ꓘꓴ ꓜꓲꓼ ꓞꓳ ꓬꓲ. ꓫꓵꓻ ꓚꓱ, (Church history)

Tuesday, April 11, 2023

ꓘꓴ ꓜꓲꓼ ꓞꓳ ꓬꓲ. ꓫꓵꓺ ꓚꓱ, (Church history)

ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓝꓲ ꓓꓴ ꓐꓴ ꓔꓯ ꓝꓲ ꓓꓴ ꓒꓲ‐ꓕꓱ ꓔꓯ ꓧꓳꓽ ꓪꓴ. ꓟꓴ ꓝꓲ ꓢꓲ ꓠꓬꓲ ꓝꓮꓲ ꓬꓲ. ꓡꓰ ꓔꓶ ꓔ ꓟ ꓘꓴ ꓜꓲꓼ ꓞꓳ ꓔꓯ ꓥ ꓟꓲ ꓝꓲ ꓓꓴ ꓒꓲ‐ꓕꓱ ꓔꓯ ꓙꓵꓽ ꓝꓲ ꓟ ꓥ ꓡꓳ꓿ ꓝꓲ ꓓꓴ ꓒꓲ‐ꓕꓱ ꓬꓲ. ꓛꓲ ꓙꓵꓽ ꓪ ꓘꓳ ꓣꓴ ꓟꓶ ꓡꓰ ꓢꓴ ꓠꓬ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓢꓴ ꓥ ꓢꓲ ꓠꓬꓲ ꓔꓲꓺ ꓒ ꓓꓽ ꓐꓴ ꓔꓯ ꓗꓳ ꓡꓳ ꓗꓪ ꓐꓰ ꓪꓴꓽ ꓡꓳꓻ ꓬꓰ ꓢꓴ ꓥ ꓡꓳ꓿

ꓙꓲ‐ꓢꓴ ꓢꓲꓺ ꓤ ꓐꓴ ꓔꓬ ꓟ ꓟꓵꓽ ꓗꓪ ꓝꓲ ꓓꓴ ꓐꓴ ꓡꓰ ꓮ. ꓣꓳ ꓡꓳ. ꓜꓴꓻ ꓔꓯ ꓡꓳ. ꓠ, ꓟ ꓮ. ꓣꓳ ꓡꓳ. ꓒꓽ ꓔꓯ ꓛ ꓗꓷ ꓟ ꓡꓰ ꓐꓰ ꓔꓲꓺ ꓒ ꓓꓽ ꓐꓴ ꓔꓯ ꓙꓲ‐ꓢꓴ ꓢꓲꓺ ꓤ ꓐꓴ ꓔꓬ ꓟ ꓟꓵꓽ ꓗꓪ ꓔꓬ ꓝꓲ ꓟ ꓥ ꓡꓳ꓿ ꓔꓲꓺ ꓒ ꓓꓽ ꓔꓯ ꓬꓰ ꓙ ꓔꓳ, ꓙ ꓠ, ꓟ ꓔꓲꓺ ꓒ ꓓꓽ ꓠꓬ ꓔꓲꓺ ꓒ ꓐꓴ ꓐꓰ Deacon ꓐꓴ ꓔꓯ ꓙꓵꓽ ꓪ ꓖꓶ ꓟ ꓥ ꓡꓳ꓿

ꓣꓳ‐ꓟ ꓡꓳ ꓒꓱ ꓓꓽ ꓗꓪ ꓪꓴ‐ꓢ ꓟꓬꓱꓽ ꓟꓯ ꓔꓬ ꓟ ꓔꓲꓺ ꓒ ꓓꓽ ꓐꓴ ꓠꓬ ꓡꓳ ꓒꓱ ꓤ ꓗꓪ ꓪꓴ‐ꓢ ꓟꓬꓱꓽ ꓟꓯ ꓔꓬ ꓢꓴ ꓔꓲꓺ ꓒ ꓓꓽ ꓐꓴ ꓔꓯ ꓬꓰ ꓙ ꓔꓳ, ꓙ ꓠ, ꓟ ꓙꓵꓽ ꓪ ꓙꓳ ꓟ ꓥ ꓡꓳ꓿ꓬꓲ‐ꓩ‐ꓢꓳ ꓡꓳ ꓒꓱ ꓗꓪ ꓪꓴ‐ꓢ ꓟꓬꓱꓽ ꓟꓯ ꓔꓬ ꓟ ꓔꓲꓺ ꓒ ꓓꓽ ꓐꓴ ꓠꓬ ꓮ‐ꓫ ꓟ‐ꓠ ꓟꓵꓽ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓧꓳꓽ ꓣꓴ ꓠ, ꓟ ꓙꓵꓽ ꓪ ꓙꓳˍ ꓡꓳ꓿

