꓾ ꓝꓲ ꓓꓴ 12:20 ꓾ 2 ꓚ ꓟꓲꓽ 2:3꓾  2 ꓚ ꓟꓲꓽ 2:11꓾ 1 ꓪ ꓔꓲ 5:1꓾  ꓬꓲ-ꓢ-ꓬ 23:5 ꓾ ꓡꓴ-ꓘ 10:13 ꓾ 2 ꓢ-ꓟꓴ-ꓬꓰ 5:11 ꓾ ꓬꓳ-ꓶ 3:4꓾ ꓟ-ꓕꓲ 11:21 ꓾ ꓝꓲ ꓓꓴ 21:3꓾  ꓱ-ꓢꓶ-ꓡ 3:7 ꓾ ꓟ-ꓘꓳ 3:8 ꓾ꓟ-ꓘꓳ 7:31 ꓾ 1 ꓚ ꓟꓲꓽ 22:4꓾  ꓡꓴ-ꓘ 6:17꓾  ꓬꓲ-ꓢ-ꓬ 23:17꓾  ꓬꓲ-ꓢ-ꓬ 23:1 ꓾1 ꓚ ꓟꓲꓽ 14:1 ꓾ ꓠꓲ-ꓬ-ꓟ-ꓬ 13:16꓾  ꓬꓲ-ꓢ-ꓬ 23:8꓾  2 ꓢ-ꓟꓴ-ꓬꓰ 24:7꓾ ꓟꓴꓽ ꓖꓪ 87:4꓾  ꓟꓴꓽ ꓖꓪ 45:12꓾ ꓟꓴ-ꓖꓪ 83:7꓾  ꓟ-ꓘꓳ 7:24꓾  ꓝꓲ-ꓓꓴ 21:7