ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓬꓲ ꓟꓹ ꓟ ꓬꓲ-ꓡꓲ-ꓫ-ꓑꓷ ꓟꓸ ꓟꓲꓽ

ꓢꓲꓽ ꓫꓬ ꓕꓳꓽ ꓶ ꓗꓪ ꓟ ꓬꓲ-ꓡꓲ-ꓫ-ꓑꓷ ꓠꓬ ꓢ-ꓚꓬ-ꓡꓲ-ꓬ ꓟꓬꓱꓺ ꓔ ꓟ ꓔꓲ ꓒ ꓬꓲ ꓤ ꓟꓶ ꓥ ꓡꓳ= ꓬꓲ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓟꓹ ꓟ ꓟ-ꓡꓲ ꓐꓰ ꓫꓵꓽ ꓤ ꓧꓪ ꓤ ꓜꓳꓽ ꓢꓴ ꓕꓲ ꓣꓳˍ ꓟꓲ ꓥ ꓡꓳ= ꓬꓲ-ꓡꓲ-ꓫ-ꓑꓷ ꓐꓰ ꓢ-ꓚꓬ-ꓡꓲ-ꓬ ꓐꓴ ꓔꓯ “ꓪꓴ-ꓢ ꓕꓵꓼ ꓪ ꓐꓰ ꓙꓵꓽ ꓚꓱꓹ ꓮ ꓙꓵꓽ ꓔꓯ ꓬꓲ ꓜꓶ ꓒꓵꓽ ꓛꓳˍ ꓟ ꓔꓱꓹ ꓜꓳꓽ ꓢꓴ” ꓐꓯ ꓢꓲ ꓡꓴ-ꓘ 1ꓽ6 ꓗꓪ ꓐꓯ ꓔ ꓡꓳ= ꓬꓲ-ꓡꓲ-ꓫ-ꓑꓷ ꓠꓬ ꓞꓳ ꓡꓱꓽ ꓟ ꓥ ꓠꓬꓲ ꓤ ꓠꓱ ꓟꓽ ꓙꓳ= ꓮ ꓟꓶ ꓕꓯ ꓬꓲ ꓠꓬ ꓬꓲ ꓞꓲꓼ ꓮ ꓘꓶꓸ ꓟꓳꓽ ꓡꓰ ꓢꓲ꓾ ꓤ ꓠꓱ ꓦꓵꓻˍ ꓟ ꓦꓬꓼ ꓠꓬꓲˍ ꓟꓲ ꓗꓳꓸ ꓙꓰꓳ=

ꓢ-ꓚꓬ-ꓡꓲ-ꓬ ꓠꓬ ꓢꓲ ꓒ ꓦꓲ ꓗꓪ ꓫꓳꓸ ꓛꓴ ꓔꓲ ꓔꓬ ꓕꓯ꓾ ꓟꓴꓽ ꓗꓪ ꓝꓲ ꓓꓴ Gabriel ꓠꓬ ꓫꓳꓸ ꓛꓴ ꓖꓴ ꓡꓯꓼ ꓙ ꓗꓪ ꓓꓳꓻ ꓡ ꓢꓲ ꓬꓲ ꓔꓯ ꓬꓲ ꓤ ꓟꓶ ꓬꓲ-ꓡꓲ-ꓫ-ꓑꓷ ꓠꓬ ꓤ ꓕꓲ ꓣꓳ ꓦꓵꓻ ꓡˍ ꓟ ꓐꓰ꓾ ꓬꓲ ꓪ ꓠꓬ ꓤ ꓖꓳ ꓕꓲ ꓣꓳ ꓔꓯ ꓬꓳ-ꓦ ꓟꓬꓱ ꓖꓶ ꓠ ꓗꓹ ꓡꓳ= ꓤ ꓠꓱ ꓤ ꓠꓬ ꓢꓲ ꓒ ꓒꓬꓱꓽ ꓕꓯꓽ ꓗꓪ ꓪꓴꓽˍ ꓟ ꓒꓬꓱꓼ ꓡ ꓢꓲ꓾ ꓬꓲ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓐꓰ ꓞꓳ ꓤ ꓮ ꓟꓬꓹ ꓐꓴ ꓠꓬ ꓗꓹ ꓛꓲˍ ꓥꓳ꓾ ꓐꓰ ꓐꓯ ꓖꓶˍ ꓡꓳ= (ꓡꓴ-ꓘ 1ꓽ14-15)

