ꓗꓳ-ꓫ-ꓠ ꓡꓳ ꓒꓱ ꓟꓸ ꓟꓲꓽ

ꓢꓲꓽ ꓫꓬ ꓕꓳ ꓶ ꓗꓪ ꓟ ꓡꓳ ꓒꓱ ꓚꓱꓹ ꓔꓯ ꓢꓳˍ ꓟ ꓙꓵꓹ

ꓗꓳ-ꓫ-ꓠ ꓡꓳ ꓒꓱ (Goshen)

Goshen ꓐꓯˍ ꓟ ꓔꓯ ꓕꓲ ꓐꓱ ꓠꓬ Gosen ꓐꓯ ꓡꓳ= ꓣꓳ ꓡꓲ-ꓢꓴ ꓢꓲꓽ ꓫꓬ ꓕꓳ ꓶ ꓗꓪ ꓠꓬ ꓗꓳ-ꓫ-ꓠ ꓐꓰ ꓟꓬꓱ ꓔ ꓟ ꓥ ꓡꓳ= ꓕꓱ ꓟ ꓠꓬ ꓬ-ꓗꓴ ꓬꓲ ꓤ ꓬꓳ-ꓢꓷ ꓬꓲ-ꓙꓲ ꓟꓵꓽ ꓗꓪ ꓔꓬ ꓕꓯ ꓩ-ꓣ-ꓳ ꓪ ꓔꓲ ꓡꓰ ꓬꓲ ꓔꓯ ꓖꓶ ꓔ ꓟ ꓕꓲ ꓔꓶꓸ ꓥ ꓡꓳ= ꓬꓲ ꓚꓰ ꓬꓲ ꓪꓴꓸ 45ꓽ9-10 ꓗꓪ ꓣꓳ ꓡꓳꓸ ꓟꓳ ꓪ ꓓꓹ ꓡꓳ= ꓗ ꓠꓯꓸ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓠꓬ ꓬꓲ-ꓙꓲ ꓟꓵꓽ ꓗꓪ ꓐꓰ ꓓꓳꓻ ꓙꓰˍ ꓕꓯ ꓗꓳ-ꓫ-ꓠ ꓔꓯ ꓡꓳ ꓔꓲꓸ ꓢꓲ ꓓꓳ ꓡˍ ꓟ ꓥ ꓡꓳ=

ꓗꓳ-ꓫ-ꓠ ꓠꓬ ꓠꓲꓡꓰ ꓬꓲꓻ ꓟ ꓬꓲ ꓘꓶꓽ ꓗꓪ ꓠꓱꓸ ꓦꓱꓽ ꓧꓪꓽ ꓮ ꓘꓶꓸ ꓙꓲˍ ꓟ ꓟꓵꓽ ꓮ ꓘꓶꓸ ꓙꓲˍ ꓟ ꓕꓲ ꓔꓶꓸ ꓥ ꓡꓳ= ꓠꓲꓡꓰ ꓬꓲꓻ ꓟ ꓐꓶ ꓓꓳ ꓕꓲ ꓛꓱꓽ ꓗꓪ ꓙꓳˍ ꓟ ꓕꓲ ꓔꓶꓸ ꓥ ꓡꓳ= ꓢꓲꓽ ꓫꓬ ꓕꓳ ꓶ ꓗꓪ ꓮ ꓡꓰ ꓟꓳꓻ ꓪ ꓓꓹ ꓥ ꓐꓯ ꓠꓬ ꓬꓲ ꓚꓰ ꓬꓲ ꓪꓴ ꓕꓳ ꓶ ꓗꓪ ꓬ-ꓗꓴ ꓬꓲ ꓤ ꓥ ꓟ ꓬꓲ-ꓢꓷ-ꓡꓰ ꓐꓴ ꓠꓬ ꓦꓯ-ꓐ-ꓣꓳꓠ ꓗꓪ ꓔꓬ ꓡꓳ= ꓖꓳ ꓡꓱ ꓦꓯ-ꓐ-ꓣꓳꓠ ꓗꓪ ꓔꓬ ꓟ ꓙꓵꓹ ꓗꓪ ꓫꓸ ꓓꓴ ꓟꓷꓼ ꓢꓴ꓾ ꓫꓸ ꓘꓳꓼ ꓦꓰꓼ ꓟꓷꓼ ꓘꓳꓼ ꓓꓳ ꓡ ꓢꓲ ꓠꓬꓲ ꓬꓲ ꓪ ꓠꓬ ꓮ ꓘꓶꓸ ꓫ ꓔꓬ ꓡꓳ= ꓖꓳ ꓕꓯ ꓬꓲ ꓪ ꓜꓽ ꓪꓳꓽ ꓡꓳ ꓪꓳꓽ ꓪ ꓓꓹ ꓟ ꓠꓬ ꓬꓲ-ꓙꓲ ꓟꓵꓽ ꓗꓪ ꓡꓰꓽ ꓥ ꓡꓳ=

