ꓘꓴ ꓜꓲꓼ ꓞꓳ ꓚꓺ ꓟꓲꓽ (Church history)

       ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓔꓯ ꓙꓵꓽ ꓢꓴ ꓢꓲꓽ ꓒꓽ ꓜꓴꓻ ꓚꓱꓹ  

(Holy SEE) ꓐꓯ ꓟ ꓠꓬ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓗꓪ ꓐꓰ ꓙꓵꓽ ꓢꓴ ꓢꓲꓽ ꓒꓽ ꓜꓴꓻ ꓔꓯ ꓐꓯ ꓟ ꓥ ꓡꓳ= ꓣꓳ-ꓟ ꓡꓳ ꓒꓱ ꓗꓪ ꓐꓰ  ꓔꓲꓺ ꓒ ꓪ ꓔꓲꓸ  ꓡꓰ ꓧꓳꓽ ꓪꓴꓸ ꓟꓴ ꓔꓬ ꓟ  ꓙꓵꓽ ꓢꓲꓽ ꓒꓽ ꓜꓴꓻ ꓐꓴ ꓠꓬ ꓟꓵꓽ ꓗꓳꓹ ꓓꓵꓺ ꓓꓵꓺ ꓗꓪ ꓔꓬ ꓟ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓐꓱ ꓶ ꓙꓵꓽ ꓚꓱꓹ꓾ ꓟꓲ ꓠꓯ ꓡ ꓞꓳ ꓞꓳ ꓙꓳ ꓚꓱꓹ ꓐꓰ ꓫꓵꓽ ꓪꓴ ꓫꓬꓹ ꓖꓶꓽ ꓚꓱꓹ ꓮ ꓟꓬꓹ ꓫꓵꓽ ꓔꓯ ꓬꓰˍ ꓟ ꓥ ꓡꓳ= ꓣꓳ-ꓟ ꓢ-ꓢꓶ-ꓠ ꓗꓪ ꓟ ꓔꓲꓺ ꓒ ꓓ ꓠꓬ ꓔꓲꓺ ꓒ ꓪ ꓔꓲ ꓥ ꓡꓳ= ꓣꓳ-ꓟ ꓗꓴꓷꓼ ꓠꓬ ꓟꓵꓽ ꓗꓳꓹ ꓓꓵꓺ ꓓꓵꓺ ꓗꓪ ꓔꓬ ꓟ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓬꓲ ꓚꓰꓺˍ ꓟꓲ ꓥ ꓡꓳ=

ꓗ-ꓕꓳ-ꓡꓲ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴꓸ ꓟꓴ ꓔꓬ ꓟ  ꓙꓵꓽ ꓢꓲꓽ ꓒꓽ ꓜꓴꓻ ꓐꓴ ꓠꓬ Vatican ꓗꓴꓷꓼ ꓗꓪ ꓔꓬ ꓢꓲ ꓠꓬꓲ꓾   ꓟꓬꓱꓽ ꓬꓰ ꓔꓬ ꓟ ꓥ ꓡꓳ= ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓠꓬ ꓟꓵꓽ ꓗꓳꓹ ꓓꓵꓺ ꓓꓵꓺ ꓗꓪ ꓙꓳˍ ꓟ ꓗꓴꓷꓼ ꓮ ꓙꓵꓽ ꓐꓰ ꓙꓻ ꓡꓯ ꓘꓳˍ ꓟ ꓥ ꓡꓳ= ꓟꓵꓽ ꓗꓳꓹ ꓓꓵꓺ ꓓꓵꓺ ꓗꓪ ꓙꓳˍ ꓟ ꓗꓴꓷꓼ ꓐꓴ ꓔꓯ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓠꓬ ꓔꓲꓺ ꓒ ꓪ ꓔꓲ ꓡꓰ ꓧꓳꓽ ꓪꓴꓸ ꓟꓴ ꓔꓬ ꓟ ꓙꓵꓽ ꓢꓴ ꓢꓲꓽ ꓒꓽ ꓜꓴꓻ ꓔꓯ ꓘꓳꓹ ꓣꓴˍ ꓡꓳ= (Holy see) ꓟꓬꓱꓺ ꓔꓯ (Vatican) ꓟꓬꓱꓺ ꓐꓰ ꓣꓱꓽˍ ꓥˍ ꓟꓲ꓾ ꓟꓬꓱꓺ ꓕꓲ ꓟ ꓐꓰ ꓕꓲ ꓟ ꓠꓬ ꓟꓽ ꓫꓱꓸ ꓡꓯ ꓘꓳ=(Vatican City State) ꓠꓬ 1929 ꓘꓳꓼ ꓕꓯ ꓒꓬꓱꓼ ꓡ ꓟ ꓥ ꓢꓲ ꓠꓬꓲ꓾ (Holy See) ꓟꓬꓱꓺ ꓠꓬ ꓬꓲ ꓪꓴꓸ ꓪꓴ-ꓢ ꓦ ꓡꓱ ꓢꓴ  ꓐꓴ ꓞꓳ ꓙꓳ ꓔꓬ ꓟ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓙꓵꓽ ꓚꓱꓹ ꓧꓳꓽ ꓪꓴꓸ  ꓟꓴ ꓔꓬ ꓟ ꓚꓱꓹ ꓔꓯ ꓐꓯ ꓔ ꓟ ꓥˍ ꓡꓳ=