ꓢ-ꓚꓬ-ꓡꓲ-ꓬ ꓠꓬ ꓬꓲ ꓐꓰ ꓬꓲ ꓤ ꓟꓶ ꓠꓬ ꓞꓲꓼ ꓟꓳꓽ ꓢꓴ ꓐꓴ ꓥ ꓠꓬꓲ ꓕꓱ ꓟ ꓮ ꓡꓲ ꓒꓬꓱꓼ ꓡ ꓓꓹ ꓢꓰꓽ꓾ ꓐꓰ ꓠ ꓠꓬꓲˍ ꓡꓳ= ꓖꓳ ꓟ ꓑꓶꓸ ꓓꓴ ꓟꓴꓽ ꓗꓪ ꓝꓲ ꓓꓴ Gabriel ꓠꓬ ꓟꓷꓽ ꓠꓷꓹ ꓝ ꓘꓶꓽ ꓟꓽ ꓐꓲ ꓡ ꓕ ꓑꓳꓸ ꓢ-ꓚꓬ-ꓡꓲ-ꓬ ꓠꓬ ꓫꓸ ꓕꓱ ꓟꓽ ꓐꓰꓼ ꓗꓷ ꓡꓰˍ ꓥꓳ꓾ ꓐꓰ ꓟꓴꓽ ꓗꓪ ꓝꓲ ꓓꓴ ꓡꓰ ꓐꓯ ꓖꓶˍ ꓡꓳ= ꓖꓳ ꓡꓱ ꓠꓬꓲ ꓢ-ꓚꓬ-ꓡꓲ-ꓬ ꓠꓬ ꓖꓳ ꓕꓲ ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲ ꓫꓸ ꓕꓱ ꓟꓽ ꓐꓰꓼ ꓡ ꓗꓷ ꓡꓰꓳ=

ꓬꓲ-ꓡꓲ-ꓫ-ꓑꓷ ꓠꓬ ꓬꓲ ꓔꓯ ꓖꓳ ꓓꓱꓽ ꓗꓪ ꓤ ꓶꓻ ꓡꓰ ꓟ ꓔꓯ ꓢꓷꓸ ꓡꓰ ꓕꓯ꓾ ꓬꓲ ꓠꓬ ꓦ ꓐ ꓥꓪꓽ ꓟ ꓑꓬ ꓗꓷꓳ= ꓬꓲ ꓡꓰ “ꓢꓲ ꓒ ꓡꓰ ꓥꓪ ꓔꓯ ꓬꓰ ꓙ ꓡꓺꓳ= ꓬꓲ ꓣꓱꓽ ꓛꓰ ꓥꓪ ꓔꓯ ꓟꓳꓸ ꓖꓶ ꓡ ꓢꓲ ꓞꓳ ꓤ ꓗꓳ ꓡꓳ ꓗꓪ ꓐꓰ ꓬꓲ ꓡꓰ ꓥꓪ ꓫꓸ ꓔꓳ ꓓꓴ ꓣꓴ ꓦ ꓗꓷꓳ꓾ ꓐꓰ ꓐꓯ ꓢꓲ ꓪꓴ-ꓢ ꓔꓯ ꓫꓱꓸ ꓖꓶˍ ꓡꓳ= (ꓡꓴ-ꓘ 1ꓽ25)