Antioch ꓔꓲꓺ ꓒ ꓓꓽ ꓐꓴ ꓠꓬ Syria ꓗꓴꓷꓼ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓧꓳꓽ ꓪꓴ. ꓟꓴ ꓔꓬ ꓢꓴ ꓐꓴ ꓥ ꓡꓳ꓿ ꓝꓮꓲ Caesarea ꓟꓵꓽ ꓗꓪ ꓔꓬ ꓟ ꓔꓲꓺ ꓒ ꓓꓽ ꓐꓴ ꓠꓬ Palestine ꓟꓵꓽ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓥ ꓡꓳ꓿

Alexandria ꓡꓳ ꓒꓱ ꓗꓪ ꓔꓬ ꓟ ꓔꓲꓺ ꓒ ꓓꓽ ꓐꓴ ꓠꓬ Egypt ꓗꓴꓷꓼ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓧꓳꓽ ꓪꓴ. ꓟꓴ ꓔꓬ ꓢꓴ ꓐꓴ ꓥ ꓡꓳ꓿ Carthage ꓡꓳ ꓒꓱ ꓗꓪ ꓔꓬ ꓟ ꓔꓲꓺ ꓒ ꓓꓽ ꓐꓴ ꓠꓬ Africa ꓟꓵꓽ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓧꓳꓽ ꓪꓴ. ꓟꓴ ꓔꓬ ꓢꓴ ꓐꓴ ꓥ ꓡꓳ꓿

ꓝꓮꓲ ꓔꓲꓺ ꓒ ꓓꓽ ꓐꓴ ꓜꓲꓼ ꓡꓯ ꓘꓳ, ꓢꓲ ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓧꓳꓽ ꓣꓱ ꓔꓬ ꓟ ꓙꓵ, ꓕꓯ ꓔꓳ, ꓜꓳ ꓡ ꓟ ꓫꓵꓽ ꓪꓴꓽ ꓔꓯ ꓮ ꓡꓰ ꓐꓰ ꓫꓬ, ꓠ, ꓟ ꓖꓪꓽ ꓙꓱ ꓡꓯ ꓘꓳ, ꓢꓲ ꓪꓴ‐ꓢ ꓟꓬꓱꓽ ꓬꓰ ꓟ ꓥ ꓡꓳ꓿ ꓕꓱ ꓔꓲꓺ ꓒ ꓓꓽ ꓐꓴ ꓖꓪꓽ ꓙꓱ ꓡꓯ ꓘꓳ, ꓟ ꓔꓯ ꓠꓬ Provincial Council ꓐꓰ ꓘꓴˍ ꓟ ꓥ ꓡꓳ꓿

ꓣꓳ‐ꓟ ꓡꓳ ꓒꓱ ꓗꓪ ꓔꓬ ꓟ ꓔꓲꓺ ꓒ ꓓꓽ ꓠꓬ ꓟꓵꓽ ꓗꓳ ꓓꓵ ꓓꓵ ꓗꓪ ꓔꓬ ꓟ ꓔꓲꓺ ꓒ ꓓꓽ ꓐꓴ ꓐꓰ ꓔꓲꓺ ꓒ ꓐꓴ Deacon ꓐꓴ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓧꓳꓽ ꓪꓴ. ꓟꓴ ꓢꓴ ꓥ ꓡꓳ꓿ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓮ ꓟꓬ, ꓛꓲ ꓪꓴꓽ ꓟ ꓫꓵꓽ ꓪꓴꓽ ꓙꓳ ꓡ ꓕꓯ ꓣꓳ‐ꓟ ꓡꓳ ꓒꓱ ꓗꓪ ꓐꓰ ꓔꓲꓺ ꓒ ꓓꓽ ꓡꓰ ꓫꓵꓻ ꓪꓴꓽ ꓫꓬ, ꓖꓶ ꓡ ꓟ ꓥ ꓡꓳ꓿