ꓘꓴ ꓜꓲꓼ ꓞꓳ ꓚꓻ ꓟꓲꓽ

ꓢꓲꓽ ꓫꓬ ꓟ ꓟꓹ ꓟ ꓟ-ꓡꓲ-ꓬ ꓠꓬ ꓝꓴꓲ ꓟꓽ ꓙꓳ ꓙꓳ ꓖꓳꓽ ꓓꓱ ꓠꓬꓲꓽ ꓔꓱꓹ ꓐꓲˍ ꓟ ꓚꓱꓹ

ꓕꓲ ꓟꓲ ꓠꓯ ꓡꓱꓸꓼ ꓗꓪ ꓔꓬ ꓟ ꓔꓲꓺ ꓒ ꓓꓽ ꓐꓴ ꓠꓬ꓾ ꓢꓲꓽ ꓫꓬ ꓟ ꓟꓹ ꓟ ꓟ-ꓡꓲ-ꓬ ꓝꓴꓲꓸ ꓟꓽ ꓙꓳ ꓙꓳ ꓖꓳꓽ ꓓꓱ ꓠꓬꓲꓽ ꓔꓱꓹ ꓒꓬꓱꓼ ꓡꓰ ꓟ ꓚꓱꓹ ꓔꓯ ꓘꓴ ꓜꓲꓼ ꓞꓳ ꓗꓪ ꓧꓳꓽ ꓪꓴꓸ ꓟꓴ ꓔꓬ ꓟ ꓔꓲꓺ ꓒ ꓪ ꓔꓲ ꓡꓰ ꓐꓯ ꓑꓶꓸ ꓖꓶꓽ ꓠꓹ ꓟ ꓓꓰꓽˍ ꓟ ꓥ ꓡꓳ= ꓔꓲꓺ ꓒ ꓪ ꓔꓲ ꓠꓬ꓾ ꓔꓲꓺ ꓒ ꓓꓽ ꓐꓴ ꓐꓰ ꓟꓲ ꓠꓯ ꓢꓷꓸ ꓠꓲꓹ ꓙꓳ ꓢꓴ ꓜꓴꓻ ꓔꓯ ꓒꓴ ꓖꓶꓽ ꓢꓲ ꓠꓬꓲ꓾ ꓢꓲꓽ ꓫꓬ ꓟ ꓟꓹ ꓟ ꓟ-ꓡꓲ-ꓬ ꓠꓬ ꓝꓴꓲꓸ ꓟꓽ ꓙꓳ ꓙꓳ ꓖꓳꓽ ꓓꓱ ꓠꓬꓲꓽ ꓔꓱꓹ ꓐꓲ ꓡꓰ ꓟ ꓚꓱꓹ  ꓔꓯ ꓧꓪꓸ ꓟꓰꓹ ꓠꓹ ꓟ ꓙꓵꓽ ꓪ ꓖꓶ ꓗꓷꓳ= ꓙꓲ-ꓢꓴ ꓢꓲꓺ ꓤ ꓐꓴ ꓔꓯ ꓥˍ ꓟꓲ ꓪꓽ ꓘꓴ ꓠꓹ ꓟ ꓐꓯ ꓖꓶˍ ꓡꓳ=