ꓬ-ꓗꓴ ꓬꓲ ꓤ ꓐꓴ ꓠꓬ ꓜꓽ ꓓꓴ ꓓꓳ ꓓꓴ꓾ ꓐꓵ ꓞꓶꓽ ꓐꓵ ꓟꓲ ꓪꓴ ꓠꓹ ꓟ ꓐꓱ ꓶ ꓡˍ ꓐꓷ= ꓖꓳ ꓟ ꓠꓬ ꓦꓰꓼ ꓟꓷꓼ ꓘꓳꓼ ꓓꓳ ꓡ ꓗ ꓠꓯꓸ ꓠꓬꓲꓽ ꓘꓳꓼ ꓕꓲ ꓘꓳꓼ ꓗꓪ ꓥ ꓡꓳ= ꓖꓳ ꓕꓱ ꓬꓳ-ꓢꓷ ꓠꓬ ꓬꓲ ꓮ ꓬꓲꓼ ꓐꓴ ꓔꓯ ꓜꓲ ꓗꓷ ꓗ ꓠꓯꓸ ꓬꓲ ꓮ ꓬꓲꓼ ꓐꓴ ꓔꓯ ꓬꓲ-ꓙꓲ ꓟꓵꓽ ꓗꓪ ꓔꓬ ꓡ ꓠꓹ ꓟ꓾ ꓬꓲ ꓐꓹ ꓐ ꓔꓯ ꓥ ꓟꓲ ꓧꓳꓽ ꓔꓯꓹ ꓡ ꓠꓹ ꓟ ꓐꓯ ꓡꓳ= ꓖꓳ ꓡꓱ ꓢꓲ ꓠꓬꓲ ꓗꓳ-ꓫ-ꓠ ꓕꓲ ꓔꓶꓸ ꓗꓪ ꓔꓬ ꓝꓲ ꓗꓷꓳ=

ꓗꓳ-ꓫ-ꓠ ꓡꓳ ꓒꓱ ꓠꓬ ꓬꓲ-ꓙꓲ ꓟꓵꓽ ꓗꓪ ꓟꓽ ꓓ ꓟꓵꓽ ꓙꓲˍ ꓟ ꓕꓲ ꓔꓶꓸ ꓥ ꓡꓳ= ꓔꓶ ꓫꓵꓽ ꓔꓶ ꓙꓰꓽ ꓮ ꓘꓶꓸ ꓙꓲˍ ꓟ ꓡꓰꓽ ꓟꓽ ꓞꓲꓺ ꓙꓱꓽ ꓤ ꓥ ꓟꓲ ꓮ ꓘꓶꓸ ꓦꓵꓻ ꓙꓲˍ ꓟ꓾ ꓬꓲ ꓜꓽ ꓮ ꓘꓶꓸ ꓙꓳˍ ꓟ꓾ ꓟꓳꓼ ꓠꓲꓹ ꓛꓵꓼ ꓮ ꓘꓶꓸ ꓙꓳˍ ꓟ ꓕꓲ ꓔꓶꓸ ꓥ ꓡꓳ= ꓬꓲ ꓚꓰ ꓬꓲ ꓪꓴꓸ 46ꓽ34 ꓗꓪ ꓗꓳ-ꓫ-ꓠ ꓠꓬ ꓔꓬ ꓠꓹ ꓟ ꓐꓱ ꓶ ꓮ ꓘꓶꓸ ꓙꓲˍ ꓟ ꓕꓲ ꓔꓶꓸ ꓥ ꓢꓲ꓾ ꓮ ꓣꓳ ꓡꓳꓸ ꓒ ꓐꓴ ꓐꓱ ꓶˍ ꓟꓲ ꓮ ꓘꓶꓸ ꓙꓲˍ ꓟ ꓕꓲ ꓔꓶꓸ ꓥ ꓡꓳ꓾ ꓐꓰ ꓐꓯ ꓔ ꓡꓳ= 

