ꓘꓴ ꓜꓲꓼ ꓞꓳ ꓟꓸ ꓟꓲ꓾ ꓡꓳ ꓓꓰ ꓕꓯꓽ ꓢꓲ ꓗꓪ ꓔꓶ ꓔ ꓟ ꓘꓴ ꓜꓲꓼ ꓞꓳ

ꓟ-ꓕꓲ 16ꓽ18-19 ꓗꓪ ꓟ ꓟꓸ ꓟꓲ ꓬꓰ-ꓢꓴ ꓬꓲꓸ ꓚꓲꓸ ꓛꓬ ꓔꓶ ꓔ ꓟ ꓘꓴ ꓜꓲꓼ ꓞꓳ ꓟꓸ ꓟꓲ ꓥꓳ= ꓮ ꓟꓶ ꓟꓲ ꓠꓯ ꓗꓪ ꓣꓳꓽ ꓮ ꓙꓵꓽ ꓢꓴ ꓢꓷ_ ꓟ ꓕꓲꓼ ꓡꓰꓹ ꓘꓴ ꓜꓲꓼ ꓞꓳ ꓠꓬ ꓵ ꓖꓴ ꓟꓽ ꓓ ꓙꓳ ꓡˍ ꓡꓳ= ꓬꓰ-ꓢꓴ ꓠꓬ ꓘꓴ ꓜꓲꓼ ꓞꓳ ꓕꓱ ꓟꓬ ꓟ ꓔꓶ ꓔꓸ ꓟꓸ ꓢꓲꓽ ꓫꓬ ꓕꓳ ꓶ ꓗꓪ ꓫꓬꓽ ꓫꓬꓽ ꓡꓳꓸ ꓓꓳ ꓡꓹ ꓡꓳ= ꓕꓯꓽ ꓢꓲ ꓗꓪ ꓟ-ꓕꓲ ꓕꓳ-ꓶ 16ꓽ18-19 ꓝꓲꓸ ꓔꓯ ꓮ ꓟ ꓥ ꓟꓲ ꓵ ꓠꓬꓲˍ ꓡꓳ= ꓖꓳ ꓡꓱ ꓥ ꓟꓲ ꓘꓳꓹ ꓣꓴ ꓟꓽ ꓐ ꓡ=

ꓬꓰ-ꓢꓴ ꓠꓬ ꓢꓲ-ꓟꓴ ꓕꓯꓽ ꓢꓲ ꓗꓪ ꓔꓶ ꓔꓸ ꓟ ꓘꓴ ꓜꓲꓼ ꓞꓳ ꓠꓬ ꓬꓲꓸ ꓠꓯꓸˍ ꓟ ꓚꓵ ꓘꓶꓽ ꓥ ꓡꓳ= ꓠꓴ ꓠꓽ ꓒꓲ-ꓕꓱ ꓥꓳ= ꓡꓳ ꓓꓰ ꓕꓱ ꓟ ꓕꓯꓽ ꓢꓲ ꓗꓪ ꓥꓪ ꓘꓴ ꓜꓲꓼ ꓞꓳ ꓥꓪ ꓔꓶ ꓔ ꓬꓰˍ ꓥꓳ= ꓫꓵꓻ ꓓꓴꓽ ꓬꓲꓸ ꓪꓽ ꓠꓬꓲꓹ ꓟ ꓡꓰ ꓥꓪ ꓘꓴ ꓜꓲꓼ ꓞꓳ ꓔꓯ ꓧꓪꓸ ꓡꓰ ꓟꓽ ꓘꓴ= ꓥꓪ ꓠꓬ ꓟꓴ ꓗꓪ ꓗꓴꓷꓼ ꓜꓳ ꓜꓴ (ꓢꓳ-ꓕꓴꓽ ꓒꓲꓹ ꓓꓴ) ꓠꓴ ꓔꓯ ꓖꓶˍ ꓥꓳ= ꓟꓲ ꓠꓯ ꓗꓪ ꓠꓴ ꓡꓰ ꓞꓳꓹ ꓔ ꓟ ꓮ ꓫꓵꓽ ꓥ ꓟꓲ ꓟꓴ ꓗꓪ ꓗꓴꓷꓼ ꓗꓪˍ ꓟꓲ ꓞꓳꓹ ꓔ ꓥꓳ= ꓟꓲ ꓠꓯ ꓗꓪ ꓠꓴ ꓡꓰ ꓩꓴ ꓗꓷ ꓟ ꓮꓸ ꓫꓵꓽ ꓥ ꓟꓲ ꓟꓴ ꓗꓪ ꓗꓪ ꓟꓲ ꓩꓴ ꓗꓷˍ ꓥꓳ= ꓟꓸ ꓟꓲ ꓝꓲꓸ ꓕꓱ ꓟ ꓬꓰ-ꓢꓴ ꓬꓲꓹ ꓚꓲꓸ ꓛꓬꓽ ꓐꓯ ꓔ ꓟ ꓥ ꓡꓳ=