ꓬꓲ-ꓡꓲ-ꓫ-ꓑꓷ ꓤ ꓠꓱ ꓶꓻ ꓡꓰ ꓟ ꓦ ꓐ ꓛꓳꓼ ꓟ ꓙꓳ ꓡ ꓗ ꓠꓯꓸ꓾ ꓟ-ꓡꓲ ꓥˍ ꓟꓲ ꓢꓲ-ꓫꓬ-ꓟ-ꓦ ꓢꓯꓼ ꓪ ꓗꓪ ꓐꓰ ꓤ ꓶꓻ ꓡꓰˍ ꓡꓳ= ꓟꓴꓽ ꓗꓪ ꓝꓲ ꓓꓴ Gabriel ꓡꓰ ꓬꓲ-ꓡꓲ-ꓫ-ꓑꓷ ꓠꓬ ꓤ ꓶꓻ ꓞꓹ ꓟ ꓔꓯ ꓐꓯ ꓖꓶ ꓗꓷ ꓟ ꓑꓶꓸ ꓓꓴ ꓟ-ꓡꓲ ꓠꓬ ꓬꓲ-ꓡꓲ-ꓫ-ꓑꓷ ꓔꓯ ꓡꓳꓸ ꓙ ꓠꓹ ꓟ ꓬꓲ-ꓡꓲ-ꓫ-ꓑꓷ ꓔꓬ ꓟ ꓟꓵꓽ ꓗꓪ ꓙꓰˍ ꓡꓳ (ꓡꓴ-ꓘ 1ꓽ36-37)= ꓕꓱ ꓤ ꓟꓶ ꓤ ꓐꓴ ꓔꓯ ꓕꓲ ꓫꓵꓽ ꓕꓲ ꓧꓪ ꓗꓪ ꓡꓰꓽ ꓗꓶ ꓔ ꓟ ꓠꓬ ꓪꓴ-ꓢ ꓬꓲ ꓠꓵꓻ ꓠꓲꓹ ꓐꓰ ꓞꓳ ꓤ ꓐꓴ ꓔꓯ ꓮ ꓡꓲ ꓟꓬ ꓛꓲ ꓙꓽ ꓗꓳꓻˍ ꓟ ꓬꓲ ꓢꓷꓸ ꓡꓰ ꓓꓴ ꓥ ꓡꓳ= ꓬꓲ ꓪ ꓐꓴ ꓔꓯ ꓫꓵꓽ ꓤ ꓧꓪ ꓤ ꓒꓬꓱꓼ ꓡꓰ ꓝꓲˍ ꓟ ꓗꓪ ꓐꓰ ꓪꓴ-ꓢ ꓠꓬ ꓬꓲ ꓪ ꓔꓯ ꓕꓲ ꓣꓳ ꓛꓳ ꓕꓲ ꓣꓳ ꓠꓲꓹ ꓟ ꓗꓴ ꓖꓶˍ ꓟ ꓐꓰ ꓢꓯꓼ ꓖꓶˍ ꓟ ꓔꓯ ꓑꓯꓹ ꓟꓶ ꓡꓰ ꓝꓲˍ ꓟ ꓥ ꓡꓳ=

ꓟ-ꓡꓲ ꓠꓬ ꓬꓲ-ꓡꓲ-ꓫ-ꓑꓷ ꓦꓲ ꓗꓪ ꓛꓲ ꓡ ꓗꓷ ꓢꓲ꓾ ꓟ-ꓡꓲ ꓒꓵꓽ ꓗ ꓬꓰˍ ꓟ ꓔꓯ ꓬꓲ-ꓡꓲ-ꓫ-ꓑꓷ ꓑ ꓙꓽ ꓡꓰ ꓕꓯ ‘ꓶꓻ ꓞꓹ ꓟ ꓤ ꓠꓱ ꓤ ꓠꓬ ꓤ ꓘꓶ ꓗꓪ ꓔꓷꓹ ꓡꓵ ꓡˍ ꓡꓳ= ꓝꓮꓲ ꓬꓲ-ꓡꓲ-ꓫ-ꓑꓷ ꓠꓬ ꓢꓲ-ꓫꓬ-ꓟ-ꓦ ꓐꓲ ꓡꓰ ꓢꓲ꓾ ꓢꓯꓼ ꓓꓽ ꓟ ꓡꓰ “ꓤ ꓟꓶ ꓤ ꓮ ꓙꓵꓽ ꓕꓯꓽ ꓢꓲ ꓠꓴ ꓠꓬ ꓶꓼ ꓙꓳ ꓫꓱꓹ ꓙꓳˍ ꓡꓳ= ꓠꓴ ꓖꓳ ꓓꓱꓽ ꓗꓪ ꓶꓻ ꓞꓹ ꓟ ꓤ ꓠꓱ ꓤ ꓥˍ ꓟꓲ ꓶꓼ ꓙꓳ ꓫꓱꓹ ꓙꓳˍ ꓡꓳ= ꓥꓪ ꓢꓲ ꓒ ꓬꓲ ꓟꓹ ꓟ ꓥꓪ ꓔꓯ ꓔꓱꓹ ꓠꓬꓲ ꓡˍ ꓟ ꓔꓯ꓾ ꓥꓪ ꓮ ꓡꓲ ꓘꓳ ꓣꓴ ꓒꓵꓽˍ ꓢꓰꓽ= ꓠꓴ ꓒꓵꓽ ꓗ ꓐꓯ ꓘꓶꓽ ꓥꓪ ꓑ ꓙꓽ ꓡꓰ ꓕꓯ ꓡꓰ꓾ ꓥꓪ ꓤ ꓘꓶ ꓗꓪ ꓟ ꓤ ꓠꓱ ꓤ ꓠꓬ ꓗꓹ ꓛꓲ ꓠꓬꓲ ꓔꓷꓹ ꓡꓵ ꓡꓺꓳ= ꓢꓲ ꓒ ꓬꓲ ꓔꓯ ꓐꓯ ꓗꓷ ꓟ ꓮ ꓙꓵꓽ ꓐꓲ ꓡˍ ꓥꓳ꓾ ꓐꓰ ꓙꓵꓻ ꓢꓴ ꓤ ꓟꓶ ꓤ ꓠꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓡꓳ꓾” ꓐꓰ ꓐꓯ ꓡꓳ’ (ꓡꓴ-ꓘ 1ꓽ41-45)= ꓟ-ꓡꓲ ꓔꓯ ꓒꓬꓱꓼ ꓔꓬ ꓟ ꓔꓯ ꓟ-ꓡꓲ ꓕꓲ ꓘꓶꓽˍ ꓟꓲ ꓟꓽ ꓫꓸ ꓕꓱ ꓗꓷ ꓕꓯ ꓡꓰ ꓢꓲꓽ-ꓫꓬ-ꓟ-ꓦ ꓠꓬ ꓬꓲ-ꓡꓲ-ꓫ-ꓑꓷ ꓔꓯ ꓐꓯ ꓖꓶ ꓗꓷ ꓟ ꓥ ꓡꓳ=