ꓖꓳ ꓗꓸ ꓠꓯꓸ ꓔꓲꓺ ꓒ ꓪ ꓔꓲ ꓡꓰ ꓒꓴ ꓗꓷ ꓟ ꓜꓴꓻ ꓡꓰ ꓐꓳ ꓖꓶˍ ꓟ ꓐꓰ ꓧꓪ ꓔ ꓟ ꓚꓱꓹ ꓮ ꓟꓬꓹ ꓔꓯ AD 1854 ꓘꓳꓼ  12ꓦ 8 ꓠꓬꓲ ꓟꓲ-ꓢ ꓔꓶ ꓖꓶ ꓪꓽ ꓘꓴ ꓙꓵꓹ ꓟꓽ ꓬꓰ ꓢꓰꓽ ꓕꓯ ꓙꓵꓽ ꓪ ꓙꓳˍ ꓟ ꓔꓲꓺ ꓒ ꓓꓽ 200 ꓣꓳ ꓐꓰ ꓘꓴ ꓜꓲꓼ ꓞꓳ ꓗꓪ ꓐꓰ ꓙꓲ-ꓢꓴ ꓢꓲꓺ ꓤ ꓐꓴ ꓮ ꓟꓬꓹ ꓟꓲꓽ ꓕꓯꓽ ꓗꓪ ꓔꓲꓺ ꓒ ꓪ ꓔꓲ ꓡꓰ ꓑꓶ ꓗꓷꓳ= ꓐꓯ ꓑꓶ ꓗꓷ ꓟ ꓚꓱꓹ ꓠꓬ “ꓟꓲ ꓠꓯ ꓡ ꓞꓳ ꓝꓴꓲꓸ ꓮ ꓙꓵꓽ ꓔꓯ ꓣꓴ ꓗꓷ ꓢꓴ ꓚꓬꓴꓸ ꓢꓲꓺ ꓒ ꓬꓰ-ꓢꓴ ꓙꓲ-ꓢꓴ ꓡꓰ ꓬꓰ ꓗꓷ ꓟ ꓙꓲˍ ꓟ ꓟꓬꓱꓽ ꓗꓪ ꓐꓰ ꓬꓲ ꓟꓹ ꓟ ꓟ-ꓡꓲ-ꓬ ꓠꓬ ꓐꓹ ꓐ ꓪꓴ-ꓢ ꓡꓰ ꓖꓶꓽˍ ꓟ ꓣꓱꓽ ꓛꓰꓽ ꓡꓯꓼ ꓫꓴꓻ ꓘꓳ ꓣꓴ ꓟꓶˍ ꓟ ꓥ ꓢꓲ ꓠꓬꓲ꓾ ꓮ ꓠꓱ ꓕꓯ ꓮ-ꓓꓯ ꓐꓰ ꓰ-ꓪ ꓡꓰ ꓬꓰ ꓗꓷ ꓟ ꓝꓴꓲ ꓐꓰ ꓝꓴꓲ ꓟꓽ ꓟ ꓙꓳ ꓢꓴ ꓥ ꓡꓳ ꓐꓰ ꓐꓯ ꓑꓶ ꓗꓷꓳ= ꓕꓱ ꓟ ꓠꓬ ꓙꓲ-ꓢꓴ ꓢꓲꓺ ꓤ ꓐꓴ ꓙꓵꓻ ꓠꓹ ꓟ ꓥ ꓢꓲ ꓘꓴ ꓜꓲꓼ ꓞꓳ ꓗꓪ ꓔꓬ ꓟ ꓙꓲ-ꓢꓴ ꓢꓲꓺ ꓤ ꓐꓴ ꓮ ꓕꓯ ꓥˍ ꓟꓲ ꓙꓵꓻ ꓠ ꓗꓹ ꓡꓳ ꓐꓰ ꓐꓯ ꓔ ꓡꓳ=