ꓢꓲ-ꓟꓴ ꓔꓯꓸ ꓠꓴ ꓠꓽ ꓒꓲ-ꓕꓱ ꓥ ꓡꓳ= ꓡꓳ-ꓓꓰ ꓕꓱ ꓟ ꓕꓯꓽ ꓢꓲ ꓥꓪ ꓘꓴ ꓜꓲꓼ ꓞꓳ ꓔꓶ ꓔ ꓥꓳ= ꓥ ꓡꓳ= ꓡꓳ ꓓꓰ ꓠꓬ ꓮ ꓟꓬ ꓘꓳꓼ ꓡꓳꓼˍ ꓥ ꓟꓲ ꓐꓬ ꓡꓰ ꓛꓵꓽ ꓡꓰ ꓟꓽ ꓠ ꓟˍ ꓡꓰ ꓐꓰ ꓬꓰ-ꓢꓴ ꓔꓶ ꓔ ꓟ ꓘꓴ ꓜꓲꓽ ꓞꓳ ꓠꓬ ꓐꓬ ꓡꓰ ꓟꓽ ꓓ= ꓫꓵꓻ ꓓꓴ ꓬꓲ ꓪꓽ ꓠꓬꓲˍ ꓟ ꓡꓰ ꓘꓴ ꓜꓲꓼ ꓞꓳ ꓔꓯ ꓧꓪꓸ ꓡꓰ ꓟꓽ ꓓ= ꓮ ꓠꓱ ꓬꓲ ꓪꓴꓸ ꓟ ꓦꓬꓼ ꓠꓬꓲ ꓗꓪ ꓘꓴ ꓜꓲꓼ ꓞꓳ ꓔꓯ ꓟꓶꓽ ꓡꓰ ꓠꓹ ꓟ ꓓꓶꓽ ꓡꓯ ꓘꓳˍ ꓟ 100 ꓘꓳꓼ ꓔꓳꓹ ꓜꓳꓽˍ ꓥ ꓟꓲ꓾ ꓢꓰꓼ ꓡꓯ ꓘꓳ ꓥ ꓟꓲ ꓘꓴ ꓜꓲꓼ ꓞꓳ ꓔꓯ ꓧꓪꓸ ꓡꓰ ꓟ ꓘꓴ=

ꓜꓳ ꓜꓴ ꓢꓳ-ꓕꓴꓽ ꓒꓲꓹ ꓓꓴ꓾ ꓐꓰ ꓩꓴ ꓗꓷ ꓠꓹ ꓟ ꓐꓰ ꓞꓳ ꓔ ꓠꓹ ꓟ ꓕꓵꓽ ꓪꓽ-ꓸ ꓦꓲ ꓘꓴꓽ ꓕꓲꓽ ꓟ ꓗꓪ ꓪꓴꓽ ꓓꓰ ꓡꓰ ꓢꓴ ꓠꓽ ꓢꓳ-ꓕꓴꓽ ꓒꓲꓹ ꓓꓴ ꓔꓯꓹ ꓔ ꓢꓴ ꓥ ꓟ ꓡꓰ ꓐꓰ ꓪꓴ-ꓢ ꓬꓲ ꓗꓴꓷꓼ ꓗꓪ ꓓꓵꓽ ꓙꓰ ꓓꓹ ꓟ ꓙꓵꓼ ꓪꓽ ꓔꓯꓹ ꓔ ꓢꓴ ꓙꓳ ꓢꓴ ꓠꓬ ꓬꓰ-ꓢꓴ ꓬꓲ ꓚꓲꓸ ꓛꓬꓽ ꓔꓶ ꓔ ꓟ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓙꓳˍ ꓟ ꓟꓸ ꓟꓲ ꓝꓲꓸ ꓕꓱ ꓟ ꓗꓪ ꓫꓬꓽ ꓫꓬꓽ ꓡꓰ ꓖꓴ ꓔ ꓡꓳ= ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓙꓰ ꓓꓹ ꓟ ꓙꓵꓽ ꓪ ꓙꓳ_ ꓟ ꓗ ꓘꓶꓽ ꓖꓳ ꓕꓲꓽ ꓒꓲꓼ ꓗꓪ ꓐꓰ ꓟꓴ ꓗꓪ ꓗꓪ ꓓꓵꓽ ꓙꓰ ꓡꓯ=