ꓬꓲ-ꓡꓲ-ꓫ-ꓑꓷ ꓤ ꓠꓱ ꓦꓵꓻ ꓝꓲꓸ ꓛꓲ ꓡ ꓢꓲ꓾ ꓤ ꓠꓱ ꓦꓵꓻ ꓗꓷ ꓗ ꓠꓯꓸ (8) ꓠꓬꓲ ꓕꓯ ꓤ ꓠꓱ ꓤ ꓔꓯ ꓶˍ ꓟ ꓗ ꓫꓵ ꓬꓰ ꓖꓶ ꓠꓹ ꓟ ꓐꓱ ꓶ ꓠꓶꓽ ꓛꓳꓽ ꓕꓲ ꓛꓳˍ ꓐꓰ ꓬꓲ ꓫꓵꓽ ꓬꓲ ꓧꓪ ꓐꓴ ꓠꓬ ꓖꓳ ꓗꓪ ꓛꓲ ꓡˍ ꓡꓳ= ꓦꓬꓼ ꓠꓬꓲ ꓖꓳ ꓟ ꓗꓪ ꓤ ꓠꓱ ꓤ ꓐꓴ ꓔꓯ ꓫꓵꓽ ꓤ ꓧꓪ ꓤ ꓐꓴ ꓗꓳ ꓡꓳ ꓗꓪ ꓙꓳˍ ꓟ ꓟꓬꓱ ꓟꓬꓱ ꓖꓶ ꓠꓹ ꓟ ꓬꓲ ꓡꓲꓽ ꓙꓳˍ ꓟ ꓦꓬꓼ ꓠꓬꓲ ꓥ ꓡꓳ= ꓖꓳ ꓡꓱ ꓥˍ ꓟꓲ ꓬꓲ-ꓡꓲ-ꓫ-ꓑꓷ ꓡꓰ ꓬꓲ ꓤ ꓟꓬꓱ ꓔꓯ “ꓬꓳ-ꓦ” ꓐꓰ ꓟꓬꓱ ꓖꓶ ꓠꓹ ꓟ ꓐꓯ ꓖꓶˍ ꓡꓳ= ꓖꓳ ꓕꓲ ꓙꓵꓹ ꓗꓪ ꓛꓲ ꓢ-ꓚꓬ-ꓡꓲ-ꓬ ꓠꓽ ꓫꓸ ꓕꓱ ꓟꓽ ꓐꓰꓼ ꓡ ꓢꓰꓽ=