ꓬꓳ-ꓢꓷ ꓫꓵꓻ ꓗ ꓠꓯꓸ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓬꓽ ꓡ ꓟ ꓪꓴꓸ ꓠꓬꓲ ꓬꓲ-ꓙꓲ ꓟꓵꓽ ꓞꓳ ꓤ ꓐꓴ ꓠꓬ ꓙꓽ ꓫꓸ ꓢꓲ ꓬꓲ ꓪ ꓔꓯ ꓬꓲ ꓔꓶꓸ ꓟꓽ ꓖꓶ꓾ ꓚꓳ ꓑꓸ ꓬꓰ ꓝꓲˍ ꓟ  ꓚꓱꓹ ꓔꓯ ꓡꓳꓸ ꓟꓳˍ ꓡꓳ= ꓖꓳ ꓡꓱ ꓢꓲ ꓠꓬꓲ 430 ꓘꓳꓼ ꓛꓲ ꓡ ꓕꓯ ꓗ ꓠꓯꓸ ꓠꓬ ꓟꓳ-ꓫꓲ ꓡꓰ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓔꓯ ꓬꓲ-ꓙꓲ ꓟꓵꓽ ꓗꓪ ꓐꓰ ꓧꓳꓽ ꓔꓯꓹ ꓙꓰˍ ꓡꓳ= ꓖꓳ ꓕꓯ ꓗꓳ-ꓫ-ꓠ ꓗꓪ ꓚꓳꓸ ꓢ-ꓘꓳ ꓐꓯ ꓟ ꓕꓲ ꓔꓶꓸ ꓬꓲ ꓪ ꓛꓲ ꓡˍ ꓡꓳ= ꓖꓳ ꓟ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓬꓲ-ꓙꓲ ꓟꓵꓽ ꓗꓪ ꓐꓰ ꓓꓳ ꓡˍ ꓟ ꓬꓲ ꓪꓴꓸ ꓕꓲ ꓔꓶꓸ ꓥ ꓡꓳ= 

ꓖꓳ ꓡꓱ ꓢꓲ ꓠꓬꓲ ꓠꓲꓡꓰ ꓬꓲꓻ ꓟ ꓔꓯ 41 ꓧꓪꓹ ꓬꓲ ꓪ ꓠꓬ ꓖꓴꓽ ꓡ ꓢꓲ ꓠꓬꓲ꓾ ꓙ ꓡ ꓢꓲ ꓠꓬꓲ ꓬꓲ ꓪ ꓠꓬ ꓟꓳꓮꓐ ꓐꓯˍ ꓟ ꓪ ꓓꓰ ꓟꓵꓽ ꓗꓪ ꓬꓲ ꓪ ꓔꓬ ꓡꓳ= ꓬꓲ-ꓙꓲ ꓟꓵꓽ ꓗꓪ ꓬꓲ-ꓙꓲ ꓪ ꓔꓲ 26 ꓣꓳ ꓕꓲ ꓣꓳ ꓙꓵꓽˍ ꓕꓯ꓾ ꓐꓚ 672 ꓘꓳꓼ ꓐꓰ 525 ꓘꓳꓼ ꓠꓬꓲꓽ ꓗꓴꓸ ꓚꓸꓼ ꓗꓪ ꓔꓬ ꓗꓷ ꓟ ꓥ ꓡꓳ=