ꓢꓲꓽ ꓫꓬ ꓟ ꓟꓹ ꓟ ꓟ-ꓡꓲ-ꓬ ꓠꓬ ꓝꓴꓲ ꓟꓽ ꓙꓳ ꓙꓳ ꓖꓳꓽ ꓓꓱ ꓠꓬꓲꓽ ꓔꓱꓹ ꓐꓲˍ ꓟ ꓚꓱꓹ ꓔꓯ ꓟꓽ ꓐꓯ ꓗꓷ ꓢꓰꓽ ꓟ ꓧꓶꓸ ꓕꓯ 10 ꓘꓳꓼ ꓕꓯ ꓡꓰ ꓡ-ꓢ-ꓡꓯꓸ ꓪ-ꓚꓲ ꓗꓪ ꓤ ꓠꓱ ꓤ ꓠꓬꓲꓽ ꓣꓳ ꓔꓯ ꓟꓲ ꓠꓯ ꓡ ꓞꓳ ꓐꓴ ꓝꓴꓲ ꓪꓴꓸ ꓠꓬꓲ ꓠꓲꓹ ꓟ ꓫꓸ ꓢꓲ ꓠꓬꓲ꓾ ꓥꓴꓻ ꓔꓬ ꓟ ꓔꓯ ꓟꓹ ꓟ ꓟ-ꓡꓲ-ꓬ ꓠꓬ ꓤ ꓠꓱ ꓤ ꓐꓴ ꓔꓯ ꓟꓳꓸ ꓖꓶˍ ꓡꓳ= ꓤ ꓠꓱ ꓤ ꓐꓴ ꓔꓯ ꓪꓽ ꓘꓴ ꓠꓹ ꓟ ꓟꓸ ꓖꓶˍ ꓟ ꓥ ꓡꓳ=  AD 1854 ꓘꓳꓼ 12ꓦ ꓟ 8 ꓠꓬꓲ ꓕꓯ ꓔꓲꓺ ꓒ ꓪ ꓔꓲ ꓡꓰ ꓢꓲꓽ ꓫꓬ ꓟ ꓟꓹ ꓟ ꓟ-ꓡꓲ-ꓬ ꓠꓬ ꓝꓴꓲ ꓟꓽ ꓙꓳ ꓙꓳ ꓖꓳꓽ ꓓꓱ ꓠꓬꓲꓽ ꓔꓱꓹ ꓒꓬꓱꓼ ꓡꓺꓳ꓾ ꓐꓰ ꓐꓯ ꓑꓶ ꓗꓷ ꓗꓸ ꓠꓯꓸ 1858 ꓘꓳꓼ 1 ꓦ ꓟ 11 ꓠꓬꓲ ꓕꓯ French ꓗꓴꓷꓼ Lourdes ꓡꓳ ꓒꓱ ꓗꓪ Bernadette Sombrous ꓟꓬꓱꓺ ꓔ ꓟ ꓤ ꓟꓶ ꓤ ꓔꓯ ꓟꓳꓸ ꓖꓶ ꓗꓷꓳ= ꓬꓲ ꓔꓯ ꓮ ꓟꓬꓹ ꓧꓪꓹ ꓟꓳꓸ ꓖꓶ ꓗꓷ ꓟ ꓥꓳ=

ꓟꓹ ꓟ ꓟ-ꓡꓲ-ꓬ ꓠꓬ ꓤ ꓟꓶ ꓤ ꓔꓯ ꓮ ꓕꓯ ꓥ ꓟꓲ ꓪꓽ ꓘꓴ ꓠꓹ ꓟ꓾ ꓣꓳ-ꓢ-ꓣꓲ ꓪꓽ ꓘꓴ ꓠꓹ ꓟ ꓐꓰ ꓝꓴꓲꓸ ꓔꓯ ꓓꓵꓽ ꓙ ꓢꓲ ꓠꓬꓲ꓾ ꓜ ꓝꓲꓸ ꓝꓲꓸ ꓠꓹ ꓟ ꓟꓸ ꓖꓶ ꓗꓷꓳ= Bernadette ꓡꓰ ꓭ ꓛꓲ ꓗꓪ ꓬꓲ ꓡꓯꓽ ꓒꓯꓹ ꓡꓰ ꓚꓴꓸ ꓗꓷ ꓕꓯ ꓬꓲꓻ ꓙꓬ ꓓꓳ ꓡ ꓡꓳ= ꓬꓲꓻ ꓙꓬ ꓔꓯ ꓠꓻ ꓔꓬ ꓢꓴ ꓐꓴ ꓓꓳ ꓗꓷ ꓕꓯ ꓓꓻ ꓡꓰ ꓟ ꓮꓽ ꓟꓬꓹ ꓙꓳ ꓗꓷꓳ= AD 1858 ꓘꓳꓼ 5ꓦ ꓕꓯ ꓙꓲꓻ ꓫꓬ ꓢꓴ Bernadette ꓔꓯ ꓟꓳꓸ ꓖꓶˍ ꓕꓯ ꓢꓲꓽ ꓫꓬ ꓟ ꓟꓹ ꓟ ꓟ-ꓡꓲ-ꓬ ꓡꓰ ꓫꓸ ꓕꓱˍ ꓟ ꓠꓬ “ꓥꓪ ꓠꓬ ꓝꓴꓲꓸ ꓟꓽ ꓙꓳ ꓙꓳ ꓖꓳꓽ ꓓꓱ ꓠꓬꓲꓽ ꓔꓱꓹ ꓒꓬꓱꓼ ꓡ ꓟ ꓢꓲꓺ ꓒ ꓬꓰ-ꓢꓴ ꓬꓲ ꓟꓹ ꓟ ꓥ ꓡꓳ” ꓐꓰ ꓐꓯ ꓟꓸ ꓖꓶ ꓗꓷꓳ=