ꓠꓶꓽ ꓛꓳ ꓕꓲ ꓛꓳ ꓐꓴ ꓥˍ ꓟꓲ ꓬꓲ-ꓡꓲ-ꓫ-ꓑꓷ ꓔꓯ ꓠꓴ ꓫꓵꓽ ꓠꓴ ꓧꓪ ꓘꓴꓽ ꓗꓪ ꓬꓳ-ꓦ ꓟꓬꓱ ꓖꓶ ꓔ ꓢꓴ ꓟꓽ ꓙꓳ ꓠꓬꓲ ꓬꓲ ꓔꓯ ꓢ-ꓚꓬ-ꓡꓲ-ꓬ ꓐꓰ ꓟꓬꓱ ꓖꓶ ꓠꓯꓹ ꓡꓳ꓾ ꓐꓰ ꓐꓯ ꓖꓶˍ ꓡꓳ= ꓖꓳ ꓡꓱ ꓥˍ ꓟꓲ ꓢ-ꓚꓬ-ꓡꓲ-ꓬ ꓠꓬ ꓕꓳ ꓡ ꓒꓬꓽ ꓧꓪ ꓢꓲ “ꓬꓳ-ꓦ” ꓟꓬꓱ ꓔꓯ ꓐꓳ ꓗꓷꓳ= ꓕꓱ ꓡꓱ ꓬꓰˍ ꓟ ꓗꓪ ꓐꓰ ꓟꓴꓽ ꓗꓪ ꓝꓲ ꓓꓴ ꓐꓯ ꓖꓶ ꓡˍ ꓟ ꓔꓯ ꓬꓲ ꓙꓵꓻˍ ꓟ ꓔꓯ ꓟꓸ ꓖꓶ ꓗꓷ ꓢꓲ ꓠꓬꓲ꓾ ꓖꓳ ꓟ ꓪꓴꓸ ꓠꓬꓲ ꓬꓲ ꓠꓬ ꓝꓮꓲ ꓕꓲ ꓧꓪꓹ ꓫꓸ ꓕꓱ ꓐ ꓡ ꓗꓷꓳ (ꓡꓴ-ꓘ 1ꓽ57-64) =

ꓬꓲ-ꓡꓲ-ꓫ-ꓑꓷ ꓬꓲ ꓤ ꓠꓬ ꓪꓴꓽ ꓡ ꓢꓲ ꓠꓬꓲ꓾ ꓪꓴ-ꓢ ꓟꓲ ꓙꓬꓽ ꓗꓪ ꓬꓲ-ꓡꓲ-ꓬˍ ꓡꓰ ꓐꓰ ꓪꓽ ꓠꓬꓲ ꓠꓬꓲˍ ꓡꓰꓽ ꓢꓲ ꓒ ꓐꓱ ꓶ ꓟꓬꓱꓽ ꓬꓰ ꓢꓴ ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓒꓬꓱꓼ ꓡ ꓗꓷꓳ (ꓡꓴ-ꓘ 1ꓽ17)= ꓝꓮꓲ ꓠꓬ ꓟꓷꓽ ꓠꓷꓹ ꓝ ꓒ ꓟ-ꓡ-ꓘꓷ ꓟꓷꓽ ꓠꓷꓹ ꓝ ꓗꓷ ꓟˍ ꓡꓰ ꓐꓰ ꓢꓲ ꓒ ꓙ ꓖꓴ ꓙꓽ ꓖꓶ ꓢꓴ ꓒꓬꓱꓼ ꓡ ꓗꓷꓳ= (ꓟ-ꓡ-ꓘꓷ 3ꓽ1 ꓹ ꓡꓴ-ꓘ 1ꓽ76꓾ ꓬꓳ-ꓦ 3ꓽ1-6)