ꓟꓵꓽ ꓗꓳꓹ ꓓꓵꓺ ꓓꓵꓺ ꓗꓪ ꓙꓳˍ ꓟ ꓗꓴꓷꓼ ꓮ ꓟꓬꓹ ꓐꓰ  ꓙꓻ ꓡꓯ ꓘꓳ ꓓꓴ ꓬꓰˍ ꓕꓯ (Vatican City State) ꓜꓴꓻ ꓔꓯ ꓟꓽ ꓙꓻ ꓡꓯ ꓘꓳ꓾ (Holy See) ꓙꓵꓽ ꓢꓲꓽ ꓒꓽ ꓜꓴꓻ ꓐꓰ  ꓙꓻ ꓡꓯ ꓘꓳꓹ ꓡꓳ= (Holy See) ꓐꓰ (Vatican City State) ꓟꓬꓱꓽ ꓬꓰˍ ꓟ ꓟꓽ ꓫꓱꓸ ꓡꓯ ꓘꓳ ꓟ ꓥˍ ꓡꓳ= (Holy See) ꓗꓴꓷꓼ ꓙꓵꓼ ꓢꓲꓽ ꓒꓽ ꓜꓴꓻ ꓠꓬ꓾ ꓣꓳ-ꓟ ꓗꓴꓷꓼ ꓘꓴꓽ ꓗꓪ ꓔꓬ ꓢꓲ ꓠꓬꓲ ꓟꓬꓱꓽ ꓬꓰ ꓔꓬ ꓟ ꓥˍ ꓡꓳ= ꓖꓳ ꓗꓪ ꓟꓬꓱꓽ ꓬꓰ ꓔꓬ ꓢꓴ ꓠꓬ(2750) ꓣꓳ ꓥˍ ꓡꓳ= (Holy See) ꓜꓴꓻ ꓐꓰ ꓟꓵꓽ ꓗꓳꓹ ꓓꓵꓺ ꓓꓵꓺ ꓗꓪ ꓙꓳˍ ꓟ ꓗꓴꓷꓼ ꓐꓴ ꓐꓰ ꓙꓻ ꓡꓯ ꓘꓳ ꓠꓹ ꓟ (333) ꓣꓳ ꓔꓬ ꓟ ꓥ ꓡꓳ= Vatican City State ꓗꓪ ꓟꓬꓱꓽ ꓬꓰ ꓔꓬ ꓢꓴ ꓠꓬ (1909) ꓣꓳ ꓥ ꓡꓳ= Holy See ꓗꓴꓷꓼ ꓙꓵꓽ ꓜꓴꓻ ꓗꓪ ꓐꓰ ꓫꓬ ꓖꓶ ꓔ ꓟ ꓕꓳ ꓶ ꓑꓷꓠꓽ ꓠꓬ (Holy See) ꓜꓴꓻ ꓗꓪ ꓟꓬꓱꓽ ꓬꓰ ꓔꓬ ꓢꓴ ꓐꓴ ꓐꓱ ꓶ ꓥ ꓡꓳ= Vatican City State ꓗꓪ ꓐꓰ ꓫꓬ ꓖꓶ ꓔ ꓟ ꓕꓳ ꓶ ꓑꓷꓠꓽ ꓠꓬ Vatican ꓗꓴꓷꓼ ꓘꓴꓽ ꓗꓪ ꓞꓳ ꓙꓳ ꓢꓯꓸ ꓔꓬ ꓟ ꓑ ꓫꓬ ꓐꓴ ꓐꓱ ꓶ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓙꓰˍ ꓕꓯ ꓣꓴ ꓠꓹ ꓟ ꓫꓬ ꓖꓶ ꓔ ꓟ ꓕꓳ ꓶ ꓑꓷꓠꓽ ꓥ ꓡꓳ= ꓔꓲꓺ ꓒ ꓪ ꓔꓲ ꓔꓬ ꓟꓵꓽ Vatican ꓗꓴꓷꓼ ꓗꓪ ꓫꓬ ꓔꓬ ꓟ ꓝꓲ ꓓꓴ ꓒꓲ-ꓕꓱ ꓪꓽ ꓘꓴ ꓦꓲꓻ ꓠꓬ ꓟꓲ ꓠꓯ ꓗꓪ ꓪꓴꓽ ꓡꓳꓹ ꓬꓰ ꓟ ꓪꓽ ꓘꓴ ꓦꓲꓻ ꓥ ꓡꓳ=