ꓬꓲ-ꓡꓲ-ꓫ-ꓑꓷ ꓟꓸ ꓟꓲꓽ ꓗꓪ ꓐꓰ ꓪꓴ-ꓢ ꓔꓯ ꓦ ꓡꓱ ꓐꓳˍ ꓟ ꓠꓬ ꓮ ꓡꓲ ꓥˍ ꓟꓲ ꓪꓴ-ꓢ ꓟꓽ ꓟꓳꓻ ꓟꓽ ꓗꓷ ꓡꓰ꓾ ꓡꓯꓼ ꓫꓴ ꓟꓽ ꓟꓶ ꓐꓰˍ ꓟꓲ ꓟꓽ ꓗꓷ ꓡꓰ꓾ ꓐꓯ ꓟ ꓣꓳ ꓮ ꓙꓵꓽ ꓔꓯ ꓢꓷꓸ ꓙ ꓟꓳ ꓙ ꓖꓶ ꓡ ꓔꓬ ꓡꓳ= ꓬꓲ ꓠꓬ ꓮ ꓟꓬꓹ ꓘꓳꓼ ꓦꓴꓻ ꓠꓬꓹ ꓗꓷ ꓟ꓾ ꓮ ꓟꓬꓹ ꓘꓳꓼ ꓪꓽ ꓘꓴ ꓗꓷ ꓢꓲ꓾ ꓙꓵꓻ ꓠꓲꓹ ꓠꓯꓸꓼ ꓗꓪ ꓪꓴ-ꓢ ꓔꓯ ꓪꓽ ꓘꓴˍ ꓟ ꓮ ꓟꓬꓹ ꓘꓳꓼ ꓬꓰ ꓗꓷ ꓟ ꓗꓪ ꓐꓰ ꓪꓴ-ꓢ ꓡꓰ ꓬꓲ ꓔꓯ ꓟꓽ ꓖꓶ ꓡ ꓟ ꓑꓶꓸ ꓓꓴ ꓪꓴ-ꓢ ꓠꓬ ꓬꓲ ꓔꓯ ꓟꓳꓻ ꓟꓽ ꓟꓵ ꓡ? ꓐꓰˍ ꓟꓲ ꓓꓵꓽ ꓙ ꓟꓶ ꓓꓴ ꓙꓳ ꓡˍ ꓥꓳ= ꓖꓳ ꓡꓱ ꓐꓯ ꓥ ꓟꓲ ꓪꓴ-ꓢ ꓠꓬ ꓬꓲ ꓔꓯ ꓮ ꓕꓯˍ ꓟꓲ ꓡꓳꓸ ꓙ ꓔꓬ ꓡꓳ=

ꓣꓳ ꓥˍ ꓟꓲ ꓖꓳ ꓟ ꓡꓰ ꓐꓰ ꓥꓳ= ꓪꓴ-ꓢ ꓔꓯ ꓶꓼ ꓓꓰꓽ ꓔ ꓟ ꓠꓬ ꓟꓶ ꓫꓵˍ ꓟˍ ꓟꓲ ꓙꓳ ꓗꓴꓸˍ ꓥꓳ= ꓖꓳ ꓡꓱ ꓥ ꓟꓲ ꓪꓴ-ꓢ ꓠꓬ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓐꓱ ꓶ ꓬꓲ ꓔꓶ ꓙꓱꓼ꓾ ꓬꓲ ꓠꓲꓹ ꓡꓶꓽ ꓔꓯ ꓐꓲ ꓡꓰ ꓝꓲ ꓔꓬ ꓟ ꓥ ꓡꓳ꓾ ꓐꓰ ꓐꓯ ꓖꓶ ꓡ ꓔꓬ ꓡꓳ=

ꓪꓴ-ꓢ ꓠꓬ ꓬꓲ ꓙ ꓟꓳ ꓘꓶꓽ ꓔꓯ ꓮ ꓕꓯˍ ꓟꓲ ꓕꓶꓺ ꓡꓰ ꓝꓲˍ ꓡꓳ= ꓣꓳ ꓪꓽ ꓘꓴˍ ꓟ ꓔꓯ ꓪꓴ-ꓢ ꓡꓰ ꓞꓼ ꓞꓼ ꓟꓽ ꓓꓽ ꓔꓳꓹ ꓖꓶ ꓡ ꓥˍ ꓟꓲ ꓣꓳ ꓪꓽ ꓘꓴ ꓘꓶꓽ ꓔꓯ ꓬꓲ ꓑ ꓙꓽˍ ꓡꓳ= ꓢꓯꓸ ꓔꓬ ꓟ ꓪꓴ-ꓢ ꓠꓬ ꓣꓳ ꓔꓯ ꓟꓳꓻˍ ꓡꓳ= ꓣꓳ ꓠꓬ ꓞꓲꓼ ꓟꓳꓽ ꓡˍ ꓕꓯ ꓥˍ ꓟꓲ ꓪꓴ-ꓢ ꓠꓬ ꓣꓳ ꓔꓯ ꓠꓱꓸ ꓐꓯ ꓢꓴ ꓔꓯ ꓢꓯꓼ ꓟꓬ ꓖꓶ ꓠꓹ ꓟ ꓐꓱ ꓶ ꓣꓳ ꓔꓯ ꓣꓱꓽˍ ꓟꓲ ꓣꓱꓽˍ ꓥꓳ=